جڑواں دھاتوں نائوبیم اور ٹینٹلم کی مقامی پروسیسنگ کے ذریعے پاکستان میں صنعتی انقلاب برپا کیا جا سکتا ہے، گلگت بلتستان ، خیبرپختونخوا، بلوچستان اور سندھ میںوسیع زخائر موجود ہیں۔ویلتھ پاک کی رپورٹ کے مطابق جڑواں دھاتوں نائوبیم اور ٹینٹلم کی مقامی پروسیسنگ کے ذریعے پاکستان میں صنعتی انقلاب برپا کیا جا سکتا ہے۔ پاکستان پراسیس شدہ فارمز اورصنعتی اشیا کی درآمد،طبی اور صنعتی اشیا کی تیاری پر بہت زیادہ زرمبادلہ خرچ کرتا ہے۔گلوبل مائننگ کمپنی کے پرنسپل جیولوجسٹ، ماربل اینڈ گرینائٹ اینڈ منرلز کی نیشنل کونسل کے ممبر اور پاکستان منرل ڈیولپمنٹ کارپوریشن میں ارضیات کے سابق جنرل منیجر محمد یعقوب شاہ نے کہاکہ یہ صنعت اور منافع کمانے کے لیے ایک انقلابی موضوع ہے۔ ٹینٹلم کا کوئی متبادل معدنیات ابھی تک دریافت نہیں ہوا ہے۔ اس کا غیر معمولی معیار دیگر تمام موازنہ دھاتوں سے زیادہ چارج فی گرام ذخیرہ کرنا ہے۔ عالمی سطح پربرازیل، کینیڈا اور آسٹریلیا اس کے سرکردہ پروڈیوسر اور برآمد کنندگان ہیں۔ کانگو، برونڈی، ایتھوپیا، موزمبیق، نائیجیریا، روانڈا، یوگنڈا میں بھی فعال طور پر کان کنی کی جاتی ہے۔

انہوں نے کہا کہ یہ گلگت بلتستان ، خیبرپختونخوا، بلوچستان اور سندھ میں چٹانوں کی تشکیل میں وافر مقدار میں پایا جاتا ہے۔ اگر اس کی پروسیسنگ پاکستان میں شروع ہوتی ہے تو یہ فطری بات ہے کہ دوسرے ممالک ان اہم جڑواں دھاتوں کے حوالے سے ہمارے تجارتی شراکت دار بن جائیں گے۔ٹینٹلم بڑے پیمانے پر بہت سے صنعتی مقاصد کے لیے استعمال کیا جاتا ہے جن میںسیمی کنڈکٹرز، طبی آلات، متعدد تیزابوں کے خلاف اینٹی کورروسیو، الیکٹرانک انڈسٹری، ایرو اسپیس، ڈیفنس، فرنس، الیکٹرانکس، جی پی ایس سسٹم، ایئر بیگ میکانزم، اینٹی لاک بریکنگ سسٹم، اور زیورات شامل ہیں۔ جیٹ انجنوں، ہائی پریشر پائپ لائنوں، سپر کنڈکٹنگ میگنیٹ، بریک ڈسک، پل، راکٹ، تیل گیس پائپ لائنوں، کی تیاری میں استعمال ہونے والے اعلی طاقت والے سٹینلیس سٹیل اور دیگر دھاتوں کی تیاری کے لیے استعمال ہونے والے مرکب دھاتوں کی طاقت کو بہتر بنانے کے لیے یہ بہترین مواد ہے۔

پاکستان کی نائوبیم، ٹینٹلم، وینیڈیم، اور زرکونیم ایسک کی درآمدات میں 2006 سے 2020 تک اضافہ ہوا اور چین 100 فیصد تقریبا 99 ہزار امریکی ڈالرکے حصص کے ساتھ سرفہرست تجارتی شراکت دار رہا۔سیالکوٹ چیمبر آف کامرس اینڈ انڈسٹری کی سرجیکل کمیٹی کے ممبر مکینیکل انجینئر فیضان الحق مرزا نے کہاہم پاکستان میں مصنوعی ہپ جوائنٹ بنانے والے پہلے ادارے ہیں۔ انتہائی زنگ اور الکلائن مزاحم ہونے کی وجہ سے، ہم امپلانٹس اور جسم کے مصنوعی جوڑوں کی تیاری کے لیے سٹینلیس سٹیل الائے درآمد کرتے ہیں۔ مقامی پیداوار کے لیے ایسی دھاتیں درآمد کرنا بھی آسان نہیں ہے۔ٹینٹلم کی حیاتیاتی مطابقت کو جسمانی سیالوں کے سامنے آنے پر منفی مدافعتی ردعمل کو متحرک نہ کرنے کے لیے بہترین سمجھا جاتا ہے۔

کریڈٹ: انڈیپنڈنٹ نیوز پاکستان-آئی این پی