لاہور ہائیکورٹ نے عورت مارچ کے منتظمین کو لاہور میں عورت مارچ کی مشروط اجازت دے دی۔ رپورٹ کے مطابق لاہور ہائیکورٹ کے جسٹس انوار حسین نے عورت مارچ کو این او سی جاری نہ کرنے کے خلاف درخواست پر سماعت کرتے ہوئے عورت مارچ کو مشروط مارچ کی اجازت دیدی۔عدالت نے ہدایت کی ہے کہ عورت مارچ کی انتظامیہ کے سوشل اکاونٹس پر کوئی متنازع بیان اپ لوڈ نہیں کیا جائے گا۔ مارچ میں آئین پاکستان کے خلاف بھی کوئی اقدام نا کیا جائے۔عدالت نے کہا کہ نادرا آفس شملہ پہاڑی سے لیکر فلیٹی ہوٹل تک مارچ کیا جاسکتا ہے جبکہ عورت مارچ دوپہر ڈیرھ بجے سے لیکر شام چھ بجے تک ہوگا۔ عدالت نے مزید واضح کیا کہ کسی خاص فرقے کے مہمان کو مدعو نہیں کیا جائے گا۔

کریڈٹ: انڈیپنڈنٹ نیوز پاکستان-آئی این پی

انسداد دہشتگردی کی عدالت نے مسلم لیگ(ن)کے مرکزی رہنما اور وزیر داخلہ رانا ثنا اللہ کے ناقابل ضمانت وارنٹ گرفتاری جاری کر دیے۔ گوجرانوالہ کی انسداد دہشت گردی عدالت میں وفاقی وزیر داخلہ رانا ثنا اللہ نے حاضری سے استثنی کی درخواست دی تھی، عدالت نے درخواست خارج کرتے ہوئے ناقابل ضمانت وارنٹ گرفتاری جاری کر دیے۔ وفاقی وزیر داخلہ کے نا قابل ضمانت وارنٹ گرفتاری اے ٹی سی کے جج رانا زاہد اقبال خان نے جاری کیے، عدالت نے پولیس کو حکم دیا ہے کہ رانا ثنا اللہ کو گرفتار کرکے 28 مارچ کو پیش کیا جائے۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کے رہنما سابق وزیر اعلیٰ پنجاب چوہدری پرویز الہیٰ نے کہا ہے کہ پی ٹی آئی کے لوگ بہت خاندانی ہیں ، عزت کرتے ہیں، جتنی عزت عمران خان نے دی شاید ہی کبھی کسی لیڈر نے کی ہو ، نواز شریف کوئی لیڈر نہیں، پی ٹی آئی کی قیادت کے شکر گزار ہیں، جو گیپ تھا وہ فل ہوگیا ، آج بسم اللہ ہوئی اور یہ سلسلہ جاری رہے گا ، پی ٹی آئی کی جماعت میں بہت جنون ہے ، جیسے قائد اعظم کی جماعت میں روح تھی ویسے ہی ان کی تھی ، ن لیگ انتخابات کے نتائج سے ڈر اور مرے جارہے ہیں ، عمران خان نے ایسے ہی مذکرات کی دعوت نہیں دی ۔منگل کے روز پریس کانفرنس کرتے ہوئے سابق وزیر اعلیٰ پنجاب چوہدری پرویز الہیٰ نے کہا کہ پی ٹی آئی کے لوگ بہت خاندانی ہیں ، عزت کرتے ہیں، جتنی عزت عمران خان نے دی شاید ہی کبھی کسی لیڈر نے کی ہو ، نواز شریف کوئی لیڈر نہیں، پی ٹی آئی کی قیادت کے شکر گزار ہیں، جو گیپ تھا وہ فل ہوگیا ، آج بسم اللہ ہوئی اور یہ سلسلہ جاری رہے گا ، مسلم لیگ ن اور پیپلزپارٹی نے انتخابات میں تاخیر کی تو ان کو خود انتخابات لڑنا مشکل ہوجائے گا ، ن لیگ سوچ رہی ہے کہ عام انتخابات کا اعلان کردیا جائے گا ، ن لیگ سمجھتی ہے کہ پی ٹی آئی والے سارے آگئے جیسے ڈانٹونک والے بندر کو بٹھاتے ہیں ، ویسے ان کا حشر ہوگا ، میرے خیال میں مریم نواز اپنے عمل سے ناکام ہوئی ہے ، پہلے دن خان صاحب نے صحیح کہا کہ مریم نواز جب عمران خان کے خلاف بات کرتی ہے تو ان کا گراف اوپر چلا جاتا ہے ، پی ٹی آئی کی جماعت میں بہت جنون ہے ، جیسے قائد اعظم کی جماعت میں روح تھی ویسے ہی ان کی تھی ، ن لیگ انتخابات کے نتائج سے ڈر اور مرے جارہے ہیں ، گزشتہ روز چار بندے نوٹس لے کر آئے ، سارا دن ان کی پریس کانفرنس میں پی ٹی آئی چھائی رہی ، ان کے ہوتے ہوئے اللہ کے فضل سے کوئی نقصان نہیں ہوسکتا ، صحافیوں کے سوالات کا جواب دیتے ہوئے چوہدری پرویز الہیٰ نے کہا کہ عمران خان نے ایسے ہی مذکرات کی دعوت نہیں دی ، آخر انتی دیر لگی ہے چار سال سے مذاکرات کہتے رہے ، اگر خود ہی سامنے آجائیں تو زیادہ اچھا ہوگا ، آصف زرداری میرے خلاف تھوڑے بیان دیتے ہیں کیا؟ عمران خان پر 70سے زائد کیسز ہیں ،سارا پاکستان ان کی عقل پر ہنسے گا ، جتنی عزت عمران خان نے دی تو میں نے نوٹیفکیشن کے کاغذ کا کیا کرنا ہے ۔

کریڈٹ: انڈیپنڈنٹ نیوز پاکستان-آئی این پی

وفاقی وزیر و سینیٹر شیری رحمان نے کہا ہے کہ ساری عمر چور چور کی سیاست کرنیوالے اپنی چوری کا جواب دینے سے کیوں بھاگ رہے ہیں۔ سماجی رابطے کی ویب سائٹ ٹوئٹر پر بیان میں وفاقی وزیر و سینیٹر شیری رحمان پر نے کہا کہ پھر عدالت مفرور خان کو بلاتی رہی لیکن وہ پیش نہیں ہوئے، جس نے کہا تھا میں گھر پہ نہیں، 7تاریخ کو عدالت میں پیش ہوں گا، وہ آج پھر عدالتی نظام اور قانون کی دھجیاں اڑا رہا ہے. ان کاکہنا تھا کہ یہی وہ ملک کی اشرافیہ اور مافیا ہے جو خود کو قانون سے بالا سمجھتی ہے، عدالت کی جانب سے کسی بھی مجرم کو اتنی سہولیات اور مراعات نہیں ملتی جتنی لاڈلے خان کو مل رہی ہیں، کون سے مجرم کیلئے عدالت پورا پورا دن انتظار کرتی ہے؟ شیری رحمان کاکہنا تھا کہ ہمارے رہنماں کو پابندی سے عدالت میں پیش ہونے کا حکم دیا جاتا تھا، قانونی اور عدالتی اصول سب کیلئے ایک کیوں نہیں؟ توشہ خانہ کیس کی عوامی سماعت کا مطالبہ کرنے والے عمران خان عدالت میں سوالات کا جواب دینے سے کیوں انکار کررہے ہیں؟ شیری رحمان نے مزید کہا کہ توشہ خانہ سے چوری نہیں کی تو عدالت میں تلاشی دینے سے کیوں ڈر رہے ہیں؟ ۔

