پاکستان کا انجینئرنگ سیکٹر 30لاکھ افراد کو روزگار فراہم کرتا ہے اور ملک کی کل برآمدات کا 4.8 فیصد ہے،انجینئرنگ سامان کی برآمدات میں رواں مالی سال کے پہلے آٹھ مہینوں کے دوران 10.15 فیصد اضافہ ہواجو 163 ملین ڈالر رہیں، ٹرانسپورٹ کے آلات اور دیگر برقی مشینری کی برآمدات میں بالترتیب 18.9فیصداور 44.4فیصدکا اضافہ ہوا،بڑھتی ہوئی مہنگائی اور روپے کی قدر میں بڑے پیمانے پر کمی نے پیداواری لاگت میں نمایاں اضافہ کیا ہے۔انجینئرنگ ڈویلپمنٹ بورڈ کے چیف ایگزیکٹو آفیسر رضا عباس شاہ نے ویلتھ پاک سے بات کرتے ہوئے کہا کہ دانشمندانہ پالیسیاں چیلنجوں کی نشاندہی کرنے اور جدید تکنیکوں کے استعمال کو یقینی بنانے میں مدد کرتی ہیںجوانجینئرنگ کے شعبے کی کارکردگی کو نمایاں طور پر بہتر بنا سکتی ہیںجس سے برآمدات میں صحت مند نمو ہوتی ہے۔ پاکستان کے انجینئرنگ سیکٹر میں بے پناہ صلاحیت موجود ہے۔ انہوں نے کہا کہ ٹھوس حکمت عملیوں کے نفاذ سے اس شعبے میں سرمایہ کاری میں نمایاں بہتری آسکتی ہے۔پاکستان الیکٹرک فین مینوفیکچرنگ ایسوسی ایشن کے سیکرٹری جنرل احسان مجتبی نے بتایا کہ غیر پیداواری کارکنان، جدید ٹیکنالوجی کی کمی اور زیادہ قرضے لینے کے اخراجات اس شعبے کی مسابقت کی کمی کے بڑے عوامل ہیں۔

انہوں نے کہا کہ تیزی سے بڑھتی ہوئی مہنگائی اور روپے کی قدر میں بڑے پیمانے پر کمی نے پیداواری لاگت میں نمایاں اضافہ کیا ہے۔انہوں نے کہا کہ اس شعبے کی مسابقتی صلاحیت کو بہتر بنانے اور آنے والے سالوں میں برآمدات میں نمایاں حصہ حاصل کرنے کے لیے غیر موثر پیداواری عمل کی نشاندہی اور ابھرتے ہوئے رجحانات کو اپنانا ضروری ہے۔پاکستان کا انجینئرنگ سیکٹر سب سے بڑا اور سب سے زیادہ کراس سیکٹرل روابط رکھتا ہے جو تقریبا 30 لاکھ افراد کو روزگار فراہم کرتا ہے اور ملک کی کل برآمدات میں تقریبا 4.8 فیصد حصہ ڈالتا ہے۔انجینئرنگ سامان کی برآمدات میں گزشتہ سال کی اسی مدت کے مقابلے میں رواں مالی سال 2022-23 کے پہلے آٹھ مہینوں کے دوران 10.15 فیصد اضافہ ہوا ہے۔مالی سال 23 کے جولائی تا فروری کے دوران انجینئرنگ سامان کی برآمدات 163 ملین ڈالر رہیں جبکہ مالی سال 2021-22 کے اسی مہینوں کے دوران 148 ملین ڈالر کی برآمدات تھیں۔انجینئرنگ کے سامان میں سے ٹرانسپورٹ کے آلات اور دیگر برقی مشینری کی برآمدات میں بالترتیب 18.9فیصداور 44.4فیصدکا اضافہ ہوا۔تاہم ماہ بہ ماہ کی بنیاد پر جنوری 2023 کے مقابلے میں فروری 2023 میں انجینئرنگ کے سامان کی برآمدات میں 19.36 فیصد کی کمی واقع ہوئی۔

کریڈٹ: انڈیپنڈنٹ نیوز پاکستان-آئی این پی

سعودی عرب کی تاریخ میں پہلی مرتبہ خاتون اور مرد خلاباز 9 مئی کو خلائی مہم پر روانہ ہوں گے۔ عرب میڈیا کے مطابق علی القرنی اور ریانہ برناوی بین الاقوامی خلائی اسٹیشن جانے والے پہلے سعودی خلاباز ہیں۔ دونوں خلابازوں کے کریڈٹ پر 11 اہم سائنسی تحقیقات شامل ہیں۔ ان تحقیقات میں مائیکرو گریوٹی، انسانی ریسرچ، سیل سائنسز، اور مائیکرو گریوٹی میں مصنوعی بارش کے لیے تحقیق کے تجربات شامل ہیں۔ سعودی اسپیس اتھارٹی کے مطابق علی اور ریانہ نے بین الاقوامی خلائی اسٹیشن کے سفر کے دوران سائنسی تجربات کرنے کے لیے خصوصی تربیتی پروگرام مکمل کیا ہے۔ دونوں خلاباز 9 مئی کو خلائی اسٹیشن کے لیے روانہ ہوں گے۔

