سابق وزیراعظم شاہد خاقان عباسی نے کہا ہے کہ نیب میں ہونیوالی ناانصافی کی نظیر عدالتی تاریخ میں کہیں نہیں ملتی۔ پاکستان مسلم لیگ ن کے سینئر رہنما اور سابق وزیراعظم شاہد خاقان عباسی کراچی نیب کورٹ میں پیش ہوئے جس کے بعد میڈیا سے گفتگو کرتے ہوئے کہا کہ نیب کا کام سیاست کو توڑنے اور جوڑنے کا ہے، انصاف کا تقاضا اور انصاف کہاں گیا یہ کسی کو نظر نہیں آتا، یہ بدنصیبی ہے، جو یہاں ناانصافی ہوتی ہیاس کی نظیر عدالتی تاریخ میں نہیں ہے۔ انہوں نے کہا کہ نیب نے ملک کو مفلوج کیا ہوا ہے، آج یہ پانچواں سال ہے کیس چل رہا ہے، بار بار عدالت آتے ہیں لیکن ہوتا کچھ بھی نہیں، 5 سال ہو گئے لیکن صرف تاریخ ملتی ہے، عدالتوں میں کیمرے لگوائے جائیں تاکہ عوام بھی دیکھیں کہ عدالتوں میں ہوتا کیا ہے۔ شاہد خاقان عباسی کا مزید کہنا تھا کہ کئی ججز کا عدالتوں سے تبادلہ ہو گیا لیکن ہمارا کیس وہیں کا وہیں ہے، نیب کا ادار صرف سیاست کی جوڑ توڑ کے لیے رکھا گیا ہے، میری اپیل ہے کہ نیب کے ادارے کو ختم کیا جائے۔

کریڈٹ: انڈیپنڈنٹ نیوز پاکستان-آئی این پی

سپریم کورٹ میں زمین کے تنازع سے متعلق کیس میں چیف جسٹس قاضی فائز عیسی نے وکیل پر برہمی کا اظہار کردیا۔ دوران سماعت چیف جسٹس نے ریمارکس دئیے کہ پنجاب کے وکیل دعوی لکھنا کب سیکھیں گے۔ عرضی نویس سے دعوی مرتب کروایا جاتا ہے۔ قانون میں کہاں لکھا ہے کہ وکیل صرف عدالت میں کھڑے ہو کر دلائل دے گا۔ چیف جسٹس نے کہا کہ بتائیں کیا قانون عرضی نویس سے دعوی مرتب کرنے کی اجازت دیتا ہے، قانون میں کہاں لکھا ہے کہ وکیل صرف عدالت میں کھڑے ہو کر دلائل دے گا۔ وکیل کی خدمات حاصل کرنے کا مقصد یہ ہے کہ وہ دعوی لکھ کر اس کی تصدیق کر کے جمع کرائے۔ چیف جسٹس نے ریمارکس دیے کہ سب سے زیادہ جھگڑے بھی پنجاب کے وکیل کرتے ہیں، پھر سب وکلا ان کیلئے کھڑے ہو جاتے ہیں اور ہڑتالیں کرتے ہیں، ہڑتال کرنا وکیل کا حق کیسے ہوگیا، پورا نظام ہی خراب کردیا گیا ہے۔ کیا پنجاب کے لا کالجز ڈرافٹنگ نہیں سکھاتے۔ بلوچستان کے پسماندہ علاقے تربت میں جائیں وہاں بھی وکیل خود ڈرافٹنگ کرتا ہے۔

کریڈٹ: انڈیپنڈنٹ نیوز پاکستان-آئی این پی

گوادر کے دلکش مناظر کے مرکز میں واقع پانچویں گوادر آف روڈ ریلی 2023 شاندار کامیابی کے ساتھ اختتام پذیر ہوئی جس میں پرسکون ماحول اور مقامی باشندوں کے خوش آمدید جذبے کو اجاگر کیا گیا۔گوادر پرو کے مطابق گوادر ڈویلپمنٹ اتھارٹی(جی ڈی اے) اور بلوچستان موٹر اسپورٹس ایسوسی ایشن نے حکومت پاکستان اور پاک فوج کے تعاون سے ایونٹ کا انعقاد کیا۔ پری پیڈ کیٹیگری کا اختتامی مرحلہ اتوار کو ہوا ، جس میں مقامی اور بین الاقوامی ریسرز کا متحرک امتزاج پیش کیا گیا . یہ مقابلہ 250 کلو میٹر طویل ایک چیلنجنگ ٹریک کے ساتھ شروع ہوا، جس میں صحراں، پہاڑوں اور ساحلی علاقوں سمیت حیرت انگیز مناظر کو پیش کیا گیا، جس نے ایونٹ میں جوش و خروش اور مہم جوئی کی ایک اضافی پرت کا اضافہ کیا۔ گوادر سے تعلق رکھنے والے مقامی ریسر جینئد ہوت بلوچ نے پہلی پوزیشن حاصل کی جبکہ ایک معروف ریسر نے رنر اپ پوزیشن حاصل کی۔ گوادر پرو کے مطابق ریلی کے ابتدائی مرحلے کے دوران ، "تیار کردہ بی کیٹیگری" کے بائیک کیٹیگری میں پہلی پوزیشن ایرانی موٹر سائیکل سوار بہرام نے حاصل کی۔ "تیار کردہ اے کیٹیگری" میں ، زیغم چوہان نے کامیابی حاصل کی اور شدید مسابقتی میدان میں سرفہرست مقام حاصل کیا۔ گوادر کے میر غوث بخش بزنجو اسٹیڈیم میں منعقدہ پروقار ایوارڈ تقریب میں ان کی شاندار کارکردگی کو ٹرافیوں اور نقد انعامات سے نوازا گیا۔ تقریب کے مہمان خصوصی سینیٹر کہدا بابر تھے۔ گوادر پرو کے مطابق سینیٹر بابر نے ایک اہم سیاحتی مقام کے طور پر گوادر کے بڑھتے ہوئے امکانات پر زور دیتے ہوئے شہر کو اسمارٹ پورٹ سٹی میں تبدیل کرنے پر روشنی ڈالی ، جس کے نتیجے میں توقع ہے کہ عالمی سطح پر سیاحوں کی آمد کو راغب کیا جائے گا۔ تفریحی اور کھیلوں کی سرگرمیوں کی متنوع رینج کو برقرار رکھنے کی اہمیت پر زور دیتے ہوئے ، انہوں نے مقامی اور زائرین دونوں کے لئے یکساں طور پر متحرک اور پرکشش ماحول کو فروغ دینے کی اہمیت پر زور دیا۔

