کوپن ہیگن (شِنہوا) یورپی یونین (ای یو) کے ماحولیاتی ادارے نے اپنی ایک رپورٹ میں خبردار کیا ہے کہ فضائی آلودگی اس وقت یورپ میں ماحولیاتی صحت کے خطرے کی اہم ترین وجہ ہے۔

یورپی ماحولیاتی ادارے (ای ای اے) کی نومبر کے اختتام پر جاری رپورٹ کے مطابق 2021 میں فضائی آلودگی کی شرح عالمی ادارہ صحت (ڈبلیو ایچ او) کی تجویز کردہ سطح سے کہیں زیادہ رہی ہے۔

رپورٹ میں مزید بتایا گیا کہ فضائی آلودگی کو ان رہنما اصول کی سطح تک کم کرنے سے یورپی یونین کے رکن ممالک میں بڑی تعداد میں اموات کو کم کیا جاسکتا ہے۔

رپورٹ کے مطابق 2021 میں یورپی یونین میں 3 لاکھ 20 ہزار سے زائد اموات 3 اہم فضائی آلودگیوں ، باریک ذرات، اوزون اور نائٹروجن ڈائی آکسائیڈ کے سبب ہوئی تھیں۔

رپورٹ میں کہا گیا ہے کہ اگر باریک ذرات (پی ایم 2.5 ) کی سطح عالمی ادارہ صحت کی سفارشات پر پورا اترتی تو یورپی یونین میں 2 لاکھ 53 ہزار اموات کو ٹالا جاسکتا تھا۔

اس کے علاوہ نائٹروجن ڈائی آکسائیڈ (این او 2) آلودگی سے 52 ہزار جبکہ قلیل مدتی اوزون (او 3) سے 22 ہزار اموات ہوئیں۔

رپورٹ کے مطابق یورپی یونین سے باہر یورپی ممالک کو شامل کیا جائے تو یورپ بھر میں آلودگی سے اموات کی تعداد  3 لاکھ 89 ہزار تک پہنچ چکی ہے۔

یورپی ماحولیاتی ادارے کے مطابق صحت پر مرتب اثرات کے نئے اندازوں کے مطابق فضائی آلودگی سے پھیپھڑوں کا سرطان ، امراض قلب ، دمہ اور ذیابیطس جیسی بیماریوں میں اضافہ ہوتا ہے۔

موغادیشو(شِنہوا)صومالی نیشنل آرمی (ایس این اے) اور علاقائی جوبالینڈ ریاستی فورسز نے جنوبی صومالیہ میں زیریں جوبہ علاقے کے علاقے ابودین میں ایک آپریشن کرنے کے بعد الشباب کے 70 سے زائد عسکریت پسندوں کو ہلاک کر دیا۔

مقامی جوبالینڈ سرکاری ٹی وی کے مطابق ایس این اے اور جوبا لینڈ ریاستی فورسز اور دہشت گردوں کے خلاف جنگ میں فوج کی مدد کرنے والے بین الاقوامی شراکت داروں کی مشترکہ کارروائی میں الشباب کے 70 سے زیادہ جنگجو اور کمانڈر مارے گئے۔

دہشت گردوں کے خلاف یہ تازہ ترین حملہ ،الشباب کے عسکریت پسندوں کی جانب سے جمعرات کو ریاست جوبالنڈ کے انتظامی دارالحکومت کسمایو کے مغرب میں ایس این اے کی ایلیٹ فورسز کے 33 ڈاناب فورسزاہلکاروں کو ہلاک کرنے کے دعویٰ کے بعد کیا گیا ہے۔

بیجنگ(شِنہوا)چین کے قومی صحت کمیشن نے قبل از پیدائش اسکریننگ و تشخیص کی خدمات کے معیار کی نگرانی اور انتظام کو بڑھانے کے لیے اس حوالے سے معیارات کا ایک سیٹ جاری کیا ہے۔

 یہ معیارات پیدائشی نقائص کو روکنے ، ان کا علاج کرنے سمیت چین میں قبل از پیدائش اور بعد از پیدائش کی دیکھ بھال کی خدمات کو بہتر بنانے کی کوشش ہیں۔

کمیشن نے ان طبی اداروں کی وضاحت کی جو کوالٹی مینجمنٹ کی پہلی بنیادی ذمہ داری کے طور پر قبل از پیدائش اسکریننگ اور تشخیص کرتے ہیں۔

کمیشن کے مطابق طبی اداروں کو متعلقہ قوانین اور ضوابط، تکنیک کے معیارات اور تقاضوں پر عمل کرنا چاہیے، اس طرح کی خدمات فراہم کرنے کے پورے عمل کے دوران کوالٹی مینجمنٹ کے معیارات کو مکمل طور پر لاگو کرنا چاہیے اور معیار کو مسلسل بہتر بنانے کے لیے کمزوریوں کو دور کرنا چاہیے۔

ہانگ ژو (شِنہوا) چین میں ایک تحقیقی ٹیم نے پروپیلین اور پروپین کو الگ کرنے کے لیے ایک نیا مالیکیولر فلٹر مواد تیار کرلیا ہے۔

ژی جیانگ یونیورسٹی کے مطابق پروپیلین وہ خام مال ہے جو کیمیائی مصنوعات جیسے پلاسٹک، گھریلو آلات، طبی سازوسامان ، مصنوعی ریشے اور کاسمیٹکس میں پایا جاتا ہےتاہم صنعتی پیداوار کے دوران پروپیلین کو پروپین سے الگ کرنا ایک دشوارگزار کام ہے۔

