انسداد دہشتگردی کی عدالت نے جوڈیشل کمپلیکس توڑ پھوڑ کیس میں پی ٹی آئی رہنماں کی عبوری ضمانتوں میں توسیع کردی۔ اسلام آباد کی انسداد دہشتگردی کی عدالت میں عمران خان اور دیگرپی ٹی آئی رہنماوں کے خلاف جوڈیشل کمپلیکس توڑپھوڑکیس کی سماعت ہوئی جس سلسلے میں اسد عمر، عمر ایوب،علی نواز، حماد اظہر، حسان نیازی، اعظم سواتی، راجہ خرم نواز اور فرخ حبیب عدالت میں پیش ہوئے۔ شبلی فراز، اسدقیصر اور زلفی بخاری کی طرف سیحاضری سے استثنی کی درخواستیں دائر کی گئیں جسے عدالت نے منظور کرلیا۔ وکیل ملزمان نے عدالت کو بتایا کہ عمران خان کی اسلام آباد ہائیکورٹ میں 3 مئی کو درخواست ضمانت مقرر ہے،ان کی اسلام آباد ہائیکورٹ میں درخواست ضمانت تک اے ٹی سی عبوری ضمانت میں توسیع کرے۔ دورانِ سماعت جج نے فرخ حبیب سے استفسار کیا کہ آپ گزشتہ دو سماعتوں پر نہیں آئے، ایسا لگا کہیں اٹھا تو نہیں لیے گئے، اس پر فرخ حبیب نے کہا کہ مجھے ملک میں گھومنے کا کوئی شوق نہیں۔ بعد ازاں عدالت نے پی ٹی آئی رہنماں کی عبوری ضمانت میں 17 مئی تک توسیع کردی۔

کریڈٹ: انڈیپنڈنٹ نیوز پاکستان-آئی این پی

ڈائریکٹر ادارہ شماریات سندھ نے ڈیجیٹل خانہ و مردم شماری کے نئے اعداد و شمار جاری کردیے۔ ڈائریکٹر ادارہ شماریات سندھ منور گھانگرو نے کہا کہ سندھ کی آبادی ساڑھے 5 کروڑ سے تجاوز کرگئی جس کی تعداد 5 کروڑ 50 لاکھ 85 ہزار تک پہنچ چکی ہے۔ ڈائریکٹر ادارہ شماریات نے بتایا کہ کراچی کی آبادی ایک کروڑ 79 لاکھ 65 ہزار سے زائد ہوگئی جب کہ حیدر آباد ڈویژن میں ایک کروڑ 19 لاکھ 78 ہزار 208 افراد کی گنتی ہوئی ہے۔ منور گھانگرو کے مطابق لاڑکانہ ڈویژن میں 79 لاکھ 90 ہزار 96، سکھر 62 لاکھ 14ہزار 842 افراد اور شہید بے نظیر آباد ڈویژن میں 59لاکھ 78 ہزار 147 افراد کی مردم شماری ہوئی ہے۔ اس کے علاوہ میر پور خاص ڈویژن کی آبادی 49لاکھ58 ہزار 562افراد تک پہنچ گئی ہے۔

کریڈٹ: انڈیپنڈنٹ نیوز پاکستان-آئی این پی

مسلم لیگ ن کے رہنما اور سابق وزیراعظم شاہد خاقان عباسی نے کہا ہے کہ قومی احتساب بیورو (نیب )گزشتہ سالوں میں ایک بھی سیاستدان کو نہیں پکڑ سکا، نیب کیسز دیکھ کر ملک میں کوئی سرمایہ کاری نہیں کرتا۔ اسلام آباد میں احتساب عدالت کے باہر میڈیا سے گفتگو کرتے ہوئے شاہد خاقان عباسی کا کہنا تھا کہ نیب قانون میں جعلی کیسز کو ختم کرنے کی گنجائش موجود ہے، نیب عدالتوں میں کیمرے لگا کر عوام کو سماعت دکھانی چاہیے۔ شاہد خاقان عباسی کا کہنا تھا کہ نیب کیسز دیکھ کر ملک میں کوئی سرمایہ کاری نہیں کرتا، نیب کے تماشوں نے ملک کو تباہ کردیا ہے، ملک میں سابق وزیراعظم کو انصاف نہیں ملیگا تو غریب کو کیسے ملے گا۔ ایک سوال کے جواب میں ان کا کہنا تھا کہ الیکشن کمیشن نے انتخابات کروانے ہیں، جس جماعت نے حصہ لینا ہو انتخابات میں حصہ لے لیگی، انتخابات کرانا ن لیگ کا کام نہیں ہے، پی ٹی آئی نے دونوں بار بدنیتی پر مذاکرات کیے۔

کریڈٹ: انڈیپنڈنٹ نیوز پاکستان-آئی این پی

پنجاب کے ضلع بہاولپورکے شہر احمد پور شرقیہ میں ٹریفک حادثے کے نتیجے میں خاتون سمیت دو افراد جاں بحق ہو گئے۔ پولیس حکام کے مطابق نیشنل ہائی وے پر درہ چاچڑاں کے قریب تیز رفتار بس نے موٹر سائیکل کو ٹکر مار دی جس کے نتیجے میں خاتون سمیت 2 افراد جاں بحق جبکہ ایک زخمی ہو گیا۔ حکام نے بتایا کہ حادثے کے بعد بس ڈرائیور موقع سے فرار ہوگیا تاہم پولیس نے بس کو تحویل میں لے لیا ہے۔

کریڈٹ: انڈیپنڈنٹ نیوز پاکستان-آئی این پی

پنجگور میں بارشوں کے باعث دیواریں گرنے کے واقعات میں 2 افراد جان کی بازی ہار گئے۔ پراوینشل ڈیزاسٹر مینجمنٹ اتھارٹی (پی ڈی ایم اے) کے مطابق صوبے کے مختلف علاقوں میں بارشوں سے ہلاکتوں کی تعداد 6 ہوگئی ہے، کوئٹہ کے مختلف علاقوں میں حالیہ بارشوں سے متعدد سڑکوں کا ملبہ برساتی پانی میں بہہ گیا۔ کیچ، پنچگور، چاغی و لسبیلہ میں واقع گھروں کو پہنچنے والے نقصانات کا سروے کیا جا رہا ہے جبکہ خضدار کے علاقے میں ژالہ باری سے فصلوں کو نقصان پہنچا ہے۔

کریڈٹ: انڈیپنڈنٹ نیوز پاکستان-آئی این پی

امریکا نے کہا ہے کہ پاکستان میں کسی بھی ایسی حکومت کی حمایت کریں گے جو پاکستانی عوام کی مرضی کی عکاس ہو۔ واشنگٹن میں پریس بریفنگ کے دوران امریکی وزارت خارجہ کے ترجمان ویدانت پٹیل کا کہنا تھا کہ ہم یقینی طور پر پاکستان کی داخلی یا ملکی سیاست پر کچھ نہیں کہیں گے۔ انہوں نے مزید کہا کہ بین الاقوامی مذہبی آزادی پر کمیشن ایک آزاد امریکی کمیشن ہے، جو کہ صدر، سیکرٹری خارجہ اور کانگریس کو پالیسی سفارشات فراہم کرتا ہے، حکومتیں یا دیگر ادارے جن کے پاس اس رپورٹ کے بارے میں سوالات یا تبصرے ہیں انہیں براہ راست کمیشن سے رابطہ کرنا چاہیے۔ واضح رہے کہ امریکی کمیشن برائے بین الاقوامی مذہبی آزادی نے اپنی سالانہ رپورٹ میں بھارت میں مسلمانوں اور عیسائیوں سے ناروا سلوک کی نشاندہی کی ہے۔