کریڈٹ: انڈیپنڈنٹ نیوز پاکستان-آئی این پی

یوٹیلیٹی اسٹورزکارپوریشن نے دستیابی کے ساتھ ہی سبسڈی والی سستی چینی 8 روپے فی کلو مہنگی کردی۔ ذرائع کے مطابق بغیر سبسڈی والی چینی کی فی کلو قیمت میں بھی8 روپے کا اضافہ کیا گیا ہے۔ یوٹیلیٹی اسٹورزپرچینی کی قیمتوں میں اضافے کا اطلاق فوری ہوگا، یوٹیلیٹی اسٹورزپرعام صارفین کے لیے فی کلوچینی کی قیمت 155روپے مقرر کی گئی ہے۔ بی آئی ایس پی صارفین کے لیے چینی کی فی کلو قیمت 109 روپے مقرر کی گئی ہے۔ اس سے قبل عام صارفین کے لیے چینی کی قیمت 147 روپے فی کلو تھی، سبسڈی کے تحت چینی کی پرانی قیمت101 روپے فی کلو تھی۔

کریڈٹ: انڈیپنڈنٹ نیوز پاکستان-آئی این پی

مسلم لیگ ن کے قائد نواز شریف کی پیشی سے قبل عدالتوں کی سکیورٹی سخت کردی گئی ہے جب کہ احتساب عدالت میں بم ڈسپوزل اسکواڈ نے کمرہ خالی کروا کر تلاشی بھی لی۔ سابق وزیراعظم میاں نواز شریف کی اسلام آباد ہائی کورٹ میں پیشی سے قبل عدالت اور اطراف میں سکیورٹی کے سخت انتظامات کیے گئے ۔ حفاظتی انتظامات کے تحت پولیس اہل کاروں کو احاطہ عدالت اور اطراف میں تعینات کردیا گیا ۔ احتساب عدالت میں نواز شریف کی پیشی سے قبل اندر اور باہر سکیورٹی کے سخت اقدامات کیے گئے ہیں اور جوڈیشل کمپلیکس سے جی الیون سگنل تک پولیس کی بھاری نفری تعینات کی گئی ۔

کریڈٹ: انڈیپنڈنٹ نیوز پاکستان-آئی این پی

پاکستان مسلم لیگ (ن)کے صدر اور سابق وزیر اعظم شہباز شریف نے فلسطینی متاثرہ علاقوں میں امدادی سامان بھجوانے کیلئے ہنگامی اقدامات کا مطالبہ کر دیا۔اپنے ایک بیان میں سابق وزیر اعظم شہباز شریف کا کہنا تھا کہ اسرائیلی جبر و استبداد اور ظلم کے نتیجے میں دوہرا انسانی المیہ جنم لے رہا ہے، اسلامی دنیا کی قیادت عالمی برادری کے ساتھ مل کر فلسطینیوں کی نسل کشی روکے۔ سابق وزیر اعظم کا کہنا تھا کہ فلسطین کربلا کا منظر پیش کر رہا ہے جہاں پانی اور خوراک بند ہے، بے گناہ بچے، خواتین اور شہری قاتلوں کے نرغے میں ہیں، بڑھتی بے حسی اور بے بسی دنیا کو سنگین نتائج کی طرف دھکیل رہی ہے۔ شہباز شریف کا کہنا تھا کہ انسانیت کو بچانے میں ناکامی دنیا کے امن کی ناکامی ہوگی۔ ان کا کہنا تھا کہ ایک ایک لمحے کی تاخیر بے گناہوں کی شہادتوں کی صورت نکل رہی ہے، محصور فلسطینیوں کیلئے امدادی قافلوں کو اجازت نہ ملنا عالمی اتھارٹی اور قانون کو مذاق بنا رہا ہے، فلسطینی بچوں کے آنسووں نے دنیا کو ہلا کر رکھ دیا ہے۔ انہوں نے مزید کہا کہ مظلوموں کا لہو بہانے سے ناجائز ریاست کا وجود جائز نہیں ہو گا، جلد اس مسئلے کا حل نہ نکلا تو ناقابل تلافی نقصان ہو گا۔