کریڈٹ: انڈیپنڈنٹ نیوز پاکستان-آئی این پی

شمالی کوریا کی جانب سے جوہری صلاحیت کے حامل زیر سمندر حملہ کرنے والے ڈرون کا ایک اور تجربہ کیا گیا ہے ۔ غیر ملکی میڈیا رپورٹس کے مطابق نئے ڈرون کو Haeil-2 کا نام دیا گیا ہے ، شمالی کوریا نے کچھ روزقبل زیرسمندر Haeil-1 سونامی نامی ڈرون کا بھی تجربہ کیا تھا، جس کا مقصد بڑی آپریشنل بندرگاہوں کو دھماکے سے ایک بڑی تابکار لہر پیدا کر کے تباہ کرنا ہے۔ میڈیا رپورٹس کے مطابق نیا ڈرون تجربہ 4سے 7 اپریل کے درمیان کیا گیا، اس ڈرون نے 71 گھنٹے 6 منٹ تک پانی کے اندر ایک ہزار کلو میٹر کا فاصلہ طے کیا اور کامیابی سے ہدف کو نشانہ بنایا۔ شمالی کوریا کے سرکاری میڈیا کا اس حوالے سے کہنا ہے کہ ڈرون تجربے کا مقصد امریکا اور جنوبی کوریا کو طاقت دکھانا ہے، اس تجربے کی ویڈیو اور تصاویر جاری کر دی گئیں ہیں۔

کریڈٹ: انڈیپنڈنٹ نیوز پاکستان-آئی این پی

اسرائیل میں گاڑی راہ گیروں پر چڑھنے کے واقعے میں ایک شخص ہلاک ہوگیا۔ غیرملکی میڈیا کے مطابق راہگیروں پر گاڑی چڑھنے کا واقعہ تل ابیب میں پیش آیا جس میں 6 افراد زخمی ہوئے۔ شہر کے ایک اور علاقے میں فائرنگ کی بھی اطلاعات سامنے آئیں۔ اسرائیلی پولیس حکام کا کہنا ہے کہ گاڑی کے فلسطینی ڈرائیور کو گولی مار دی گئی۔ ڈرائیور کا تعلق مغربی کنارے سے ہے اور گاڑی مبینہ طور پر چوری کی تھی۔ اسرائیلی وزارت خارجہ نے واقعہ کی تحقیقات سے قبل ہی اسے دہشت گردانہ حملہ قرار دے دیا۔ اسرائیل کی مسلمان دشمن فورسز رمضان المبارک کے آغاز سے ہی مسجد اقصی میں گھس کر فلسطینی نمازیوں کو بدترین تشدد کا نشانہ بنا رہی ہیں مسجد کا تقدس پامال کررہی ہیں۔

کریڈٹ: انڈیپنڈنٹ نیوز پاکستان-آئی این پی

برطانوی فلاحی تنظیم ایکشن فار ہیومینٹی نے فلسطینی علاقوں میں بڑھتی ہوئی کشیدگی سے متاثرہ فلسطینیوں کے لیے ہنگامی بنیادوں پر عطیات کی اپیل کی ہے۔ یہ تنظیم 2021 سے فلسطین میں کام کر رہی ہے۔ اس نے گذشتہ کشیدہ صورتحال کے دوران بھی مغربی کنارے اور غزہ میں فلسطینیوں کے لیے خوراک، صاف پانی، طبی خدمات تک رسائی میں مدد کی ہے اور یتیموں کی بھی مدد کی ہے۔ تنظیم نے مزید کہا کہ فلسطین میں اس کی ٹیمیں انسانی ضروریات کا جائزہ لے رہی ہیں اور جان بچانے کے لیے ضرورت مندوں تک امداد پہنچانے کی منصوبہ بندی کر رہی ہیں۔ ایکشن فار ہیومینٹی کے سی ای او عثمان مقبل نے کہا ہے کہ ایک مرتبہ پھر فلسطینیوں کو تشدد میں اضافے کی وجہ سے بگڑتے ہوئے انسانی بحران کا سامنا ہے۔ ان کے مطابق اس صورتحال کا سامنا ایسے وقت میں ہوا ہے جب بہت سے فلسطینی رمضان کا مقدس مہینہ منا رہے ہیں۔ عثمان مقبل کا کہنا ہے کہ مہینوں سے مغربی کنارے اور غزہ میں کشیدگی کا جائزہ لے رہے ہیں اور بڑھتے ہوئے تشدد کے پیش نظر ہم لوگوں سے مطالبہ کر رہے ہیں کہ وہ فلسطین میں زندگیاں بچانے اور فلسطینیوں کی مدد کے لیے دل کھول کر عطیات دیں۔ واضح رہے رواں ہفتے اسرائیلی پولیس نے مسجد اقصی میں نمازیوں پر دھاوا بولا تھا اور مسجد کے احاطے سے سینکڑوں افراد کو گرفتار کیا تھا اور زبردستی مسجد سے نکالا تھا۔اسرائیلی پولیس نے کہا تھا کہ اس نے مسجد سے مشتعل افراد کو نکالنے کے لیے یہ کارروائی کی۔ جمعرات کی رات سے جمعے کی صبح تک، اسرائیلی جنگی طیاروں نے غزہ کی پٹی میں حماس اور اسلامی جہاد سے منسلک کئی عسکری مقامات پر بمباری کی تھی۔