کریڈٹ: انڈیپنڈنٹ نیوز پاکستان-آئی این پی

عوامی نیشنل پارٹی(اے این پی) کی جانب سے بلائی گئی آل پارٹیز کانفرنس میں جمعیت علما اسلام کے اعتراض پر پاکستان تحریک انصاف نے شرکت نہ کرنے کا فیصلہ کر لیا۔ اے این پی کی آل پارٹیز کانفرنس(اے پی سی) میں پی ٹی آئی اور جے یو آئی کی شرکت کے تنازع پر جے یوآئی کا اے این پی کے ساتھ رابطہ ہوا، جس میں پی ٹی آئی کو دعوت دینے پر اپنے تحفظات سے آگاہ کردیا۔ جے یو آئی کے اعتراض کے بعد پی ٹی آئی نے آل پارٹیز کانفرنس میں شرکت کرنے کا فیصلہ واپس لے لیا۔ مولانا عطا الرحمان کی قیادت میں جے یوآئی وفد نے اے این پی کے میاں افتخار حسین سے ملاقات کی ہے۔ پی ٹی آئی کے رہنما اسد قیصر نے اے این پی کی اے پی سی میں شرکت نہ کرنے کی تصدیق کرتے ہوئے کہا کہ ہم نے اے این پی کی اے پی سی میں شرکت کی دعوت قبول کی تھی لیکن اب ہم نہیں جائیں گے، مجھے قیادت نے منع کردیا ہے کہ اے این پی کی اے پی سی میں نہیں جانا۔ تاہم جے یوآئی ذرائع کے مطابق پی ٹی آئی کے اے پی سی میں شرکت کے انکار کے بعد جے یو آئی اے پی سی میں شرکت کرے گی۔ سیکرٹری جنرل اے این پی میاں افتخارکا کہنا ہے کہ پی ٹی آئی نے ہمیں اے پی سی میں نہ آنے سے متعلق ابھی تک آگاہ نہیں کیا۔ واضح رہے کہ اے این پی نے شاہ محمود قریشی اور فواد چودھری کے ذریعے پی ٹی آئی کو اے پی سی میں شرکت کی دعوت دی تھی۔ اے این پی نے زمان پارک جا کر خود چیئرمین پی ٹی آئی عمران خان کو بھی اے پی سی میں شرکت کی دعوت دینے کی خواہش ظاہر کی تھی۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ نے تحریک انصاف کے صدر اور سابق وزیراعلی پنجاب چودھری پرویز الہی کی گرفتاری کیلئے پولیس کے چھاپے فوری روکنے کی استدعا مسترد کر دی۔ تفصیلات کے مطابق لاہور ہائیکورٹ میں سابق وزیراعلی پنجاب چودھری پرویز الہی کی رہائش گاہ پر پولیس اور اینٹی کرپشن کے آپریشن کے خلاف درخواست پر سماعت ہوئی، جسٹس سردار سرفراز ڈوگر نے پرویز الہی کے بیٹے راسخ الہی کی درخواست پر سماعت کی۔ دوران سماعت وکیل درخواست گزار نے کہا کہ سابق وزیر اعلی کے گھر پر غیر قانونی طور پر پولیس آپریشن کیا گیا، لاہور ہائیکورٹ سے ضمانت لینے کے باوجود پرویز الہی کی گرفتاری کی کوشش کی گئی۔ عامر سعید راں نے کہا کہ پولیس کی جانب سے پرویز الہی کے گھر چھاپہ عدالتی حکم کی واضح خلاف ورزی ہے، عدالت نے چودھری پرویز الہی کی حفاظتی ضمانت منظور کر رکھی ہے۔ جسٹس سردار سرفراز ڈوگر نے کہا کہ کس قانون کے تحت عدالت گرفتاری سے روک سکتی ہے؟، جب تک رپورٹ نہیں آتی کیسے آپ کی بات مان سکتے ہیں؟، پولیس کو اپنا زور لگانے دیں جب معاملہ عدالت آئے گا تو دیکھ لیں گے۔ عدالت نے آئی جی اور ڈی جی اینٹی کرپشن کو قانون کے دائرے میں رہتے ہوئے کام کرنے کی ہدایت کردی، عدالت نے آئندہ سماعت پر ڈی جی اینٹی کرپشن اور آئی جی پنجاب سے تفصیلی رپورٹ بھی طلب کرلی ہے۔ خیال رہے کہ چودھری پرویز الہی کی جانب سے دائر درخواست میں استدعا کی گئی تھی کہ عدالت چیف سیکرٹری کو ذمہ داروں کے خلاف کارروائی اور پولیس کو پرویز الہی کی گرفتاری سے روکنے کا حکم دے۔

کریڈٹ: انڈیپنڈنٹ نیوز پاکستان-آئی این پی

یمن کے جنوبی صوبے ابیان کے قبائلی وفد کے ارکان صنعاء میں یمنی سرکاری فوج کے آٹھ سال سے قید ایک کمانڈر فیصل رجب کی رہائی کا انتظار کر رہے ہیں۔(شِنہوا)

پاکستان اکانومی واچ کے چئیرمین برگیڈئیر(ر) محمد اسلم خان نے کہا ہے کہ آئی ایم ایف کی شرائط کا سلسلہ ختم ہونے میں نہیں آ رہا ہے جو ایک سازش ہے۔یہ ادارہ قرضہ روک کر پاکستان کو کمزور کرنا چاہتا ہے تاکہ اپنی مرضی کے سیاسی فیصلے کروا سکے۔ عالمی ادارہ اس وقت تک پاکستان کو قرضہ نہیں دے گا جب تک ہم سی پیک سے پیچھے ہٹ نہیں جاتے جو اس کا اصل ہدف ہے۔ اسی وجہ سے درجنوں شرائط پوری کرنے کے باوجود آئی ایم ایف مسلسل بہانے کر رہا ہے۔ لولے لنگڑے جواز پیش کرنے کی وجہ سے آئی ایم ایف کے ارادے سب پر عیاں ہو گئے ہیں۔پاکستان کو آئی ایم ایف کے بغیر جینا ہو گا جس کی اولین شرط اشرافیہ نوازی کا خاتمہ ہے۔ محمد اسلم خان نے یہاں جاری ہونے والے ایک بیان میں کہا کہ پاکستان اور آئی ایم ایف کے درمیان معاہدے میں تاخیر کی وجہ سے ملکی معیشت بہت متاثر ہوئی ہے جبکہ عوام کو بھی اسکی بھاری قیمت ادا کرنا پڑی ہے۔ اقتصادی ماہرین کے مطابق پاکستان کے موجودہ معاشی حالات کی وجہ سے ملک کے پاس آئی ایم ایف کے علاوہ کوئی آپشن نہیں کیونکہ دوسرے عالمی مالیاتی اداروں اور دیگر ممالک نے پاکستان کے لیے قرضہ کو آئی ایم ایف پروگرام کی بحالی سے جوڑ رکھا ہے اور آئی ایم ایف کی جانب سے قسط کے اجرا کے بعد مزید قرضے مل سکیں گے۔ انھوں نے کہا کہ آئی ایم ایف سے معاہدے میں تاخیر نے غیریقینی کی صورتحال پیدا کی ہے، روپے کی قدر میں کمی ہوئی ہے، سرمایہ کاری ختم ہو کر رہ گئی ہے اور فنانشنل مارکیٹ میں منفی اثرات پیدا ہوئے ہیں جس کی وجہ سے پاکستان کی کریڈٹ ریٹنگ مسلسل کم ہو رہی ہے۔ روپے کی قدر میں گراوٹ سے عام آدمی کے لیے بہت ساری چیزیں مہنگی ہوگئی ہیں کیونکہ کھانے پینے کی چیزوں سے لے کر تیل تک درامد کیا جاتا ہے ۔ یکدم بجلی، گیس اور شرح سود بڑھانے کا فیصلہ غلط تھا جس سے عوام اور کاروباری برادری پر بہت بوجھ پڑا ہے۔حکومت کو چائیے کہ حالات بہتر ہوتے ہی آئی ایم ایف کے چنگل سے نکلنے کے لئے بھرپور کوشش کرے۔

