پاکستان کا 60 فیصد پانی ذخیرہ کرنے کے ناکارہ نظاموں کی وجہ سے ضائع ہو جاتا ہے، موسمیاتی تبدیلیوں کے بڑھتے ہوئے خطرے سے نمٹنے کیلئے قومی اور مقامی سطحوں پر آبی وسائل کے تحفظکے لیے فوری اقدام کی ضرورت،استعمال شدہ پانی کی ری سائیکلنگ کیلئے جدید ٹیکنالوجی اپنانے پر کام کرنا ہو گا۔ویلتھ پاک کی رپورٹ کے مطابق پاکستان میں موسمیاتی تبدیلیوں کے بڑھتے ہوئے خطرے سے نمٹنے کیلئے قومی اور مقامی سطحوں پر اپنے آبی وسائل کے تحفظ اور بہتری کے لیے فوری اقدام کی ضرورت ہے۔ڈپٹی ڈائریکٹر پاکستان کونسل آف ریسرچ اینڈ واٹر ریزروائرز مس صائقہ عمران نے ویلتھ پاک سے بات کرتے ہوئے کہا کہ دنیا بھر میں آبی وسائل کی بھروسے کو متاثر کرنے والا ایک اہم عنصر موسمیاتی تبدیلی ہے جس سے پاکستان میں پانی کی دستیابی کے مستقبل کے بارے میں بھی خدشات پیدا ہوتے ہیں۔ہمارے پانی کی فراہمی کے نیٹ ورک دبا وکا شکار ہیں اور ہمارے پاس میٹھے پانی کے وسائل محدود ہیں۔ ملک صنعتی، زرعی اور گھریلو ضروریات کو پورا کرنے کے لیے زمینی پانی پر بہت زیادہ انحصار کرتا ہے۔ زیر زمین پانی کے علاوہ پینے کا 70 فیصد سے زیادہ پانی کنووں سے حاصل کیا جاتا ہے۔

زیادہ تر دیہی گھرانوں کے پاس پانی تک رسائی کے لیے ہینڈ پمپ، موٹرائزڈ پمپ، یا دستی کنویں ہیں۔صائقہ نے کہاکہ پاکستان کا تقریبا 60 فیصد پانی ذخیرہ کرنے کے ناکارہ نظاموں کی وجہ سے ضائع ہو جاتا ہے اور محتاط منصوبہ بندی کے ذریعے اس قیمتی وسائل کی حفاظت کے لیے اقدامات کیے جانے چاہییں۔ اہم مسئلہ قابل اعتماد، درست اور قابل عمل ڈیٹا کی کمی ہے۔ نکاسی آب اور گندے پانی کے دوبارہ استعمال کے لیے نئی ٹیکنالوجی اور طریقوں کو اپنانے کی ضرورت ہے۔ نکاسی آب اور گندے پانی کے دوبارہ استعمال کو فروغ دینے کے لیے ان تکنیکوں کو نقل کیا جانا چاہیے۔صائقہ نے کہا کہ بہت سی تنظیمیں اور حکام پانی کی طلب کو منظم کرنے کے لیے اقدامات کر رہے ہیں اور پانی کے متبادل ذرائع جیسے گرے واٹر اور گندے پانی کو دوبارہ استعمال کرنے، صاف کرنے اور بارش کے پانی کو ذخیرہ کر رہے ہیں۔انہوں نے کہا کہ ہمارا ادارہ پانی کے استعمال کی کارکردگی کو بہتر بنانے کے لیے ملک بھر میں کم لاگت پانی، زراعت اور موسمیاتی ٹیکنالوجیز کو فروغ دے رہا ہے اور مختلف صنعتوں کی حوصلہ افزائی کر رہا ہے کہ وہ زراعت، گھریلو اور صنعتی شعبوں میں پاکستان کے پانی کے چیلنجوں سے نمٹنے کے لیے اپنا کردار ادا کریں۔

"انہوں نے کہا کہ ہم انٹرنیشنل واٹر مینجمنٹ انسٹی ٹیوٹ ،انٹرنیشنل سینٹر فار ایگریکلچرل ریسرچ ان دی ڈرائی ایریاز ،کنسورشیم آف انٹرنیشنل ایگریکلچرل ریسرچ سینٹرزاور واٹر لینڈ اینڈ ایکو سسٹم کے فلیگ شپ پروگرام کے ساتھ تعاون کر رہے ہیں ۔ مشترکہ طور پر پاکستان واٹر ویک 2022 انٹرنیشنل کانفرنس کا انعقاد کیا گیا جس کا عنوان تھا 'آب و ہوا سے لچکدار پاکستان کے لیے پانی-خوراک توانائی اور ایکو سسٹم گٹھ جوڑ کا کردار۔پاکستان واٹر ویک 2022، اپنی نوعیت کی پہلی تقریب، جس کا مقصد ملک اور بیرون ملک سے ماہرین تعلیم، سرکاری حکام، این جی اوز، اور پالیسی ماہرین کو اکٹھا کرنا ہے تاکہ پاکستان کو آج درپیش مسائل پر تبادلہ خیال کیا جا سکے۔وزیر برائے منصوبہ بندی ترقی اور خصوصی اقدامات احسن اقبال کے مطابق دنیا کو پانی کی شدید قلت کا سامنا ہے اور بڑھتی ہوئی آبادی کی بڑھتی ہوئی طلب کے مقابلے تازہ پانی کی دستیابی کم ہو رہی ہے۔وزیر نے تحفظ کے متعدد اقدامات پر توجہ مرکوز کرنے کی ضرورت پر زور دیاجن میں مربوط آبی وسائل کے انتظام ،پانی کی فراہمی کو بہتر بنانا، فطرت پر مبنی حل، پانی اور خوراک کی حفاظت کو مضبوط بنانا، تکنیکی جدت طرازی، اور پائیدار ترقی کے لیے زیادہ سے زیادہ بیداری پیدا کرناشامل ہے۔

کریڈٹ: انڈیپنڈنٹ نیوز پاکستان-آئی این پی