تحقیقی ٹیم کے سربراہ اور ژی جیانگ یونیورسٹی کے شینگ ہوا بن نے بتایا کہ مالیکیولر فلٹرصرف چھوٹے مالیکیولز کو داخل ہونے کی اجازت دیتا ہے اور بڑے مالیکیولزکو روک دیتا ہے۔

تحقیقی ٹیم نے ایک تیز، مؤثر اور کم کاربن مالیکیولر فلٹر مواد زیڈ یو-609 تیارکیا ہے جو صرف پروپیلین مالیکیولز کو داخل ہونے کی اجازت دیتا ہے اور پروپین مالیکیولز کو بلاک کرتا ہے۔

شینگ نے توقع ظاہر کی ہے کہ پروپلین الگ کرنے کی ٹیکنالوجی سے توانائی کی کھپت میں نمایاں کمی آئے گی اور انتہائی اعلیٰ خالص الیکٹرانک کیمیکلز کو مقامی طور پر تیار کرنے میں مدد ملے گی۔

یہ تحقیق جرنل سائنس میں حال ہی میں شائع ہوئی ہے۔

بیجنگ (شِنہوا) فلپائن کے بعض سیاست دان چین مخالف جذبات کو ہوا دے کر اسے بحیرہ جنوبی چین کے معاملے سےجوڑنے کی کوشش کررہے ہیں جو فلپائنی عوام کے مفادات کے خلاف ہے۔

شِنہوا کے ساتھ ایک انٹرویو میں چائنہ انسٹی ٹیوٹ آف کنٹینپرری انٹرنیشنل ریلیشنز کے انسٹی ٹیوٹ آف میری ٹائم اسٹریٹیجی اسٹڈیز کے ڈپٹی ڈائریکٹر یانگ شیاؤ نے کہا کہ  فلپائنی سیاست دانوں کا یہ اقدام دراصل ان کے اپنے سیاسی مفادات کو پورا کرتا ہے اور یہ سب فلپائنی عوام کی فلاح و بہبود کی قیمت پر ہے۔

انہوں نے کہا کہ فلپائن کے سیاست دانوں کی دانستہ کشیدگی اور تخریبی اقدامات سے خطے میں امن، ترقی، استحکام، پائیداری اور خوشحالی خطرے میں پڑرہی ہے۔

انہوں نے مزید کہا کہ ان کے اقدامات نے علاقائی امن و استحکام کو نقصان پہنچاکر علاقائی ترقی میں رکاوٹ پیدا کی ہے۔

انہوں نے کہا کہ ماہی گیری، تیل و گیس کی پیداوار میں تعاون سے مقامی افراد فائدہ اٹھا سکتے تھےتاہم بحیرہ جنوبی چین میں بڑھتی کشیدگی طویل مدت میں علاقائی خوشحالی کے حصول میں نقصان دہ ثابت ہوگی۔

یانگ نے کہا کہ علاقائی سلامتی کی صورتحال نسبتا مستحکم رہی ہے تاہم فلپائن کے حالیہ اقدامات نے اسے سبوتاژ کردیا ہے۔

انہوں نے کہا کہ فلپائن کا ارادہ واضح ہے کہ وہ رین آئی جیاؤ پر مستقل فوجی تنصیبات تعمیر کرنا چاہتا ہے یہ اقدام علاقائی صورتحال کو متاثر کرے گا جس سے بحیرہ جنوبی چین میں فوجی کشیدگی میں اضافہ ہوگا۔

تیانجن(شِنہوا) چین کے شمالی بندرگاہی شہر تیانجن  میں2023 کے پہلے 11 مہینوں کے دوران کل سرحد پار ای کامرس کی غیر ملکی تجارت کا حجم تقریباً 11 ارب 40 کروڑ یوآن (تقریباً 1 ارب 60 کروڑ  ڈالر)  ریکارڈ کیا گیا۔

 میونسپل بیورو آف کامرس نے کہا کہ اس مدت کے دوران 3 ارب 80 کروڑ یوآن سے زیادہ کی درآمدات اور7 ارب 60 کروڑ یوآن سے زیادہ برآمدات کا اعلان شہر کے سرکاری سرحد پار ای کامرس جامع سروس پلیٹ فارم کے ذریعے کیا گیا۔

اس شہر کا مقصد چین (تیانجن) سرحد پار ای کامرس کے جامع پائلٹ زون کی تعمیر کو پالیسی اور موڈ جدت کے ذریعے مزید فروغ دینا اور روایتی صنعتوں اور مینوفیکچرنگ کمپنیوں میں مزید غیر ملکی تجارتی اداروں کی مدد کرنا ہے تاکہ ان کی تنظیم نو اوراپ گریڈنگ کو تیز کیا جا سکے اور سرحد پار ای کامرس تجارت کے ذریعے اپنی منڈیوں کو وسعت دی جا سکے۔

شنگھائی(شِنہوا)چین کا پہلا مقامی طور پر بنایا گیا بڑا کروز بحری جہاز "اڈورا میجک سٹی" اتوار کو شنگھائی کی ایک بندرگاہ سے اپنے آزمائشی سفر کا آغاز کرتے ہوئے روانہ ہوا۔

دنیا بھر سے مدعو مہمانوں اور عملے کے تقریباً 13 سو ارکان کو لے کر یہ  بحری جہاز اتوار کو بعد ازدوپہر  شنگھائی ووسونگ کو انٹرنیشنل کروز ٹرمینل سے روانہ ہوا اور توقع ہے کہ یہ پیر کو ٹرمینل پر واپس آئے گا۔

