22 فیصدپاکستانی کرائے کے مکانات میں رہنے پر مجبور،سندھ میں کرائے داروں کی تعداد سب سے زیادہ،2008 میں 14.8 فیصد شہری گھرانے کرایہ دار تھے، بڑھتی ہوئی آبادی سے شہروں میں رہنے کے اخراجات میں اضافہ،دستیاب سہولیات پر بوجھ پڑ گیا ، بے ہنگم آبادی روزگار کی منڈیوں کے لیے سنگین چیلنجز کا باعث۔ویلتھ پاک کی رپورٹ کے مطابق پاکستان میں لوگوں کی ایک بڑی تعداد پسماندہ دیہی علاقوں سے شہری علاقوں میں منتقل ہو رہی ہے جس کی وجہ سے تمام صوبوں کے اہم شہروں میں بھیڑ ہے۔ پاکستان انسٹیٹوٹ آف ڈویلپمنٹ اکنامکس کے ڈاکٹر ایازنے ویلتھ پاک سے بات کرتے ہوئے کہا کہ شہری آبادی تیزی سے بڑھ رہی ہے جس سے دستیاب سہولیات پر بوجھ پڑ گیا ہے۔ انہوں نے کہا کہ بڑھتی ہوئی آبادی نے شہری مراکز میں رہنے کے اخراجات میں اضافہ کیا ہے۔ ایسی صورت حال میں کرائے کے مکانات کی قیمتوں میں ایک خاص اضافہ دیکھا گیا۔ انہوں نے بتایا کہ 2008 میں پاکستان کے 14.8 فیصد شہری گھرانے کرایہ دار تھے اور یہ تعداد 2020 میں بڑھ کر 22 فیصد ہو گئی۔

صوبائی سطح پر صوبہ سندھ سب سے آگے ہے جہاں 26 فیصد خاندان کرائے پر رہتے ہیں، اس کے بعد خیبر پختونخواہ 23 فیصد،بلوچستان 22.5فیصد اور پنجاب 19فیصدہیں۔ڈاکٹر ایاز نے کہا کہ دیہی آبادی اکثر زندگی کی بنیادی ضروریات جیسے کہ پینے کے صاف پانی، تعلیم، صحت، سڑک کے بنیادی ڈھانچے، ٹرانسپورٹ سے محروم رہتی ہے جس کی وجہ سے وہ شہروں میں چلے جاتے ہیں اور معیاری زندگی گزارتے ہیں۔ انہوں نے تجویز پیش کی کہ حکومت کو دیہی علاقوں کی ترقی پر توجہ مرکوز کرنی چاہیے اور پانی، صحت کی دیکھ بھال، تعلیم، سڑکیں، ٹرانسپورٹ، معیاری خوراک فراہم کرنی چاہیے۔ جب مقامی لوگوں کو یہ سہولیات ان کے آبائی شہروں میں ملیں گی تو وہ کبھی شہروں کی طرف ہجرت نہیں کریں گے۔ انہوں نے کہا کہ پاکستان میں آبادی میں اضافے کی بلند شرح کا مطلب غربت، ناخواندگی، کم معیار زندگی، خوشحالی کا فقدان، اور غربت کا شیطانی چکر، دولت کی غیر مساوی تقسیم اوربیماریاں ہیں۔ بڑھتی ہوئی شہری آبادی روزگار کی منڈیوں کے لیے سنگین چیلنجز کا باعث بنتی ہے۔

انہوں نے کہا کہ شہروں میں جدید ٹیلی کمیونیکیشن پاکستانی معاشرے کو اہم فوائد فراہم کرتی ہے۔ حکومت خواندگی اور پیشہ ورانہ تربیت کے پروگراموں کو فنڈز فراہم کرکے شہری منتقلی کو بہتر طریقے سے سنبھال سکتی ہے۔ اس کے علاوہ شہر کے رہائشیوں کو بنیادی خدمات فراہم کرنے کے لیے نجی شعبے کی کوششوں میں مدد کی جانی چاہیے۔ کمیونٹیز، حکومتیں اور تنظیمیں خواتین کو بااختیار بنانے اور اعلی معیار کی تعلیم تک آسان رسائی کے ذریعے لوگوں کو چھوٹے خاندانوں کا انتخاب کرنے کے قابل بنانے کے لیے کام کریںتو ہم ایک پائیدار آبادی حاصل کر سکتے ہیں۔ اور خاندانی منصوبہ بندی کرنے سے ہم اس بات کو یقینی بنا سکتے ہیں کہ مستقبل میں ہر کوئی ایک صحت مند سیارے پر ایک معقول معیار زندگی حاصل کر سکتا ہے-

کریڈٹ: انڈیپنڈنٹ نیوز پاکستان-آئی این پی