کریڈٹ: انڈیپنڈنٹ نیوز پاکستان-آئی این پی

الیکشن کمیشن نے توہین الیکشن کمیشن کیس میں چیئرمین پی ٹی آئی کو پیش نہ کرنے پر سیکرٹری وزارت داخلہ طلب کر تے ہوئے کہا ہے کہ وزارت داخلہ ایک شخص کو سکیورٹی نہیں دے سکتی تو الیکشن کیسے کرائے گی؟ وزارت داخلہ کیسے ہمیں حکم دے سکتی ہے؟ سیکرٹری خود پیش ہوں۔ منگل کو الیکشن کمیشن کے ممبر سندھ نثار درانی کی سربراہی میں 4 رکنی کمیشن نے پاکستان تحریک انصاف کے چیئرمین عمران خان اور سابق وفاقی وزرا اسد عمر اور فواد چوہدری کے خلاف توہین الیکشن کمیشن کیس کی سماعت کی۔ سماعت کے دوران فواد چوہدری اور اسد عمر پیش پیش ہوئے جبکہ اڈیالہ جیل میں قید چیئرمین پی ٹی آئی کو پیش نہیں کیا گیا جس پر پاکستان تحریک انصاف کے وکیل شعیب شاہین نے کہا کہ الیکشن کمیشن کی اصل توہین تو آج ہوئی ہے۔ اے آئی جی آپریشن نے چیئرمین پی ٹی آئی کو پیش نہ کرنے کے حوالے سے رپورٹ جمع کرائی اور کمیشن کو بتایا کہ راولپنڈی گنجان آبادی پر مشتمل ہے اور خطرات سے خالی نہیں، چیئرمین پی ٹی آئی خود کہہ چکے ہیں کہ ان کی زندگی کو خطرات ہیں۔ ممبر سندھ نثار درانی نے سوال کیا کہ آپ کو یقین ہے کہ پی ٹی آئی چیئرمین جو کہتے تھے وہ درست ہے ؟۔ وزارت داخلہ کی جانب سے تجویز دی گئی کہ الیکشن کمیشن اڈیالہ جیل میں جا کر کیس کی سماعت کر لے جس پر کمیشن نے کہا کہ آپ چیئرمین پی ٹی آئی سے لکھوا کے لے آئیں کہ میں معذرت کرتا ہوں۔ کمیشن کی جانب سے کہا گیا کہ وزارت داخلہ ایک شخص کو سکیورٹی نہیں دے سکتا تو الیکشن کیسے کرائیں گے، وزارت داخلہ کیسے ہمیں حکم دے سکتی ہے؟ سیکرٹری خود پیش ہوں۔ بعدازاں 4 رکنی کمیشن نے چیئرمین پی ٹی آئی کو پیش نہ کرنے پر سیکرٹری وزارت داخلہ کو طلب کرتے ہوئے کیس کی مزید سماعت 13 نومبر تک ملتوی کر دی۔

کریڈٹ: انڈیپنڈنٹ نیوز پاکستان-آئی این پی

سابق وزیراعظم نواز شریف کی اسلام آباد کی عدالتوں میں پیشی کے پیش نظر پولیس نے انہیں خصوصی سیکیورٹی فراہم کر دی۔ تفصیلات کے مطابق قائد ن لیگ نوازشریف کی سیکیورٹی اسکواڈ میں 3 اسپیشل پولیس وینز بھی شامل کردی گئیں، اے ٹی ایس اہلکاروں کا خصوصی دستہ بھی نواز شریف کے ساتھ تعینات کردیا گیا۔ جوڈیشل کمپلیکس کے باہر 500 اہلکار،ہائیکورٹ میں 300 اہلکار تعینات کردیا گیا جبکہ پولیس نے ہائی کورٹ جانے والے راستوں کو خار دار تاریں لگا کر بند کردیا۔ یاد رہے کہ نواز شریف کو پہلے ہی سابق وزیراعظم کی سیکیورٹی دی جا چکی ہے، پولیس حکام کا کہنا ہے نوازشریف کوبلیو بک کے مطابق سابق وزیراعظم کی سیکورٹی فراہم کی گئی۔ نواز شریف کوسکیورٹی کی دو گاڑیاں، رہائشگاہ پر پولیس گارڈ تعینات کردی گئی ہے۔

کریڈٹ: انڈیپنڈنٹ نیوز پاکستان-آئی این پی

راولپنڈی سے اسلام آباد جانے والی میٹرو بس حادثے کا شکار ہوگئی۔ فیض احمد فیض اسٹیشن پرمیٹرو بس بائونڈری وال سے ٹکرا گئی، حادثے کے باعث متعدد مسافر معمولی زخمی، شیشے ٹوٹ گئے۔ میٹرو بس کو حادثہ ڈرائیور کی مبینہ غفلت کے باعث پیش آیا،بس سنگل ٹریک پر اوورٹیکنگ کرتے ہوئے بائونڈری سے ٹکرائی۔

کریڈٹ: انڈیپنڈنٹ نیوز پاکستان-آئی این پی

سابق وزیر داخلہ اور عوامی مسلم لیگ کے سربراہ شیخ رشید احمد کی طبیعت اچانک ناساز ہونے کے باعث انہیں امراض قلب کے ہسپتال منتقل کردیا گیا۔ گزشتہ رات شیخ رشید کو سینے میں تکلیف کے باعث راولپنڈی انسٹیٹیوٹ آف کارڈیالوجی (آر آئی سی) ہسپتال منتقل کیا گیا۔ شیخ رشید کا ایمرجنسی میں طبی معائنہ کیا گیا جس کے بعد ڈاکٹرز نے انہیں مختلف ٹیسٹ کروانے کی تجویز دی۔ شیخ رشید کی ای سی جی کی گئی ہے، انہیں کچھ دیر تک زیر نگرانی رکھا جائے گا۔ شیخ رشید کو سینے میں تکلیف کی شکایت پر آر آئی سی ہسپتال لایا گیا۔ ڈاکٹرز کی جانب سے شیخ رشید کے دل اور خون کے مختلف ٹیسٹ کرنے تک ہسپتال میں انڈر آبزرویشن رکھا جائے گا۔ شیخ رشید کا صبح معائنہ کرکے حتمی رائے قائم کرسکیں گے۔