اس سفرکے بعد ایک اور آزمائشی سفر یکم جنوری 2024 کو شمال مشرقی ایشیا کے تجارتی سفر کے لیے طے کیا گیا ہے۔

بحری جہاز بنانی والی  سی ایس ایس سی شنگھائی ویگاو چھیاو شپ بلڈنگ کمپنی لمیٹڈ کے مطابق اڈورا میجک سٹی  کی لمبائی 323.6 میٹر ہے جس کا مجموعی وزن 1 لاکھ 35 ہزار 500ٹن ہے اور یہ مجموعی طور پر2 ہزار 125مہمان خانوں میں 5 ہزار 246 مسافروں کی گنجائش کا حامل  ہے۔

یہ کروز بحری جہاز 16 منزلوں پر مشتمل ہےجس میں لوگوں کے لیے مجموعی طور پر 40 ہزار مربع میٹرپر محیط رہائش اور تفریحی رقبہ موجود ہے۔

چین، مشرقی شہر شنگھائی میں واقع شنگھائی ووسونگ کو بین الاقوامی کروز ٹرمینل پر لنگر انداز کروز شپ "اڈورا میجک سٹی" پر کھیلوں کی ایک سہولت دیکھی جاسکتی ہے۔ (شِنہوا)

چین، مشرقی شہر شنگھائی میں واقع شنگھائی ووسونگ کو بین الاقوامی کروز ٹرمینل پر لنگر انداز کروز شپ "اڈورا میجک سٹی" کا اندرونی منظر۔ (شِنہوا)

غزہ کی پٹی کے جنوبی شہر خان یونس میں اسرائیلی فضائی حملے کے بعد بچے ملبے میں بچا کچا سامان تلاش کر رہے ہیں۔ (شِنہوا)

روس، سینٹ پیٹرزبرگ میں فادر فراسٹ کا لباس پہنے افراد سجی ہوئی بس کے سامنے موسیقی پیش کر رہے ہیں۔ (شِنہوا)

یوگینڈا، کمپالا میں معذوربچوں کی دیکھ بھال کرنے والی خیراتی تنظیم سپورٹ ڈس ایبلڈ چلڈرن گابا (ایس ڈی سی جی) کی بانی بیٹی نانکبیروا (دائیں) عطیات کی ایک تقریب کے دوران چینی کاروباری ادارے سی آر جے ای (مشرقی افریقہ) لمیٹڈ کی ایگزیکٹو لائی شوئی کو تعریفی سند پیش کر رہی ہیں۔ (شِنہوا)

ژینگ ژو (شِنہوا) چینی ماہرین آثار قدیمہ نے چین کے وسطی صوبے ہی نان کے صدر مقام ژینگ ژو میں واقع ایک شہر کے کھنڈرات میں ملک کا قدیم ترین معروف مقبرہ کمپلیکس دریافت کیا ہے جو شانگ دور (1600-1046 قبل مسیح) سے تعلق رکھتا ہے۔

یہ دریافت 2021 سے 2023 تک کی جانے والی کھدائی کے دوران ہوئی تھی  جسے حال ہی میں صوبہ ہی نان میں آثار قدیمہ کی کامیابیوں پر منعقدہ ایک سالانہ اجلاس میں عوام کے سامنے پیش کیا گیا ہے۔

مقبرہ کمپلیکس تقریباً 3 ہزار 400 برس پرانا ہے جس کی باقیات تقریباً 20 ہزار مربع میٹر پر پھیلی ہوئی ہیں ۔ یہ قبرستان میں اندر اور باہر سرنگوں، قبروں اور قربانی کی باقیات سمیت دیگر اشیاء پر مشتمل ہے۔

قبرستان سے خول کی شکل کےسونے سے بنے "جنازے کا ماسک" ،فیروزی، کانسی اور قیمتی پتھروں کے سامان بھی برآمد ہوئے ہیں۔

ژینگ ژو بلدیاتی ادارہ برائے ثقافتی ورثہ اور آثارقدیمہ کے محقق ہوانگ فوچھنگ کے مطابق یہ قبرستان اب تک دریافت شدہ سب سے قدیم "ژاؤیو" ہے، یہ نام قدیم کلاسیکی کتابوں میں اعلیٰ شخصیات کے مقبروں کے حوالے کے طور پر درج ہے ۔ جو ژاؤیو کی اصلیت کی تلاش اور چین میں مقبرہ نظام کے ارتقاء میں بہت اہمیت رکھتا ہے۔

نئی دہلی(شِنہوا) بھارت کے دارالحکومت نئی دہلی میں فضائی آلودگی میں اضافے کے پیش نظر شہرمیں ایک بار پھر گاڑیوں کی نقل و حرکت اور تعمیراتی سرگرمیوں پر پابندیاں عائد کر دی گئیں ہیں۔

ریاست کے وزیر ماحولیات گوپال رائے نے کہا کہ ملکی دارالحکومت میں ہوا کے معیار کا اشاریہ (اے کیو آئی) "شدید" زمرے میں داخل ہو گیا ہے  جس کے باعث ٹریفک اور تعمیراتی سرگرمیوں کی نقل و حرکت پر پابندیاں لگائی گئی ہیں۔