کریڈٹ: انڈیپنڈنٹ نیوز پاکستان-آئی این پی

حکومت کی ناقص پالیسیوں کی وجہ سے انڈسٹریز تباہ و برباد ہو چکی ہے۔50 فیصد انڈسٹریز فار سیل ہے جسے کباڑے بھی نہیں خرید رہے ہیں کیونکہ اس کے پاس بھی قوت خرید ختم ہو چکی ہے۔80فیصد انڈسٹریز بند ہونے سے لاکھوں مزدور بے روز گار ہو چکے ہیںوزیرخزانہ اسحاق ڈار بند کمرے میں فیصلے کررہے ہیں اس سے ملک تباہی کے دہانے پر کھڑا ہے۔پنجاب کی انڈسٹریز تیزی سے بند ہورہی ہے اگر حکومت نہیں چاہتی ہم انڈسٹریز کو چلائیں ہمیں واضح طور پر بتا دیا ہم کوئی اور کاروبار کر لیں۔یہ بات ریجنل چیئرمین اپپٹما حافظ شیخ محمد اصغر قادری نے اپپٹما کے اجلاس سے خطاب کرتے ہوئے کہی۔ اس موقع پر سینٹرل چیئرمین سمیت دیگر صنعتکار بھی موجود تھے انہوںنے کہا کہ بجلی' گیس'پٹرولیم سمیت خام مال مہنگا ہونے سے انڈسٹریز تباہی کا شکار ہوچکی ہے۔انڈسٹریز بند ہونے سے جہاںمعیشت بدحال ہو گی وہاں لاکھوں افراد بے روزگاری کا شکار بھی ہونگے۔انہوںنے کہا کہ صنعتکار انڈسٹریز بند نہیں کرنا چاہتے انڈسٹریز کوچلانے کے لئے صنعتکاروں نے اپنے گھر سے سیل کر دیئے۔صنعتکاروں نے آخری تک دم تک انڈسٹریز چلانے کی کوشش کر رہے ہیں لیکن اب انکی قوت برداشت جواب دے چکی ہے۔

انہوں نے حکومتی پالیسیوں پر کڑی تنقید کرتے ہوئے کہا کہ کراچی میں گیس 11 سو پچیس روپے جبکہ پنجاب کی انڈسٹریز کو 25 سو روپے دینا ہے تو اس دہرے معیار کی وجہ سے پنجاب کے صنعتکار دل برداشت ہو چکے ہیں۔انہوںنے کہا کہ حکومت پنجاب میں بحران پیدا کرنا چاہتی ہے اگر لاکھوں مزدور بے روزگار ہونگے تو وہ سڑکوں پر آئیں اور روڈ بلاک ہونگے تو ملک جام ہو کر رہ جائے گا۔ انہوں نے کہا کہ جس تیزی سے کرائمز میں اضافہ ہو رہا ہے وہ ناقابل برداشت ہے جس سے ہر شخص غیر محفوظ ہو کر رہ گیا ہے۔ انہوںنے کہا کہ آئی ایم ایف کی شرائط پرعملدرآمدسے ملک میں بھونچال آگیا ہے۔ڈالر کی قیمت میں زبردست اضافہ ہوا ہے۔ بنیادی شرح سود سترہ فیصد سے بڑھا کر بیس فیصد کر دی گئی ہے جس پر بینک منافع ملا کر یہ شرح 24.23 فیصد تک ہو گئی جس کی موجودگی میں کوئی بھی کاروبار ممکن نہیں اس لئے بے شمار انڈسٹریز سمیت کاروبار بندہو جائیں گے اور بینک نادہندگی میں اضافہ ہوگا۔ ڈالر کی قدر میں اتار چڑھائو جاری ہے۔ گزشتہ روز بجلی تین روپے 82 پیسے فی یونٹ مزید مہنگی کر دی گئی ہے جبکہ سونے کی قیمت میں بھی اضافہ ہوا ہے اشیائے تعیش پر سیلز ٹیکس کی شرح 22 فیصد کر دی گئی'مہنگائی 35 فیصد کی شروع کو چھو رہی ہے

اس سارے کھیل میں جہاں عوام پس رہے ہیں وہیں سٹے باز راتوں رات اربوں روپے کما رہے ہیں۔انہوںنے کہا کہ آئی ایم ایف سے معاہدے میں مسلسل تاخیر سے مارکیٹ میں بے چینی بڑھ رہی ہے اور اعلی حکام کے تسلی آمیز بیانات سے صورتحال بہتر ہونے کی بجائے بگڑ رہی ہے۔ یہ درست ہے کہ پاکستان نے آئی ایم ایف سمیت ہر قرض دہندہ سے مسلسل وعدہ خلافیاں کرکے اپنی ساکھ تباہ کر ڈالی ہے مگر عالمی ادارہ بھی مسلسل اپنی شرائط میں اضافہ اور سختی کر رہا ہے جو پریشان کن ہے۔ان حالات میں عالمی اداروں کے بارے سازشی نظریات پروان چڑھ رہے ہیںجوملکی معیشت کے لئے نیک شگون نہیںہے۔ انہوںنے کہاکہ بعض ممالک کی جانب سے پاکستان کی معیشت کونقصان پہنچانے کی سازشیںخارج ازامکان نہیں ہیں مگر زیادہ قصور ان نام نہاد ماہرین کا ہے جو سمجھتے تھے آئی ایم ایف کو نظر انداز کرکے دوست ممالک سے قرضہ لیا جا سکتاہے جو انکی خام خیال ثابت ہوئی ہے کیونکہ دوست ممالک نے بھی آئی ایم ایف کی نگرانی کے بغیر قرض دینے سے انکار کردیا ہے۔