کریڈٹ: انڈیپنڈنٹ نیوز پاکستان-آئی این پی

دنیا بھر میں پولیو کا عالمی دن منایا گیا لیکن بدقسمتی سے پاکستان اور افغانستان ہی صرف دو ملک ایسے باقی ہیں جو پولیو وائرس کو ختم کرنے میں ناکام نظر آتے ہیں۔ سندھ میں چند ہفتے قبل پولیو وائرس کا ایک کیس رپورٹ ہونے کے بعد ماہرین تشویش کا اظہار کر رہے ہیں۔ ماہرین کے مطابق اس سال پاکستان میں اب تک پولیو وائرس سے متاثرہ بچوں کی تعداد چار ہوچکی ہے، بدقسمتی سے لوگوں میں آگاہی کی کمی اور حکومت کی عدم توجہی سے 30 فیصد بچوں کو مکمل حفاظتی ٹیکے نہیں لگ پاتے۔ کراچی کے تقریبا ہر ضلع سے پولیو وائرس کے سیمپلز ملنا اس بات کا ثبوت ہے کہ شہر کے کئی بچے پولیو وائرس کے پھیلا کا سبب بن سکتے ہیں جو یقینا ایک خطرناک مسئلہ ہے۔ ماہرین کے مطابق پولیو وائرس 5 سال سے کم عمر کے بچوں کو زندگی بھر کے لیے نہ صرف مفلوج کرسکتا ہے بلکہ ان کی موت کا بھی باعث بن سکتا ہے، ایسے علاقے جہاں صفائی کا انتظام نہ ہو وہاں پولیو کا وائرس بہت تیزی سے پھیل سکتا ہے۔ ماہرین کا کہنا ہے کہ پولیو وائرس کے مکمل خاتمے کے لیے عوام کو مکمل ویکسینیشن سے متعلق شعور و آگاہی فراہم کرنا لازمی ہے جبکہ پولیو وائرس سے نجات کیلئے آلودہ اور گندے پانی کا مسئلہ بھی حل کرنا ہوگا۔

کریڈٹ: انڈیپنڈنٹ نیوز پاکستان-آئی این پی

انسداد دہشت گردی عدالت نے ڈاکٹر یاسمین راشد سمیت 24 ملزمان کی ضمانتوں پر پراسیکیوشن اور سپیشل پراسیکیوٹر کو دلائل دینے کی ہدایت کر دی۔ لاہور کی انسداد دہشت گردی عدالت کے جج ارشد جاوید نے عسکری ٹاور حملہ کیس میں ڈاکٹر یاسمین راشد سمیت 24 ملزمان کی ضمانتوں کی درخواستوں پر سماعت کی۔ دوران سماعت عدالت نے کہا ہے کہ پراسیکیوشن ضمانتوں پر دلائل مکمل کرے جس پر پراسیکیوشن نے جواب دیا کہ مقدمات کا تفصیلی ریکارڈ موجود نہیں ہے، عدالت تاریخ دے دے آئندہ سماعت پر دلائل دیں گے۔ بعدازاں عدالت نے پراسیکیوشن اور سپیشل پراسیکیوٹر کو دلائل دینے کی ہدایت کرتے ہوئے کیس کی مزید سماعت 28 اکتوبر تک ملتوی کر دی۔ واضح رہے کہ ڈاکٹر یاسمین راشد، صداقت حسین، رفیق خان، اعزاز رفیق سمیت 24 ملزمان نے جیل سے اپنے وکلا کے ذریعے ضمانت کی درخواستیں دائر کی ہیں، ملزمان کے خلاف تھانہ گلبرگ میں مقدمہ درج ہے۔

کریڈٹ: انڈیپنڈنٹ نیوز پاکستان-آئی این پی

انسداد دہشت گردی عدالت نے سابق ایم پی اے نذیر چوہان اور دیگر کیخلاف پولیس پر حملہ کیس کی سماعت یکم نومبر تک ملتوی کر دی۔ انسداد دہشت گردی عدالت کی ایڈمن جج عبہر گل خان نے کیس پر سماعت کی، نذیر چوہان نے پیش ہو کر حاضری لگائی۔ دوران سماعت عدالت نے ملزمان کے خلاف مزید گواہوں کو بیانات کے لیے طلب کر لیا۔ واضح رہے کہ ملزمان کے خلاف چار گواہوں کے بیانات قلمبند کیے جا چکے ہیں، پراسیکیوشن نے پولیس کی اخراج رپورٹ کو مسترد کر دیا تھا، نذیر چوہان، سعد نذیر، عابد علی، رفاقت علی، حافظ رضوان، قاسم، فیصل مقبول اور قمر عباس کی اخراج رپورٹ پیش کی گئی تھی۔ یاد رہے کہ نذیر چوہان اور دیگر کیخلاف 2022 میں تھانہ چونگ میں پولیس پر حملے کے الزام میں مقدمہ درج کیا گیا تھا۔