وفاقی حکومت کے کمیشن برائے ایئر کوالٹی منیجمنٹ (سی اے کیو ایم) نے اے کیو آئی کی بگڑتی ہوئی صورتحال کے باعث دہلی اور نیشنل کیپیٹل ریجن (این سی آر) کے گردو ونواح میں غیر ضروری تعمیراتی کام  سمیت بی ایس-تھری پٹرول اور بی ایس -فور ڈیزل  پر چلنے والی گاڑیوں پر پابندی لگانے کا حکم دیا۔

لان ژو (شِنہوا) چین کے وزیر اعظم لی چھیانگ نے چین کے شمال مغربی علاقے میں زلزلہ زدہ علاقوں کا دورہ کیا اور متاثرہ افراد کا معیار زندگی بہتر بنانے کے لئے تمام ممکنہ ذرائع استعمال کرنے اور سردیوں میں ان کی زندگی محفوظ بنانے کی ہدایت کی۔

کمیونسٹ پارٹی آف چائنہ کی مرکزی کمیٹی کے سیاسی بیورو کی قائمہ کمیٹی کے رکن لی چھیانگ نےصوبہ گانسو کی کاؤنٹی جی شی شان  اور ہمسایہ صوبے چھنگ ہائی کی کاؤنٹی من ہی کے متعدد دیہات کا دورہ کیا۔پیر کی شب 11 بجکر 59 منٹ پر ایک شدید نوعیت کا زلزلہ آیا تھا جس کی شدت 6.2 ریکارڈ کی گئی تھی۔ زلزلے میں 148 افراد ہلاک اور 781 زخمی ہوئے  جبکہ متعدد عمارتیں منہدم ہو گئی تھیں۔

دورے میں وزیراعظم نے اس آفت سے متاثرہ افراد سے گفتگو کی اور ان کی دوبارہ آباد کاری ، امدادی سامان کی فراہمی اور عارضی رہائش گاہوں کے قیام بارے معلومات حاصل کیں۔

انہوں نے کہا کہ موجودہ امدادی سرگرمیوں میں اولین ترجیح اس بات کو یقینی بنانا ہے کہ متاثرہ افراد سردیوں میں گرم اور محفوظ رہیں۔

انہوں نے امدادی کارکنوں پر زور دیا کہ بستیوں میں متاثرین کو امدادی سامان اور روزمرہ کی ضروریات کی اشیا پہچانے میں تیزی سے کام کریں اور خیموں میں رہائش پذیر افراد کے لئے جلد از جلد عارضی مکانات تعمیر کریں۔

لی نے کہا کہ اگر ضرورت ہوتو زلزلے زدہ علاقوں میں عمارتوں کی جانچ پڑتال کی جائے اور انہیں مضبوط بنایا جائے تاکہ رہائشی واپس جاسکیں اوراس کے علاوہ اسکول اور اسپتال جیسی ضروری سہولیات کو دوبارہ کھولا جاسکے۔

انہوں نے کہا کہ تعمیر نو کی منصوبہ بندی مربوط انداز میں ہو تاکہ مقامی افراد کا معیارزندگی بہتر بنانے میں مدد مل سکے اور اس آفت سے پیدا شدہ غربت سےبچا جا سکے۔

انہوں نے زخمیوں کو بہترین طبی امداد فراہم کرنے پر زور دیا۔

چینی وزیراعظم نے مقامی حکومتوں کو ہدایت کی کہ وہ قدرتی آفات کےبارے میں امدادی معلومات بروقت جاری کریں اور متاثرہ افراد کے خدشات کا فعال طریقے سے دور کریں۔

دی ہیگ (شِنہوا) یورپی مارکیٹ میں چین کی نئی توانائی گاڑیوں کی مقبولیت میں اضافہ صرف پرکشش قیمت کے سبب نہیں بلکہ چینی کار سازوں نے اس کی صلاحیت اور کارکردگی پر بھی بہت توجہ دی ہے۔

شِںہوا کے ساتھ ایک انٹرویو میں ڈچ ماہر اقتصادیات اور آئی این جی بینک کے سینئر سیکٹر اکانومسٹ ریکو لومان نے کہا کہ یورپ میں 10 فیصد درآمدی ٹیکس کے باوجود چینی الیکٹرک کاریں پرکشش قیمت رکھتی ہیں جس سے وہ صارفین کے لئے ایک زبردست انتخاب بن چکی ہیں۔

انہوں نے کہا کہ سستی ہونے کے علاوہ چینی نئی توانائی گاڑیاں اپنے مختلف قسم کے ماڈلز کی وجہ سے بھی صارفین میں کشش رکھتی ہیں جس کی بڑی مثال بی وائی ڈی اور ایم جی جیسے برانڈز ہیں۔

لومن نے چینی نئی توانائی گاڑیوں کی لاگت کے مؤثر ہونے کا ذکر کرتے ہوئے کہا کہ نہ پرکشش قیمت چینی کاروں کی مقبولیت میں اضافے کی وجہ بنی ہے بلکہ ایک سروے کے مطابق یورپ میں ڈرائیورز کی گاڑیوں کے معیار بارے رائے عمومی طور پر مثبت ہے۔

انہوں نے کہا کہ یہ ماضی کی نسبت مختلف ہے اس وقت معیار سے متعلق خدشات زیادہ نمایاں تھے۔ اس وقت یہ حقیقت ہے کہ نئی توانائی گاڑیوں کی پہلی مارکیٹ چین ہے جہاں وہ اپنی مصنوعات کو بہتر بنانے میں پہلے ہی بہت کام کرچکے ہیں۔