کریڈٹ: انڈیپنڈنٹ نیوز پاکستان-آئی این پی

مرغی کے فی کلو گوشت میں 30 روپے کا اضافہ کردیا گیا۔رپورٹس کے مطابق 30 روپے کے اس نئے اضافے کے بعد برائلر مرغی کے فی کلو گوشت کی قیمت 557 روپے سے بڑھ کر 587 روپے ہوچکی ہے، اسی طرح زندہ برائلر کے دام بھی 20 روپے مزید بڑھا دیے گئے ہیں، جس کی وجہ سے زندہ برائلر ہول سیل ریٹ پر 363 روپے سے بڑھ کر 383 اور پرچون کے نرخ 371 روپے سے بڑھا کر 391 روپے فی کلو مقرر کردیئے گئے تاہم ملک میں انڈوں کی قیمت 274 روپے فی درجن پر برقرار ہے، انڈوں کی پیٹی 8 ہزار 100 روپے کی ہوگئی ہے جب کہ عام مارکیٹ میں فی انڈہ 22 سے 24 روپے کے درمیان فروخت ہو رہا ہے۔اس حوالے سے مرغی فروشوں کا کہنا ہے کہ فیڈ مہنگا ہونے کی وجہ سے زیادہ تر پولڑی فارم مالکان نے مرغیوں کی پیداوار کم کر دی ہے جس سے مرغی اور انڈوں کے قیمتوں میں بے تحاشہ اضافہ دیکھنے میں آیا، پہلے روزانہ کی بنیاد پر ہم 10سے 12من تک مرغی فروخت کرتے تھے، اب مہنگائی کی وجہ سے روزانہ کی بنیاد پر فروخت صرف 3 من تک بشمکل پہنچ پاتی ہے کیوں کہ مرغی کا ریٹ میں بے تحاشہ اضافہ ہونے کی وجہ سے کوئی مرغی خریدنے کے لئے ہماری دکانوں کا رخ نہیں کرتا۔

کریڈٹ: انڈیپنڈنٹ نیوز پاکستان-آئی این پی

حکومت نے کہا ہے کہ آنے والے دنوں میں مہنگائی 38 فیصد تک بڑھ سکتی ہے جبکہ مہنگائی کا طوفان ملک کا سابقہ بلند ترین ریکارڈ بھی توڑ سکتا ہے۔مرکزی بینک کی مانیٹری پالیسی مہنگائی کی توقعات پر قابو نہیں پا سکی، اس ضمن میں وزارت خزانہ نے کہا کہ اپریل 2023 کے لیے افراط زر 36 فیصد سے 38 فیصد کی حد میں رہنے کی توقع ہے۔دسمبر 1973 میں پاکستان میں مہنگائی کی سب سے زیادہ شرح 37.8 فیصد ریکارڈ کی گئی تھی، جسے مہنگائی کی حالیہ لہر نے جلد ہی پیچھے چھوڑ دیا ہے، گزشتہ ماہ مہنگائی کی شرح 35.4 فیصد تھی، رپورٹ میں یہ بھی تسلیم کیا گیا کہ مرکزی بینک کی پالیسیاں بھی مدد نہیں کر رہیں۔وزارت خزانہ کے اکنامک ایڈوائزر ونگ کی طرف سے تیار کی گئی رپورٹ کے مطابق سٹیٹ بینک نے شرح سود میں ریکارڈ 21 فیصد اضافہ کر دیا ہے، مہنگائی کی شرح سستی سطح پر آنے میں وقت لگے گا، اگلے مالی سال کے لیے حکومت نے اوسطاً 20 فیصد افراط زر کی شرح کا تخمینہ لگایا ہے۔وزارت خزانہ نے کہا کہ آئی ایم ایف کی کامیابی سے تکمیل یہ پروگرام زیادہ سرمائے کی آمد کو راغب کرنے، شرح مبادلہ میں مزید استحکام اور افراط زر کے دباو? کو کم کرنے کی راہ ہموار کرے گا۔رپورٹ کے مطابق وزارت خوراک کے تخمینے کے مطابق اس سال 29 ملین میٹرک ٹن گندم دستیاب ہوگی۔

کریڈٹ: انڈیپنڈنٹ نیوز پاکستان-آئی این پی

پاکستان میں مہنگائی کی شرح میں مسلسل اضافہ رواں برس کیتیسرے مہینے بھی جاری رہا۔ وفاقی ادارہ شماریات کے تازہ ترین اعداد و شمار کے مطابق گزشتہ برس کے مقابلے میں اس سال مارچ میں مہنگائی کی شرح میں 35.37 فیصد اضافہ ریکارڈ کیا گیا، جو گزشتہ پچاس سالوں میں مہنگائی کی بلند ترین سطح ہے۔یہ اعداد وشمار ایک ایسے موقع پر جاری کیے گئے ہیں، جب جمعے کے روز کراچی میں مفت راشن کی تقسیم کے ایک مرکز میں بھگدڑمچنے سے عورتوں اور بچوں سمیت کم ازکم سولہ افراد ہلاک ہو گئے تھے۔ حکومت نے ملک بھر میں سستے آٹے کی تقسیم کے لیے مراکز کھول رکھے ہیں۔ سرکاری ریکارڈ کے مطابق ٹرکوں اور ڈسٹری بیوشن پوائنٹس سے آٹے کے ہزاروں تھیلے لوٹ بھی لیے گئے ہیں۔'جس طرح مہنگائی بڑھ رہی ہے، مجھے یقین ہے کہ قحط جیسی صورتحال ابھر رہی ہے۔''شماریات بیورو کے ایک ترجمان نے کہا کہ مہنگائی کی یہ شرح 1970 کی دہائی میں ماہانہ ریکارڈ رکھنے کا سلسلہ شروع کیے جانے کے بعد سے بیورو کی طرف سے ریکارڈ کی گیا سب سے زیادہ سالانہ اضافہ ہے۔مارچ میں ریکارڈ کی گئی

مہنگائی کی شرح نے فروری میں مہنگائی کی 31.5 فیصد شرح کو بلند شرح کو بھی پیچھے چھوڑ دیا۔ کھانے، مشروبات اور ٹرانسپورٹ کی قیمتیں 50 فیصد تک بڑھ گء ہیں۔پاکستانی معیشت کو امریکی ڈالر کے مقابلے میں ملکی کرنسی روپے کی قدر میں کمی کے باعث شدید مشکلات کا سامنا ہے اور اس کے ساتھ ساتھ غیر ملکی زر مبادلہ کے ذخائر بھی اب صرف چار ہفتوں تک کی درآمدات کی ادائیگیوں کے لیے باقی بچے ہیں۔پاکستانی معیشت کو پچھلے سال اگست میں آنے والیتباہ کن سیلابوں کی وجہ سے بھی بڑے پیمانے پر نقصان پہنچا تھا۔پاکستانی حکومت رواں ماہ 170 ارب روپے کے نئے ٹیکس لگائے گیافراط زر کی شرح میں اضافہوفاقی ادارہ شماریات کے مطابق فروری کے مقابلے میں مارچ کے مہینے میں قمیتوں میں 3.72 فیصد اضافہ دیکھا گیا۔ ماہرین اقتصادیات کے مطابق روپے کی قدر میں مسلسل کمی، حکومت کی جانب سے قیمتوں پر رعایتوں کے خاتمے اور ٹیکسوں میں اضافے کے بعد افراط زر کی شرح میں حالیہ اضافہ متوقع تھا۔شماریات بیورو نے کے مطابق مارچ میں خوراک کی قمیتوں میں سالانہ افراط زر کی شرح شہری اور دیہی علاقوں کے لیے بالترتیب 47.1 فیصد اور 50.2 فیصد رہی۔ پاکستان کا مرکزی بینک بنیادی سطح پر افراط زر میں اس اضافے کو تشویش کا باعث قرار دے چکا ہے۔