کریڈٹ: انڈیپنڈنٹ نیوز پاکستان-آئی این پی

افغانستان کی وزارت برائے پناہ گزین اور وطن واپسی کے امور کے ایک بیان میں کہا گیا ہے کہ بروز سوموار مجموعی طور پر3 ہزار افغان مہاجرین ہمسایہ ملک پاکستان سے واپس افغانستان پہنچ گئے ہیں۔ وزارت کی جانب سے منگل کے روز جاری کردہ بیان کے مطابق مہاجرین کی افغانستان واپسی کا عمل جاری ہے۔ ایک رپورٹ کے مطابق 25 لاکھ سے زائد اندراج شدہ افغان مہاجرین پاکستان میں رہائش پذیر ہیں اور اتنی ہی تعداد ایران میں بھی قیام پذیرہے۔ گزشتہ 6 ماہ کے دوران ایران سے 2 لاکھ 70ہزارسے زائد افغان مہاجرین واپس آ چکے ہیں۔

کریڈٹ: انڈیپنڈنٹ نیوز پاکستان-آئی این پی

چینی وزارت خارجہ کی ترجمان نے کہا ہے کہ چین کو امید ہے کہ عالمی ادارہ صحتکا سیکرٹریٹ سائنس پر مبنی،با مقصد اور منصفانہ موقف اختیار کرے گا۔ ترجمان ما ؤننگ نے ایک باقاعدہ پریس بریفنگ کے دوران عالمی ادارہ صحت کے ڈائریکٹر جنرل ٹیڈروس ایڈھانوم گیبریئس کے بیان کے بارے میں پوچھے گئے ایک سوال کے جواب میں کہا امید ہے کہ ڈ بلیو ایچ او کا سیکرٹریٹ دیگر ملکوں کے ساتھ ساتھ امریکہ میں نوول کرونا وائرس کی ابتدا کا سراغ لگانے کی تحقیق کے سلسلے میں سیاست کو راستے میں نہیں آنے دے گا۔ ٹیڈروس ایڈھانوم گیبریئس کے بیان کہ عالمی ادارہ صحت چین سے اعداد وشمار شریک کرنے میں شفافیت کا مطالبہ کرتا رہتا ہے چینی ترجمان نے کہا کہ ماخذ کی تحقیق کو مسلسل سیاسی بنایا جا رہا ہے جو کہ اس کام کو مشکل بنا دے گا۔ ما ؤنے کہا کہ چین نے پہلے دن سے ہی عالمی سائنس پر مبنی نوول کرونا وائرس کی ابتدا کا سراغ لگانے میں فعال طور پر تعاون کیا ہے اور اس میں حصہ لیا ہے۔ اس دوران چین اس معاملے کو ہر قسم کا سیاسی رنگ دینے کا سختی سے مخالف رہا ہے۔ ترجمان نے واضح کیا کہ نوول کرونا وائرس کی زد میں آنے کے بعد سے دو بار عالمی ادارہ صحت کے ماہرین مل کر کام کرنے کے لیے چین آئے ہیں

جس کی بدولت سائنس پر مبنی مستند مشترکہ رپورٹ سامنے آئی اور اس نے عالمی سطح پر ماخذ کا سراغ لگانے کے لیے ایک مستحکم بنیاد فراہم کی ہے۔ انہوں نے کہا کہ عالمی ادارہ صحت کی جانب سے نوول پیتھوجینز (ایس اے جی او) کے ماخذ کے لیے سائنسی مشاورتی گروپ قائم کرنے کے بعد چین نے ماہرین کو اس گروپ میں شامل کرنے کی سفارش کی اور چینی ماہرین کے لیے تحقیقات کے نتائج کو عالمی ادارہ صحت کے سیکرٹریٹ اور سائنسی مشاورتی گروپ کے ساتھ شریک کرنے کے لیے تقریبات کا اہتمام کیا۔ ما ؤنے کہا کہ چین نے کسی بھی دوسرے ملک کے مقابلے میں زیادہ اعداد وشمار اور تحقیقی نتائج کا اشتراک کیا ہے اور ماخذ معلوم کرنے میں سب سے زیادہ تعاون کیا ہے۔ ما ؤنے کہا کہ وائرس کی ابتدا کا سراغ لگانا سائنس کا معاملہ ہے۔ یہ مطالعہ صرف اور صرف دنیا بھر کے سائنسدانوں کو مشترکہ طور پر کر نا چاہیے۔ترجمان نے کہا کہ کچھ عرصہ سے امریکی فریق اس معاملے کو سیاست کا رنگ دے کر ہتھیار اور آلے کے طور پر استعمال کررہا ہے۔ امریکہ بغیر کسی معاون ثبوت کے حیاتیاتی ہتھیارکے نظریے اور لیبارٹری سے اخراج کے نظریہ جیسی خرافات پھیلا رہا ہے جس نے سائنس پر مبنی عالمی طور پر ماخذوں کا سراغ لگانے کے لیے ماحول کو شدید طور پر زہر آلود کر دیا ہے۔

کریڈٹ: انڈیپنڈنٹ نیوز پاکستان-آئی این پی

چین کے صدر ، کمیونسٹ پارٹی آف چائنہ کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین شی جن پھنگ نے نجی شعبے کی مثبت اور اعلی معیار کی ترقی بارے مناسب رہنمائی پر زور دیا ہے۔ شی نے ان خیالات کا اظہار چینی عوامی سیاسی مشاورتی کانفرنس کی 14 ویں قومی کمیٹی کے پہلے اجلاس میں شرکت کرنے والے چائنہ نیشنل ڈیموکریٹک کنسٹرکشن ایسوسی ایشن اور آل چائنہ فیڈریشن آف انڈسٹری اینڈ کامرس کے قومی سیاسی مشیروں سے ملاقات میں کیا۔ انہوں نے ان کے مشترکہ گروپ اجلاس میں شرکت کرکے ان کی آرا اور تجاویز کو سنا۔ شی نے اس بات پر زور دیا کہ کمیونسٹ پارٹی آف چائنہ کی مرکزی کمیٹی ہمیشہ سرکاری شعبے کو غیرمعمولی طور پر مستحکم کرتی اور اسے ترقی دیتی ہے اور غیر سرکاری شعبے کی ترقی کی حوصلہ افزائی، حمایت اور رہنمائی کرتی ہے۔ شی نے کہا کہ کمیونسٹ پارٹی آف چائنہ کی مرکزی کمیٹی کا ہمیشہ یہ موقف رہا ہے کہ ملک کی معاشی و سماجی ترقی میں غیر سرکاری شعبے کی حیثیت اور کردار میں کوئی تبدیلی نہیں آئی ہے۔ اس شعبے کی ترقی کی حوصلہ افزائی، تعاون اور رہنمائی کے اصول اور پالیسیاں تبدیل نہیں کئے گئے۔ اس شعبے کو ایک سازگار ماحول اور زیادہ مواقع فراہم کرنے بارے اصول اور پالیسیاں بھی نہیں بدلی گئیں۔ انہوں نے یہ بھی کہا کہ کمیونسٹ پارٹی آف چائنہ کی مرکزی کمیٹی ہمیشہ اس بات پر یقین رکھتی ہے کہ نجی کاروباری ادارے اور کاروباری افراد "ہمارے اپنے خاندان کا حصہ ہیں"۔

