بھارت کی حکمران جماعت بھارتیہ جنتا پارٹی ( بی جے پی )نے اسلام فوبیا کو بڑھانے کے لیے سوشل میڈیا پر گروپس بنا لیے۔ سات اکتوبر کو حماس کی کارروائی کے بعد اسرائیل کے غزہ پر حملوں کے ساتھ ہی بھارتی حکومت نے مسلمانوں کے خلاف زہر اگلنا شروع کردیا تھا۔ مودی سرکار نے فلسطینوں کے قاتل اسرائیل کی حمایت کا اعلان کرتے ہوئے فلسطین اور مسلمانوں کو نیست و نابود کرنے کے دعوے شروع کردئیے۔ عرب چینل کے مطابق بھارت حماس اور اسرائیل سے متعلق غلط معلومات اور جھوٹا پروپیگنڈا پھیلانے میں سرفہرست ہے۔بی جے پی نے سوشل میڈیا پر باقاعدہ گروپس بنا کر مسلمانوں کے خلاف منگھڑت پروپیگنڈا اور جھوٹا مواد تخلیق کرکے شیئر کرنا شروع کردیا ہے۔ مودی سرکار کی سرپرستی میں بنائے گئے واٹس ایپ اور فیس بک گروپس اسرائیل کو مظلوم اور مسلمانوں کو ظالم دکھانے کے لیے جھوٹا مواد شئیر کررہے ہیں اور پھیلا رہے ہیں۔ بھارتی ویب سائٹ کا کہنا ہے کہ فیس بک اور واٹس ایپ پر 13 سے زائد ہندوتوا گروپس اس وقت بھارت میں مقبولیت حاصل کررہے ہیں جن کا مقصد محض اسلاموفوبیا کو ہوا دینا ہے۔ سوشل میڈیا پر مودی سرکار ایک مہم ایسی بھی چلارہی ہے جس میں اسرائیلیوں کو معصوم دکھا کر یہ کہا جاتا ہے کہ مقبوضہ کشمیر میں بھی ہندو مسلمانوں کے ہاتھوں ایسے ہے ظلم کا شکار ہیں۔ سوشل میڈیا گروپس پر بھارتی عوام کو غصہ دلانے کے لیے مسلمانوں کی جانب سے حملے کی جھوٹی دھمکیاں بھی پھیلائی جارہی ہیں۔

کریڈٹ: انڈیپنڈنٹ نیوز پاکستان-آئی این پی

اسرائیلی فورسز نے غزہ پر زمینی اور فضائی حملے شروع کر دیئے جس کے نتیجے میں بڑے پیمانے پر شہادتوں اور تباہی کا خدشہ ظاہر کیا جارہا ہے جبکہ مواصلاتی نظام مکمل تباہ ہونے سے غزہ کا دنیا بھر سے رابطہ مکمل کٹ گیا۔ بین الاقوامی نشریاتی اداروں کے مطابق اسرائیلی فورسز نے غزہ میں بھرپور طاقت کے ساتھ آپریشن اور وحشیانہ بمباری شروع کردی ہے، جس کی نتیجے میں غزہ کی پٹی میں مواصلاتی نظام مکمل تباہ ہوگیا ہے۔ فلسطینی ٹیلی کمیونیکیشن کمپنی جوال نے بتایا کہ اسرائیلی بمباری سے آخری بچنے والی انٹرنیشنل کیبل بھی تباہ ہوگئی ہے، جس کی وجہ سے غزہ کا رابطہ دنیا سے کٹ گیا ہے۔ عرب میڈیا رپورٹ کے مطابق غزہ میں 100 سے زائد فضائی طیارے بمباری کررہے ہیں جبکہ ٹینکس اور توپوں کے ذریعے بھی بمباری کی جارہی ہے، جس کی وجہ سے ہر طرف تباہی اور آگ لگی نظر آرہی ہے۔ اسرائیلی فوج کے ترجمان ڈینیل ہگری نے کہا کہ آج کی رات ہماری فورسز غزہ میں زمینی آپریشن کا دائرہ بڑھا رہی ہیں، جس کے تحت مختلف علاقوں میں شدید بمباری بھی کی جائے گی۔ انہوں نے کہا کہ غزہ شہر کے لوگ اپنے گھروں سے جنوبی علاقوں کی طرف نقل مکانی کرلیں کیونکہ اسرائیل کی جانب سے فضائی کارروائیاں بھی کی جائیں گی۔ ہگری نے کہا کہ ہماری افواج مغویوں کی بازیابی کیلیے اس مشن کو جلد پایہ تکمیل تک پہنچائے گی اور ہم ہر طریقے سے دفاع کیلیے بھرپور انداز سے تیار ہیں۔

اسرائیل کی توپوں نے غزہ میں قائم الشفا اسپتال کے قریب بھی شدید بمباری کی ہے جس کے نتیجے میں جانی نقصان کا اندازہ نہیں ہوسکا۔ دوسری جانب غزہ میں قائم الشفا اسپتال کے ترجمان نے اسرائیلی دعوے کی تردید کی اور کہاکہ اسپتال کو حماس کا ہیڈکوارٹر قرار دینا بے بنیاد اور جھوٹا پروپیگنڈا ہے۔ اسپتال کے ترجمان سلما معروف نے سرکاری میڈیا سے بات کرتے ہوئے کہا کہ اسپتال میں مریضوں کے علاوہ کوئی موجود نہیں ہے۔ انہوں نے کہا کہ اسرائیل نے جھوٹی آڈیو ریکارڈنگ تیار کر کے ہم پر الزام عائد کیا کہ اسپتال میں حماس کے لوگ موجود ہیں، اس کے ساتھ ہی انہوں نے اس بات کی بھی تردید کی کہ حماس نے ایندھن چرایا ہے۔ ادھر وزیر صحت نے بتایا کہ اسرائیل کے حالیہ آپریشن سے قبل غزہ پر ہونے والی وحشیانہ بمباری میں شہید فلسطینیوں کی تعداد 7400 سے تجاوز کرگئیں جبکہ 21 ہزار کے قریب لوگ زخمی ہیں۔ انہوں نے بتایا کہ مغربی کنارے میں اسرائیلی کارروائیوں سے اب تک 110 فلسطینی شہید اور 1950 زخمی ہوئے ہیں۔ اردن کے وزیر خارجہ نے اسرائیل کی جانب سے غزہ میں شروع کیے جانے والے تازہ آپریشن پر کہا ہے کہ اسرائیل اب دنیا کو جہنم بنانے کی کوشش کررہا ہے، معصوم نہتے شہریوں کو نشانہ بنانے کا عمل قابل نفرت اور قابلِ مذمت ہے۔

کریڈٹ: انڈیپنڈنٹ نیوز پاکستان-آئی این پی

خام تیل کو ریفائن کرنے کی کمپنیوں کی محدود صلاحیت توانائی میں خود کفالت کے حصول کی پاکستان کی جستجو میں رکاوٹ بن رہی ہے، جس کی وجہ سے ریفائنڈ تیل کی خاطر خواہ مقدار کی درآمد کی ضرورت ہے جو بصورت دیگر مقامی طور پر صاف کیا جا سکتا ہے۔سابق ایم ڈی آئل اینڈ گیس ڈویلپمنٹ کمپنی لمیٹڈ محمد ریاض خان نے ویلتھ پاک کو بتایاکہ خام تیل کو پروسیس کرنے کے لیے ملکی ریفائنریز کی کم صلاحیت کی وجہ سے پاکستان ریفائنڈ تیل کا خالص درآمد کنندہ ہے۔پاکستان کی ریفائننگ کی صلاحیت 19.4 ملین ٹن سالانہ ہے۔ اپ گریڈیشن کی کمی کے ساتھ ساتھ تکنیکی اور مالی حدود جیسے عوامل کی وجہ سے مکمل استعمال میں رکاوٹ ہے۔ریاض نے کہا کہ 4.6 ملین میٹرک ٹن خام تیل کی سالانہ پیداوار کے ساتھ، پاکستان اپنی کل پیٹرولیم ضروریات کا صرف 20 فیصد پورا کر سکتا ہے۔باقی 80 فیصد کو پورا کرنے کے لیے، ملک خام تیل اور ریفائنڈ پیٹرولیم مصنوعات کی درآمد پر انحصار کرتا ہے، جس پر تقریبا 15 سے 16 بلین ڈالر سالانہ خرچ ہوتے ہیں۔ریفائنری کمپنیاں اکثر فرسودہ ٹکنالوجی اور جدید، لاگت سے موثر ریفائننگ طریقوں تک محدود رسائی کے ساتھ جدوجہد کرتی ہیں۔ انہوں نے مزید کہا کہ پاکستان میں بہت سی ریفائنریز پرانے آلات اور ٹیکنالوجی کی حامل ہیں جو انہیں کم موثر اور ماحول دوست بناتی ہیں۔