کریڈٹ: انڈیپنڈنٹ نیوز پاکستان-آئی این پی

لارج سکیل مینوفیکچرنگ انڈسٹری کی پیداوار مسلسل کم ہو رہی ہے اور صنعت کو طویل مدتی ترقی کے لیے اہم اصلاحات کی ضرورت ہے، کرنسی کی قدر میں تیزی سے کمی اور ملکی معیشت کی مجموعی سست روی کی وجہ سے 18 سیکٹر کم پیداوار ریکارڈ کر رہے ہیں، جولائی تا فروری 2022-23 کے دوران ایل ایس ایم آئی کی مجموعی پیداوار 5.56 فیصد کم ہو کر 116.64 پوائنٹس ہو گئی۔آل پاکستان ٹیکسٹائل ملز ایسوسی ایشن کے اسٹینڈنگ ممبر محمد نعیم نے ویلتھ پاک سے بات کرتے ہوئے کہا کہ مانیٹری اور مالیاتی پالیسی میں سختی، درآمدی کنٹرول، ایندھن کی بلند قیمتیں، کم عالمی اور گھریلو طلب اور کاروبار کرنے کی لاگت میں اضافہ نے ایل ایس ایم آئی کی پیداوار میں کمی کا سبب بنایا ہے جیسا کہ ہم ٹیکسٹائل، کاغذ کی پیداوار میں کمی کو دیکھ سکتے ہیں۔انہوں نے کہا کہ مینوفیکچرنگ سیکٹر کئی مہینوں سے آپریشن جاری رکھنے کے لیے جدوجہد کر رہا تھاکیونکہ درآمدی پابندیوں کی وجہ سے خام مال کی سپلائی گرگئی تھی۔ انہوں نے کہا کہ کرنسی کی قدر میں تیزی سے کمی اور ملکی معیشت کی مجموعی سست روی کی وجہ سے مسئلہ مزید بڑھ گیا ہے اور18 سیکٹر کم پیداوار ریکارڈ کر رہے ہیں۔

صرف ملبوسات، چمڑے کی مصنوعات، فرنیچر اور دیگر مینوفیکچرنگ سیکٹرز ،فٹ بال کی پیداوار میں اضافہ دیکھا گیاجب کہ خوراک، مشروبات، تمباکو، ٹیکسٹائل، لکڑی کی مصنوعات، کاغذ اور بورڈ، کوک اور پیٹرولیم مصنوعات، فارماسیوٹیکل، ربڑ میں کمی دیکھی گئی۔ مصنوعات، غیر دھاتی معدنی مصنوعات، کیمیکل، لوہے اور اسٹیل کی مصنوعات، برقی آلات، مشینری اور سامان، آٹوموبائل اور دیگر نقل و حمل کا سامان بھی اس میں شامل ہے۔پاکستان بیورو آف سٹیٹسٹکس کے مطابق جولائی تا فروری 2022-23 کے دوران ایل ایس ایم آئی کی مجموعی پیداوار 5.56 فیصد کم ہو کر 116.64 پوائنٹس ہو گئی جو کہ 2021-22 کی اسی مدت میں 123.50 پوائنٹس تھی۔سال بہ سال کی بنیاد پر پیداوار فروری 2022 میں 142.66 پوائنٹس سے فروری 2023 میں 11.59 فیصد کم ہوکر 126.13 پوائنٹس ہوگئی۔ ماہانہ بنیادوں پرآوٹ پٹ فروری 2023 میں 0.50 فیصد کم ہوکر 126.13 پوائنٹس ہوگئی۔جولائی سے فروری کے دوران جن شعبوں میں ترقی ہوئی ان میں ملبوسات، چمڑے کی مصنوعات فرنیچر اور دیگر مینوفیکچرنگ شامل ہیں۔جولائی تا فروری کے دوران جن شعبوں میں کمی ہوئی ان میں خوراک مشروبات تمباکو ٹیکسٹائل لکڑی کی مصنوعات کاغذ اور بورڈ شامل ہیں۔

کوک اور پیٹرولیم مصنوعات کیمیکلز کیمیائی مصنوعات کھاد دواسازی ربڑ کی مصنوعات غیر دھاتی معدنی مصنوعات ، لوہے اور فولاد کی مصنوعات، کمپیوٹر، الیکٹرانکس اور آپٹیکل مصنوعات مشینری اور سامان آٹوموبائل اور دیگر نقل و حمل کا سامان بھی شامل ہے۔ندیم نے کہا کہ کسی ملک کے مینوفیکچرنگ سیکٹر کی ترقی اس کی معاشی طاقت کا ایک اہم اشارہ ہے۔ انہوں نے کہا کہ صنعتیں روزگار کے مواقع پیدا کرکے غربت اور بے روزگاری کے خاتمے میں مدد کرتی ہیں۔پاکستان کی ترقی کے امکانات محدود رہنے کی توقع ہے کیونکہ طویل عرصے تک کاروبار اور صارفین کے اعتماد میں مسلسل کمی ہے جس کی وجہ سے سپلائی چین میں رکاوٹوں، کمزور اعتماد کے ساتھ آنے والے مہینوں میں صنعت کی پیداوار میں مزید کمی آنے کی توقع ہے۔ زیادہ قرض لینے کے اخراجات اور ایندھن کی قیمتیں بھی اس کی ایک وجہ ہیں۔انہوں نے سرمایہ کاری، مسابقت اور پیداواری صلاحیت کو بہتر بنانے کے لیے ڈھانچہ جاتی اصلاحات کی تجویز پیش کی جس میں تحریف آمیز تحفظات کو دور کرنے کے لیے تجارت اور کاروباری ریگولیٹری اصلاحات شامل ہیں۔

کریڈٹ: انڈیپنڈنٹ نیوز پاکستان-آئی این پی

پیداواری صلاحیت کا منفی رجحان تمام شعبوں زراعت، مینوفیکچرنگ اور خدمات کی پیداوار کو متاثر کر رہا ہے،کم پیداواری صلاحیت بین الاقوامی مارکیٹ میں اعلی ان پٹ لاگت اور مسابقت کے نقصان کا باعث بنتی ہے، ملک کی نصف آبادی پر مشتمل ہونے کے باوجود موجودہ افرادی قوت میں خواتین کی شرکت کی شرح صرف 21 فیصد ہے،سرمایہ کاری کے قوانین میں اصلاحات کر کے پیداواری صلاحیت میں خاطر خواہ اضافہ کیا جا سکتا ہے۔ویلتھ پاک کی رپورٹ کے مطابق ماہرین کا کہنا ہے کہ پائیدار ترقی کے لیے پیداواری صلاحیت بڑھانے والی اصلاحات کی تشکیل اور ان پر عمل درآمد کی ضرورت ہوتی ہے جو کہ وسائل کی بہتر تقسیم اور علاقائی اور عالمی انضمام کو بہتر بنائے گی۔ نیشنل پروڈکٹیوٹی آرگنائزیشن کے سی ای او محمد عالمگیر چوہدری نے ویلتھ پاک سے بات کرتے ہوئے کہا کہ پاکستان میں کم پیداواری صلاحیت کا مشاہدہ کیا جا رہا ہے جس کی بنیادی وجہ ریگولیٹری پیچیدگیاں، تکنیکی موافقت کی کمی اور تجارتی کھلے پن کی کم سطح ہے۔عالمگیر نے رائے دی کہ ایک طویل مدتی ترقی کے ایجنڈے کے لیے پائیدار ترقی کے حصول کے لیے مذکورہ بالا تحریفات کے خاتمے کی ضرورت ہے۔ایس ڈی پی آئی کے ایگزیکٹو ڈائریکٹر ڈاکٹر عابد قیوم سلیری نے کہا کہ پیداواری صلاحیت کا منفی رجحان تمام شعبوں بشمول زراعت، مینوفیکچرنگ اور خدمات کی پیداوار کو متاثر کر رہا ہے۔