کریڈٹ: انڈیپنڈنٹ نیوز پاکستان-آئی این پی

انڈین میڈیا کے ایڈیٹرز کی تنظیم ایڈیٹرز گِلڈ آف انڈیا نے حکومت کی جانب سے سوشل میڈیا پر خبروں کی چھان پھٹک کے لییفیکٹ چیکنگ یونٹ کے قیام پر تشویش کا اظہار کیا ہے۔ غیر ملکی میڈیا کے مطابق انڈین میڈیا انڈسٹری کی تنظیم نے نئے قوانین کو سخت اور سنسرشپ کے مترادف قرار دیا ہے۔ آئی ٹی کے نئے قواعد میڈیا پلیٹ فارمز کے لیے یہ لازم قرار دیتے ہیں کہ وہ ایسی کوئی خبر شائع، نشر یا شیئر نہ کریں جو حکومت سے متعلق غلط معلومات پر مبنی ہو۔ انڈیا کے وزیراعظم نریندر مودی کی انتظامیہ مختلف سوشل میڈیا پلیٹ فارمز کے ساتھ بار بار تنازعات میں الجھتی رہی ہے۔ سوشل میڈیا پلیٹ فارمز مودی حکومت کے ان مطالبات پر عمل کرنے میں ناکام رہے کہ مبینہ طور پر غلط معلومات پھیلانے کے الزام میں کچھ مواد یا اکانٹس کو ہٹا دیا جائے۔ وفاقی حکومت نے جمعرات کو اعلان کیا کہ وہ جعلی، غلط یا گمراہ کن معلومات کی شناخت کے لیے فیکٹ چیک یونٹ کا قیام عمل میں لا رہی ہے۔اس اعلان کے بعد ایڈیٹرز گِلڈ آف انڈیا نے اس یونٹ کے گورننگ میکانزم، جعلی خبروں کے تعین میں اس کے وسیع اختیارات اور ایسے معاملات میں اپیل کرنے کے حق پر سوال اٹھایا ہے۔ تنظیم نے کہا کہ یہ سب کچھ نیچرل جسٹس کے اصولوں کے منافی اور سنسرشپ کے مترادف ہے۔ تنظیم کے بیان کے مطابق اس طرح کے سخت قوانین کے بارے میں وزارت کا نوٹیفکیشن افسوسناک ہے۔ گِلڈ ایک بار پھر وزارت پر زور دیتا ہے کہ وہ اس نوٹیفکیشن کو واپس لے اور میڈیا تنظیموں اور پریس باڈیز سے مشاورت کرے۔ تاہم حکومت نے جمعے کو کہا کہ یہ قواعد سخت نہیں اور جعلی خبروں کی نشاندہی کرنے والے یونٹ کو بہت زیادہ اختیارات نہیں دیے گئے۔

کریڈٹ: انڈیپنڈنٹ نیوز پاکستان-آئی این پی

اپوزیشن لیڈر قومی اسمبلی راجہ ریاض کو فوری طور پر عہدے سے ہٹانے کے لئے لاہور ہائیکورٹ میں درخواست دائر کر دی گئی۔ شہری منیر احمد نے اظہر صدیق ایڈووکیٹ کے توسط سے لاہور ہائیکورٹ میں درخواست دائر کی جس میں وفاقی حکومت، سپیکر قومی اسمبلی اور دیگر کو فریق بنایا گیا ہے۔ درخواست میں کہا گیا ہے کہ عدالت نے تحریک انصاف کے اراکین قومی اسمبلی کے استعفوں کی منظوری پر حکم امتناعی جاری کررکھا ہے، اسمبلی رولز کے حوالے سے عدلیہ کا فیصلہ آ چکا ہے، پی ٹی آئی اراکین کی موجودگی میں راجہ ریاض کی تقرری غیر آئینی ہے، راجہ ریاض کا تعلق پی ڈی ایم سے ہے وہ اپوزیشن لیڈر نہیں بن سکتے، اسمبلی کی مدت ختم ہونے والی ہے مگر سپیکر نے راجہ ریاض کو عہدے سے نہیں ہٹایا۔ درخواست میں استدعا کی گئی کہ عدالت اسمبلی کی مدت ختم ہونے سے پہلے ہی راجہ ریاض کو عہدے سے ہٹانے کا حکم دے۔

کریڈٹ: انڈیپنڈنٹ نیوز پاکستان-آئی این پی

الیکشن کمیشن نے الیکشن ایکٹ سیکشن 57 اور 58 میں ترامیم کے مجوزہ مسودہ کی تیاری شروع کردی۔ الیکشن ایکٹ میں ترامیم کا مجوزہ مسودہ وزارت پارلیمانی امور کے حوالے کیا جائے گا، ترامیم الیکشن کمیشن کو مزید مضبوط بنانے کے لئے ہیں۔ سیکشن 58 میں الیکشن شیڈول کے اجرا کا اختیار الیکشن کمیشن کو ہے، سیکشن 58کے تحت الیکشن کمیشن کے کردار کو مزید واضح کیا جائے گا تاکہ کوئی ابہام نہ رہے۔ سیکشن 58 میں مجوزہ ترمیم کے ذریعے الیکشن کمیشن کا کردار مضبوط کیا جائے گا جبکہ سیکشن 57 کے تحت تاریخ دینے کا اختیار صدر مملکت کو ہے جس میں ترمیم تجویز کی جا رہی ہے۔ اس کے علاوہ ذرائع نے بتایا کہ حکومت کی جانب سے ترمیم کر کے اختیار الیکشن کمیشن کو دینے کی تیاری بھی کی جا رہی ہے۔