لومان نے دنیا کے معروف کار ساز اداروں میں سے ایک سٹیلانٹس اور چینی نئی توانائی گاڑی فورچونر لیپ موٹر کے درمیان تعاون پر بات کرتے ہوئے کہا کہ اس معاہدے سے دونوں کو فائدہ ہوگا اس وقت چین میں سٹیلانٹس کی نمائندگی نہ ہونے کے برابر ہے اور لیپ موٹر یورپ اور امریکہ میں نظر نہیں آتی ہے۔

انہوں نے شِںہوا کو بتایا کہ یہ معاہدہ سٹیلانٹس کو دنیا کی سب سے بڑی کار اور نئی توانائی گاڑیوں کی مارکیٹ میں داخل ہونے کی آسان سہولت فرہم کرے گا جہاں متوسط طبقے میں اضافے کے ساتھ ساتھ ترقی کی بھی کافی گنجائش موجود ہے۔ اس معاہدے سے شراکت دار ایک دوسرے کا سیلز نیٹ ورکس استعمال کرسکتے ہیں۔

مناگوا(شنہوا) نکاراگوا کے وسطی علاقے ماتاگالپا میں ایک ٹریفک حادثے میں کم سے کم 16 افراد ہلاک اور 26  زخمی ہو گئے۔

نکاراگوا کی نائب صدر روزاریو موریلو نے مقامی ٹیلی ویژن چینل 4 کو بتایا کہ ہلاک ہونے والوں میں کئی بچے بھی شامل ہیں۔

حادثہ گزشتہ صبح اس وقت پیش آیا جب تقریباً 70 مسافروں کو لے جانے والی ایک بس رانچو گرانڈے میونسپلٹی میں مانسیرا ندی کے پل کی باڑ سے ٹکرا گئی۔ جس کے بعد سرکاری حکام، وزارت صحت، نیشنل پولیس اور فائر ڈیپارٹمنٹ کے یونٹ جائے وقوعہ پر بروقت پہنچے اور متاثرین کی امداد میں حصہ لیا۔

ماتاگالپا کے پولیٹیکل سکریٹری پیڈرو حسلم نے کہا کہ "ہم ماتاگالپا شہر میں ہونے والے اس سانحے سے افسردہ ہیں۔"

کمپالا (شِنہوا) یوگنڈا کے ماہرین نے کہا ہے کہ ایشیا کے  بڑے ملک چین کی پائیدار اقتصادی ترقی سے دنیا بالخصوص افریقہ کے لیے مواقع میسر آتے رہیں گے۔

یہ بات چین میں منعقدہ حالیہ سالانہ مرکزی اقتصادی ورک کانفرنس کے اختتام پر یوگنڈا کے ماہرین نے کہی۔

چین کے قومی ادارہ شماریات کے مطابق ملک مستقل بحالی کی کوشش کررہا ہے، تیسری سہ ماہی میں مجموعی مجموعی پیداوار میں گزشتہ برس کی نسبت 4.9 فیصد اور 2023 کی ابتدائی 3 سہ ماہی میں گزشتہ برس کی نسبت 5.2 فیصد اضافہ ہوا ہے۔

یوگنڈا کے اکنامک پالیسی ریسرچ سینٹر کے سینئر محقیق کورٹی پال لاکوما نے کہا کہ عالمی ترقی کی نسبت چین کی اقتصادی ترقی کی شرح متاثر کن ہے۔

بین الاقوامی مالیاتی اداروں کی پیش گوئیوں کے مطابق 2024 کے دوران چین کی شرح نمو عالمی شرح نمو سے زائد ہوگی۔ اس ضمن میں عالمی بینک کا تخمینہ 4.5 فیصد جبکہ عالمی مالیاتی فنڈ کا 4.6 فیصد ہے۔

چین نے ڈیجیٹل معیشت اور ماحول دوست توانائی جیسے نئے شعبوں میں توجہ مرکوز کررکھی ہے جوعالمی سطح خاص کر افریقہ کو مواقع فراہم کرتی ہے۔

ماہرین کی رائے میں چین الیکٹرک گاڑیوں کے سب سے بڑے پیداواری ممالک میں سے ایک ہے۔ اس کے علاوہ چین افریقی ممالک سے حاصل شدہ اہم معدنیات خاص طور پر مائیکروچپ اور الیکٹرک گاڑیوں (ای وی)کی پیداوار کے شعبے میں تیزی سے بڑھتی مارکیٹ ہے۔اس سے افریقہ ۔ چین تجارت خاص کر لیتھیم جیسی معدنیات کو فروغ ملے گا

کینبرا (شِنہوا) آسٹریلوی ماہرین نے ایشیا بحرالکاہل میں پائیدار ترقی اور ڈیجیٹل معیشت کے فروغ میں چین اور ہمسایہ ممالک کے ساتھ ملکر کام کرنے پر زور دیا ہے۔

شِںہوا کے ساتھ انٹرویو میں آسٹریلیا کی اعلیٰ جامعات کے ماہرین نے چین کی دنیا کی معروف ماحول دوست پائیدار ترقی کو سراہتے ہوئے کہا کہ آسٹریلیا اس شعبے میں تعاون سے فائدہ اٹھا سکتا ہے۔

کوئنز لینڈ یونیورسٹی آف ٹیکنالوجی (کیو ٹی) کے معاون پروفیسر واروک پاؤل نے شِںہوا کو بتایا کہ اگلے 20 سال میں ڈیجیٹلائزیشن اور ماحولیاتی استحکام عالمی معیشتوں کی معاشی ترقی کے دو سب سے بڑے محرک ہوں گے اور چین ان دونوں میں سب سے آگے ہے۔