کم پیداواری صلاحیت بین الاقوامی مارکیٹ میں اعلی ان پٹ لاگت اور مسابقت کے نقصان کا باعث بنتی ہے۔ان کی تجویز کردہ اصلاحات میں جدت کی حوصلہ افزائی، ماحولیاتی حالات کو بہتر بنانا، ضوابط کو ہموار کرنا، مسابقت پر مبنی اقتصادی نظام کو فروغ دینا، اور برآمدی حکمت عملی پر نظر ثانی کرنا شامل ہے۔انہوں نے کہا کہ میکسیکو اور ویتنام کی برآمدی تنوع کی حکمت عملی کی طرف سے مارکیٹ پر مبنی معیشت کو اپنانے سے گزشتہ دہائیوں کے دوران دونوں ممالک کی پیداواری صلاحیت میں نمایاں بہتری آئی ہے۔پاکستان انسٹی ٹیوٹ آف ڈویلپمنٹ اکنامکس کی اسسٹنٹ پروفیسر ڈاکٹر مریم محسن نے ویلتھ پاک کو بتایاکہ ملک کی نصف آبادی پر مشتمل ہونے کے باوجود موجودہ افرادی قوت میں خواتین کی شرکت کی شرح غیر معمولی طور پر 21 فیصد ہے۔ڈاکٹر مریم نے کہاکہ خواتین کی ملازمت کی سطح کو مردوں کے کام کرنے کی شرح کے برابر کرنے سے ملک پیداواری صلاحیت میں نمایاں اضافہ کر سکتا ہے اور سال 2025 تک جی ڈی پی میں 60 فیصد اضافہ کر سکتا ہے۔پاکستان کی اقتصادی ترقی کے بارے میں ورلڈ بینک کی حالیہ رپورٹ کے مطابق تجارت میں کھلے پن کے لیے رکاوٹوں کو کم کرکے اور براہ راست غیر ملکی سرمایہ کاری کو مزید راغب کرنے کے لیے سرمایہ کاری کے قوانین میں اصلاحات کر کے پیداواری صلاحیت میں خاطر خواہ اضافہ کیا جا سکتا ہے۔

کریڈٹ: انڈیپنڈنٹ نیوز پاکستان-آئی این پی

ریڈکو ٹیکسٹائل ملز لمیٹڈ نے مالی سال 2022-23 کے پہلے چھ مہینوں جولائی سے دسمبرمیں 425 ملین آمدنی حاصل کی جو کہ سال بہ سال 31فیصد اضافہ کو ظاہر کرتی ہے ۔ویلتھ پاک کی رپورٹ کے مطابق چھ ماہ کے دوران مجموعی نقصان 28.6 ملین تھاجو گزشتہ سال کی اسی مدت میں 51.2 ملین کے منافع کے مقابلے میں 156فیصدکی نمایاں کمی کو ظاہر کرتا ہے۔ٹیکس سے پہلے کا نقصان 42.8 ملین تھاجو پچھلے سال کی اسی مدت میں 28.7 ملین کے منافع کے مقابلے میں 249فیصدکی کمی کو ظاہر کرتا ہے۔خالص نقصان 48.2 ملین تھا جو پچھلے سال کی اسی مدت میں 23.8 ملین کے منافع کے مقابلے میں 302فیصدکی نمایاں کمی کو ظاہر کرتا ہے۔مجموعی منافع اور خالص منافع میں نمایاں کمی بنیادی طور پر روئی اور پالئییسٹر یارن سمیت خام مال کی قیمتوں میں غیر معمولی اضافے اور عالمی سپلائی چینز پر وبائی امراض کے اثرات کی وجہ سے تھی۔2021-22 میں کمپنی نے 728.6 ملین کی کل آمدن کی اطلاع دی جو پچھلے سال کے 495 ملین کے مقابلے میں 47فیصداضافہ کی نمائندگی کرتا ہے۔مجموعی منافع میں بھی نمایاں اضافہ ہواجو کہ گزشتہ سال کے 36.8 ملین کے مقابلے مالی سال 2021-22 میں 79فیصداضافے سے 65.8 ملین ہو گیا۔تاہم سال کے لیے ٹیکس سے پہلے کا منافع پچھلے سال کے 48.4 ملین کے مقابلے میں 44فیصدکم ہو کر 26.9 ملین ہو گیا۔ سال کے لیے فی حصص آمدنی پچھلے سال کے مقابلے میں 68فیصدکی کمی کو ظاہر کرتی ہے۔ریڈکوایک پبلک لمیٹڈ کمپنی ہے جس نے اکتوبر 1991 میں کام شروع کیا۔ اسے منسوخ شدہ کمپنیز آرڈیننس کے تحت شامل کیا گیا تھا۔ کمپنی کی بنیادی سرگرمیوں میں یارن اور گریج فیبرک کی تیاری اور فروخت شامل ہے۔

کریڈٹ: انڈیپنڈنٹ نیوز پاکستان-آئی این پی

خیبرپختونخوا انرجی ڈویلپمنٹ آرگنائزیشن دور دراز علاقوں میں 13 سولر منی گرڈ سٹیشنوں کی تنصیب مکمل کرنے کے لیے پوری طرح تیار ہے، 757 ملین روپے کی لاگت سے تمام نئے ضم شدہ قبائلی اضلاع کو بجلی فراہم کی جائیگی، منصوبے پر 83 فیصد کام مکمل ہو چکا ہے،سولرائزیشن کے ذریعے آف گرڈ علاقوں کو بجلی کی فراہمی حکومت کی ترجیح ہے۔یہ بات سولرائزیشن کے پروجیکٹ ڈائریکٹر اسفندیار خان نے ویلتھ پاک کو بتائی۔ اس منصوبے سے شمسی توانائی کی پیداوار کے ذریعے بلاتعطل اور کم لاگت بجلی فراہم کر کے غربت زدہ اور جنگ زدہ کمیونٹیز پر خصوصی توجہ مرکوز کرتے ہوئے ہدف بنائے گئے علاقوں میں اقتصادی سرگرمیوں میں اضافہ ہو گا۔ 757 ملین روپے کی لاگت سے صوبہ خیبر پختونخوا کے تمام نئے ضم شدہ قبائلی اضلاع کو مذکورہ اقدام کے تحت شمسی توانائی سے بجلی پیدا کرنے کے ذریعے مارکیٹ کے علاقوں کو کل 2.27 میگا واٹ بجلی فراہم کی جائیگی۔ انہوں نے کہا کہ یہ منصوبے باجوڑ، مہمند، کرم، اورکزئی، شمالی وزیرستان کے قبائلی اضلاع اور لکی مروت، بنوں اور ڈیرہ اسماعیل خان کے سرحدی علاقوں میں مکمل کیے جائیں گے۔ اسفندیار نے کہا کہ منصوبے پر 83 فیصد کام مکمل ہو چکا ہے اور باقی کام جلد مکمل ہونے کی امید ہے ۔انہوں نے کہا کہ اس منصوبے کے لیے ایسے دیہی علاقوں کا انتخاب کیا گیا جو قومی گرڈ سے منسلک نہیں تھے۔