انہوں نے ریفائننگ سیکٹر میں براہ راست غیر ملکی سرمایہ کاری کی حوصلہ شکنی کرنے والی کچھ رکاوٹوں پر روشنی ڈالی۔پاکستان میں ریفائنری کے منصوبے منظوری سے قبل کاغذی کارروائی کے بوجھل عمل سے مشروط ہیں۔ ریفائنری پراجیکٹس کے لیے ریگولیٹری منظوری کے عمل کو آسان بنانا، بشمول ماحولیاتی کلیئرنس، زمین کا حصول، اور اجازت نامے، اہم ہے۔ بیوروکریٹک رکاوٹوں کو کم کرنا ممکنہ سرمایہ کاروں کے لیے سرمایہ کاری کو مزید پرکشش بنا سکتا ہے۔ سابق ایم ڈی نے تجویز پیش کی کہ حکومت کو تیل کی ریفائنری کے منصوبوں کے لیے ٹیکس مراعات اور گرانٹس فراہم کی جائیں جن میں صلاحیت میں توسیع، تکنیکی اپ گریڈیشن، اور ماحولیاتی تعمیل پر توجہ دی جائے۔ان کے خیال میں مشرقی ایشیائی ممالک کی کامیابی کی کہانیاں پاکستان کے لیے اہم ہیں۔بہت سے مشرقی ایشیائی ممالک نے سرکاری اور نجی شعبے کے درمیان تعاون کو آسان بنایا ہے۔ حکومتی پالیسیاں، ٹیکس مراعات، اور ضوابط ریفائنری منصوبوں میں نجی شعبے کی شرکت کی حوصلہ افزائی کر رہے ہیں۔ اس نے اہم سرمایہ کاری اور مہارت کو اپنی طرف متوجہ کیا ہے، جس کی وجہ سے ان ممالک میں صلاحیت میں اضافہ ہوا ہے۔انہوں نے امید ظاہر کی کہ بلوچستان کے ضلع گوادر میں ایک اور ریفائنری کی تعمیر کے لیے پاکستان سعودی عرب کے معاہدے کے بعد آئل ریفائنریوں میں مزید غیر ملکی سرمایہ کاری کی دعوت دینے کے امکانات بہت زیادہ ہیں۔پاکستان میں کمپنیوں کی ریفائننگ کی صلاحیت میں بہتری درآمدی بلوں پر دبا کو کم کرنے کے علاوہ ریفائنڈ تیل کی مقامی طلب کو پورا کر سکتی ہے۔

کریڈٹ: انڈیپنڈنٹ نیوز پاکستان-آئی این پی

پاکستان ویلیو ایڈڈ شہد یا امبر کیلسائٹ برآمد کر کے اپنے سرکاری خزانے میں اضافہ کر سکتا ہے۔سنہری رنگ کے کیلسائٹ کو پوری دنیا میں سب سے قیمتی طول و عرض کا پتھر ٹراورٹائن یا سلیمانی سمجھا جاتا ہے۔ یہ فطرت میں نیم شفاف ہے اور اس کی رنگت معدنی ہیمیٹائٹ سے آئرن کی وجہ سے ہوتی ہے۔ویلتھ پاک سے بات کرتے ہوئے، اسلام آباد میں قائم گلوبل مائننگ کمپنی کے پرنسپل ماہر ارضیات محمد یعقوب شاہ نے رائے دی کہ کیلسائٹ کی منفرد رنگ کاری کو باقاعدہ صنعتی استعمال کے بجائے ایک قیمتی آرائش میں تبدیل کرکے استعمال کرنا ضروری ہے۔انہوں نے کہا کہ شہد کیلسائٹ کے کرسٹل مختلف شکلوں میں پائے جاتے ہیں، یعنی چاک، ٹراورٹائن، چونا پتھر، ڈولومائٹ، آراگونائٹ وغیرہ۔ عام طور پر کیلسائٹ نہ صرف پاکستان بلکہ دنیا بھر میں چٹان بنانے والے کاربونیٹ معدنیات کے طور پر وافر مقدار میں پایا جاتا ہے۔یہ کئی درجات میں پایا جاتا ہے اور اگنیئس، تلچھٹ اور میٹامورفک چٹانوں میں پایا جاتا ہے۔ یہ کیلشیم کاربونیٹ کا سب سے مستحکم پولیمورف ہے۔ یہ فطرت میں کرسٹل ہے اور ایک رومبک شکل دکھاتا ہے۔عام طور پر، یہ متعدد پارباسی سے شفاف، اور نیم شفاف رنگوں میں پایا جاتا ہے، یعنی نیلا، بے رنگ مکمل طور پر شفاف برفیلی، جامنی، سفید، نارنجی، سبز، سیاہ، بھورا، پیلا، سرخ، نارنجی، سنہری، بینڈڈ، یا کثیر رنگ کے کرسٹل ہیں۔ تاہم، کیلسائٹ میں رنگ دیگر معدنیات کے شامل ہونے کی وجہ سے ہیں۔آل پاکستان کمرشل ایکسپورٹرز ایسوسی ایشن کے سابق چیئرمین ذاکر اللہ عرف جھولے لال نے شہد کیلسائٹ کی اہمیت کے بارے میں گفتگو کرتے ہوئے کہا کہ شہد کیلسائٹ پوری دنیا میں وافر مقدار میں دستیاب نہیں ہے لیکن خوش قسمتی سے یہ پاکستان میں کچھ جگہوں پر پایا جاتا ہے۔

اس کا منفرد رنگ حقیقی خوبصورتی ہے۔ دوسری صورت میں، یہ باقاعدہ کیلسائٹ کی تمام صفات کو برقرار رکھتا ہے۔ اس کا بے مثال رنگ بین الاقوامی مارکیٹ میں اچھی قیمت کا سبب ہے۔انہوں نے مزید کہا کہ کھردری شکل میں، اس کی کوالٹی کے مطابق، شہد کیلسائٹ سے 100 ڈالر سے 1000 ڈالر فی کلوگرام تک مل سکتا ہے۔ تاہم، اگر کسی بین الاقوامی فورم پر اضافی قیمت کے ساتھ فروخت کیا جائے تو ظاہر ہے کہ اس کی اچھی قیمت مل سکتی ہے۔انہوں نے مقامی ویلیو ایڈیشن یونٹس قائم کرنے کی ضرورت پر زور دیا۔ہمارے معدنیات کے شعبے کو ترقی دینے کے لیے مقامی پیداوار اور مہارت ہی واحد کلید ہیں۔قدیم تہذیبوں میں، کیلسائٹ، بشمول شہد کیلسائٹ، مقدس مجسموں، تعویذوں اور زیورات کو تراشنے کے لیے استعمال کیا جاتا تھا۔ اسے لچک کی علامت سمجھا جاتا تھا اور اسے مقدس رسومات ادا کرنے میں استعمال کیا جاتا تھا۔شفا یابی کے روایتی چینی نظام میں، کیلسائٹ، بشمول امبر کیلسائٹ، اس کے علاج کی خصوصیات کے لئے استعمال کیا جاتا ہے.اس کی معدنیات کی وجہ سے، یہ انسانی پریشانی کو دور کرتا ہے اور جسم میں توانائی کے بہا وکو مستحکم کرتا ہے۔ لہذا، شفا دینے والے اسے قدیم زمانے سے استعمال کرتے رہے ہیں۔کیلسائٹ کا استعمال مختلف صنعتی مصنوعات میں کیا جاتا ہے۔بہتر معاشی پیداوار حاصل کرنے کے لیے پاکستان کو اپنے خاص پہلووں، جیسے رنگ، مذہبی قدر، اور شفا بخش خصوصیات پر توجہ دینی چاہیے۔ یہ تمام مثبت اقدامات کان کنی کے شعبے کو مزید پائیدار اور مواقع سے بھرپور بنائیں گے۔

کریڈٹ: انڈیپنڈنٹ نیوز پاکستان-آئی این پی

پاکستان گلگت بلتستان خطے اور صوبہ خیبر پختونخواہ کی صاف اور سستی پن بجلی کی صلاحیت کو بہتر طریقے سے استعمال کر کے اپنی توانائی کی کمی کو کم کر سکتا ہے۔ویلتھ پاک سے گفتگو کرتے ہوئے، گلگت بلتستان حکومت میں پانی و بجلی کے سیکرٹری غلام مہدی نے کہا کہ ان دونوں خطوں میں وافر آبی وسائل موجود ہیں جو ملک میں بجلی کے مستقل بحران کو کم کرکے توانائی کے شعبے کو تبدیل کر سکتے ہیں۔ان دونوں خطوں میں دریاوں اور معاونوں کا ایک نیٹ ورک ہے، جن میں سے اب تک صرف ایک حصہ ہی بجلی کی پیداوار کے لیے استعمال ہوا ہے۔ پاکستان کے پاس کل 64,000 میگاواٹ پن بجلی کے ذخائر ہیں، جن میں سے 95 فیصد خیبر پختونخوا، گلگت بلتستان، پنجاب اور آزاد جموں و کشمیر میں موجود ہیں۔پاکستان پرائیویٹ پاور اینڈ انفراسٹرکچر بورڈ کی جانب سے شائع ہونے والی "ہائیڈرو پاور ریسورسز جولائی 2023" کے عنوان سے رپورٹ کے مطابق، ملک میں صرف 70 فیصد لوگوں کو بجلی تک رسائی حاصل ہے۔رپورٹ میں کہا گیا ہے کہ جون 2022 تک، کل نصب شدہ پن بجلی کی گنجائش GB میں بالترتیب 169.35میگاواٹ اور کے پی میں 5,789.22میگاواٹ تھی