کریڈٹ: انڈیپنڈنٹ نیوز پاکستان-آئی این پی

عدلیہ مخالف منظور کردہ قرار داد کی واپسی کے لئے وزیراعظم اور سیکرٹری کابینہ ڈویژن کو خط لکھ دیا گیا ہے۔ خط جوڈیشل ایکٹوازم پینل کے چئیرمین اظہر صدیق ایڈووکیٹ کی جانب سے بھجوایا گیا ہے، خط کے متن میں کہا گیا ہے کہ سپریم کورٹ نے الیکشن عمل درآمد کیس میں 90 روز میں انتخابات کرانے کا حکم دیا۔ وزیراعظم کی سربراہی میں وفاقی کابینہ نے سپریم کورٹ کے فیصلے کے خلاف قرار داد منظور کی، آئین پاکستان کے تحت تمام ادارے سپریم کورٹ کے حکم کے پابند ہیں، آئین میں سپریم کورٹ کے فیصلے کیخلاف اپیل کا قانونی طریقہ کار موجود ہے۔ وفاقی کابینہ نے عدلیہ مخالف قرار داد منظور کر کے غیر آئینی طریقہ اپنایا، وفاقی کابینہ کا اقدام آئین کے آرٹیکل 204 کے تحت واضع طور پر توہین عدالت ہے۔ اگر وفاقی کابینہ نے منظور کردہ قرار داد واپس نہ لی تو توہین عدالت کی کاروائی کے لئے عدلیہ سے رجوع کیا جائے گا۔

کریڈٹ: انڈیپنڈنٹ نیوز پاکستان-آئی این پی

آشیانہ اقبال ریفرنس میں اہم پیشرفت سامنے آئی ہے، وزیراعظم شہباز شریف اور احد چیمہ نے لاہور کی احتساب عدالت میں بریت کی درخواستیں دائر کر دیں۔وکیل امجد پرویز نے شہباز شریف اور احد چیمہ کی بریت کی درخواستیں دائر کیں۔ درخواست میں موقف اختیار کیا گیا کہ سپلیمنٹری تفتیشی رپورٹ سے کرپشن ثابت نہیں ہوئی، نیب نے سپلیمنٹری تفتیشی رپورٹ میں بے گناہ قرار دیا۔ درخواست میں عدالت سے استدعا کی گئی کہ ہمارے خلاف کوئی شواہد موجود نہیں، بری کیا جائے۔ دوسری جانب فواد حسن فواد نے بھی احتساب عدالت لاہور میں بریت کی درخواست دائر کر دی ہے، ملزم منیر ضیا، علی سجاد نے بھی بریت کی درخواستیں دائر کیں۔ یاد رہے کہ ہمراہی ملزم ندیم ضیا پیرزادہ اور بلال قدوائی پہلے ہی بریت کی درخواست دائر کر چکے ہیں، ندیم ضیا پیرزادہ نے دس دس لاکھ روپے کے 2 مچلکے جمع کروا دیئے۔ ملزم ندیم ضیا پیرزادہ کی طرف سے فقیر حسین اور محمد یاسین نے ضمانتی مچلکے جمع کرائے۔

کریڈٹ: انڈیپنڈنٹ نیوز پاکستان-آئی این پی

رویت ہلال ریسرچ کونسل کے دکھائی دینے کیلئے چاند کی عمر 19 گھنٹے سے زائد ہونی چاہیے، اس روز مطلع صاف ہوا تو بھی چاند دکھائی نہیں دے گاسیکریٹری جنرل خالد اعجاز مفتی نے کہا ہے کہ جمعرات بیس اپریل کی شا م عیدالفطر کے ہلال کی رویت نہیں ہوگی ۔ عیدالفطر اس بار تیس روزے مکمل ہونے کے بعد ہفتہ 22 اپریل 2023 کو ہوگی ۔ سیکریٹری جنرل خالد اعجاز مفتی کہ مطابق نیا چاند جمعرات 20 اپریل کو پاکستانی وقت کے مطابق صبح 9بج کر 13 منٹ پر پیدا ہو گا۔انہوں نے کہا کہ دکھائی دینے کیلئے چاند کی عمر 19 گھنٹے سے زائد ہونی چاہیے، اس روز مطلع صاف ہوا تو بھی چاند دکھائی نہیں دے گا۔ خالد اعجاز مفتی کا کہنا تھا کہ 21 اپریل کو 30 رمضان اور 22 اپریل کو یکم شوال ہوگی لہذا 20 اپریل کی شام موصول ہونے والی شوال کے چاند کوئی بھی شہادت جھوٹی ہوگی۔ اس روز یعنی 29 رمضان المبارک کی شام غروبِ آفتاب کے وقت چاند کی عمر جو رویت کے لئے 19 گھنٹوں سے زائد ہونی چاہیے وہ پاکستان کے تمام علاقوں میں 10 گھنٹوں سے بھی کم ہوگی۔ جبکہ کویتی ماہر فلکیات اور تاریخ دان عادل السعدون نے کہا ہے کہ سال رواں 1444 ہجری میں بھی عیدالفطر مسلم ممالک میں مختلف ایام میں منائی جائے گی اور اس کا انحصار شوال کا چاند نظر آنے پر ہوگا۔ تاہم رمضان کا اختتام 21 اپریل کو ہوگا اور عید 22 اپریل کو ہوگی۔ چاند نظر آنے کے حالات کے بارے میں انہوں نے وضاحت سے بتایا ہے کہ کہا کہ 20 اپریل 2023 کو چاند سورج کے ساتھ ہو جائے گا اور اسی وقت اس کو گرہن لگے گا جو عرب خطے میں نظر نہیں آئے گا۔ ملاپ اور چاند گرہن کا وقت صبح 7 بجکر 12 منٹ پر ہے۔ غروب آفتاب شام 6 بجکر 6 منٹ پر ہوگا جبکہ چاند غروب شام 6 بج کر 42 منٹ پر ہوگا۔ اس وقت چاند کی عمر 11 گھنٹے اور 6 منٹ ہوگی۔ انہوں نے ہلال دیکھنے کی شرائط پوری نہ ہونے کا عندیہ دیتے ہوئے کہا کہ زیادہ تر عرب ممالک حتی کہ موریطانیہ میں بھی 29 ویں رمضان کو عید کا چاند نظر نہیں آئے گا نہ کھلی آنکھوں سے اور نہ ہی دوربین سے۔ اس لیے اس سال زیادہ تر مسلم ممالک میں عید 22 اپریل کو ہوگی۔