پاؤل نے کہا کہ آسٹریلیا اور چین کے پاس ممکنہ طور پر متعدد شعبے ہیں جن میں وہ تعاون کر سکتے ہیں اور دونوں فریقوں کی صلاحیتوں اور وسائل سے فائدہ اٹھاسکتے ہیں۔

امریکہ میں قائم ایک غیر سرکاری تنظیم گلوبل انرجی مانیٹر کی جون میں شائع کردہ ایک رپورٹ کے مطابق چین کے پاس 2025 تک ہوا اور شمسی توانائی سے 1 ہزار 200  گیگا واٹ بجلی پیدا کرنے کی صلاحیت ہوگی جس نے چین کو 5 سال قبل ہی 2030 کے ہدف تک پہنچاکر  قابل تجدید توانائی میں عالمی رہنما بنادیا ہے۔

چین کی قومی توانائی انتظامیہ کی مئی میں جاری کردہ اعداد و شمار کے مطابق چین نے 2023 کے ابتدائی 4 ماہ میں 48.31 گیگا واٹ شمسی توانائی کی صلاحیت نصب کی تھی۔

بیجنگ(شِنہوا)چین میں رواں سال 2023 کی تیسری سہ ماہی میں چینی بینکوں کے ذریعے غیر نقدی ادائیگیوں میں مسلسل اضافہ ریکارڈ کیا گیا۔

پیپلزبنک آف چائنہ کی ایک رپورٹ کے مطابق اس عرصے کے دوران بینک کارڈز، الیکٹرانک ادائیگی کی گاڑیوں، کمرشل پیپرز، کریڈٹ ٹرانسفرز اورادائیگی کے دیگر طریقوں کے ذریعے غیر نقدی ادائیگیاں 13261 ارب 90 کروڑیوآن (تقریباً 1 ہزار869 کھرب 10 ارب ڈالر) تک پہنچ گئیں جو گزشتہ سال کی نسبت 3.92 فیصد زیادہ ہے۔ 

رپورٹ میں کہا گیا ہے کہ الیکٹرانک ادائیگیوں نے غیر نقد ادائیگیوں کا بڑا حصہ لیا جس کی کل لین دین کی مالیت 8ہزار 583 کھرب40 ارب یوآن رہی۔

الیکٹرانک ادائیگی والی گاڑیوں کے اعداد و شمار کے مطابق موبائل ادائیگیاں گزشتہ سال کی اسی مدت کے مقابلے میں 10.1 فیصد بڑھ کر 1377 کھرب 10 ارب یوآن ہوگئیں۔

رواں سال کی تیسری سہ ماہی میں بینک کارڈ کے ذریعے لین دین میں بھی اضافہ ہواجو گزشتہ سال کی نسبت 1.74 فیصد بڑھ کر2607 کھرب70 ارب یوآن تک پہنچ گیا۔

سربیا کے صدر الیگزینڈر ووچک چینی شانڈونگ ہائی سپیڈ  گروپ کی جانب سے تعمیر کردہ لاجکوواک-والجیوو موٹر وے کی تعمیراتی سائٹ کا دورہ کرتے ہوئے۔(شِنہوا)

 وسطی غزہ کی پٹی کے شہر دیر البلاح کے ایک ہسپتال میں اسرائیلی حملوں میں زخمی ہونے والے افراد کا علاج کیا جا رہا ہے۔(شِنہوا)

آل پاکستان انٹر بورڈ سپورٹس گالا میں بوائز کے کھیلوں کے مقابلے 25 دسمبر سے پاکستان سپورٹس کمپلیکس، اسلام آباد میں شروع ہونگے۔ سپورٹس گالا کے آرگنائزنگ سیکرٹری محمد بخش مری نے بتایا کہ سپورٹس گالا میں ملک بھر سے گرلز اور بوائز کے الگ، الگ بورڈز کی ٹیمیں مختلف کھیلوں کے مقابلوں میں حصہ رہی ہیں۔ گرلز کے مقابلے 20 سے 23 دسمبر تک کھیلے جارہے ہیں جبکہ بوائز کے مقابلے 25 سے 28 دسمبر تک کھیلے جائیں گے۔ گرلز کے مقابلوں میں اتھلیٹکس، ٹیبل ٹینس، بیڈمنٹن اور ہاکی کے مقابلے جبکہ مردوں کے مقابلوں میں اتھلیٹکس، ٹیبل ٹینس، والی بال اور کبڈی کے مقابلے شامل ہیں۔ ان کے مقابلوں میں 19 بورڈز کی ٹیمیں حصہ لے رہی ہیں جن میں میزبان کوئٹہ،اسلام آباد، بنوں،راولپنڈی،سوات،پشاور، ملتان، لاہور،گوجرانولہ،لارکانہ، سرگودھا،مردان،مالاکنڈ، ڈی آئی خان،فیصل آباد،کراچی، سکھر، ساہیوال اورلاہور ٹیکنیکل بورڈ کی ٹیمیں شامل ہیں۔مقابلوں کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔

کریڈٹ: انڈیپنڈنٹ نیوز پاکستان-آئی این پی

قائد اعظم سپورٹس فیسٹیول27 جنوری سیدلہ ننگل تحصیل شاہ کوٹ میں شروع ہوگا۔ایونٹ کے چیف آرگنائزر پروفیسر محمود خالد چوہدری نے بتایا کہ قائد اعظم سپورٹس فیسٹیول کی تیاریاں ابھی سے شروع کردی گئی ہیں اور فیسٹیول میں چار کھیلوں کے مقابلے رکھے گئے ہیں جن میں فٹ بال، کبڈی، والی بال اور گھوڑا دانس کے مقابلے شامل ہیں یہ مقابلے 4 فروری تک جاری رہیں گے۔ اور جن کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔

کریڈٹ: انڈیپنڈنٹ نیوز پاکستان-آئی این پی

آل پاکستان انٹر بورڈ سپورٹس کمیٹی کے سیکرٹری محمد بخش مری نے کہا ہے کہ ملک میں ممنوعہ ادویات کے استعمال کرنیکی روک تھام کے لئے کھلاڑیوں کو آگاہی فراہم کرنے کے لئے سیمینارز اور ورکشاپ کے پروگرام کرنے کی ضرورت ہے۔ ان خیالات کا اظہار انہوں نے گزشتہ روز پاکستان سپورٹس کمپلیکس اسلام آباد میں جاری آل پاکستان ائنر بورڈ سپورٹس گالا کے موقع پر میڈیا سے گفتگو کرتے ہوئے کیا۔ انہوں نے کہا کہ سپورٹس گالا میں ملک بھر سے گرلز اور بوائز کے الگ، الگ بورڈز کی ٹیمیں مختلف کھیلوں کے مقابلوں میں حصہ لیں گی۔ گرلز کے مقابلے 21 سے 23 دسمبر تک کھیلے جارہے ہیں جبکہ بوائز کے مقابلے 25 سے 28 دسمبر تک کھیلے جائیں گے۔ گرلز کے مقابلوں میں اتھلیٹکس، ٹیبل ٹینس، بیڈمنٹن اور ہاکی کے مقابلے جبکہ مردوں کے مقابلوں میں اتھلیٹکس، ٹیبل ٹینس، والی بال اور کبڈی کے مقابلے شامل ہیں۔ خواتین کے مقابلوں میں 19 بورڈز کی ٹیمیں حصہ لے رہی ہیں جن میں میزبان کوئٹہ،اسلام آباد، بنوں،راولپنڈی،سوات،پشاور، ملتان، لاہور،گوجرانولہ،لارکانہ، سرگودھا،مردان،مالاکنڈ، ڈی آئی خان،فیصل آباد،کراچی، سکھر ساہیوال اورلاہور ٹیکنیکل بورڈ کی ٹیمیں شامل ہیں۔

کریڈٹ: انڈیپنڈنٹ نیوز پاکستان-آئی این پی

ٹینس کمپلیکس کے زیر اہتمام جاری 9 ویں بے نظیر شہید ٹینس چیمپئن شپ مین فائنلز آج(اتوار کو)اسلام آباد ٹینس کمپلیکس اسلام آباد میں کھیلے جائیں گے۔ چیف آرگنائزر فضل سبحان نے بتایا کہ چیمپئن شپ میں ملک بھر تین سو سے زائد مرد اور خواتین کھلاڑی حصہ لے رہے ہیں۔ چیمپئن شپ میں 13 کیٹگریز کے مقابلے رکھے گئے ہیں جن میں مینز سنگلز اینڈ ڈبلز، لیڈیز سنگلز ، بوائز انڈر 18، گرلز انڈر 18، بوائز انڈر 14، گرلز انڈر 14، گرلز بوائز انڈر 12، گرلز اینڈ بوائز انڈر 10، سپیشل چیلڈ اور سینئر 45 پلس کیٹگریز کے مقابلے شامل ہیں

کریڈٹ: انڈیپنڈنٹ نیوز پاکستان-آئی این پی

دورہ آسٹریلیا میں دوسرے ٹیسٹ سے پہلے قومی ٹیم کو ایک اور جھٹکا لگ گیا۔ لیفٹ آرم اسپنر نعمان علی فٹنس مسائل کے باعث سیریز سے باہر ہوگئے۔ میلبورن میں نعمان علی کا اپینڈکس کا آپریشن ہوا ہے جس کی وجہ سے نعمان علی سیریز کے بقیہ دونوں میچز میں سلیکشن کے لئے دستیاب نہیں ہوں گے۔نعمان علی آج شام تک ہسپتال سے ڈسچارج ہوں گے ۔ نعمان علی کا متبادل بھجوانے یا نہ بھجوانے کا فیصلہ سلیکشن کمیٹی ٹیم انتظامیہ سے مشاورت کے بعد کرے گی۔ اس سے پہلے ابرار احمد، خرم شہزاد بھی ان فٹ ہوچکے ہیں ۔