سولر منی گرڈز کو دنیا بھر میں دور دراز کے آف گرڈ کمیونٹیز کی بجلی بنانے کا حل سمجھا جاتا ہے۔ لہذاپیڈونے یہ قدم ان علاقوں کو قابل اعتماد بجلی فراہم کرنے کے مقصد سے اٹھانے کا فیصلہ کیا جہاں بجلی کی عدم دستیابی کی وجہ سے تجارتی سرگرمیاں متاثر ہوئیں کیونکہ وہ قومی گرڈ سے منسلک نہیں تھے۔ کیونکہ یہ بیک وقت کاربن کے اخراج کو کم کرنے کے علاوہ معاشی اور سماجی فوائد بھی رکھتا ہے۔ پروجیکٹ ڈائریکٹر نے کہا کہ اس اقدام سے مارکیٹ کی سرگرمیوں اور چھوٹے درجے کے تاجروں کی آمدنی کو بڑھانے میں مدد ملے گی، اس طرح آمدنی کے واحد ذریعہ پر انحصار کرنے والے خاندانوں کی غربت اور خطرات میں کمی آئے گی۔ حالیہ توانائی اور مالیاتی بحران نے پیداوار، اقتصادیات کو بری طرح متاثر کیا ہے۔ پاکستان میں صنعتی اور تجارتی سرگرمیاں مسلسل بند ہو رہی ہیں اور بے روزگاری بڑھ رہی ہے۔ سولرائزیشن کے ذریعے آف گرڈ علاقوں کو بجلی کی فراہمی ملک کے دور دراز علاقوں کو بجلی فراہم کرنے کے لیے ایک اہم حکمت عملی ہے کیونکہ منی گرڈز روزگار کے ذریعے براہ راست معاشی اثرات مرتب کرتے ہیں اور توانائی کے اخراجات کی بچت ہوتی ہے۔ پیڈوکے زیر تعمیر سولر منی گرڈ اسٹیشنوں سے مقامی تاجروں کے لیے آف گرڈ علاقوں میں سینکڑوں دکانوں کو بجلی فراہم کرنے کی توقع ہے۔

کریڈٹ: انڈیپنڈنٹ نیوز پاکستان-آئی این پی

برطانیہ کے شاہ چارلس کی تاجپوشی اگلے ہفتے کے روز ہوگی، اس روز کرسیوں کے ایک گروپ کے استعمال کا مشاہدہ کیا جائے گا،تاریخی سینٹ ایڈورڈ کی کرسی جو 700سال سے زیادہ پہلے بنائی گئی تھی اور پہلی مرتبہ 1308میں کنگ ایڈورڈ دوم کی تاجپوشی کے موقع پر استعمال ہوئی تھی، چارلس کی تاجپوشی کے وقت استعمال کی جائے گی، علاوہ ازیں بکنگھم پیلس نے ایک بیان میں کہا کہ بادشاہ اور ان کی اہلیہ کمیلا تقریب کے مختلف مراحل میں دیگر تاریخی کرسیوں پر بیٹھیں گے،چارلس کو اگلے ہفتے لندن کے ویسٹ منسٹر ایبی میں ایک تقریب میں باضابطہ طور پر بادشاہ کا تاج پہنایا جائے گا جس میں مختلف سربراہان مملکت اور غیر ملکی معززین شرکت کریں گے۔ شاہ چارلس اپنی والدہ ملکہ الزبتھ کی جگہ سنبھالیں گے، ملکہ الزبتھ کاانتقال ستمبر میں ہو گیا تھا،چارلس اور ان کی اہلیہ کمیلا تاجپوشی کے موقع پر ملبوسات کے دو سیٹ پہنیں گے،آمد پر سرخ رنگ کا ٹکسڈو اور روانگی کے وقت ایک شاہی جامنی رنگ کا گان پہنیں گے ۔ یہ ملبوسات یا تو پہلے سے محفوظ کیے گئے ہیں یا لندن کی 334سالہ ٹیلرنگ فرم ایڈی ریوین کرافٹ نے بنائے ہیں۔

کریڈٹ: انڈیپنڈنٹ نیوز پاکستان-آئی این پی

نائیجریا کی پلیٹیو ریاست میں ایندھن کے ٹینکر میں دھماکے سے 13افراد ہلاک اور 10زخمی ہوگئے،پلیٹیو سٹیٹ پولیس کے تعلقات عامہ کے ڈائریکٹر الفریڈ الابو نے ایک بیان میں کہا کہ دھماکہ اس وقت ہوا جب ریاست کے دارالحکومت جوس میں باچی-جوسٹ نارتھ ہائی وے پر فیول اسٹیشن پر ٹینکر سے ایندھن اتارا جا رہا تھا،الابو نے بتایا کہ اس دھماکے میں 13افراد ہلاک اور 10زخمی ہوئے ہیں، دھماکے سے 28دکانیں اور 8گاڑیاں جل گئی ہیں، اطراف کے مکانات کو نقصان پہنچا ہے اور ہمیں ہلاکتوں کی تعداد میں اضافے کا خدشہ لا حق ہے۔

کریڈٹ: انڈیپنڈنٹ نیوز پاکستان-آئی این پی

ایران میں شورش زدہ صوبے سیستان بلوچستان میں ایرانی پولیس چیف کو بیوی سمیت قتل کر دیا گیا،ایرانی سرکاری میڈیا کے مطابق ایران کے شورش زدہ جنوب مشرقی صوبے سیستان بلوچستان میں حملہ آوروں نے میجر علی رضا شاہراکی کی گاڑی پر فائرنگ کی جس سے وہ موقع پر ہی جاں بحق ہوگئے،اس کی بیوی، جو اس کے ساتھ کار میں تھی، فائرنگ سے شدید زخمی ہوگئی تھی جو بعد میں زخموں کی تاب نہ لاتے ہوئے ہسپتال میں دم توڑ گئی، ابھی تک کسی گروپ نے حملے کی ذمہ داری قبول نہیں کی ہے،حالیہ مہینوں میں، سیستان، بلوچستان بھی حکومت مخالف مظاہروں کا ایک اہم مرکز رہا ہے جو گزشتہ ستمبر میں ایرانی کرد خاتون مہسا امینی کی پولیس حراست میں ہلاکت کے بعد شروع ہوا تھا۔

کریڈٹ: انڈیپنڈنٹ نیوز پاکستان-آئی این پی

پرتگال میں کبوتربازی کا شوق موت کے کھیل میں تبدیل ہوگیا، کبوتر بازی میں سبقت لے جانے کی دوڑ میں ایک شخص نے مقابلے کے تین حریفوں کو قتل کرکے خودکشی کرلی،غیر ملکی میڈیا کے مطابق لزبن کے جنوب میں واقع شہر سیٹوبل کے پولیس کمشنر اینڈریا گونسالویس کے مطابق 30سے 60سال کی عمر کے چار افراد کے درمیان کبوتربازی کے دوران جھگڑا ہوا جس پر ایک شخص نے تین افراد کو فائرنگ کر کے قتل کرنے کے بعد خودکشی کرلی ،پرتگالی میڈیا کے مطابق چاروں افراد نے کبوتربازی میں حصہ لیا تھا، ان کے درمیان سبزیوں کے ایک غیر قانونی باغ کو لے کر جھگڑا ہوا،پولیس کے اعداد وشمار سے معلوم ہوا ہے کہ پرتگال میں 2015سے اب تک ہر سال ہونے والے 80قتل میں سے اوسطا پانچ آتشیں اسلحے سے کیے گئے ،واضح رہے کہ پرتگال میں آتشیں اسلحے کے استعمال پر پابندی ہے تاہم اسلحہ سے شکار کی اجازت دی جاتی ہے۔