کریڈٹ: انڈیپنڈنٹ نیوز پاکستان-آئی این پی

کراچی کے علاقے سرجانی ٹاون میں 6 سال کی بچی کو زیادتی کے بعد قتل کردیا گیا۔ پولیس کے مطابق واقعے کے بعد کارروائی کرتے ہوئے متعدد مشتبہ افراد کو حراست میں لے لیا گیا جب کہ کچھ افراد کے ڈی این اے نمونے بھی لیے گئے ہیں۔ دوسری جانب ملیر کھوکھرا پار میں گھر سے خاتون کی لاش ملی ہے۔ ادھر محمودآباد میں تین منزلہ عمارت سے چھلانگ لگانے والی خاتون کی ٹانگ کی ہڈی ٹو ٹ گئی۔ پولیس کا کہنا ہے کہ چھلانگ لگانے والی خاتون سونیا کا دماغی توازن درست نہیں، اسے یہ بھی یاد نہیں کہ اس نے عمارت سے چھلانگ لگائی تھی۔

کریڈٹ: انڈیپنڈنٹ نیوز پاکستان-آئی این پی

کراچی کے علاقے نارتھ کراچی میں پولیس مقابلے میں تین ڈاکو ہلاک ہوگئے۔ پولیس کے مطابق نارتھ کراچی کے علاقے بابا موڑ کے قریب تین ڈاکو شہریوں کو لوٹ کر فرار ہورہے تھے کہ پولیس اور ڈاکوں کے درمیان فائرنگ کا تبادلہ ہوا اور فائرنگ کے تبادلے میں تین ڈاکو ہلاک ہوگئے۔ پولیس کے مطابق ہلاک ڈاکوں کے قبضے سے اسلحہ، موٹر سائیکل اور چھینا ہوا سامان برآمد ہوا ہے۔ پولیس مقابلے میں ہلاک ڈاکوں کی شناخت اویس، راشد اور ذیشان کے نام سے ہوئی ہے، ڈاکوں کی لاشوں کو ضابطے کی کارروائی کے لیے عباسی شہید اسپتال منتقل کردیا گیا ہے۔

کریڈٹ: انڈیپنڈنٹ نیوز پاکستان-آئی این پی

احتساب عدالت نے رہنما پیپلزپارٹی ڈاکٹر عاصم حسین کی بریت کی درخواست مسترد کردی۔ کراچی کی احتساب عدالت نے ڈاکٹر عاصم کی جانب سے دائر درخواست پر فیصلہ سنادیا۔ 17 ارب روپے کی کرپشن سے متعلق ریفرنس میں ڈاکٹر عاصم کی بریت کی درخواست مسترد ہوگئی۔ احتساب عدالت کراچی میں ڈاکٹرعاصم کے خلاف کیس کی سماعت ہوئی، اس سلسلے میں ڈاکٹرعاصم حسین اور دیگر ملزمان عدالت میں پیش ہوئے۔ قومی احتساب بیورو نیب کے مطابق ڈاکٹر عاصم و دیگر پر گیس کے ٹھیکوں کی مد میں 17 ارب روپے کی کرپشن کا الزام ہے۔