کریڈٹ: انڈیپنڈنٹ نیوز پاکستان-آئی این پی

چین کے وزیر خارجہ چھن گانگ نے کہا ہے کہ اگر امریکہ خود کو دوبارہ عظیم بنانا چاہتا ہے تو اسے دوسرے ممالک کی ترقی کو کھلے ذ ہن سے تسلیم کرنا چا ہئے ، امریکہ کی چین بارے پالیسی منطق اور ٹھوس سمت کے مکمل منافی ہے ، امید ہے امریکہ چین سے مل کر چلنے کا درست راستہ تلاش کرے گا ، امریکی حکومت دونوں ممالک کی رائے عامہ پر توجہ دیتے ہوئے "افراط زر کے خطرے" کی اسٹریٹجک تشویش سے چھٹکارا پائے گی، امریکہ غلط سمت رکھے گا تو کسی بھی قسم کی حفاظتی رکاوٹ اسے بچا نہیںسکے گی،چین ۔ یورپ تعلقات کسی تیسرے فریق کو نشانہ نہیں بناتے،روک تھام، دبا وکے حربے چین کی تجدید شباب نہیں روک سکتے ۔ چھن نے 14 ویں قومی عوامی کانگریس کے پہلے اجلاس کے موقع پر ایک پریس کانفرنس سے خطاب میں کہا کہ چین امریکہ کے ساتھ مضبوط اور مستحکم تعلقات کے فروغ کے لئے باہمی احترام، پرامن بقائے باہمی اور فائدہ مند تعاون کے اصولوں پر عملدرآمد جاری رکھے گا۔ انہوں نے کہا چین امید کرتا ہے کہ امریکی حکومت دونوں ممالک کی رائے عامہ پر توجہ دیتے ہوئے "افراط زر کے خطرے" کی اسٹریٹجک تشویش سے چھٹکارا پائے گی۔ سرد جنگ کی ذہنیت کو ترک کرتے ہوئے "سیاسی درستگی" کے نام پر ہائی جیک ہونے سے انکار کرے گی۔ چھن گانگ نے کہا ہے کہ چین ۔یورپ تعلقات کسی تیسرے فریق کو نشانہ نہیں بناتے ، نہ ان سے متعلق ہیں اور نہ اس پر انحصار کرتے ہیں۔

انہوں نے کہا اس سے کوئی فرق نہیں پڑتا کہ صورتحال کس سمت بڑھتی ہے، چین ہمیشہ یورپ کو ایک جامع اسٹریٹجک شراکت دار کے طور پر دیکھتا ہے اور یورپی انضمام کا حامی ہے۔ چین پرامید ہے کہ یورپ حقیقی معنوں میں اسٹریٹجک خودمختاری ، پائیدار سلامتی اور استحکام حاصل کرے گا۔ چین حقیقی کثیر الجہتی کو برقرار رکھنے اور جامع اسٹریٹجک شراکت داری کو گہرا کرنے کے لئے یورپ کے ساتھ کام کرنے کا خواہش مند ہے۔ چھن گانگ نے کہا ہے کہ چین کو روکنے اور دبانے سے نہ تو امریکہ عظیم بنے گا اور نہ ہی چین کی تجدید شباب رک سکے گی۔ چھن نے چینی قومی مقننہ کے جاری سالانہ اجلاس کے موقع پر پریس کانفرنس کے دوران کہا کہ امریکہ کی چین بارے پالیسی منطق اور ٹھوس سمت کے مکمل منافی ہے۔ چھن نے کہا کہ امریکہ کا دعوی ہے کہ وہ چین سے تصادم نہیں بلکہ مقابلہ کرنا چاہتا ہے۔ اس کے باوجود حقیقت میں اس کی نام نہاد "مسابقت" کا مطلب چین کو ہر اعتبار سے قابو کرنا، دبانا اور دونوں ممالک کو بے معنی فائدے کے کھیل میں پھنسانا ہے۔

چھن نے چین اور امریکہ کو اولمپک دوڑ میں شریک دو کھلاڑی قرار دیتے ہوئے کہا کہ ان میں سے ایک کھلاڑی اپنی بہترین کارکردگی دکھانے پر توجہ دینے کی بجائے ہمیشہ دوسرے کو نقصان پہنچانے کی کوشش کرتا ہے تو یہ منصفانہ مقابلہ نہیں بلکہ بدنیتی پر مبنی تصادم اور بدسلوکی ہے۔ چھن نے کہا کہ امریکہ کی جانب سے "حفاظتی رکاوٹ قائم کرنا " اور "تنازعات کو تلاش نہ کرنے" کے بیانیہ کا مطلب یہ ہے کہ جب چین کو بدنام کیا جائے یا اس پر حملہ آور ہوا جائے تو وہ زبانی یا عملی ردعمل نہ دے اور " ایسا ناممکن ہے"۔ چھن نے کہا کہ اگر امریکہ رکے بغیر غلط سمت میں چلنا جاری رکھے گا تو کسی بھی قسم کی حفاظتی رکاوٹ اسے بھٹکنے سے نہیں بچا سکے گی جس سے یقینی طور پر تنازع اور محاذ آرائی ہوگی۔ انہوں نے کہا کہ چین اس طرح کی مسابقت کا سخت مخالف ہے۔ یہ ایک لاپرواہی سے کھیلا گیا جوا ہے جس میں دونوں ممالک کے عوام اور یہاں تک کہ انسانیت کے مستقبل کے بنیادی مفادات بھی شامل ہیں۔ انہوں نے کہا کہ اگر امریکہ خود کو دوبارہ عظیم بنانا چاہتا ہے تو اسے دوسرے ممالک کی ترقی کو کھلے ذ ہن سے تسلیم کرنا چا ہئے۔

کریڈٹ: انڈیپنڈنٹ نیوز پاکستان-آئی این پی

برطانوی وزارت دفاع کی انٹیلی جنس رپورٹ میںکہا ہے کہ روس 1961کے T-62قسم کے سوویت یونین دور کے ٹینکوں کو گوداموں سے نکال کر میدان جنگ میں بھیجے گا،برطانوی وزارت دفاع کی انٹیلی جنس رپورٹ میں کہا گیا ہے کہ روسی فوج یوکرین کی جنگ میں بھاری بکتر بند گاڑیوں کے نقصان کی تلافی کے لیے 60سال پرانے T-62مرکزی جنگی ٹینکوں کو استعمال کرتے ہوئے مزاحمت کی کوشش کر رہی ہے، اس بات کا امکان ہے کہ فرسٹ گارڈز ٹینک آرمی یونٹس جو کہ روس کی سرکردہ ٹینک فورس ہے کو T-62سے دوبارہ لیس کیا جائے گا تاکہ پچھلے نقصانات کا ازالہ کیا جا سکے۔حال ہی میں اس بات کا تعین کیا گیا ہے کہ پہلی بار 1954میں جنگی میدان میں لائی جانے والی روسی BTR-50بکتر بند گاڑیوں کو بھی پہلی بار یوکرین میں تعینات کیا گیا ہے، 2022کے موسم گرما کے بعد سے ابتک تقریبا 8سو عددٹی 62کو نکالا گیا ہے اور کچھ میں رات کے اندھیرے میں نشانہ لے سکنے کے نظاموں کو نصب کیا گیا ہے، رپورٹ کے مطابق ان قدیم ٹینکوں اور بکتر بند گاڑیو ں میں جدید جنگی میدان میں بعض سیکیورٹی خامیاں بھی پائی جاتی ہیں۔