کریڈٹ: انڈیپنڈنٹ نیوز پاکستان-آئی این پی

بھارت کے سرکاری و دیگر میڈیا گروپس کا پاکستان کے حوالے سے من گھڑت پروپیگنڈا خود بھارتی صحافی محمد زبیر نے بے نقاب کردیا،رپورٹس کے مطابق بھارتی نیوز ایجنسی ایشین نیوز انٹرنیشنل(اے این آئی)نے قبر پر لوہے کی جالی کو تالا لگی تصویر پاکستان سے منسوب کرکے پوسٹ کی،اس کے بعد بھارتی نامی گرامی ویب سائٹس نے بھی یہ من گھڑت خبر پوسٹ کردی اور یہ تصویر سوشل میڈیا پر وائرل ہوگئی۔

کریڈٹ: انڈیپنڈنٹ نیوز پاکستان-آئی این پی

قطر نے بھارتی جاسوسوں کے زیر استعمال داہرہ گلوبل نامی کمپنی بند کر دی ہے،بھارت کی خفیہ ایجنسیوں نے یہ بھی دعوی کیا ہے کہ پاکستان کی جانب سے فراہم کی گئی معلومات کی بنا پر قطری حکام نے داہرہ گلوبل نامی کمپنی میں کام کرنے والے بھارتی جاسوسوں کو پکڑا جن کا تعلق بھارتی نیوی سے ہے،بھارتی جاسوسوں کو قطر میں اپنی جان کے لالے پڑے ہوئے ہیں کیونکہ ممکنہ طور پر جاسوسی کے جرم میں انکو سزائے موت ملنے والی ہے،بھارتی حکام نے اب تک انکے لیے کوئی اقدام نہیں کیا جس سے یہ بھی واضح ہے کہ بھارت اپنے نیوی کے افسروں اور جوانوں کو بچا نہیں سکتا۔

کریڈٹ: انڈیپنڈنٹ نیوز پاکستان-آئی این پی

بھارتی وزیر اعظم نریندر مودی کی گاڑی پر بھارتیہ جنتا پارٹی کی انتخابی مہم کے دوران ایک خاتون نے موبائل فون دے مارا،بھارتی میڈیا رپورٹس کے مطابق بھارتی وزیر اعظم ریاست کرناٹک کے متعدد شہروں میں اپنی انتخابی مہم میں مصروف ہیں اور اب تک کئی انتخابی ریلیوں میں شرکت اور 6جلسوں میں خطاب کرچکے ہیں،رپورٹس میں بتایا گیا کہ واقعہ نریندر مودی کے کرناٹک اسمبلی انتخابات کے لیے بی جے پی کی انتخابی مہم میں حامیوں سے ملاقات کے دوران پیش آیا،نریندر مودی شہر میسور میں اپنی انتخابی مہم کے دوسرے دن پارٹی کارکنان اور حامیوں سے ملاقات کررہے تھے جب ایک شہری نے ان کی گاڑی پر موبائل فون پھینکا۔ تاہم پولیس کی طرف سے تحقیقات کے بعد یہ ظاہر ہوا کہ موبائل بھیڑ میں سے کسی خاتون نے وزیر اعظم پر پھول پھینکتے ہوئے حادثاتی طور پر فون پھینک دیا تھا،پولیس کے مطابق فون خاتون بی جے پی کارکن نے جوش میں پھینکا جس میں کوئی بدنیتی شامل نہیں تھی، وزیر اعظم ایس پی جی سیکورٹی کی حفاظت میں تھے جب فون وزیر اعظم کی گاڑی پر گرا۔

کریڈٹ: انڈیپنڈنٹ نیوز پاکستان-آئی این پی

سوڈان میں فوج اور پیراملٹری فورسز کے درمیان جھڑپیں ، فوج جنگ بندی میں مزید 72گھنٹے کی توسیع کیلئے رضامند ہوگئی،سوڈان میں متحارب افواج نے اتوار کے روز ایک دوسرے پر جنگ بندی کی تازہ خلاف ورزیوں کا الزام عائد کیا ہے لیکن دونوں فریقوں نے کہا ہے کہ جنگ بندی کے باضابطہ معاہدے کی مدت اتوار کی نصف شب ختم ہونے والی تھی مگر اب اس میں مزید 72گھنٹے کی توسیع کی جائے گی،سوڈانی فوج کے مطابق پیراملٹری فورسز کے ساتھ 72گھنٹوں کی جنگ بندی پر راضی ہیں، امید ہے کہ باغی جنگجو جنگ بندی کا احترام کریں گے،آر ایس ایف کا کہنا ہے کہ جنگ بندی میں توسیع کا فیصلہ بین الاقوامی،علاقائی اور مقامی سطح پرمطالبات کے بعد کیا گیا ہے، واضح رہے کہ 15اپریل کو سوڈانی فوج اور نیم فوجی سریع الحرکت فورسز (آر ایس ایف)کے درمیان اقتدار کی کشمکش کے نتیجے میں لڑائی شروع ہوئی تھی اوراس میں اب تک سیکڑوں افراد ہلاک اور ہزاروں زخمی ہوچکے ہیں،لڑائی میں 528افراد ہلاک اور 4599زخمی ہوئے ہیں، سوڈان سے اب تک 45ہزار افراد نقل مکانی کر چکے ہیں جبکہ خدشہ ظاہر کیا گیا کہ لڑائی جاری رہی تو 2لاکھ 70ہزار افراد ملک چھوڑ سکتے ہیں۔

کریڈٹ: انڈیپنڈنٹ نیوز پاکستان-آئی این پی

سعودی عرب نے ملک بھر میں سیاحت کے فروغ کیلئے 2030تک ہوٹلوں کے کمروں کی تعداد دبئی سے دوگنا کرنے کا منصوبہ تیار کر لیا،عرب میڈیا کے مطابق پراپرٹی کنسلٹنسی نائیٹ فرانک (Knight Frank)کی رپورٹ میں بتایا گیا ہے کہ سعودی عرب کی جانب سے ملک بھر میں سیاحت کے فروغ اور مہمانوازی کے شعبے کی ترقی کیلئے 2030تک ہوٹلوں کے 3لاکھ 15ہزار نئے کمرے بنانے کا منصوبہ تیار کیا گیا ہے،رپورٹ کے مطابق سعودی عرب کے مہمانوازی شعبے میں اس نئے منصوبے کی تکمیل کے بعد نئے کمروں کی تعداد پڑوسی سیاحتی مرکز دبئی میں موجود 1 لاکھ 40ہزار ہوٹل کے کمروں سے دوگنی ہو جائے گی،پراپرٹی کنسلٹنسی نائیٹ فرانک میں سعودی عرب کے مہمان نوازی منصوبے کے سربراہ تراب سلیم نے سیاحت کے فروغ کیلئے نئے انفراسٹرکچر کی ضرورت بہت زوردیتے ہوئے کہا کہ ملک 65فیصد شہری ایک ماہ کے دوران ایک سے تین بار سفر کرتے ہیں،انہوں نے کہا کہ ملک کی 56فیصد آبادی 35سال سے کم عمر نوجوانوں پر مشتمل ہے اس لیے عنقریب ملک بھر میں رہائش کیلئے مختلف قسم کی جدید سہولتوں کی دستیابی اہمیت اختیار کر جائے گی،انہوں نے کہا کہ غیرملکی سیاحت کیلئے بھی نئے ائیرپورٹس، اور مقامی ثقافت اور تاریخ کو مدنظر رکھتے ہوئے بنایا گیا جدید ترین سہولیات اور آسائشوں سے آراستہ انفراسٹرکچر مہمانوازی کے شعبے میں بین الاقوامی سرمایہ کاروں کیلئے پرکشش ثابت ہوگا۔

کریڈٹ: انڈیپنڈنٹ نیوز پاکستان-آئی این پی