۔مہدی نے اس حقیقت کی طرف اشارہ کیا کہ دونوں خطوں میں نصب شدہ صلاحیتوں اور ہائیڈرو وسائل کے درمیان فرق نے بجلی کی پیداوار میں پن بجلی کے وسائل کے کم استعمال کی نشاندہی کی۔اس وقت گلگت بلتستان کے بڑے منصوبوں میں سے ایک دیامر بھاشا ڈیم ہے۔ اس کے مکمل ہونے پر تقریبا 4500 میگاواٹ بجلی پیدا ہونے کی امید ہے۔ ڈیم پانی کی کمی کو کم کرنے میں مددگار ثابت ہوگا اور ان خطوں میں زرعی شعبے کے لیے پانی کی دستیابی کو یقینی بنائے گا۔انہوں نے مزید کہا کہ ان علاقوں میں پیدا ہونے والی بجلی کو بالآخر قومی گرڈ میں ضم کیا جا سکتا ہے، جس سے اسے ملک بھر کے دیگر صنعتی علاقوں میں تقسیم کیا جا سکتا ہے۔ یہ ملک کی صنعتوں کو پڑوسی ممالک کے صنعتی شعبوں کے مقابلے میں قیمتوں کا فائدہ دے کر ان کی مسابقت کو بڑھا دے گا۔مختصرا، جی بی اور کے پی میں پن بجلی کے وسائل پاکستان کی بجلی پیدا کرنے کی صلاحیت میں نمایاں اضافہ کر سکتے ہیں۔ چونکہ پن بجلی توانائی کا ایک سستا اور زیادہ قابل اعتماد ذریعہ ہے، اس لیے یہ صارفین کو سستی اور بلاتعطل بجلی کی فراہمی کو یقینی بنائے گی۔

کریڈٹ: انڈیپنڈنٹ نیوز پاکستان-آئی این پی

انسٹی ٹیوٹ آف چائنا پاکستان اسٹڈی سینٹر کے ڈی جی سہیل محمود نے کہاہے کہ چین کا 14 واں پانچ سالہ منصوبہ پاکستان کے لیے قابل قدر بصیرت پیش کر سکتا ہے کیونکہ ملک اپنے منفرد معاشی، سماجی اور ماحولیاتی چیلنجوں سے نمٹنے کے لیے کوشاں ہے۔ اسٹریٹجک اسٹڈیز اسلام آباد نے ویلتھ پاک کو بتایا کہ یہ ایک جامع منصوبہ ہے جو جدت کی قیادت میں ترقی، سبز معیشت، بنیادی ڈھانچے کی اپ گریڈیشن، اور صنعت کی جدید کاری پر خاص زور دیتا ہے۔انہوں نے کہا کہ منصوبوں کے موثر نفاذ کے لیے سیاسی عزم اور اداروں کی ضرورت ہے اور چین کے پاس یہ دونوں عناصر ہیں جنہوں نے ماضی میں اپنے پانچ سالہ منصوبوں کو کامیاب بنایا ہے۔انہوں نے کہا کہ پاکستان کے ساتھ بنیادی مسئلہ یہ ہے کہ اس کی معاشی منصوبہ بندی من مانی تھی اور حکومت کی تبدیلی کے ساتھ اس میں کافی تبدیلیاں آئیں۔ یہ ملک کی پالیسیوں کے نتائج کے پیمانے کے حوالے سے لاگت سے فائدہ کا تجزیہ کرنے کی صلاحیت کو روک رہا ہے۔اس وقت پاکستان 6.8 فیصد توانائی قابل تجدید ذرائع سے پیدا کرتا ہے۔ چین کے 14ویں پانچ سالہ منصوبے میں صاف توانائی اور ماحولیاتی استحکام پر بہت زیادہ زور دیا گیا ہے۔

انہوں نے زور دے کر کہا کہ پاکستان ماحولیاتی چیلنجز کو کم کرنے کے لیے ماحول دوست پالیسیاں شامل کرنے کے لیے چین سے سیکھ سکتا ہے، تاکہ 2030 تک 60 فیصد قابل تجدید توانائی کے ہدف کو پورا کیا جا سکے۔آج، پاکستان میں صنعتی ترقی کا حصہ کم ہو کر صرف 19 فیصد رہ گیا ہے اور مالی سال 2022-23 میں منفی شرح نمو 2.94 فیصد ریکارڈ کی گئی ہے۔ انہوں نے کہا کہ 14ویں پانچ سالہ منصوبے کے تحت چین کی اختراعی قیادت والی صنعتی ترقی پاکستان کی پائیدار صنعتی ترقی کے لیے کلیدی سبق ہے۔سہیل نے کہا کہ چین کے پانچ سالہ منصوبے ان کے طویل المدتی وژن کے لیے مشہور ہیں اور پاکستان بھی اسی طرح کا طریقہ اپنانے سے فائدہ اٹھا سکتا ہے، پائیدار ترقی اور ترقی کو یقینی بنانے کے لیے مستقبل کے لیے واضح مقاصد اور اہداف کا تعین کر سکتا ہے۔ چین کے پانچ سالہ منصوبے تیزی سے جدت اور ٹیکنالوجی پر مرکوز ہیں۔ انہوں نے تجویز پیش کی کہ اسی خطوط کے ساتھ، پاکستان کو تحقیق اور ترقی میں سرمایہ کاری کرنی چاہیے، انٹرپرینیورشپ کی حوصلہ افزائی کرنی چاہیے اور عالمی معیشت میں مسابقتی رہنے کے لیے اختراع کے کلچر کو فروغ دینا چاہیے۔ چینی حکومت مسلسل پانچ سالہ منصوبوں کی تشکیل اور ان پر عملدرآمد کی مشق کر رہی ہے۔ عالمی معیشت کے اسپیکٹرم میں نئی پیش رفت کے ساتھ، یہ منصوبے ملک کو اس کے مطابق اپنی اقتصادی ترجیحات کی تشکیل میں مدد کرتے ہیں۔ اس حوالے سے پاکستان کو چینی تجربے سے سیکھنے کے لیے بہت سے سبق ہیں۔

کریڈٹ: انڈیپنڈنٹ نیوز پاکستان-آئی این پی

ہفتہ وار بنیادوں پر مہنگائی کی شرح میں 0.33 فیصد کی کمی ہوگئی،سالانہ بنیادوں پر مہنگائی کی شرح 29.65 فیصد ریکارڈ کی گئی۔ ادارہ شماریات نے مہنگائی کے ہفتہ وار اعدادوشمار جاری کر دئیے جس کے مطابق گزشتہ ہفتے میں 14 اشیا ضروریہ کی قیمتوں میں اضافہ ہوا،17 اشیا کی قیمتوں میں کمی،20 کی قیمتیں مستحکم رہیں،گزشتہ ہفتے ٹماٹر فی کلو 23 روپے مہنگے ہوئے۔ ادارہ شماریات کے مطابق آلو کی فی کلو قیمت میں 3 روپے کا اضافہ ہوا۔ رپورٹ کے مطابق گزشتہ ہفتے انڈے فی درجن 5 روہے مہنگے ہوئے،800 گرام نمک 1 روہے،لہسن فی کلو 4 روپے مہنگا ہوا،دال ماش، دال چنا دال مسور کی قیمتوں میں اوسطا آٹھ روپے فی کلو کمی ہوئی۔ ادارہ شماریات کے مطابق چکن چھتیس روپے، ایل پی جی سلنڈر پچاس روپے، چینی تین روپے فی کلو سستی ہوئی، گزشتہ ایک ماہ میں آٹے کے بیس کلو تھیلے کی قیمت میں پینتالیس روپے کمی ہوئی۔ ادارہ شماریات کے مطابق چاول، پیاز، چینی، گڑ اور کیلے کی قیمتوں میں بھی کمی ہوگئی۔