کریڈٹ: انڈیپنڈنٹ نیوز پاکستان-آئی این پی

یوکرینی صدر ولودیمر زیلنسکی نے دوسری مرتبہ ملکی خفیہ سروس کے نائب سربراہ الیکسینڈر یاکوشیف اور بعض دیگر عہدیداروں کو بر طرف کر دیا ،یوکرینی ایوان صدرکے مطابق یوکرینی خفیہ سروس کے نائب سربراہ یاکوشیف، شعبہ اقتصادی تعاون کے صدر الیکسینڈر پرووتوروف اور شعبہ برائے تحفظ قومی اسرار کے صدر ایگور نوسکو کو بر طرف کر دیا گیا ہے،زاپوریا کی خفیہ سروس کے صدر بورس بزروکی اور سومی شاخ کے صدر ایڈورڈ فیدوروف کو بھی برخاست کرنیکے بعد زیلسنکی نے سومی آفس کیلیے اولیگ کراسنو شاپکا کو جبکہ ادارہ برائے قومی اسرار کے صدر کیلیے اولیگ ہراموف کو مقرر کیا ہے ۔

کریڈٹ: انڈیپنڈنٹ نیوز پاکستان-آئی این پی

ایران نے دوران سفر بحری کشتیوں کو تباہ کرنے کے لیے آواز سے 8گنا زیادہ تیز رفتار سپر سونک بیلسٹک میزائل تیار کرلیا ہے،ایران کے سرکاری میڈیا کے مطابق ایرانی چیف آف دی اسٹاف جنرل محمد باقری نے تہران میں ایک تقریب کے دوران میزائل کے کامیاب تجربے کا ذکرتے کرتے ہوئے کہا کہ ہمارا شمار ان میزائلوں کی تیاری میں پیش پیش تین ممالک میں ہو چکا ہے، اس قسم کے میزائلوں کی رفتار آواز سے 8گنا زیادہ اور مسافت 1500کلومیٹر تک ہوتی ہے۔

کریڈٹ: انڈیپنڈنٹ نیوز پاکستان-آئی این پی

انڈونیشیا کے نٹونا خطے میں لینڈ سلائیڈنگ کے نتیجے میں 11افراد جاں بحق جبکہ درجنوں افراد لاپتہ ہو گئے،انڈونیشیا ڈیزاسٹر مینجمنٹ ایجنسی کے عہدیدار نے بیان دیتے ہوئے کہا کہ نٹونا کے سیرسان دیہات میں شدید بارشوں کی وجہ سے لینڈ سلائڈنگ کا سامنا کرنا پڑا ہے،انہوں نے کہا کہ ابھی بھی زیرزمین بڑی تعداد میں افراد دبے ہوئے ہیں،انہوں نے کہا کہ سرچ اینڈ ریسکیو ٹیموں نے ابھی تک 11افراد کی لاشوں کو نکال لیا ہے جبکہ مرنے والے افراد کی تعداد میں اضافہ ہونے کا خدشہ ظاہر کیا جا رہا ہے،ریسکیو حکام ، پولیس ، فوجیوں اور رضاکار نامساعد موسمی حالات کے باوجود اپنی امدادی سرگرمیوں کو جاری رکھے ہوئے ہیں، لینڈ سلائڈنگ کے باعث کئی ایک متاثرہ علاقوں تک رسائی ممکن نہیں ہوسکی ہے، تقریبا 50افراد کی تلاش اب بھی جاری ہے۔

کریڈٹ: انڈیپنڈنٹ نیوز پاکستان-آئی این پی

امریکہ نے بشار الاسد انتظامیہ کے فوجی خفیہ سروس افسر امجد یوسف کے خلاف 10سال بعد پابندیاں لگانے کا فیصلہ کیا ہے،امریکہ کے وزیر خارجہ انتھونی بلنکن نے ایک بیان میں کہا کہ شام میں جنگ کا 12واں سال شروع ہو گیا ہے، اس دوران بے شمار جنگی اور انسانی جرائم کا ارتکاب کیا گیا ہے،ان جرائم میں سے ایک 16اپریل 2013کودمشق کے محلے تادامون میں اسد انتظامیہ کے فوجی خفیہ سروس اہلکار امجد یوسف کے ہاتھوں 41نہتے شہریوں کا قتل عام ہے،بلنکن نے کہا کہ منظم شکل میں کئے گئے اس قتل عام کے ویڈیو دلائل کو غیر جانبدار محققین کی طویل اور جامع تحقیق کے بعد پہلی دفعہ 2022میں رائے عامہ کے سامنے پیش کیا گیا تھا، اب ہم اس ظلم کا حساب پوچھنے کے لئے کاروائیاں شروع کر رہے ہیں،امریکی وزیر خارجہ کا کہنا تھا کہ امجد یوسف، اس کی اہلیہ عنان یوسف اور قریبی عزیزوں کے امریکہ میں داخلے پر پابندی لگا دی گئی ہے۔تادامون کے مقتولین کے ویڈیو مناظر عالمی ممالک کے لئے، سیاسی حل میں پیش رفت کئے بغیر، اسد انتظامیہ کے ساتھ بحالی تعلقات سے باز رہنے کی ایک اہم یاددہانی ہے، انتھونی بلنکن نے کہا کہ اسد انتظامیہ کو انسانی حقوق کی پامالی کا حساب دینا ہو گا، شامی شہریوں کے خلاف کئے گئے جرائم حق تلفیوں اور ناانصافیوں کا حساب پوچھا جانا شام اور علاقے میں پائیدار امن کی اولین شرط ہے،واضح رہے کہ امجد یوسف نے 2013میں ہاتھ پاوں باندھ کر 41شہریوں کو ایک ایک کر کے گولی مار کر قتل کر دیا تھا۔

کریڈٹ: انڈیپنڈنٹ نیوز پاکستان-آئی این پی

مشرقی میکسیکو میں ایک لاوارث ٹرک میں موجود 343غیر قانونی تارکین وطن کوتحقیقاتی سنٹر منتقل کر دیا گیا ہے ،میکسیکن نیشنل انسٹی ٹیوٹ آف مائیگریشن (آئی این ایم)کی جانب سے دیے گئے ایک بیان میں کہا گیا ہے کہ ہونڈوراس، ایل سلواڈور، گوئٹے مالا اور ایکواڈور سے تعلق رکھنے والے تارکین وطن کو ریاست ویراکروز میں ایک ٹرک میں موجود پایا گیا ہے،آئی این ایم کے مطابق 343میں سے 103تارکین وطن کم عمر کے بچے ہیں، واقعے کی تحقیقات شروع کر دی گئی ہیں،خیال کیاجا رہا ہے کہ ٹرک کا ڈرائیور موقع سے فرار ہو گیا اور تارکین وطن کو انسانی سمگلروں نے امریکہ لے جانے کے لیے اس ٹرک میں جمع کیا تھا۔