کریڈٹ: انڈیپنڈنٹ نیوز پاکستان-آئی این پی

مالی بحران سے جڑا ایندھن کا مسئلہ تاحال برقرار ہے جس کے باعث منگل کو بھی پی آئی اے کی 30 سے زائد پروازیں منسوخ ہو گئیں۔ کراچی سے اسلام آباد کی 4 دو طرفہ، کراچی سے تربت کی دو اور لاہور کی 3 پروازیں منسوخ ہوئیں اسی طرح کراچی سے سکھر اور کراچی سے کوئٹہ کی دو طرفہ 4 جبکہ دمام سے کراچی کی پرواز بھی منسوخ ہو گئی ہے۔ فلائٹ شیڈول کے مطابق لاہور سے کوئٹہ کی دو، اسلام آباد سے دبئی کی دو اور وفاقی دارالحکومت سے بھی ابوظہبی کیلئے دو پروازیں منسوخ کی گئی ہیں۔ اسی طرح اسلام آباد سے گلگت کیلئے دو طرفہ 4، اسلام آباد، کوئٹہ اور سکردو بھی کی 4 پروازیں منسوخ ہوئیں، اسلام آباد سے گلگت اور سکھر کیلئے آنے جانے کی 4 اور دوحہ سے اسلام آباد کی پرواز بھی منسوخ ہو گئی۔ ملتان سے ریاض کی پی کے 2 جبکہ دبئی کی ایک پرواز منسوخ کی گئی ہے، شارجہ سے ملتان کی پرواز پی کے 294 منسوخ کردی گئی، سیالکوٹ سے شارجہ کیلئے دو طرفہ دونوں پروازیں منسوخ کر دی گئی ہیں، پشاور سے ریاض اور شارجہ کے لیے دو طرفہ 4 پروازیں منسوخ کر دی گئی ہیں، اسی طرح دبئی اور ابوظہبی سے پشاور کی پروازیں پی کے 217، پی کے 218 منسوخ کر دی گئی ہیں۔

کریڈٹ: انڈیپنڈنٹ نیوز پاکستان-آئی این پی

آزاد ریاست جموں و کشمیر کا 76واں یوم تاسیس ملی جوش و خروش اور تجدید عہد کے ساتھ منایا گیا ۔ 24 اکتوبر 1947 کو ظالم ڈوگرہ حکمرانوں کے تسلط کے خلاف کشمیری مسلمانوں نے مسلح جدوجہد کر کے ریاست جموں و کشمیر کا ایک حصہ آزاد کروایا تھا۔ منگل کو یوم تاسیس کی مناسبت سے مرکزی تقریب دارالحکومت مظفرآباد میں پریڈ گراونڈ میں منعقد ہو ئی ، مرکزی تقریب میں آزاد کشمیر کے صدر اور وزیراعظم نے خصوصی شرکت کی ۔ یوم تاسیس کے موقع پر آزاد کشمیر کے وزیراعظم چودھری انوار الحق نے اپنے پیغام میں کہا کہ یہ دن ان شہدا کی قربانیوں کا ثمر ہے جنہوں نے یہ خطہ آزاد کروایا۔ انہوں نے کہا کہ مقبوضہ جموں و کشمیر کے مظلوم بہن بھائیوں کے ساتھ کھڑے ہیں، ہماری حکومت کی اولین ترجیح تحریک آزادی کشمیر ہے۔ چودھری انوارالحق کا مزید کہنا تھا کہ وہ دن دور نہیں جب مقبوضہ جموں و کشمیر کے عوام بھارتی تسلط سے آزادی حاصل کر کے پاکستان کے ساتھ الحاق کریں گے۔

کریڈٹ: انڈیپنڈنٹ نیوز پاکستان-آئی این پی

نگران وزیر اعلی پنجاب محسن نقوی نے کہا ہے کہ پولیو کے چیلنج سے نمٹنے کے لئے معاشرے کے ہر طبقے کو اپنا موثر کردار ادا کرنا ہوگا۔ نگران وزیر اعلی پنجاب محسن نقوی نے پولیو کے عالمی دن پر اپنے پیغام میں کہا ہے کہ دنیا نے پولیو کے مرض کو مات دے دی ہے لیکن پاکستان اور افغانستان میں ابھی تک پولیو موجود ہے، پاکستان کو پولیو سے پاک کرنے کی ذمہ داری ہر پاکستانی کے کندھے پر ہے۔ محسن نقوی نے کہا کہ والدین سے اپیل ہے کہ بچوں کو انسداد پولیو کے قطرے پلائیں اور موذی مرض سے بچائیں، پولیو کے خلاف جنگ میں شامل ورکرز اور آرگنائزیشنز کی کاوشوں کو سلام کرتا ہوں۔ انہوں نے مزید کہا کہ مشترکہ کوششوں سے ہی ہم آئندہ نسلوں کے لیے اس کرہ ارض سے پولیو کا خاتمہ کر سکتے ہیں، آج کے دن اس بیماری کو جڑ سے ختم کرنے کا عہد کرتے ہیں۔