کریڈٹ: انڈیپنڈنٹ نیوز پاکستان-آئی این پی

افغان شہریوں کا وطن واپسی کا سلسلہ جاری ،اب تک کل 81,974 افغان پناہ گزینوں کی اپنے وطن واپسی ہوچکی ہے،افغان باشندوں کی اپنے وطن واپسی دونوں ممالک اور خطے کے پائیدار امن کے لئے ناگزیر ہے ۔پاکستان کئی دہائیوں سے افغانستان کے جنگی متاثرین کو اپنے ملک میں پناہ دیے ہوئے ہے،حکومت پاکستان نے غیرقانونی شہریوں کو پاکستان چھوڑنے کے لئے 31 اکتوبر کی ڈیڈ لائن دی ہے۔ پاکستان میں دہشتگردی، منشیات، کلیشنکوف کلچر، اسمگلنگ جیسے بے شمار جرائم افغان پناہ گزینون کی وجہ سے پیدا ہوئے ہیں،حکومت پاکستان اور عسکری قیادت نے پاکستان کی سالمیت کے پیش نظر ان جرائم کو ختم کرنے کا اٹل فیصلہ کرلیا ہے۔ حکومتی احکامات کے پیشِ نظر طورخم اور چمن بارڈر سے روزانہ ہزاروں افغان باشندے اپنے وطن واپس جا رہے ہیں۔ 27 اکتوبرکو 5046 افغان باشندے اپنے ملک چلے گئیہیں،5046 افغان شہریوں میں 1241 مرد، 1052 خواتین اور 2753 بچے اپنے ملک چلے گئے،افغانستان روانگی کے لیے 153 گاڑیوں میں 310 خاندانوں کی اپنے وطن واپسی عمل میں لائی گئی اور یہ سلسلہ روزانہ کی بنیاد پر جاری ہے،اب تک کل 81,974 افغان پناہ گزینوں کی اپنے وطن واپسی ہوچکی ہے۔ افغان باشندوں کی اپنے وطن واپسی دونوں ممالک اور خطے کے پائیدار امن کے لئے ناگزیر ہے۔

کریڈٹ: انڈیپنڈنٹ نیوز پاکستان-آئی این پی

لاہور میں سموگ کے ڈیرے، ہفتہ کی صبح سویرے ہی شہر کے بیشتر علاقوں میں ایئر کوالٹی انڈیکس کی شرح چار سو سے تجاوزکرگئی، شہر کی مجموعی ایئر کوالٹی انڈیکس کی شرح 368 تک جا پہنچی۔ لاہور دنیا کا سب سے آلودہ شہر قرار، جبکہ دہلی کا دوسرا نمبر ہے۔گارڈن ٹان میں ایئرکوالٹی انڈیکس کی شرح 421 ہوگئی،مال روڑ پر ماحولیاتی آلودگی کی شرح 407 ہوگئی،گلبرگ میں 434، پولو گرانڈ کینٹ سب سے آلودہ علاقہ شرح 430 ریکارڈ کی گئی۔ محکمہ موسمیات کا کہنا ہیکہ اسموگ کے حوالے سے زیرو ٹالرنس پالیسی پر کام کیا جائے۔

کریڈٹ: انڈیپنڈنٹ نیوز پاکستان-آئی این پی

خیبر پختونخوا کے نگراں وزیر خزانہ احمد رسول بنگش کا کہنا ہے کہ یہ حقیقت ہے کہ صوبے کو مالی مشکلات کا سامنا ہے مگر سرکاری ملازمین کی تنخواہوں میں کٹوتی کی خبریں محض افواہ ہیں۔ تفصیلات کے مطابق صوبائی نگراں وزیر خزانہ نے کہا کہ وفاق کے ذمہ گزشتہ مالی سال کے 233 ارب روپے واجب الادا ہیں۔ نگراں وزیر اعظم نے صوبے کے بقایا جات کی ادائیگی کا یقین دلایا ہے۔ میڈیا رپورٹ کے مطابق احمد رسول بنگش کا کہنا تھا کہ سرکاری ملازمین کی تنخواہوں سے کسی قسم کی کٹوتی نہیں کی جارہی، یہ بات غیر رسمی طور پر زیرِ بحث آئی تھی۔ انہوں نے بتایا کہ نگراں کابینہ نے فروری 2024 تک 4 ماہ کے لیے 529 ارب روپے بجٹ کی منظوری دے دی۔

کریڈٹ: انڈیپنڈنٹ نیوز پاکستان-آئی این پی

سپریم کورٹ بار کے سالانہ انتخابات 31 اکتوبر کو ہوں گے۔ سپریم کورٹ بار کی آٹھ مختلف نشستوں پر 20 امیدوار میدان میں ہیں، مجموعی ووٹرز کی تعداد 3 ہزار 756 ہے، لاہور میں سب سے زیادہ ووٹر 1 ہزار 3 سو 48 ہیں۔ صدارتی نشست پر شہزاد شوکت اور میاں عبد القدوس کے درمیان مقابلہ ہوگا، سیکرٹری کی نشست پر علی عمران سید اور سلمان منصور مدمقابل ہونگے۔ پولنگ صبح ساڑھے آٹھ بجے سے لیکر شام پانچ بجے تک جاری رہے گی۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ کے ججز کا نیا ڈیوٹی روسٹر جاری کر دیا گیا ہے۔ چیف جسٹس لاہور ہائیکورٹ کی منظوری کے بعد ایڈیشنل رجسٹرار نے ڈیوٹی روسٹر جاری کیا، نئے ججز روسٹر کے مطابق 12 ڈویژن بنچ اور 25 سنگل بنچ کیسز کی سماعت کریں گے۔ چیف جسٹس لاہور ہائی کورٹ محمد امیر بھٹی اور جسٹس عابد حسین چٹھہ پر مشتمل دو رکنی بنچ تمام نوعیت کے کیسز کی سماعت کرے گا، جسٹس ملک شہزاد احمد خان اور جسٹس فاروق حیدر پر مشتمل دو رکنی بنچ سزائے موت کے خلاف اپیلوں سمیت دیگر کیسز سنے گا۔ ڈیوٹی روسٹر کے مطابق جسٹس شجاعت علی خان اور جسٹس سلطان تنویر پر مشتمل بنچ سول اپیلوں سمیت دیگر کیسز کی سماعت کرے گا، جسٹس علی باقر نجفی کی سربراہی میں دو رکنی بنچ نیب کی اپیلوں کے کیسز سنے گا، جسٹس شاہد بلال حسن اور جسٹس رسال حسن سید پر مشتمل دو رکنی بنچ سول اپیلوں پر سماعت کرے گا۔ جسٹس مس عالیہ نیلم اور جسٹس وحید پر مشتمل بنچ انسداد دہشت گردی کے مقدمات سمیت دیگر کیسز سنے گا، جسٹس عابد عزیز شیخ اور جسٹس فیصل زمان خان پر مشتمل بنچ بینکنگ سمیت دیگر کیسز کی سماعت کرے گا، جسٹس شمس محمود مرزا اور جسٹس انوار حسین پر مشتمل بنچ ٹیکس اپیلوں سمیت دیگر کیسز کی سماعت کرے گا۔ ڈیوٹی روسٹر کے مطابق جسٹس شہباز رضوی اور جسٹس طارق سلیم شیخ پر مشتمل بنچ سزائے موت کے خلاف اپیلوں پر سماعت کرے گا، جسٹس مسعود عابد نقوی اور جسٹس چوہدری اقبال پر مشتمل بنچ سول اپیلوں کے کیسز سنے گا، جسٹس شاہد کریم اور جسٹس عاصم حفیظ پر مشتمل بنچ سول اپیلوں اور کمرشل کیسز کی سماعت کرے گا۔ جسٹس شہرام سرور چوہدری اور جسٹس علی ضیا باجوہ پر مشتمل بنچ منشیات اپیلوں سمیت دیگر کیسز کی سماعت کرے گا، جسٹس شہرام سرور چوہدری کی سربراہی میں دو رکنی بنچ دہشت گردی کی اپیلوں پر سماعت کرے گا، ڈویژن بنچ میں شامل تمام ججز بطور سنگل بنچ کیسز کی سماعت کریں گے۔ لاہور ہائیکورٹ کے نئے ججز روسٹرم پر 30 اکتوبر سے 23 دسمبر تک عمل درآمد ہوگا۔