کریڈٹ: انڈیپنڈنٹ نیوز پاکستان-آئی این پی

مشرقی افریقہ کے ملک یوگنڈا میںمسیح کے حواری نامی کلیسا سے منسلک ہزاروں عیسائی قیامت کے ڈر سے ایتھوپیا ہجرت کر گئے ہیں،پولیس ترجمان آسکر اوگیکا کے مطابق یوگنڈا کے مشرقی گاوں'اوبولولم'کے رہائشی سینکڑوں عیسائی، اس خوف سے کہ قیامت شروع ہو جائے گی اور ان کے علاقے کو بھی متاثر کرے گی، ایتھوپیا کی طرف ہجرت کر گئے ہیں،اوگیکا کے مطابق مہاجرین کے مذہبی رہنماوں کا عقیدہ ہے کہ قیامت کے بعد ایتھوپیا سے زندگی دوبارہ سے شروع ہو جائے گی، ان مذہبی پیشواوں نے ایتھوپیا آنے سے قبل اپنا تمام مال ملک فروخت کر دیا اور قیامت کے دوران ایتھوپیا کے واحد محفوظ جگہ ہونے کے یقین کے ساتھ اس ملک میں آ گئے ہیں،اوگیکا نے کہا کہ ہم نے اس واقعے کی تحقیقات شروع کروا دی ہیں۔

کریڈٹ: انڈیپنڈنٹ نیوز پاکستان-آئی این پی

مصر میں ایک میت کی تدفین کے وقت ایک عجب حادثہ پیش آیا جب قبر اندر موجود متعدد افراد پر گر پڑی جس کے نتیجے میں متعدد افراد دب گئے،قاہرہ کے سکیورٹی ڈائریکٹوریٹ کی سکیورٹی سروسز کو اطلاع ملی کہ ایک قبر کی چھت گر گئی ہے اور اس کے اندر لوگ دب گئے ہیں، شہری دفاع کے حکام نے فوری ریسکیو آپریشن کرکے قبرمیں دبے زخمیوں کو نکالا جنہیں اسپتال منتقل کیا گیا ہے، متوفی کے لواحقین میت کو مقامی خاندانی قبرستان میں دفن کر رہے تھے کہ دیوار کا کچھ حصہ گر گیا اور قبر کے اندر لوگ دب گئے،وزارت داخلہ کے مطابق قبرستان کے داخلی دروازے پر سیڑھیوں پر رکنے والے تین افراد زخمی ہوئے۔

کریڈٹ: انڈیپنڈنٹ نیوز پاکستان-آئی این پی

کنگ عبدالعزیز کمپلیکس برائے غلاف کعبہ کے امور کی ایجنسی نے خانہ کعبہ میں حجر اسود اور رکن یمانی کے اطراف غلاف کعبہ کے کڑھائی والے پارچوں کو تبدیل کردیا ہے، عرب میڈیا کے مطابق خانہ کعبہ کے کونے رکن یمانی میں لگے کپڑے کی جگہ کڑھائی والے ٹکڑوں کو سنہری سرکنڈوں کے دھاگوں سے تبدیل کیا گیا، تبادلے کا عمل کمپلیکس کے انتہائی ہنر مند درزی کے 6افراد نے انجام دیا، یہ کام 20دن کے اندر مکمل کیا گیا ، دس دن کی شرح سے دونوں کونوں میں غلاف کعبہ سے ملے ہوئے خصوصی پارچوں کو تبدیل کیا گیا،یہ نئے دیدہ زیب ٹکڑے لوگوں کی بڑھتی ہوئی تعداد کو مد نظر رکھ کر تیار کئے گئے ہیں، طواف کرنے والوں کو حجر اسود اور رکن یمانی پر سلام کرتے ہوئے کم سے کم پریشانی کو بھی ملحوظ رکھا گیا،جنرل پریذیڈنسی برائے امور خانہ کعبہ اور مسجد نبوی میں غلاف کعبہ کے لیے کنگ عبدالعزیز کمپلیکس کے انڈر سیکریٹری جنرل انجینئر امجد الحازمی نے بتایا کہ حجر اسود کے کناروں اور رکن یمانی کے کونے کی کڑھائی اعلی ترین معیار کے مطابق کی گئی ہے اور کڑھائی میں جدید ترین تکنیک کے ساتھ خودکار طریقے کو استعمال کیا گیا ہے،الحازمی نے کہا کہ کناروں کی کڑھائی کے عمل میں سنہری رنگ کے سرکنڈے کے دھاگے استعمال کیے جاتے ہیں،جنہیں تاجیما مشین میں داخل کیے گئے ڈیزائن کے مطابق سیاہ ساٹن کپڑے کے ٹکڑے پر کڑھائی میں ڈھالا جاتا ہے۔

کریڈٹ: انڈیپنڈنٹ نیوز پاکستان-آئی این پی

الجزائر میں ایک اسکول کے احاطے میں ایک بچی کو سوئیاں چبھوئے کے عجیب واقعے کے بعد سوشل میڈیا پر اس پربحث چھڑ گئی ہے، دوسری طرف والدین اس واقعے کے بعد پریشان اور خوف زدہ ہیں،یہ واقعہ اس وقت سامنے آیا جب ایک اسکول کی طالبہ کو دو خواتین کی جانب سے گاڑی کے ذریعے اغوا کرنے کی کوشش کے بارے میں معلومات گردش میں آئیں، واقعہ ریاست عین الدفلی کی میونسپلٹی العطاف میں واقع ایک اسکول کے احاطے میں پیش آیا،اسکول میں زیر تعلیم بچی کے ساتھ پیش آنے والے حیران واقعے کے بعد سٹی کورٹ نے ایک بیان جاری کیا جس میں کہا گیا تھا کہ یہ مبینہ طور پر ایک جادوگری کا کیس ہے جس میں دو خواتین کو حراست میں لیا گیا ہے، خواتین کے قبضے سے سوئیاں اور بال ملے ہیں جب کہ ان کے ایک تیسرے ساتھی جادوگرکو بھی تلاش کرلیا گیا ہے،تفتیشی جج نے دو ملزمان کو عارضی حراست میں رکھنے کا حکم جاری کیا جب کہ تیسرے ملزم کو جوڈیشل کنٹرول سسٹم کے تحت رکھا گیا،ملزمان پر عوامی سڑک پر نقل و حمل کا ذریعہ اور جادو ٹونے کا لالچ دے کر یا کسی بچے کو اغوا کرنے کی کوشش کے جرم کا الزام عائد کیا ہے، ملزمان کے خلاف قانون نمبر 20/15کے آرٹیکل 28، 33اور 34کے تحت مقدمہ درج کرلیا گیا ہے۔

کریڈٹ: انڈیپنڈنٹ نیوز پاکستان-آئی این پی

ایران میں 30نومبر سے ابتک 230اسکولوں میں 5ہزار سے زائدطلبا و طالبات کو '' سلو پوائزن'' دینے کے واقعات کی تحقیقات کا آغاز کر دیا گیا ہے، ان واقعات سے متعلق ایرانی پارلیمنٹ کے تحقیقاتی کمیشن کے رکن محمد حسن آصفیری نے کہا کہ بچوں کی حالت اچاک بگڑنے کے بارے میں گزشتہ روز خفیہ معلومات ادارے ، دفتر داخلہ، تعلیم وصحت اور پاسداران انقلاب کے نمائندوں کی شرکت کے ساتھ ایک اجلاس منعقد ہوا،انہوں نے کہا کہ 30نومبر 2022سے اب تک 25صوبوں کے 230اسکولوں میں 5ہزار سے زیادہ طلبا و طالبات کو شکایات کا سامنا کرنا پڑا ہے، اس کی وجوہات کو جاننے کے لیے مختلف ٹیسٹ کیے گئے، تا ہم زہر کی قسم یا ماخذ کا تعین نہیں کیا جا سکا اور تحقیقات جاری ہیں،غیر مصدقہ معلومات کے مطابق بعض جگہوں پر سڑے ہوئے پھلوں کی بو جیسی گیس کو محسوس کیا گیا ہے، انہوں نے کہا کہ وزارت صحت اس واقعے کا سنجیدگی سے جائزہ لے رہی ہے اور وہ وزارت کے نتائج کا انتظار کر رہی ہے،ایران میں 30نومبر 2022سے زیادہ تر طالبات کے زیر تعلیم ہونے والے اسکولوں میں پوائزننگ کے واقعات سامنے آئے ہیں، طلبا میں سانس کی تکلیف، متلی، سر درد اور اعضا میں بے حسی جیسی علامات پائی گئیں تھیں ۔