کریڈٹ: انڈیپنڈنٹ نیوز پاکستان-آئی این پی

نگران وزیر اعلی پنجاب محسن نقوی نے لاہور پرائم سی بی ڈی پنجاب قائد ڈسٹرکٹ پراجیکٹ کا دورہ کیا اور تعمیراتی کاموں کا جائزہ لیا۔ وزیر اعلی محسن نقوی نے سی بی ڈی پنجاب قائد ڈسٹرکٹ سے والٹن روڈ تک تعمیر ہونے والی سڑک کا معائنہ کیا، پراجیکٹ پر کام کی رفتار کا جائزہ لیا اور والٹن ریلوے ٹریک پر اوورہیڈ برج پراجیکٹ کا تعمیراتی کام جلد از جلد شروع کرنے کی ہدایت کی، محسن نقوی نے پل کی سائٹ تک جاری تعمیراتی سرگرمیوں کا مشاہدہ بھی کیا۔ محسن نقوی نے والٹن اوورہیڈ برج پراجیکٹ کو فاسٹ ٹریک پر مکمل کرنے کی ہدایت کی۔ اس موقع پر چیف ایگزیکٹو آفیسر سی بی ڈی پنجاب عمران امین نے قائد ڈسٹرکٹ پراجیکٹ پر ہونے والی پیش رفت بارے وزیراعلی پنجاب کو بریف کیا۔ بریفنگ میں بتایا گیا کہ لاہور پرائم سی بی ڈی پنجاب قائد ڈسٹرکٹ کے انفراسٹرکچر کا کام رواں ماہ میں مکمل ہو جائے گا، منصوبے کے انفراسٹرکچر میں روڈ ورک، سیوریج، پانی، بجلی اور مواصلات کا نظام شامل ہے، پراجیکٹ میں گرین ایریا کے لئے یکساں جگہ دی گئی ہے۔ دوران بریفنگ مزید بتایا گیا کہ سی بی ڈی پنجاب قائد ڈسٹرکٹ تا والٹن روڈکی کل لمبائی 4.2 کلومیٹر ہے اور اس میں بلیو روڈ ٹیکنالوجی استعمال کی جا رہی ہے، سی بی ڈی پنجاب قائد ڈسٹرکٹ تا والٹن روڈ سگنل فری کوریڈور ہوگا جس میں تین لینز اور ایک فلائی اوور شامل ہے، پراجیکٹ سب بیس مکمل ہوگئی ہے جبکہ والٹن فلائی اوور کا پائل لوڈ بھی ٹیسٹ مکمل کر لیا گیا ہے۔ اس موقع پر گفتگو کرتے ہوئے وزیراعلی پنجاب محسن نقوی کا کہنا تھا کہ یہ منصوبہ لاہور کی ترقی کو نئی سمت دے گا، سینٹر پوائنٹ کو والٹن روڈ سے منسلک کرنے سے فاصلہ تین منٹ میں طے ہوگا، سی بی ڈی کا پورا پراجیکٹ مکمل ہونے سے اربوں روپے کی سرمایہ کاری آئے گی۔ صوبائی وزیر اطلاعات عامر میر، سیکرٹری ہاسنگ، سیکرٹری اطلاعات، سی سی پی او، این ایل سی کے حکام، ڈپٹی کمشنر، چیف ایگزیکٹو آفیسر سی بی ڈی، چیف آپریٹنگ آفیسر سی بی ڈی بریگیڈیئر (ر) منصور اور متعلقہ حکام بھی اس موقع پر موجود تھے۔

کریڈٹ: انڈیپنڈنٹ نیوز پاکستان-آئی این پی

پنجاب کی عدالتوں میں تمام ملزمان کی ویڈیو لنک کے ذریعے سماعت کا فیصلہ کرلیا گیا۔ لاہور ہائیکورٹ کے جسٹس شجاعت علی خان کی زیر صدارت اہم اجلاس ہوا جس میں آئی جی جیل خانہ جات پنجاب، آئی ٹی ماہرین سمیت دیگر شریک ہوئے۔ اجلاس میں فیصلہ ہوا کہ پنجاب کی عدالتوں میں تمام ملزمان کو کچہریوں میں پیش کرنے کے بجائے ویڈیو لنک کے ذریعے پیش کیا جائے گا۔ منصوبے سے قومی خزانے کی کروڑوں روپے کی بچت ہوگی، منصوبے سے کچہریوں میں رش کم اور کیسز کا بوجھ بھی ختم ہوگا، وہاڑی میں پائلٹ پراجیکٹ کامیاب ہونے کے بعد منصوبے کو پورے پنجاب میں نافذ کرنے کا فیصلہ کیا گیا ہے۔ دوسرے مرحلے میں منصوبے پر یکم نومبر سے پنجاب کے 7 اضلاع راولپنڈی، جہلم، چکوال، میانوالی ،مظفر گڑھ، بھکر چنیوٹ میں عمل درآمد ہو گا۔

کریڈٹ: انڈیپنڈنٹ نیوز پاکستان-آئی این پی

چین کے صدر، کمیونسٹ پارٹی آف چائنہ کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین  شی جن پھنگ بیجنگ میں عظیم عوامی ہال میں خواتین کی 13ویں قومی کانگریس میں شریک ہیں۔(شِنہوا)

کمیونسٹ پارٹی آف چائنہ اور چینی ریاست کے رہنما شی جن پھنگ، لی  چھیانگ ، ژاؤ لیجی، وانگ ہوننگ، چھائی چھی ، ڈنگ شوئی شیانگ اور لی شی بیجنگ میں عظیم عوامی ہال میں خواتین کی 13ویں قومی کانگریس کو مبارکباد پیش کرنے کے لیے اس میں شریک ہیں۔(شِنہوا)

چین کی عوامی سیاسی مشاورتی کانفرنس (سی پی پی سی سی ) کی قومی کمیٹی کے چیئرمین وانگ ہوننگ بیجنگ میں پاکستانی سینیٹ کے چیئرمین صادق سنجرانی سے ملاقات کر رہے ہیں۔(شِنہوا)

چین کی عوامی سیاسی مشاورتی کانفرنس (سی پی پی سی سی ) کی قومی کمیٹی کے چیئرمین وانگ ہوننگ بیجنگ میں پاکستانی سینیٹ کے چیئرمین صادق سنجرانی سے ملاقات کر رہے ہیں۔(شِنہوا)

چین کی عوامی سیاسی مشاورتی کانفرنس (سی پی پی سی سی ) کی قومی کمیٹی کے چیئرمین وانگ ہوننگ بیجنگ میں پاکستانی سینیٹ کے چیئرمین صادق سنجرانی سے ملاقات کر رہے ہیں۔(شِنہوا)

ایک طبی کارکن غزہ کی پٹی کے جنوب میں خان یونس شہر کے مرکز میں اسرائیلی فضائی حملوں کے بعد ناصر ہسپتال میں ایک زخمی بچے کا علاج کر رہی ہے۔(شِنہوا)

بیجنگ (شِنہوا) چین نے آسٹریلوی وزیر اعظم انتھونی البانیز کے دورہ اور چھٹی چائنہ انٹرنیشنل امپورٹ ایکسپو (سی آئی آئی ای) میں شرکت کا خیر مقدم کیا ہے۔