کریڈٹ: انڈیپنڈنٹ نیوز پاکستان-آئی این پی

اقوام متحدہ میں پاکستان کے مستقل مندوب منیر اکرم نے کہا ہے کہ غزہ میں ہر گزرتے وقت کے ساتھ حالات بدترین ہوتے جا رہے ہیں، اسرائیلی فورسز غزہ میں فلسطینیوں کی نسل کشی کر رہی ہیں۔ اقوام متحدہ کے اجلاس سے خطاب کرتے ہوئے منیر اکرم نے کہا ہے کہ فلسطینی عوام غزہ میں ظلم و جبر برداشت کر رہے ہیں، فلسطین میں اسرائیل اپنے شیطانی حملے میں عورتوں اور بچوں سمیت انسانیت کا قتل عام کر رہا ہے، غزہ میں ڈھائے جانے والے مظالم متغیر نسل کشی کے مترادف ہیں۔ پاکستان کے مستقل مندوب منیر اکرم نے مزید کہا ہے کہ سیکرٹری جنرل بھی متنبہ کر چکے ہیں اور ہم سب بھی مشاہدہ کر رہے ہیں، جن حالات کا میں نے ذکر کیا وہ ہر گزرتے وقت بعد بدترین ہوتے جا رہے ہیں، ہم سیکرٹری جنرل کے بیان کیخلاف اسرائیل کے ظالمانہ ردعمل کی شدید مذمت کرتے ہیں۔ انہوں نے کہا ہے کہ انسانیت کے ناطے ہم سب کو فلسطین میں جاری ظلم و بربریت پر مذمت کرنی چاہیے، خاص طور پر جو ظلم و ستم عورتوں اور بچوں پر ڈھایا جا رہا ہے، جس طرح شیطانی اور گھنانے طریقے سے فلسطینیوں کو ذبح کیا جا رہا ہے ہم سب کو اس کی بھی مذمت کرنی چاہیے۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائیکورٹ نے ایف الیون میں پرائیویٹ تعلیمی ادارے کو الاٹ شدہ پلاٹ پر تعمیرات سے روک دیا۔ عدالت نے ایف الیون میں پرائیویٹ تعلیمی ادارے کو پلاٹ الاٹ کرنے کے خلاف کیس کا تحریری حکم جاری کر دیا، جسٹس میاں گل حسن اورنگزیب نے 9 صفحات پر مشتمل حکم نامہ جاری کیا۔ جسٹس میاں گل حسن اورنگزیب نے استفسار کیا کہ وزارت تعلیم بتائے ڈی جی فیڈرل ڈائریکٹوریٹ آف ایجوکیشن ابھی تک تعینات کیوں نہیں ہوا؟ بادی النظر میں پبلک پرائیویٹ پارٹنرشپ سکول میں صرف 20 فیصد کیلئے فری تعلیم آئینی خلاف ورزی ہے۔ عدالتی فیصلے میں کہا گیا کہ سیکرٹری بطور ڈی جی فیڈرل ڈائریکٹوریٹ آف ایجوکیشن اضافی چارج میں پالیسی فیصلہ نہیں کر سکتے، فیڈرل ڈائریکٹوریٹ آف ایجوکیشن نے پلاٹ کے معاملے پر وزارت تعلیم سے جن خدشات کا اظہار کیا وہ رپورٹ پیش کریں۔ تحریری حکم نامے میں کہا گیا کہ آئندہ سماعت تک پلاٹ پر کسی قسم کی کوئی تعمیرات نہیں ہوں گی۔ ٹیچرز ایسوسی ایشن کی درخواست پر کیس کی مزید سماعت 21 نومبر تک ملتوی کر دی گئی۔

کریڈٹ: انڈیپنڈنٹ نیوز پاکستان-آئی این پی

سابق وزیراعلی پنجاب چودھری پرویز الہی کی اینٹی کرپشن کے مقدمے میں ضمانت واپس لینے کے فیصلے کے خلاف درخواست سماعت کیلئے مقرر کر دی گئی۔ لاہور ہائی کورٹ کے جسٹس سلطان تنویر یکم نومبر کو درخواست پر سماعت کریں گے، عدالت نے وکلا کو دلائل کیلئے طلب کر رکھا ہے۔ واضح رہے کہ چودھری پرویز الہی نے ٹرائل کورٹ کا ضمانت کا فیصلہ واپس لینے کا اقدام لاہور ہائی کورٹ میں چیلنج کیا ہے۔ یاد رہے کہ اینٹی کرپشن نے پرویز الہی کے خلاف پنجاب اسمبلی میں بھرتیوں کا مقدمہ درج کر رکھا ہے۔ دوسری جانب سابق وزیراعلی پنجاب کو دو روزہ جسمانی ریمانڈ مکمل ہونے کے بعد آج لاہور ضلع کچہری میں پیش کیا جائے گا، اینٹی کرپشن پرویز الہی سے تحقیقات کی رپورٹ عدالت پیش کرے گی۔

کریڈٹ: انڈیپنڈنٹ نیوز پاکستان-آئی این پی

بیجنگ (شِنہوا) چین نے عالمی جملہ حقوق (آئی پی) تعاون میں فعال حصہ لیکر نتیجہ خیز نتائج حاصل کیے ہیں۔

قومی جملہ حقوق انتظامیہ کے سربراہ شین چھانگ یو نے ایک پریس کانفرنس میں بتایا کہ چین نے عالمی جملہ حقوق تنظیم (ڈبلیو آئی پی او) کے ساتھ اپنے تعاون کو بڑے پیمانے پر وسعت دی ہے اور ڈبلیو آئی پی او کے چین میں دفتر ، شنگھائی میں تصفیہ مرکز اور 100 سے زیادہ ٹیکنالوجی اور اختراع کے معاون مراکز قائم کئے۔

انہوں نے بیلٹ اینڈ روڈ شراکت دار ممالک کے ساتھ تعاون پر روشنی ڈالتے ہوئے کہا کہ گزشتہ 10 برس میں بیلٹ اینڈ روڈ شراکت دار ممالک میں چینی درخواست دہندگان کے پیٹنٹ کی منظوری کی اوسط شرح نمو 23.8 فیصد سالانہ رہی جبکہ چین میں بیلٹ اینڈ روڈ شراکت دار ممالک کی پیٹنٹ منظوری کی شرح 9.8 فیصد تک پہنچ گئی۔

چین نے جملہ حقوق شعبے میں ہمسایہ ممالک کے ساتھ قریبی طور پر کام کرکے کثیر الجہتی اور دوطرفہ جملہ حقوق تعاون کو وسعت دی ہے۔ اس کے علاوہ 80 سے زیادہ ممالک ، خطوں اور عالمی تنظیموں کے ساتھ شراکت داری قائم کی ہے۔

شین نے مزید کہا کہ مستقبل میں چین بیلٹ اینڈ روڈ شراکت داروں ، برکس اور خاص کر سبز ٹیکنالوجی میں شریک ممالک میں پیٹنٹ کے اطلاق اور اشتراک کو فروغ دے گا۔ 

کتے کے کاٹنے نے آسٹریلین ویمن کرکٹر ایلیسا ہیلی کو ویمن بگ بیش لیگ سے باہر کر دیا،آسٹریلیا کی قائم مقام کپتان اور سڈنی سکسرز کی وکٹ کیپر بیٹر ایلیسا ہیلی کو چند روز قبل ان کے اپنے ہی کتے نے کاٹ لیا تھا،اس حوالے سے بتایا گیا تھا کہ ایلیسا ہیلی اپنے ہی کتوں کی لڑائی چھڑوا رہی تھیں کہ اس دوران ایک کتے نے ان کے ہاتھ کی انگلی پر کاٹ لیا،کتے کے کاٹنے کے بعد ایلیسا ہیلی کا فوری طور پر آپریشن ہوا لیکن انجری کے باعث ایلیسا ہیلی ویمن بگ بیش لیگ سے باہر ہو گئیں،ایلیسا ہیلی کا کہنا ہے کہ یہ ایسی خبر ہے جس کی مجھے امید نہیں تھی، مجھے سڈنی سکسرز سے پیار ہے، میں ویمن بی بی ایل کھیلنا چاہتی تھی لیکن اب میرا فوکس جلد فٹ ہونے پر ہے، اس دوران میں ٹیم کے ساتھ رہوں گی۔

کریڈٹ: انڈیپنڈنٹ نیوز پاکستان-آئی این پی

آئی سی سی ورلڈکپ کے سیمی فائنل تک رسائی آسان بنانے کیلئے پاکستان ٹیم کے جنوبی افریقا کے خلاف میچ سے قبل پاکستان ٹیم کی پلیئنگ الیون میں دو تبدیلیاں کی گئیں،حسن علی اور اسامہ میر پلیئنگ الیون کا حصہ نہیں تھے جبکہ ان دو کھلاڑیوں کی جگہ وسیم جونیئر اور محمد نواز کو پلینگ الیون میں شامل کیا گیا ۔

کریڈٹ: انڈیپنڈنٹ نیوز پاکستان-آئی این پی

ورلڈکپ میں پاکستان اور جنوبی افریقہ کے درمیان میچ سے قبل چنئی میں تیز ہوائوں کیساتھ بارش ہو گئی،کچھ دیر تیز بارش کے بعد پھوار کا سلسلہ جاری رہا جو تھوڑی دیر میں رک گیا،بھارتی محکمہ موسمیات نے چنئی میں بارش کی پیشگوئی کر رکھی تھی۔