کریڈٹ: انڈیپنڈنٹ نیوز پاکستان-آئی این پی

گڈاپ سٹی کے علاقے میں واقع نجی فارم ہاوس میں پکنک کے لیے جانے والا شخص پول میں نہاتے ہوئے ڈوب کر جاں بحق ہوگیا ، متوفی لیاری کا رہائشی تھا ۔ گڈاپ سٹی کے علاقے میں گوہر نایاب فارم ہاوس کے پول میں نہاتے ہوئے ڈوب کر ایک شخص جاں بحق ہوگیا ، متوفی کی لاش بقائی اسپتال ٹول پلازہ لائی گئی جہاں سے ورثا پولیس کارروائی کرانے سے انکار کر کے لاش اپنے ہمراہ ایدھی ایمبولینس کے ذریعے گھر لے گئے۔ پولیس کے مطابق متوفی کی شناخت 45 سالہ زاہد ولد الہی بخش کے نام سے کی گئی متوفی مکان نمبر 302 گلی نمبر 17 ڈی روڈ لیاری بہار کالونی کا رہائشی تھا جو اپنے دوستوں کے ہمراہ پکنک منانے فارم ہاوس آیا ہوا تھا ، پولیس واقعے کی تحقیقات کر رہی ہے ۔

کریڈٹ: انڈیپنڈنٹ نیوز پاکستان-آئی این پی

اٹلی کشتی حادثے میں جاں بحق 9 پاکستانیوں میں سے 7 کی ڈیڈ باڈیز لاہور پہنچ گئیں۔ ، جن میں ایک خاتون کی ڈیڈ باڈی بھی شامل ہے۔ میتیں تیونس سے براستہ جدہ سعودی ائیر کی پرواز ایس وی 734 کے ذریعے لاہور لائی گئیں۔ اوورسیز پاکستانی فاونڈیشن کے نمائندے نے ڈیڈ باڈیز وصول کرکے ورثا کے حوالے کردیں۔ ساتوں افراد کی ڈیڈ باڈیز گجرات ڈویژن روانہ کردی گئیں۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ نے سابق ممبر قومی اسمبلی چودھری وجاہت حسین کی حفاظتی ضمانت منظور کر لی۔ جسٹس علی باقر نجفی کی سربراہی میں دو رکنی بینچ نے چودھری وجاہت حسین کی درخواست پر سماعت کی، درخواست میں گجرات پولیس، آئی جی اور حکومت پنجاب کو فریق بنایا گیا تھا۔ درخواست میں مقف اپنایا گیا کہ پولیس نے سیاسی بنیادوں پر انسداد دہشت گردی کی دفعات کے تحت مقدمہ درج کیا، درج مقدمہ میں متعلقہ عدالت سے ضمانت کروانا چاہتے ہیں، عدالت حفاظتی ضمانت منظور کرئے۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کے مرکزی رہنما اور سابق وزیر خزانہ اسد عمر نے کہا ہے کہ عدالت پیشیوں کی آڑ میں عمران خان کے قتل کی سازش کی جارہی ہے۔ میڈیا سے گفتگو کرتے ہوئے رہنما پی ٹی آئی اسد عمر نے کہا کہ آج سے 4 ماہ پہلے تک جب بھی عدالت بلاتی تھی تو عمران خان جاتے تھے، عمران خان ایک بار نہیں کئی بار عدالت گئے، عمران خان کو کوئی انا کا مسئلہ نہیں، عمران خان کو کسی بھی عدالت میں پیش ہونے پر کوئی اعتراض نہیں۔ انہوں نے کہا کہ خان صاحب کو معلومات آنا شروع ہوگئی تھیں کہ جان کو خطرہ ہے، آج بھی عمران خان کے پاس مصدقہ اطلاعات آ رہی ہیں کہ ان کی جان کو خطرہ ہے، عمران خان پر عدالت میں حملہ کیا جاسکتا ہے، نوٹس دینے کیلئے آنے کو بھی بہت بڑی بات بنا دیا جاتا ہے۔ اسد عمر نے کہا کہ سیاسی شخصیات کا قتل ہماری تاریخ کا حصہ ہے، عمران خان لاہور ہائی کورٹ اور جوڈیشل کمپلیکس میں پیش ہوئے، سکیورٹی کا انتظام نظر نہیں آیا، عمران خان نے پہلے بھی اپنے اوپر قاتلانہ حملہ اور جوابی بیانیہ سے متعلق سازش کو بے نقاب کیا اور اب بھی مصدقہ اطلاعات و شواہد ہیں کہ عدالت پیشیوں کی آڑ میں عمران خان کے قتل کی سازش کی جارہی ہے۔ سابق وفاقی وزیر کا مزید کہنا تھا کہ ہر پانچویں گھر میں لوگ بے روزگار ہو گئے ہیں، آج غریب طبقے کے ساتھ متوسط طبقے کا بھی گزارہ مشکل ہوتا چلا جا رہا ہے، کاروبار بند ہو رہے ہیں، ملک پر اس وقت بدترین مہنگائی اور بے روزگاری مسلط ہے لیکن اس امپورٹڈ حکومت کا ہدف صرف عمران خان اور تحریک انصاف ہے۔

کریڈٹ: انڈیپنڈنٹ نیوز پاکستان-آئی این پی

شام کے شہر حلب کے بین الاقوامی ہوائی اڈے پر اسرائیلی فضائی حملے میں اس کا رن وے تباہ ہو گیا اور اس پر آپریشنل سروسزمعطل کردی گئی ہیں،شام کے سرکاری میڈیا کی رپورٹ کے مطابق شامی فضائی دفاع نے مقامی وقت کے مطابق صبح 2بجکر 7منٹ پر ساحلی شہر لاذقیہ کے مغرب میں بحیرہ روم کی سمت سے داغے گئے میزائلوں کو روک دیا،پچھلے سال اسرائیل نے شام اور لبنان میں حزب اللہ سمیت اتحادیوں کو ہتھیاروں کی فراہمی کے لیے تہران کی جانب سے فضائی سپلائی لائنوں کے بڑھتے ہوئے استعمال کو روکنے کے لیے شام کے ہوائی اڈوں پر اپنے حملے تیز کر دیے ہیں۔

کریڈٹ: انڈیپنڈنٹ نیوز پاکستان-آئی این پی

جاپان کا فلیگ شپ ایچ 3راکٹ فنی خرابی کے باعث ایک بار پھر اڑان بھرنے میں ناکام ہو گیا جس کے بعدجاپان ایرو سپیس ایکسپلوریشن ایجنسی(جے اے ایکس اے)نے اسے خود کو تباہ کرنے کی کمانڈ دے دی، عالمی میڈیا کے مطابق جے اے ایکس اے نے کہا کہ یہ فیصلہ ایجنسی کے ماہرین کے اس نتیجے پر پہنچنے کے بعد کیا گیا کہ مشن کامیاب نہیں ہو سکتا،جاپان نے خلا تک اپنی آزادانہ رسائی کو بڑھانے اور ایلون مسک کیسپیس ایکس سمیت حریفوں سے عالمی لانچ مارکیٹ کا بڑا حصہ حاصل کرنے کے اپنے امکانات کو تقویت دینے کے لیے ایچ 3راکٹ بنایا،ایچ 3راکٹ تین دہائیوں میں ملک کا پہلا نیا میڈیم لفٹ لانچر، سرکاری اور تجارتی سیٹلائٹس کو مدار میں چھوڑنے اور بین الاقوامی خلائی سٹیشن کو فیری سپلائی کرنے کے لیے ڈیزائن کیا گیا تھا، جو ایک بار پہلے بھی 17فروری کو اڑان بھرنے میں ناکام ہو گیا تھا۔