وزارت خارجہ کی ترجمان ماؤ ننگ نے پیر کو روزانہ کی پریس کانفرنس میں  انتھونی البانیز کے دورہ سے متعلق ایک سوال کا جواب دیتے ہوئے کہا کہ آسٹریلوی وزیر اعظم 4 سے 7 نومبر تک چین کا دورہ اور چھٹی چائنہ انٹرنیشنل امپورٹ ایکسپو میں شرکت کریں گے۔

ترجمان نے کہا کہ چینی وزیراعظم لی چھیانگ کی دعوت اور چھٹی چائنہ انٹرنیشنل امپورٹ ایکسپو میں شرکت پر وزیر اعظم انتھونی البانی کا خیرمقدم کرتے ہیں۔ انہوں نے کہا کہ  مضبوط اور مستحکم چین-آسٹریلیا تعلقات دونوں ممالک اور دونوں عوام کے بنیادی مفادات میں ہیں اور یہ علاقائی اور عالمی امن و استحکام کے لیے بھی سازگار ہیں۔

کوہاٹ بورڈ نے آل پاکستان انٹر بورڈ فٹ سال چیمپئن شپ جیت لی جبکہ سوات بورڈ کی ٹیم دوسرے اور کوئٹہ کی ٹیم تیسرے نمبر پر رہی۔ چیمپئن شپ کی اختتامی تقریب کے مہمانان خصوصی سوات ایجوکیشن بورڈ آف انٹرمیڈیٹ اینڈ سیکنڈری ایجوکیشن کے چیئرمین عمر حسین اور انٹر بورڈ کوآڈرینیش کمیٹی کے سیکرٹری محمد بخش تھے جہنوں نے کامیابی حاصل کرنے والے کھلاڑیوں میں انعامات تقسیم کئے۔ اس موقع پر سوات بورڈ کے ڈائریکٹر سپورٹس افضال احمد، مردان بورڈ کے ڈائریکٹر سپورٹس محمد صابر،بنوں بورڈ کے ڈائریکٹر سپورٹس سید عبدالطیف شاہ، ٹورنامنٹ آرگنائزنگ سیکرٹری فہمید تلوکر، اسلام آباد سوکر فٹ سال ایسوسی ایشن کے صدر رانا تنویر احمد، کے علاوہ میزبان راولپنڈی بورڈ کے آفیشلز شمشاد علی، حافظ محفوظ احمد، جمیل خان، ملک سہیل، راجہ سرورِ خان، رانا عابد اورحامد صدیق کے علاوہ شائقینِ کی کثیر تعداد بھی موجود تھی۔ گزشتہ روز پاکستان سپورٹس کمپلیکس، اسلام آباد میں چیمپئن شپ کا فائنل میچ کوہاٹ بورڈ اور سوات بورڈ کی ٹیموں کے درمیان کھیلا گیا جس میں کوہاٹ بورڈ نے سوات بورڈ کو 3-4پنلٹی ککس پر ہرا دیا،مقرہ وقت میں دونوں ٹیمیں 2-2گول سے برابر رہیں،تیسری پوزیشن کے کھیلے گئے میچ میں کوئٹہ بورڈ نے اسلام آباد بورڈ کو 2-7گول سے ہرا دیا،میچ کمشنر کے فرائض رانا تنویر احمد نے جبکہ ریفریز کے فرائض محمد انور خان، عارف گل اور توحید گلزار نے انجام دیئے۔ پاکستان فٹ سال فیڈریشن کے صدر حضرت علی خان اور سیکرٹری جنرل عدنان ملک نے آل پاکستان انٹر بورڈ فٹ بال چیمپئن شپ کے کامیاب انعقاد پر ٹورنامنٹ کمیٹی اور ٹورنامنٹ میں اول پوزیشن پر آنے والی ٹیم کوہاٹ بورڈ، دوسری پوزیشن سوات بورڈ اور تیسری پوزیشن حاصل کرنے والی ٹیموں کوئٹہ کے کھلاڑیوں اور انتظامیہ کو مبارکباد دی ہے،چیمپئن شپ میں ملک بھر سے گیارہ بورڈز کی ٹیموں نے حصہ لیا جن کو دو گروپوں میں تقسیم کیا گیا۔ گروپ اے مردان، کوہاٹ، کراچی (بی آئی ای)، سوات، پشاور اور بنوں کی ٹیمیں شامل تھیں جبکہ راولپنڈی، اسلام آباد، فیصل آباد، کوئٹہ اور کراچی(ایس بی ٹی ای)کی ٹیموں کو گروپ بی میں رکھا گیا تھا۔