کریڈٹ: انڈیپنڈنٹ نیوز پاکستان-آئی این پی

گورنر خیبر پختونخوا حاجی غلام علی نے کہا ہے کہ موجودہ آئینی و سیاسی بحران کا حل پورے ملک میں ایک ہی روز انتخابات کے انعقاد سے ممکن ہے۔ نجی ٹی وی سے گفتگو میں حاجی غلام علی نے کہا کہ ملک میں ایک ہی روز انتخابات کے انعقاد کیلیے تمام اسٹیک ہولڈرز اس حوالے سے مل بیٹھ کر معاملات طے کریں۔ گورنر خیبر پختونخوا نے کہا کہ سپریم کورٹ جو کہے گی وہ تو ماننا ہوگا البتہ خیبر پختونخوا میں ہر روز دہشتگردی کے واقعات ہو رہے ہیں، فوری الیکشن کا مطالبہ کرنے والی پی ٹی آئی بتائے کہ کیا ایسے حالات میں انتخابی مہم چلانا بھی ممکن ہوگی۔ انہوں نے کہا کہ خیبرپختونخوا اور پنجاب کے حالات میں بہت فرق ہے، ہمارے صوبے میں کوئی دن ایسا نہیں کہ دہشتگردی کا واقعہ نہ ہوا ہو۔ حاجی غلام علی کا کہنا ہے کہ میں نے تاریخ دینی ہے الیکشن وفاقی وصوبائی حکومت اورالیکشن کمیشن نے کرانا ہے، نگران صوبائی حکومت کا خط میں نیالیکشن کمیشن اورسپریم کورٹ کو بھیجا۔ الیکشن کے حوالے سے ہمیں ٹھنڈے دماغ کے ساتھ فیصلے کرنا ہوں گے۔ ان کا کہنا تھا کہ اصل اسٹیک ہولڈر صوبے کے عوام، پولیس اور انتخابی عملہ ہے، الیکشن کا مطالبہ کرنے والے بتائیں ان حالات میں وہ انتخابی مہم بھی چلاسکیں گے؟ کیا اس وقت وانا،وزیرستان ، کرم و دیگر علاقوں میں انتخابی مہم ممکن ہوگی۔

کریڈٹ: انڈیپنڈنٹ نیوز پاکستان-آئی این پی

عمران خان اور بشری بی بی پر عدت کے دوران نکاح کے کیس کی سماعت بغیر کارروائی کے ملتوی کردی ہے۔ اسلام آباد کی ڈسٹرکٹ اینڈ سیشن کورٹ میں عمران خان اوربشری بی بی پرعدت کیدوران نکاح کیالزام کیکیس کی سماعت ہوئی جس میں مرکزی گواہ مفتی سعید احمد خان کی عمرہ پر روانگی کے باعث بیان آج ریکارڈ نہ ہوسکا۔ وکیل درخواست گزار نے کہا کہ گواہ مفتی سعید عمرے پرگئے ہیں لہذا عدالت آئندہ کی تاریخ رکھ دے۔ عدالت نے عمران خان اوربشری بی بی کیخلاف دائرپرائیویٹ شکایت پر سماعت 28 اپریل تک ملتوی کردی۔

کریڈٹ: انڈیپنڈنٹ نیوز پاکستان-آئی این پی

انسداد دہشتگردی ڈپارٹمنٹ( سی ٹی ڈی) نے کارروائی کرتے ہوئے پنجاب میں 8 دہشتگردوں کو گرفتار کرلیا۔ سی ٹی ڈی ترجمان کے مطابق گرفتار دہشت گردوں سے دھماکہ خیز مواد ، ہینڈ گرینیڈ ، لٹریچر برآمد کیا گیا ہے۔ گرفتار دہشت گردوں میں فواد اللہ ، فقیر محمد ، آصف نواز ، ضیا الرحمان ، عتیق احمد اور بشیر شامل ہیں۔ ترجمان کا مزید کہنا تھا کہ لاہور سے کالعدم ٹی ٹی پی سے تعلق رکھنے والے اختر نواز اور داعش کے محمد عثمان کو گرفتار کیا گیا۔ گوجرانوالہ سے چار اور ڈی جی خان اور بہاولپور سے ایک ایک دہشت گرد کو گرفتار کیا گیا۔ گرفتار دہشت گردوں کے خلاف چھ ایف آئی آر درج کر کے کاروائی کا آغاز کر دیا گیا۔ دہشت گردوں کو 21 کومبنگ آپریشنز کے دوران مشتبہ افراد سے پوچھ گچھ کے دوران گرفتار کیا گیا۔ سی ٹی ڈی نے پنجاب بھر میں رواں ہفتے 402 کومبنگ اپرئشن کیے۔ کومبنگ آپریشن کے دوران 22921 مشتبہ افراد کو چیک کر کے 118 مشتبہ افراد گرفتار کیا گیا جبکہ ان دہشت گردوں کے خلاف 89 مقدمات کا اندراج کیا گیا۔

کریڈٹ: انڈیپنڈنٹ نیوز پاکستان-آئی این پی

لاہور کی سیشن عدالت نے سابق وزیراعظم کے بھانجے حسان نیازی کی عبوری ضمانت میں 20 اپریل تک توسیع کر دی۔ سیشن عدالت میں گرفتاری کے خوف سے حسان نیازی نے صدر لاہور بار ایسوسی ایشن رانا انتظار کی وساطت سے درخواست ضمانت دائر کی ، درخواست پر سماعت ایڈیشنل سیشن جج ندیم حسن وسیر نے کی ۔ عدالت نے پولیس کو حسان نیازی کی گرفتاری سے 20 اپریل تک روک دیا، حسان نیازی کے وکیل نے ایک دن کی حاضری معافی کی درخواست بھی جمع کرائی جس کو عدالت نے منظور کرلیا ۔ واضح رہے کہ حسان نیازی کے خلاف تھانہ ریس کورس میں مقدمہ 286/23 درج ہے۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ میں قومی اسمبلی کے حلقہ 118 اور 108 کے ضمنی انتخابات منسوخ کرنے کیلئے لاہور ہائیکورٹ میں درخواست دائر کردی گئی ۔ لاہور ہائیکورٹ میں تحریک انصاف کے فرخ حبیب اور اعجاز شاہ نے اظہر صدیق ایڈووکیٹ کی وساطت سے سے درخواست دائر کی ہے ۔ درخواست گزار نے مقف اختیار کیا ہے کہ قومی اسمبلی کے انتخابات کیلئے 120 دن سے کم کا عرصہ رہ گیا ہے، 120 دن سے کم کا عرصہ ہو تو ضمنی انتخابات نہیں ہوسکتے۔ درخواست میں مزید کہا گیا ہے کہ 120 دن سے کم دن ہونے پر ضمنی انتخاب کرانا قانون کے منافی ہے اور ایسے انتخاب کی کوئی گنجائش نہیں لہذا عدالت سے استدعا ہے کہ قومی اسمبلی کے حلقہ 118 اور 108 میں ضمنی انتخاب کو منسوخ کیا جائے۔