کریڈٹ: انڈیپنڈنٹ نیوز پاکستان-آئی این پی

کھیل کے میدان میں پاکستان کے خلاف سازش پر بھارت کو منہ کی کھانی پڑگئی، انٹرنیشنل ٹینس فیڈریشن کے آزاد ٹریبونل نے ڈیوس کپ ٹائی پاکستان میں ہی کرانے کا حتمی فیصلہ سنادیا۔ انٹرنیشنل ٹینس فیڈریشن کے آزاد ٹربیونل نے ڈیوس کپ ٹائی پر پاکستان کے موقف کو تسلیم کرتے ہوئے بھارت کی اپیل مسترد کردی۔ بھارت نے پاکستان میں عام انتخابات اور سکیورٹی کو بنیاد بناکر ڈیوس کپ نیوٹرل وینیو پر کرانے پر زور دیا تھا۔ تاہم انٹرنیشنل ٹینس فیڈریشن نے کہا ہے کہ پاکستان میں ڈیوس کپ نہ کھیلنے کی کوئی ٹھوس وجہ نہیں، پاکستان اور بھارت کے درمیان ڈیوس کپ ٹائی اسلام آباد میں 4 فروری کو کھیلے جائے گی۔ انٹرنیشنل ٹینس فیڈریشن کے آزاد ٹریبونل کا کہنا ہے کہ فیصلہ لینے سے پہلے تمام صورت حال کا جائزہ لیا گیا ہے۔ جج ڈیوڈ کیسرلی(اسپورٹس ریزولوشن یوکے) نے پاکستان کو ٹائی الاٹ کرنے کے کمیٹی کے فیصلے کے خلاف اے آئی ٹی اے کی اپیل مسترد کر دی۔

کریڈٹ: انڈیپنڈنٹ نیوز پاکستان-آئی این پی

بھارت میں کورونا وائرس ایک بار پھر سر اٹھارہا ہے جہاں 24 گھنٹوں میں وائرس سے 4 افراد ہلاک ہو گئے ۔ بھارتی میڈیا کے مطابق ملک میں کورونا وائرس کے صرف 24 گھنٹوں میں 752 نئے کیسز رپورٹ ہوئے ہیں جو رواں سال 21 مئی کے بعد سے اب تک کے سب سے زیادہ رپورٹ ہونے والے کیسز ہیں۔ اسی حوالے سے یونین ہیلتھ منسٹری کا بتانا ہیکہ 752 نئے کیسز رپورٹ ہونے کے بعد بھارت میں اب ایکٹو کورونا کیسز کی تعداد 3 ہزار 420 ہوگئی ہے۔ میڈیا رپورٹس میں بتایا گیا ہے کہ گزشتہ 24 گھنٹوں میں 4 افراد کورونا وائرس کی وجہ سے موت کے منہ میں جا چکے ہیں جن میں سے 2 کا تعلق ریاست کیرالہ، ایک کا راجستھان اور ایک کا تعلق کرناٹکا سے ہے۔

کریڈٹ: انڈیپنڈنٹ نیوز پاکستان-آئی این پی

امریکا نے سعودی عرب کے لیے ایک ارب ڈالر مالیت کے فوجی تربیتی پروگرام کی منظوری دیدی۔ امریکی محکمہ وفاع پیٹاگون کی جانب سے بھی اس بات کی تصدیق کی گئی ہے کہ امریکی محکمہ خارجہ نے آر ای تھری اے ٹیکٹیکل ائیربرون سرویلنس سسٹم ائیر کرافٹ موڈرانائزیشن اور اس سے جڑے آلات کی سعودی عرب کو ممکنہ فروخت کی منظوری دیدی ہے۔ پینٹاگون کے مطابق سعودی عرب نے مملکت کے اندر اور باہر ٹریننگ پروگرام جاری رکھنے کی درخواست دی تھی جو صرف لڑائی، تکنیک، پروفیشنل فوجی تعلیم، خصوصی تربیت، موبائل ٹریننگ ٹیم، ٹیکنیکل اسسٹنٹ ٹیم، ایکسٹینڈڈ ٹریننگ سروس اسپیشلسٹ اور انگلش لینگویج تک محدود نہیں ہے بلکہ اس میں رائل سعودی ائیر فورس اور دیگر فورسز کی تربیت کے پروگرام جیسے عام شہریوں کی ہلاکت سے بچا، مسلح فورسز کے تنازعات کے قوانین اور انسانی حقوق کے تربیتی پروگرام بھی شامل ہیں۔ امریکی محکمہ دفاع کے مطابق مشرق وسطی میں سیاسی استحکام اور معاشی ترقی کے لیے اہم ترین دوست ملک کو تربیتی پروگرام کی مجوزہ فروخت سے امریکا کی خارجہ پالیسی اور قومی سلامتی کے مقاصد کے حصول میں مدد ملے گی اور دونوں ممالک کے لیے مستقبل کے خطرات سے نمٹنے میں بھی معاون ثابت ہو گی۔ عرب میڈیا رپورٹس کے مطابق سعودی عرب سے معاہدے کی صورت میں امریکا کے 339 کنٹریکٹر تقریبا ایک سال کے لیے اسلامی مملکت میں تربیتی پروگرام میں شریک ہوں گے۔

کریڈٹ: انڈیپنڈنٹ نیوز پاکستان-آئی این پی

اقوام متحدہ کے سیکرٹری جنرل انتونیو گوتریس نے کہا ہے کہ اسرائیل غزہ میں مسلسل آپریشنز کررہا ہے جو علاقے میں انسانی امداد کی ترسیل میں رکاوٹیں کھڑی کررہے ہیں۔ اپنے بیان میں انہوں نے کہا کہ غزہ میں جتنی امداد کی ضرورت اس کی صرف 10 فیصد وہاں موجود ہے۔ واضح رہے کہ اسرائیل کے غزہ میں گزشتہ 48 گھنٹوں کے دوران تابڑ توڑ حملوں میں 400 فلسطینی شہید ہوگئے جس کے بعد اب تک شہید ہونے والے فلسطینیوں کی تعداد 21 ہزار کے قریب پہنچ گئی ہے۔

کریڈٹ: انڈیپنڈنٹ نیوز پاکستان-آئی این پی