کریڈٹ: انڈیپنڈنٹ نیوز پاکستان-آئی این پی

پاکستان والی بال فیڈریشن کے زیر اہتمام انٹرنیشنل والی بال ٹورنامنٹس کے لئے کھلاڑیوں کے ٹرائلز پاکستان سپورٹس کمپلیکس اسلام آباد کے حمیدی ہال میں جاری ہیں۔قومی کوچ سعید احمد خان نے بتایا کہ بوائز انڈر 18 کے پہلے مرحلے ٹرائلز ملک کے مختلف شہروں میں منعقد ہوا جس میں ملک بھر سے چھ سو سے زائد کھلاڑیوں نے حصہ لیا ٹرائلز میں اچھی کارکردگی دکھانے والے 45 کھلاڑیوں کا چنائو فائنل ٹرائلز کے لئے کیا گیا اور فائنل ٹرائلز جاری ہیں۔ انہوں نے کہا کہ فائنل ٹرائلز میں اچھی کارکردگی دکھانے والے 22 کھلاڑیوں کو قومی ٹیم میں شامل کیا جائے گا۔ ان کھلاڑیوں کے ٹرائلز غیرملکی برازیلین کوچ اسنانیا کیعلاوہ قومی کوچز سعید احمد خان،احسان اقبال اور محمد اسماعیل خان لے رہے ہیں جبکہ ان کے ہمراہ فزیکل ٹریننر برازیلین لوکس بھی ہیں۔ چوہدری محمد اکرم ٹیم کے ہمراہ بطور منیجر اور کیمپ کمانڈنٹ کی ڈیوٹی انجام دیں گے۔ منتخب ٹیم آئندہ برس جون میں ایشین انڈر 18 والی بال چیمپئن شپ میں شرکت کرے گی۔ سعید احمد نے کہا کہ یہ سب پاکستان والی بال فیڈریشن کے چیئرمین چوہدری محمد یعقوب کی ذاتی دن رات کوشش کا نتیجہ ہے اور انہوں نے کہا کہ چیئرمین چوہدری محمد یعقوب کی ہدایت کے مطابق پاکستان کی ٹیم میرٹ کی بنیاد پر مضبوط تیار کی جائے۔

کریڈٹ: انڈیپنڈنٹ نیوز پاکستان-آئی این پی

انٹر ڈویژن نیشنل باسکٹ بال چیمپئین شپ گریڈ ون میں دفاعی چیمپئین فیصل آباد، اسلام آباد اور پشاور ڈویژن نے پول راونڈ میں مسلسل دوسرا میچ جیت کر سیمی فائنلز کیلئے کوالیفائی کرلیا۔ فیڈرل باسکٹ بال ایسوسی ایشن کے زیر اہتمام پاکستان سپورٹس کمپلیکس اسلام آباد میں جاری چیمپئین شپ کے دوسرے روز پاکستان باسکٹ بال فیڈریشن کے صدر بریگیڈئر (ر) افتخار منصور، فیڈرل باسکٹ بال ایسوسی ایشن کے سیکرٹری جنرل اور چیمپئین شپ آرگنائزنگ سیکرٹری اوج ظہور، ہیڈ کوچ ملک ریاض ، اعظم ڈار سمیت بڑی تعداد میں شائقین بھی موجود تھے۔ چیمپئین شپ کے دوسرے راونڈ میں دفاعی چیمپئین فیصل آباد نے فتوحات کا سلسلہ جاری رکھتے ہویرانا بلاول کے 19اور حنان خان کے 15پوائنٹس کی بدولت گوجرانوالہ ڈویژن کو 42کے مقابلے میں 59پوائنٹس سے شکست دی،اسلام آباد نے راولپنڈی ڈویژن کو 54پوائٹس کے مقابلے میں 66پوائنٹس سے شکست دیتے ہوئے سیمی فائنل کیلئے کوالیفائی کیا۔ اسلام آباد کی کامیابی میں اشراب بٹ کے19 اور بختاور تیمور کے 10پوائنٹس نے اہم کردار ادا کیا۔ تیسرے میچ میں پشاورڈویژن نے کراچی کیخلاف 63ـ77پوائنٹس سے کامیابی حاصل کی۔ پشاور کی طرف سے محمد بلال 24، عبدالوہاب 21پوائنٹس سکور کئے جبکہ لاہور ڈویژن نے اپنے جارحانہ کھیل کی بدولت ہزارہ ڈویژن کو یکطرفہ مقابلے میں 32ـ76پوائنٹس سے شکست دی۔

کریڈٹ: انڈیپنڈنٹ نیوز پاکستان-آئی این پی

سپینش فٹ بال لیگ لالیگا میں پوائنٹس ٹیبل پر ریال میڈرڈ پہلے اور گیرونا دوسرے نمبر موجود ہے، دونوں ٹیموں کے 25،25پوائنٹس ہیں، سپینش فٹ بال لیگ لالیگا رواں سال 11اگست 2023کو شروع ہوا اور 26مئی 2024کو اختتام پذیر ہوگا،بارسلونا دفاعی چیمپئن ہے، جس نے گزشتہ سیزن میں اپنا 27واں ٹائٹل جیتا تھا،اب تک کھیلے گئے لیگ میچز میں 16ٹیمیں 10،10میچز کھیل چکی ہیں جس میں ریال میڈرڈ اور گیرونا کی ٹیمیں 8،8میچز جیت چکی ہیں اور بالترتیب پہلے ،دوسرے نمبر پر ہیں،دفاعی چیمپئن بارسلونا کی ٹیم بھی 10میچز کھیل چکی ہے اور 7میچز میں کامیابی کے بعد وہ پوائنٹس ٹیبل پر 24پوائنٹس کے ساتھ تیسرے نمبر پر ہے،اٹلیٹیکو میڈرڈ کی ٹیم 9میچز کھیل چکی ہے جس میں سے وہ 7میچ جیت کر 22پوائنٹس حاصل کر چکی ہے اور وہ 22پوائنٹس کے ساتھ ٹیبل پر چوتھے نمبر پر ہے،ریال سوسی ڈیڈ کی ٹیم 18پوائنٹس کے ساتھ پانچویں، ایتھلیٹک بلبا کی ٹیم 17پوائنٹس کے ساتھ چھٹے نمبر پر ہے ، ریوویاکانو کی ٹیم 16پوائنٹس کے ساتھ ساتویں نمبر پر ہے،رئیل بیٹس 14پوائنٹس کے ساتھ آٹھویں نمبر پر ہے، اوساسونا کی ٹیم 13پوائنٹس کے ساتھ نویں نمبر پر ہے جبکہ ویلنسیا کی ٹیم 11پوائنٹس کے ساتھ دسویں نمبر پر ہے ۔

کریڈٹ: انڈیپنڈنٹ نیوز پاکستان-آئی این پی