کریڈٹ: انڈیپنڈنٹ نیوز پاکستان-آئی این پی

ڈسٹرکٹ اینڈ سیشن کورٹ اسلام آباد نے طیبہ گل کی جانب سے سابق ڈائریکٹر جنرل قومی احتساب بیورو (نیب) شہزاد سلیم کے خلاف ہتک عزت کے کیس کی سماعت 6 مئی تک ملتوی کر دی۔ طیبہ گل اور سابق ڈی جی نیب شہزاد سلیم عدالت پیش ہوئے، طیبہ گل کے وکیل نجی مصروفیات کے باعث عدالت پیش نہیں ہوئے، جس پر ایڈیشنل سیشن جج نے کیس کی سماعت 6 مئی تک ملتوی کر دی۔ واضح رہے کہ گزشتہ سماعت پر عدالت میں پیش ہونے پر سابق ڈی جی نیب شہزاد سلیم کے وارنٹ گرفتاری معطل کردئیے گئے تھے، ڈسٹرکٹ اینڈ سیشن کورٹ اسلام آباد نے فریقین کو نوٹس جاری کرتے ہوئے سماعت 8 اپریل تک ملتوی کی تھی۔

کریڈٹ: انڈیپنڈنٹ نیوز پاکستان-آئی این پی

ڈسٹرکٹ اینڈ سیشن کورٹ اسلام آباد کے ایڈیشنل سیشن جج نے عمران خان کیخلاف توشہ خانہ کیس کی سماعت 11 اپریل تک ملتوی کر دی۔ الیکشن کمیشن کی جانب سے توشہ خانہ کیس کی جلد سماعت مقرر کرنے کی درخواست پر سماعت ہوئی۔ پی ٹی آئی کے جونیئر وکیل نے عدالت کو بتایا کہ ہمارے کسی سینئر وکیل اور نہ ہی عمران خان کو نوٹس کی تعمیل ہوئی، پولیس کی جانب سے تاحال نوٹس کی تعمیل کی رپورٹ عدالت میں جمع نہیں کرائی جا سکی۔ اس سے قبل ایڈیشنل سیشن جج نے تعمیلی نوٹس کی رپورٹ جمع ہونے تک توشہ خانہ کیس کی سماعت میں وقفہ کیا تھا۔ واضح رہے کہ پاکستان تحریک انصاف کے چیئرمین عمران خان کو توشہ خانہ کیس میں ڈسٹرکٹ اینڈ سیشن کورٹ اسلام آباد نے ذاتی حیثیت میں طلب کر رکھا تھا۔

کریڈٹ: انڈیپنڈنٹ نیوز پاکستان-آئی این پی

انتظامیہ نے چینی کے سٹے بازوں اور ذخیرہ اندوزوں کے خلاف کارروائی کرتے ہوئے چاولوں کے تھیلوں میں چھپائی گئی چینی کی 6 ہزار بوریاں تحویل میں لے لیں جبکہ موقع سے گرفتار تین ملزمان سمیت مل مالک کے خلاف مقدمہ کر لیا گیا۔ ڈپٹی کمشنر صادق آباد شکیل احمد بھٹی کی سربراہی میں اے این انڈسٹریز و رائس ملز میں کارروائی کی گئی جبکہ اسسٹنٹ کمشنر صادق آباد حماد حامد، ڈی او انڈسٹریز عماالدین جتوئی سمیت دیگر متعلقہ حکام بھی کارروائی کے دوران انکے ہمراہ موجود تھے۔ ڈپٹی کمشنر شکیل احمد بھٹی نے بتایا کہ انتظامیہ کو اطلاع ملی تھی کے تحصیل صادق آباد میں موجود رائس ملز میں چینی ذخیرہ کی گئی تھی، اے این انڈسٹریز و رائس ملز کے مالک اسرار احمد نے چار ماہ قبل چینی ذخیرہ کی تھی۔ شکیل احمد بھٹی نے بتایا کہ مالکان نے حکومتی ہدایات کے باوجود چینی کو مقامی انتظامیہ کے ریکارڈ میں ڈکلیئر نہیں کیا تھا، چینی کو سرکاری تحویل میں لیکر مالکان کے خلاف ذخیرہ اندوزی و سٹے بازی ایکٹ کے تحت مقدمہ درج کر لیا گیا ہے۔ انہوں نے مزید کہا کہ ضلع میں اشیا روزمرہ کی ذخیر اندوزی اور بلیک مارکیٹنگ کے خلاف زیرو ٹالرنس پالیسی ہے۔