کریڈٹ: انڈیپنڈنٹ نیوز پاکستان-آئی این پی

بھارتی ریاست اتر پردیش کے 80سالہ ضعیف شخص نے بیٹے اور بہو کے تضحیک آمیز رویے سے مایوس ہوکر ایک کروڑ روپے سے زائد مالیت کی جائیداد ریاست کے گورنر کو ڈونیٹ کردی،اتر پردیش کے علاقے کھٹولی ٹائون کے اولڈ ہوم میں رہائش پذیر 80سالہ ضعیف نتھو سنگھ کا کہنا تھاکہ انہوں نے اپنی تمام جائیداد اترپردیش کے گورنر کے حوالے کر نے کیلئے دستاویز سب رجسٹرار آفیس میں جمع کروادیا ہے،بھارتی میڈیا کے مطابق سب رجسٹرار آفیس نے تصدیق کی کہ نتھو سنگھ نے 4مارچ کو تقریبا ایک کروڑ روپے مالیت کا اپنا گھر اور زرعی زمین ریاستی گورنر کو منتقل کرنے کی وصیت جمع کروائی ہے،سب رجسٹرار کے مطابق نتھو سنگھ کی جانب سے جمع کروائی گئی وصیت میں لکھا گیا ہے کہ ان کے مرنے کے بعد ان کی ملکیت سرکار اپنی تحویل میں لے لے اور وہاں اسکول یا اسپتال تعمیر کروایا جائے،نتھو سنگھ نے اپنے بیٹے اور بہو پر الزام لگایا کہ دونوں کئی بار میری تضحیک کر چکے ہیں اور ان دونوں نے مجھ سے اپنا گھر چھڑوا کر اس اولڈ ہوم میں رہنے پر مجبور کیا تھا۔

کریڈٹ: انڈیپنڈنٹ نیوز پاکستان-آئی این پی

مدینہ منورہ میں مسجد نبوی ۖ میں عبادت میں مصروف پاکستانی عازم کے دل کی دھڑکن 10منٹ سے زائد وقت کے لیے رک گئی،حرمین شریفین کے امور سے متعلق ویب سائٹ کے مطابق عمرے کی ادائیگی کے لیے سعودی عرب آنے والے پاکستانی شہری مسجد نبوی ۖ میں موجود تھے، اس دوران ان کے دل کی دھڑکن 10منٹ سے زائد وقت کے لیے رک گئی،مدینہ منورہ کے شعبہ صحت کے اہلکار اطلاع ملنے پر فوری طور پرمسجد نبوی ۖ اور پاکستانی عازم عمرہ کو طبی امداد فراہم کی ، طبی امداد ملنے کے کچھ دیر بعد پاکستانی عازم عمرہ کی سانس بحال ہوگئی اور انہوں نے عبادت کا سلسلہ جاری رکھا۔

کریڈٹ: انڈیپنڈنٹ نیوز پاکستان-آئی این پی

ترکیہ کی حزب اختلاف نے مئی میں ہونے والے صدارتی انتخابات میں صدر رجب طیب اردوان کے مقابلے کے لئے کلیک دار اوغلو کو مشترکہ صدارتی امیدوار نامزد کر دیا ہے،غیر ملکی میڈیاکے مطابق ترکیہ کی 6اپوزیشن جماعتوں نے 14مئی کو ہونے والے صدارتی انتخابات کے لیے ملک کی دوسری بڑی جماعت سینٹر لیفٹ ریپبلکن پیپلز پارٹی (سی ایچ پی)کے سربراہ کمال کلیک دار اوغلو کو مشترکہ امیدوار نامزد کر دیا ہے،سینٹر لیفٹ ریپبلکن پیپلز پارٹی کو جدید ترکیہ کے بانی مصطفی کمال اتاترک نے بنایا تھا اور ملک کی سب سے قدیم سیاسی جماعت ہے حالانکہ 1990کی دہائی سے مرکزی طور پر اقتدار سے باہر ہے تاہم کلیک دار نے اقلیتی گروپوں کو قبول کرکے دائیں بازو کی جماعتوں کے ساتھ اتحاد قائم کیا ہے،انقرہ میں جمع ہونے والے ہزاروں لوگوں سے خطاب کے دوران کلیک دار اوغلو نے کہا کہ ہماری میز امن کی میز ہے، ہمارا واحد مقصد ملک کو خوشحالی، امن اور خوشی کے دنوں کی طرف لے جانا ہے،انہوں نے اپنے حامیوں سے وعدہ کیا کہ وہ اتفاق رائے اور مشاورت کے ذریعے ترکیہ پر حکومت کریں گے اور ملک میں دوبارہ پارلیمانی نظام کو نافد کریں گے، دیگر پانچ اپوزیشن جماعتوں کے رہنما ان کی ممکنہ حکومت میں نائب صدر کے طور پر کام کریں گے،74سالہ کلیک دار سالوں کے معاشی بحران اور بڑھتی ہوئی مہنگائی کے ساتھ ساتھ جنوب میں گزشتہ ماہ کے تباہ کن زلزلوں سے فائدہ اٹھا سکتے ہیں جن میں 46 ہزارسے زیادہ افراد چل بسے ہیں اور اس پر ریاستی ردعمل پر تنقید دیکھنے کو ملی،خیال رہے کہ بھارتی سول رائٹس لیڈر مہاتما گاندھی سے مشابہت کی وجہ سے کمال کلیک دار اوغلو کو گاندھی کمال یا ترکیہ کے گاندھی کے نام سے جانا جاتا ہے۔