کریڈٹ: انڈیپنڈنٹ نیوز پاکستان-آئی این پی

پاکستان 11ویں سلطان جوہر ہاکی کپ میں اپنا دوسرا میچ نیوزی لینڈ کے خلاف (آج)ہفتہ کو ملائیشیا کے شہر جوہر بھارو میں کھیلے گا، ٹورنامنٹ میں 8ممالک کی ٹیمیں حصہ لے رہی ہیں جن کو دو گروپوں میں تقسیم کیا گیا ہے ، پاکستان کو گروپ بی میں بھارت، ملائیشیا اور نیوزی لینڈ کے ساتھ رکھا گیا جبکہ گروپ اے میں آسٹریلیا، جرمنی، برطانیہ اور جنوبی افریقہ کی ٹیمیں شامل ہیں،پاکستان اپنا دوسرا میچ 28اکتوبر کو نیوزی لینڈ کے ساتھ بجے، تیسرا اور گروپ کا آخری میچ میزبان ٹیم ملائیشیا کے خلاف3:05بجے کھیلے گا،ایونٹ 27اکتوبر سے 4نومبر تک ملائیشیا کے شہر جوہر بھارو میں کھیلا جائے گا۔

کریڈٹ: انڈیپنڈنٹ نیوز پاکستان-آئی این پی

امیر جماعت اسلامی پاکستان سراج الحق نے کہا ہے کہ غزہ میں لوگ اور بچے جل رہے ہیں دنیا مجرمانہ طور پر خاموش تماشائی بنی ہے،منصورہ میں فلسطینیوں سے اظہار یکجہتی کیلئے نکالی گئی ریلی سے خطاب کرتے ہوئے سراج الحق نے کہا کہ فلسطینی بچوں کو کس جرم میں قتل کیا گیا؟ غزہ پر 6 ہزار سے زیادہ بم برسائے گئے، غزہ کے لوگ اور بچے جل رہے ہیں، اس جرم عظیم کے باوجود دنیا سو رہی ہے، اقوام متحدہ کی این جی او سیو دا چلڈرن کہاں ہے؟انہوں نے کہا کہ سلامتی کونسل، یو این او کہاں ہیں؟ آج ساری دنیا نے مجرمانہ خاموشی اختیار کی ہوئی ہے، بڑی طاقتوں نے اسرائیل کو قتلِ عام کا لائسنس دیا ہے، ان حالات میں مسلم امہ کی ذمہ داری ہے کہ وہ غزہ کو بچانے کیلئے آگے بڑھے، بیانات، قراردادیں، مذمتی بیانات اسرائیلی ٹینکوں کو نہیں موڑ سکتے،سراج الحق کا کہنا تھا کہ ہم چاہتے ہیں مسلم حکمران اپنی ذمہ داری پوری کریں، غزہ کو دوبارہ آباد کرنے کیلئے اقدامات کئے جائیں، غزہ میں کھانا، پانی، بجلی اور ادویات کی سہولیات ختم ہیں، وہاں کئی صحافیوں کو شہید کر دیا گیا، گھروں کو جلادیا گیا، فلسطینی بچے آج آگ میں جل رہے ہیں، ان کو بچانا انسانیت کا تقاضا ہے، افسوس ہے دنیا اسرائیلی مظالم دیکھ رہی ہے،امیر جماعت اسلامی پاکستان نے کہا کہ ہم مسلمان، مسجد اقصی کے محافظ ہیں، قبلہ اول کے پاسبان ہیں، ہم 29اکتوبر کو اسلام آباد میں امریکی سفارتخانے کے سامنے غزہ مارچ کر رہے ہیں۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کیخلاف ممنوعہ فنڈنگ کیس سماعت کیلئے مقرر کر دیا گیا،الیکشن کمیشن میں پی ٹی آئی کیخلاف ممنوعہ فنڈنگ کیس کی سماعت یکم نومبر کو ہوگی، الیکشن کمیشن میں ممنوعہ فنڈنگ کیس سے متعلق ثبوت فراہم کئے جائیں گے،خیال رہے کہ قبل ازیں الیکشن کمیشن نے پاکستان تحریک انصاف ممنوعہ فنڈنگ ضبطگی کیس کو ڈی لسٹ کردیا تھا، ممنوعہ فنڈنگ کیس 26ستمبر کو سماعت کیلئے مقرر کیا گیا تھا۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائیکورٹ نے سائفر کیس میں چیئرمین پی ٹی آئی کی درخواست ضمانت اور مقدمہ اخراج کی درخواستیں مسترد کرنے کا تفصیلی فیصلہ جاری کر دیا،اسلام آباد ہائی کورٹ کے چیف جسٹس عامر فاروق نے تفصیلی فیصلہ جاری کیا ہے جو 20صفحات پر مشتمل ہے،تفصیلی فیصلے کے مطابق بادی النظر میں پٹیشنر پر آفیشل سیکرٹ ایکٹ کی سیکشن 5کا اطلاق ہوتا ہے، استغاثہ کا کیس ہے کہ وزارت خارجہ نے سائفر کو ڈی کوڈ کر کے پرائم منسٹر سیکرٹریٹ کو بھجوایا،عدالتی فیصلے کے مطابق چیئرمین پی ٹی آئی نے بطور وزیراعظم سائفر کو وصول کیا اور بظاہر گم کردیا، فیصلے میں کہا گیا ہے کہ استغاثہ کے مطابق سائفر کے مندرجات کو ٹوئسٹ کر کے سیاسی مقاصد کے لیے استعمال کیا گیا، دفترِ خارجہ کے سابقہ اور موجودہ افسران بالخصوص سائفر بھیجنے والے اسد مجید کے بیانات ریکارڈ پر ہیں،فیصلے کے مطابق دفتر خارجہ کے افسران کے بیانات سے واضح ہے کہ اس میں کوئی غیرملکی سازش شامل نہیں۔

کریڈٹ: انڈیپنڈنٹ نیوز پاکستان-آئی این پی

نگران وزیراعلی پنجاب محسن نقوی نے کہا ہے کہ مقبوضہ کشمیر کی دن بہ دن خراب ہوتی صورتحال پر دنیا کی خاموشی کا کوئی جواز نہیں،مقبوضہ کشمیرمیں بھارتی جارحیت کے خلاف یوم سیاہ کے موقع پر نگران وزیراعلی پنجاب محسن نقوی نے ایک پیغام میں کہا کہ بھارتی بربریت برداشت کرنے والے کشمیری بھائیوں کو سلام اور شہیدوں کو خراج عقیدت پیش کرتا ہوں، لاکھوں بھارتی فوجیوں نے کشمیریوں کو حراست میں لے رکھا ہے اور بیگناہ کشمیری اپنے ہی گھروں میں قید ہیں،ان کا کہنا تھا کہ غیر انسانی محاصرے، کشمیریوں پر جبروتشدد سے آر ایس ایس کی مکروہ سوچ دنیا کے سامنے بے نقاب ہوچکی ہے، کشمیریوں کا جذبہ ان کو آزادی دلوا کر رہے گا کیونکہ یہ انکا بنیادی حق ہے، بین الاقوامی میڈیا اور انسانی حقوق کی تنظیمیں کشمیریوں کے لیے اپنی آواز بلند کریں،محسن نقوی نے کہا کشمیریوں نے ثابت کر دیا ہے کہ بھارت وحشیانہ طاقت کے استعمال سے ان کی تحریک کو دبا نہیں سکتا، پاکستان اپنے کشمیری بھائیوں کی سفارتی اور اخلاقی حمایت جاری رکھے گا، آج کے دن کشمیری عوام کو باورکرانا ہے کہ وہ اپنی جدوجہد میں تنہا نہیں بلکہ پاکستانی قوم ان کے ساتھ کھڑی ہے۔

کریڈٹ: انڈیپنڈنٹ نیوز پاکستان-آئی این پی

غزہ کی پٹی سے ملحقہ مصری شہر طابا میں جمعرات کی شب گرنے والے میزائل کے نتیجے میں 6افراد کے زخمی ہونے کے بعد مصر کا پہلا سرکاری رد عمل سامنے آیا ہے،مصر کے ایک خودمختار ذریعے نے جمعہ کو تصدیق کی کہ میزائل لانچ کرنے کی منزل کا تعین ہونے کے بعد اس سے نمٹنے کے لیے تمام آپشنز دستیاب ہیں، انہوں نے اس بات پر بھی زور دیا کہ مصر جواب دینے کا حق محفوظ رکھتا ہے،یہ میزائل طابا ایمبولینس کی عمارت اور شہر کے مرکزی ہسپتال کی انتظامی رہائش گاہ پر لگا۔ اسرائیلی فوج نے وضاحت کی کہ اسے بحیرہ احمر پر مصر کے ساتھ اپنی سرحد کے قریب جمعہ کی صبح ایک سکیورٹی واقعے کا علم ہے،مصر کی سرحد سے ملحقہ غزہ کی پٹی میں اسرائیلی جنگی کارروائیوں کے آغاز کے بعد سے یہ اپنی نوعیت کا دوسرا واقعہ ہے۔