کریڈٹ: انڈیپنڈنٹ نیوز پاکستان-آئی این پی

بیلاروسی حزب اختلاف کی جلاوطن رہنما سویٹلانا تسخانوسکایا کو غداری اور اقتدار پر قبضہ کرنے کی سازش کے جرم میں 15سال قید کی سزا سنا دی گئی،40 سالہ سابقہ انگلش ٹیچر موجودہ صدر الیگزینڈر لوکاشینکو کے خلاف انتخاب لڑنے کے بعد 2020میں ہمسایہ ملک لتھوانیا فرار ہو گئی تھیں، منسک کی عدالت نے تسخانوسکایا کو 15سال ، بیلاروسی اپوزیشن کونسل کے ایک سرکردہ رکن پاول لاٹوشکو کو 18سال اور تین دیگر کارکنوں کو اسی جرم میں 12سال کی قید کی سزا سنائی ، لوکاشینکو نے انتخابات میں بھاری اکثریت سے کامیابی حاصل کی تھی تاہم اپوزیشن رہنما نے سرکاری انتخابی نتائج کو مسترد کرتے ہوئے کہا تھا کہ نتائج لوکاشینکو کو فتح دلانے کے لیے تیار کیے گئے،سرکاری نتائج نے بڑے پیمانے پر احتجاج کو بھی جنم دیا تھا جس کے بعد لوکاشینکو نے مظاہرین کے خلاف وحشیانہ کریک ڈائون شروع کیا ، اپوزیشن پر حکومت کا تختہ الٹنے کی سازش کا الزام لگایا اور حزب اختلاف کی اہم شخصیات اور کارکنوں کو گرفتار کیا گیا،سرکاری میڈیا کے مطابق منسک کی ایک عدالت نے تسخانوسکایا کو 15سال ، بیلاروسی اپوزیشن کونسل کے ایک سرکردہ رکن پاول لاٹوشکو کو 18سال اور تین دیگر کارکنوں کو اسی جرم میں 12سال کی قید کی سزا سنائی ہے،سزا پانے والی تمام شخصیات نے اگست 2020میں مظاہرے شروع ہونے کے بعد بیلاروس چھوڑ دیا تھا،سویٹلانا تسخانوسکایا کے بقول عدالتی فیصلہ جمہوریت کو فروغ دینے کی ان کی کوششوں کی سزا ہے،عدالتی فیصلے پر رد عمل دیتے ہوئے اپوزیشن رہنما نے کہا کہ حکومت نے بیلاروس میں جمہوری تبدیلیوں کے لیے میرے کام کا انعام بطور 15سال قید دیا ہے، لیکن میں ہزاروں بے گناہوں کے بارے میں سوچتی ہوں جنہیں حراست میں لیا گیا اور حقیقی قید کی سزا دی گئی، میں اس وقت تک نہیں رکوں گی جب تک ان میں سے ہر ایک کو رہا نہیں کیا جاتا۔

کریڈٹ: انڈیپنڈنٹ نیوز پاکستان-آئی این پی

جینوا میں انسانی حقوق کی کونسل میں گزشتہ روز پیش کی گئی اقوام متحدہ کی ایک رپورٹ میں کہا گیا ہے کہ افغانستان میں خواتین اور لڑکیوں کے ساتھ طالبان کا سلوک انسانیت کے خلاف جرم کے مترادف ہے، طالبان کی جان بوجھ کر اور حسابی پالیسی خواتین اور لڑکیوں کے انسانی حقوق سے انکار اور انہیں عوامی زندگی سے مٹانا ہے، طالبان کی خواتین کے خلاف پالیسیاں صنفی امتیاز کے زمرے میں آتی ہیں،طالبان نے اگست 2021 میں اقتدار سنبھالا جس کے بعد انہوں نے خواتین کی ملازمت پرپابندیوں کے ساتھ ان کی آزادیوں اور حقوق کو محدود کردیا اور ان کی سیکنڈری اسکولوں اور یونیورسٹیوں میں جانے کی صلاحیت کو بہت حد تک محدود کردیا گیا،افغانستان میں انسانی حقوق کی صورتحال پر اقوام متحدہ کے خصوصی نمائندے رچرڈ بینیٹ نے کہا کہ خواتین اور لڑکیوں کے ساتھ طالبان کا سلوک "جنس کی بنیاد پر ظلم و ستم کے مترادف ہو سکتا ہے، جو انسانیت کے خلاف جرم ہے،بینیٹ نے اقوام متحدہ کی انسانی حقوق کی کونسل کو جولائی تا دسمبر 2022 پر مشتمل ایک رپورٹ میں بتایا کہ طالبان کی جان بوجھ کر اور حسابی پالیسی خواتین اور لڑکیوں کے انسانی حقوق سے انکار اور انہیں عوامی زندگی سے مٹانا ہے،انہوں نے کہا کہ طالبان کا خواتین کے خلاف یہ جنسی بنیاد پر ظلم و ستم کے بین الاقوامی جرم کے مترادف ہو سکتا ہے جس کے لیے طالبان حکام کو جوابدہ ٹھہرایا جا سکتا ہے ،انہوں نے کہا کہ انسانی حقوق کی کونسل کو طالبان کو ایک مضبوط پیغام دینا چاہیے کہ "خواتین اور لڑکیوں کے ساتھ ناروا سلوک کسی بھی بنیاد پر ناقابل قبول اور بلا جواز ہے ، خواتین اور لڑکیوں پر پابندیوں کا مجموعی طور پر پوری آبادی پر تباہ کن اور دیرپا اثر ڈالتا ہے، جو کہ صنفی امتیاز کے برابر ہے۔

کریڈٹ: انڈیپنڈنٹ نیوز پاکستان-آئی این پی

سعودی عرب کے فرمانروا شاہ سلمان بن عبدالعزیز نے رمضان المبارک کے دوران بیرون ممالک میں قرآن پاک کی 10لاکھ کاپیاں تقسیم کرنے کی منظوری دے دی ہے،عرب میڈیا کے مطابق سعودی فرمانروا کی جانب سے مختلف سائز اور دنیا کی 76سے زائد زبانوں میں ترجموں پر مشتمل قرآن پاک کی کاپیاں تقسیم کرنے کی منظوری دی گئی ہے،کنگ فہد گلوریئس قرآن پرنٹنگ کمپلیکس میں شائع کردہ کاپیاں دنیا کے 22ممالک میں موجود اسلامی مراکز کو مہیا کی جائیں گی،عرب میڈیا کے مطابق سعودیہ کے وزیر اسلامی امور شیخ عبداللطیف بن عبدالعزیز الشیخ نے اس حوالے سے کہا ہے کہ قرآن پاک کی کاپیوں کو مختلف ممالک میں رمضان المبارک تک پہنچانے کے عمل کو یقینی بنانے کیلئے شپنگ کے انتظامات شروع کر دیے گئے ہیں۔

کریڈٹ: انڈیپنڈنٹ نیوز پاکستان-آئی این پی

سعودی عرب نے ترکیہ کی ڈوبتی معیشت کو سہارا دینے کیلئے ترکیہ کے مرکزی بینک میں پانچ ارب ڈالر جمع کرانے کے معاہدے پر دستخط کر دیے ہیں ،عرب میڈیا کے مطابق سعودی عرب نے ایک معاہدے کے تحت سعودی فنڈ ڈیویلپمنٹ (ایس ایف ڈی)کے ذریعے ترکیہ کے مرکزی بینک میں پانچ ارب ڈالر جمع کرائے،یہ رقم سعودی فنڈ برائے ترقی(ایس ایف ڈی)کے ذریعے ترکیہ کے مرکزی بینک میں منتقل کی جارہی ہے،سعودی وزیر خزانہ محمد بن الجادان نے دسمبر 2022میں ارادہ ظاہر کیا تھا کہ ان کا ملک ترکیہ کے بینک میں یہ رقم جمع کروانا چاہتا ہے،واضح رہے کہ ترکیہ کے خالص زرمبادلہ کے ذخائر گز شتہ موسم گرما میں صرف 6ارب ڈالر سے زائد تھے اور یہ کم سے کم 20سال میں اپنی کم ترین سطح پر تھے،فروری کے اوائل میں ترکیہ کی معیشت کوجنوبی علاقے میں آنے والے شدید زلزلے کے بعد سے قریبا 8.5ارب ڈالر کا نقصان ہوا ہے، زلزلے کے نتیجے میں45ہزار سے زائد افراد ہلاک اور لاکھوں بے گھر ہوگئے تھے،ترکیہ کے مرکزی بینک میں زر مبادلہ کے ذخائر 24فروری کو ختم ہونے والے ہفتے کے دوران میں 1.4ارب ڈالر کم ہوکر 20.2ارب ڈالر رہ گئے تھے۔

کریڈٹ: انڈیپنڈنٹ نیوز پاکستان-آئی این پی