کریڈٹ: انڈیپنڈنٹ نیوز پاکستان-آئی این پی

غزہ میں جہاں نہتے فلسطینیوں پراسرائیلی بمباری جاری ہے وہیں سوشل میڈیا پلیٹ فارمز پر بھی ایک مختلف نوعیت کی جنگ چھڑی ہوئی ہے جہاں اسرائیلی ٹک ٹاکرز فلسطینیوں کے مصائب پر ان کا مذاق اڑاتے نظر آرہے ہیں ،اسرائیلی جارحیت کا شکار ہونیوالے فلسطینیوں کی حالت زار پر پوری دنیا درد اور کرب میں مبتلا ہے اور سراپا احتجاج بھی ، تاہم ایسے میں کچھ اسرائیلی ٹک ٹاکرز بے حسی کی مثال قائم کرتے ہوئے پانی، بجلی اور خوراک سے محروم فلسطینیوں کا مذاق اڑا رہے ہیں،عرب میڈیا کی جانب سے شئیر کی گئی ان ویڈیوز میں دیکھا جاسکتا ہے کہ اسرائیلی ٹک ٹاکرز اپنے کمرے کی لائٹ بار بار آن/آف کررہے ہیں، کچھ ویڈیو میں انہیں نلکے سے پانی پیتے اور ضائع کرتے بھی دیکھا گیا،ایک اور ویڈیو میں دیکھا گیا کہ اسرائیلی خاتون ٹک ٹاکر فلسطینی خواتین کے جیسا لباس پہن کر کیچپ، پاڈر اور میک اپ کے ذریعے اپنے چہرے پر جعلی خون کے دھبے بناتی ہیں جس سے ظاہر ہوتا ہے کہ وہ غزہ میں زخمی بچوں اور خواتین کو طنز و طعن کا نشانہ بنارہی ہے،ایوا نامی اسرائیلی میک اپ آرٹسٹ اپنی ویڈیو میں فلسطینی ماں کا بھی مذاق اڑا رہی ہیں، اپنی ویڈیو میں ٹک ٹاکر ہاتھ میں گریپ فروٹ لیے یہ دکھانے کی کوشش کرہی ہیں کہ اصل میں فلسطینی ماں کے بچے مارے نہیں جارہے،غزہ میں پانی، خوراک اور بجلی سے محروم فلسطینیوں کا مذاق اڑانے والی ویڈیوز سوشل میڈیا پر وائرل ہونے کے بعد اسرائیلی ٹک ٹاکرز کو شدید تنقید کا بھی سامنا کرنا پڑرہا ہے،دوسری جانب عرب میڈیا کی رپورٹ کے مطابق غزہ سے متعلق ویڈیوز پوسٹ کرنے والے متعدد اکائونٹس کو بھی بند کردیا گیا ہے ،حال ہی میں اسی طرح کی متعدد ویڈیوز فلسطینیوں کے مصائب کا مذاق اڑانے کے لیے پھیلائی گئی ہیں۔

کریڈٹ: انڈیپنڈنٹ نیوز پاکستان-آئی این پی

چین کے سابق وزیراعظم لی کی چیانگ دل کا دورہ پڑنے سے انتقال کر گئے، ان کی عمر 68برس تھی،چینی میڈیا کے مطابق لی چیانگ رواں سال مارچ میں وزارتِ عظمی کے عہدے سے استعفی دیا تھا،وہ چین کی حکمران جماعت کمیونسٹ پارٹی آف چائنا کی 17ویں، 18ویں اور 19ویں سینٹرل کمیٹی کے پولیٹکل بیورو کی سٹینڈنگ کمیٹی کے رکن رہے،چینی میڈیا کے مطابق 68سالہ سابق وزیراعظم شنگھائی شہر میں مقیم تھے ، جمعرات اور جمعہ کی درمیانی رات انہیں دل کا دورہ پڑا، ان کی جان بچانے کی ہرممکن کوشش کی گئی تاہم وہ جانبر نہ ہوسکے،پاکستان کے نگران وزیراعظم انوارالحق کاکڑ نے سابق چینی وزیراعظم کے انتقال پرافسوس کا اظہار کیاہے ،انوارالحق کاکڑ نے سوشل میڈیا سائٹ (ایکس)پر تعزیتی پیغام میں لکھا کہ لی کی چیانگ پاکستان کے عظیم دوست تھے، 2013میں لی کی چیانگ کے دورہ پاکستان کی بڑی اچھی یادیں ہیں، غم کی گھڑی میں اہل خانہ اور چینی عوام سے اظہا ر ہمدردی کرتے ہیں،صدر مملکت ڈاکٹر عارف علوی نے چین کے سابق وزیر اعظم لی چیانگ کے انتقال پر اظہارِ افسوس کرتے ہوئے کہا ہے کہ پاکستان آج ایک عظیم دوست سے محروم ہوگیا ،انہوں نے کہا کہ لی کی چیانگ پاک چین اقتصادی اور تزویراتی تعلقات کے بڑے حامی تھے، پاکستانی عوام کی جانب سے غم کی اس گھڑی میں تعزیت کا اظہار کرتا ہوں۔

کریڈٹ: انڈیپنڈنٹ نیوز پاکستان-آئی این پی

اسرائیلی حکام نے یروشلم میں واقع مسجدِ اقصی کو مسلمانوں کے لیے بند کر دیا ہے جبکہ یہودیوں کو ممانعت کے باوجود عبادات کرنے کی اجازت دے دی ہے،فلسطینی سرکاری میڈیا رپورٹس کے مطابق اسرائیلی حکام نے مسلمانوں کے لیے مسجدِ اقصی کے تمام دروازے عارضی طور پر بند کر دیے تاہم یہودیوں کو اپنی عبادات کرنے کی مکمل اجازت دی ہے،میڈیا رپورٹس کے مطابق مقبوضہ بیت المقدس کے محکمہ اسلامی اوقاف نے اس بات کی تصدیق کی ہے، جس کا انتظامی کنٹرول اردن کے پاس ہے،محکمہ اسلامی اوقاف کے مطابق اسرائیلی پولیس افسروں نے قلعہ بند مسجد کے تمام دروازے اچانک بند کرنا شروع کر دیے اور مسلمانوں کا داخلہ مسجد اقصی میں روک دیا گیا جبکہ دوسری جانب یہودیوں کو عبادت کی مکمل اجازت دی گئی ہے،رپورٹ کے مطابق موجودہ حکومتی معاہدے اور قدیم شہر میں واقع مسجدِ اقصی میں نافذ پالیسی کے تحت غیر مسلم، مقبوضہ بیت المقدس کے احاطے کا دورہ تو کر سکتے ہیں لیکن انہیں وہاں عبادت کرنے کی اجازت نہیں، اس کے برعکس صرف مسلمان ہی احاطے میں عبادت کر سکتے ہیں،تاہم مسجدِ اقصی کی مقدس نوعیت کے باعث یہودی قانون میں اس کے احاطے میں عبادت کی ممانعت ہے، اس کے باوجود یہودیوں کے اس مقام پر عبادت کرنے کے کئی واقعات سامنے آئے ہیں،اس اقدام کے بعد سے مسجد اقصی میں عبادت کے حوالے سے نافذ پالیسی ختم ہو چکی ہے۔

کریڈٹ: انڈیپنڈنٹ نیوز پاکستان-آئی این پی

پلوامہ ڈرامے پر 14اکتوبر کو راہول گاندھی اور سابق گورنر مقبوضہ کشمیر ستیا پال ملک کی گفتگو سامنے آگئی،سابق گورنر مقبوضہ کشمیر ستیا پال ملک نے کہا کہ مودی نے پلوامہ کو سیاسی فائدے کے لیے استعمال کیا،راہول گاندھی نے کہا کہ مودی نے مجھے شہدا کی میتیں لینے سے روکا اور ایئر پورٹ پر کمرے میں بند کرا دیا، مجھے روک کر پورے واقعے کو مودی نے سیاسی فوائد کے لیے استعمال کیا،ستیا پال ملک نے کہا کہ جب مودی کو بتایا کہ ہماری غلطی سے پلوامہ ہوا تو مجھے چپ رہنے کا حکم ملا، اجیت دوول اور راج ناتھ سنگھ نے بھی مجھے خاموش رہنے کا حکم دیا، بی جے پی نے جان بوجھ کر پلوامہ کا الزام سیاسی فائدے کے لیے پاکستان پر لگایا،سابق گورنر مقبوضہ کشمیر نے کہا کہ حملے کی اطلاع کے لیے کئی فون کیے لیکن مودی شوٹنگ میں مصروف تھا، مودی سرکار نے فوج کو مجبور کیا کہ وہ جہاز کے بجائے سڑک سے جائیں، پلوامہ میں استعمال ہونے والی خودکش گاڑی 10دن سڑکوں پر گھومتی رہی،ستیا پال ملک نے کہا کہ حملے کے دن ایک بھی لنک روڈ پر اہلکار تعینات نہیں تھے، پلوامہ پر بولنے کے جرم میں بطور سزا میرے 5 تبادلے کیے گئے،راہول گاندھی نے کہا کہ ستیا پال ملک کے انکشافات سے توجہ ہٹانے کی خاطر عتیق احمد کو میڈیا کے سامنے مروا دیا گیا۔

کریڈٹ: انڈیپنڈنٹ نیوز پاکستان-آئی این پی

انسانی حقوق کی عالمی تنظیم ایمنسٹی انٹرنیشنل نے کہاہے اسرائیل غزہ تنازع میں عالمی قوانین کی خلاف ورزیاں اور جنگی جرائم کا ارتکاب کررہا ہے، غزہ میں شدید تباہی اور بربادی روکنے کیلئے فوری جنگ بندی کی جائے،غزہ کی صورتحال پر جاری بیان میں ایمنسٹی انٹرنیشنل کا کہنا ہے کہ فریقین کی جانب سے عالمی انسانی قانون کی خلاف ورزیاں اور جنگی جرائم کا ارتکاب کیا گیا، اس بے انتہا تباہی و بربادی کی صورتحال میں انسانیت کا خیال رکھنا چاہیے،ایمنسٹی انٹرنیشنل نے مطالبہ کیا کہ شہری جانوں کا ضیاع اور انسانی مصائب روکنے کیلئے فوری اقدامات کی ضرورت ہے، عالمی برادری فریقین سے فوری انسانی جنگ بندی کا مطالبہ کرنے کیلئے متحد ہوجائے۔

کریڈٹ: انڈیپنڈنٹ نیوز پاکستان-آئی این پی

غزہ پر اسرائیلی بربریت کیخلاف دنیا بھر سے آوازیں اٹھنے کا سلسلہ تاحال جاری ہے، نیویارک کی وال اسٹریٹ پر غزہ کے مظلوم شہریوں کے ساتھ یکجہتی کا اظہار کیا گیا،مظاہرین نے ہاتھوں میں پلے کارڈ اٹھارکھے تھے اور شرکا اسرائیلی جارحیت کے خلاف نعرے بازی کر رہے تھے،ادھر برسلز میں یورپی رہنمائوں کے اجلا س کے مقام کے سامنے بھی احتجاج کیاگیا جبکہ میڈرڈ میں بھی ہزاروں طلبا فلسطینیوں کے ساتھ اظہار یکجہتی کیلئے سڑکوں پر نکلے، مظاہرین نے فلسطین کی آزادی اور غزہ کے لوگوں کی نسل کشی روکنے کا مطالبہ بھی کیا۔

کریڈٹ: انڈیپنڈنٹ نیوز پاکستان-آئی این پی

امریکی ریاست کیلی فورنیا کے شہر رچمنڈ میں فلسطین کے حق میں قرارداد سے منظور کر لی گئی،غیر ملکی میڈیا کے مطابق رچمنڈ سٹی کونسل کے اجلاس میں غزہ کے عوام کی حمایت میں بل پیش کیا گیا، پیش کیے گئے بل میں اسرائیل پر نسلی و اجتماعی سزا کا الزام لگایا گیا تھا، بل کو ایک کے مقابلے میں 5 ووٹوں سے منظور کر لیا گیا،منظور کی گئی قرارداد میں جنگ بندی اور غزہ میں انسانی امداد کی فراہمی کا مطالبہ کیا گیا اور بل میں کہا گیا کہ یہ ووٹ غزہ کے عوام کے لیے کسی امریکی شہر کی حمایت کا پہلا مظاہرہ ہے۔

کریڈٹ: انڈیپنڈنٹ نیوز پاکستان-آئی این پی

امریکی ریاست شمالی کیرولینا میں 5افراد کو گولیاں مار کر قتل کر دیا گیا، مرنے والوں کی لاشیں ایک گھر سے ملی ہیں،مقامی پولیس کا کہنا ہے کہ تمام افراد کی لاشیں شمالی کیرولینا کے شہر فیٹی ول کے علاقے کلنٹن کے مضافات میں واقع ایک گھر سے برآمد ہوئی ہیں، لاشوں سے متعلق اطلاع مقامی رہائشی شخص نے ہیلپ لائن نمبر پر دی تھی، ہلاک افراد کی شناخت نہیں ہو سکی ہے،پولیس کے مطابق ہلاک افراد میں ہسپانوی، کالے اور گورے یعنی مختلف نسلوں سے تعلق رکھنے والے 4 مرد اور ایک عورت شامل ہیں، ہلاک شدہ افراد کی عمریں 30سے 80سال کے درمیان ہیں، ابھی تک کسی ملزم یا مشکوک شخص کا کھوج نہیں لگ سکا،پولیس کو لاشوں کی اطلاع دینے والے شخص کا کہنا ہے کہ گھر واپسی کے دوران گزرتے ہوئے مجھے یہاں کچھ غیر معمولی محسوس ہوا تو خیریت دریافت کرنے کیلئے گھر میں داخل ہو گیا جہاں الگ الگ کمروں میں گولیاں لگی لاشیں بکھری ہوئی تھیں۔

کریڈٹ: انڈیپنڈنٹ نیوز پاکستان-آئی این پی

اسرائیل نے لبنانی سرحد کیقریب فاسفورس بموں سے حملے کیے جس کے باعث لگنے والی آگ قریبی دیہات تک پھیل گئی،عالمی میڈیاکے مطابق اسرائیل کی جانب سے یہ حملہ لبنان کی جنوبی سرحد پر کیا گیا، مقامی حکام کے مطابق لبنان کے سرحدی علاقوں میں اسرائیل اور حزب اللہ کے درمیان تصادم اور فائرنگ کا تبادلہ معمول بنتا جا رہا ہے،سرحدی گائوں المہ الشعب کے میئر جین غفاری کے مطابق اسرائیلی حملے کے بعد علاقے میں آگ کے شعلے بھڑکے، بعد ازاں یہ آگ گائوں کے کناروں تک پہنچ گئی،انہوں نے کہا کہ لبنانی سکیورٹی فورسز اور رضاکاروں کے علاوہ اقوام متحدہ کے فوجی دستوں نے آگ بجھانے کی کوشش میں حصہ لیا،تاہم تیز ہوا کی وجہ سے انہیں آگ بجھانے میں مشکلات کا سامنا کرنا پڑا،گائوں کے بلدیاتی دفتر کے مطابق اسرائیلی حملوں کی وجہ سے المہ الشعب نامی گائوں کی 70فیصد آباد گاوں چھوڑ کر جا چکی ہے،نقورہ کے مئیر عباس عوادہ نے کہا کہ رات کے وقت اسرائیلی حملوں میں فاسفورس بم استعمال کیے گئے، میڈیا سے وابستہ فوٹوگرافرز نے آگ کو گائوں میں زیتون کے پودوں کو جلاتے دیکھا اور مکانات کے بھی قریب تر یہ آگ نظر آئی، لبنانی حملوں سے آگ بھڑکنے کا یہ واقعہ ساحلی شہر نقورہ اور گائوں الم شعب کے درمیان پھیلا ہوا تھا،لبنان کے سرکاریمیڈیا نے لبنانی طبی عملے کے ذرائع سے انہی دنوں میں رپورٹ کیا ہے کہ سفید فاسفورس سے زخمی ہونیوالے مریض سرحدی علاقوں سے ہسپتالوں میں پہنچے ہیں،دوسری جانب انسانی حقوق کے لیے عالمی سطح پر کام کرنے والے ادارے ہیومن رائٹس واچ نے بھی اس امر کی تصدیق کی ہے کہ اسرائیل حماس اور لبنان کے سرحدی علاقوں میں حزب اللہ کے خلاف آگ بھڑکانے والے بارودی ہتھیار استعمال کر رہا ہے۔

کریڈٹ: انڈیپنڈنٹ نیوز پاکستان-آئی این پی

پینٹاگون نے عراق میں امریکی فوج کے ٹارگٹ حملے کی ناکامی کا اعتراف کرلیا ، مزید 900امریکی فوجی مشرق وسطی پہنچ گئے ، عالمی میڈیا کے مطابق امریکی محکمہ دفاع پینٹاگون کا کہنا ہے کہ گزشتہ ہفتے عراق میں کم از کم 12 اور شام میں 4 حملے کئے گئے ، اتحادی افواج کے ٹھکانوں پر حملوں میں 20سے زائد فوجی زخمی ہوئے ہیں، نئی تعیناتی کا مقصد امریکی فورسز کی حفاظت اور فضائی دفاع کو تقویت دینا ہے،امریکی وزیر دفاع لائیڈ آسٹن نے ایک بیان میں کہا کہ یہ دفاعی حملے 17اکتوبر کو ایرانی حمایت یافتہ گروپوں کے عراق اور شام میں امریکی اہلکاروں کے خلاف حملوں کے سلسلے کا جواب ہیں، ان کے فوجی اسرائیل نہیں جائیں گے، یہ تعیناتی خطے میں اسرائیل فلسطین جنگ مزید پھیلنے سے روکنے کا پیغام دینے کی کوشش ہے،ان حملوں کا حکم امریکی صدر جو بائیڈن نے دیا تھا۔

کریڈٹ: انڈیپنڈنٹ نیوز پاکستان-آئی این پی