کریڈٹ: انڈیپنڈنٹ نیوز پاکستان-آئی این پی

گورنر سندھ کامران ٹیسوری نے کہا ہے کہ 4 دن آئی جی سندھ کو اختیار دیں، میری کوآرڈینیشن سے 5 ویں دن کوئی سٹریٹ کرائم نہیں ہوگا۔ کراچی میں سترہویں سحری کے موقع پر نارتھ ناظم آباد میں میڈیا سے گفتگو کرتے ہوئے گورنر سندھ کا کہنا تھا کہ شہر میں گورنر ہاوس کی افطاری کے بینر ہٹا دیئے گئے ہیں، مجھے میسج ہے اب آپ رک جائیں، بہت ہوگیا عوام عوام۔ انہوں نے کہا کہ اختیارات دے کر سٹریٹ کرائم ختم کئے جا سکتے ہیں۔ گورنر سندھ نے بتایا کہ گیس کی بندش پر عوام کے ردعمل سے ایم ڈی ایس ایس جی سی کو آگاہ کر چکا ہوں جب گیس نہیں تو بل بھی نہ بھیجیں۔ کامران ٹیسوری کا کہنا تھا کہ عوام گیس بلز گورنر ہاس میں جمع کروائیں، انہیں صفر کروائیں گے۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کے چیئرمین عمران خان کو پارٹی عہدے سے ہٹانے کی درخواست لاہور ہائیکورٹ میں سماعت کے لئے مقرر کر لی گئی۔ جسٹس شاہد بلال حسن کی سربراہی میں لاہور ہائیکورٹ کا لارجر بنچ 12 اپریل کو سماعت کرے گا، درخواست میں عمران خان اور چیف الیکشن کمشنر سمیت دیگر کو فریق بنایا گیا ہے۔ درخواست میں مقف اختیار کیا گیا ہے کہ الیکشن کمیشن عمران خان کو این اے 95 میانوالی سے نااہل قرار دے چکا، الیکشن کمیشن نے 7 دسمبر 2022 کو قانونی کارروائی کا آغاز کیا اور 21 اکتوبر 2022 کو عمران خان کو نااہل قرار دیا۔ درخواست میں کہا گیا ہے کہ اس سے قبل نواز شریف کو بھی عدالت نااہل کر چکی ہے، نااہلی کے بعد نواز شریف پارٹی صدر نہیں رہے، نااہلی کے بعد کوئی پارٹی ہیڈ نہیں رہ سکتا، الیکشن کمیشن سے رجوع کیا مگر درخواست پر کارروائی نہیں کی۔ درخواست میں استدعا کی گئی ہے کہ عدالت عمران خان کو چیئرمین کے عہدے سے ہٹانے کا حکم دے۔

کریڈٹ: انڈیپنڈنٹ نیوز پاکستان-آئی این پی

پاکستان نے بیساکھی کی تقریبات کیلئے سکھ یاتریوں کو ویزے جاری کر دیئے۔ نئی دہلی میں پاکستانی ہائی کمیشن نے 2,856 بھارتی سکھ یاتریوں کو ویزے جاری کئے، سکھ یاتریوں کو 9 سے 18 اپریل تک کیلئے ویزے جاری کئے گئے ہیں، بھارتی یاتری (آج) اتوار کو واہگہ بارڈر کے راستے پاکستان پہنچیں گے جہاں سے انہیں خصوصی ٹرین کے ذریعے حسن ابدال روانہ کیا جائے گا۔ دورے کے دوران زائرین ڈیرہ صاحب، پنجہ صاحب، ننکانہ صاحب اور کرتارپور صاحب جائیں گے، بیساکھی اور خالصہ جنم دن کی مرکزی تقریب 14 اپریل کو گوردوارہ پنجہ صاحب حسن ابدال میں ہوگی۔ بیساکھی میلے کیلئے ویزوں کا اجرا 1974 کے مذہبی مقامات کے دورے پر پاک بھارت پروٹوکول کے فریم ورک کے تحت کیا گیا ہے۔ یاد رہے کہ ہر سال بھارت سے سکھ یاتریوں کی بڑی تعداد مختلف مذہبی تہواروں اور تقریبات میں شرکت کیلئے پاکستان کا دورہ کرتی ہے۔

کریڈٹ: انڈیپنڈنٹ نیوز پاکستان-آئی این پی

صدر مملکت ڈاکٹر عارف علوی نے سپریم کورٹ سے متعلق بل نظرثانی کیلئے واپس بھیج دیا۔ صدرِ پاکستان نے عدالتی اصلاحات بل 2023 آئین کے آرٹیکل 75 کے تحت نظرثانی کے لئے پارلیمنٹ کو واپس بھجوایا ہے۔ صدر مملکت نے کہا کہ بادی النظر میں یہ بل پارلیمنٹ کے اختیار سے باہر ہے، بل قانونی طور پر مصنوعی اور ناکافی ہونے پر عدالت میں چیلنج کیا جاسکتا ہے، میرے خیال میں اس بل کی درستگی کے بارے میں جانچ پڑتال پوری کرنے اور دوبارہ غور کرنے کیلئے واپس کرنا مناسب ہے۔ ڈاکٹر عارف علوی کا کہنا تھا کہ آئین سپریم کورٹ کو اپیل، ایڈوائزری، ریویو اور ابتدائی اختیار سماعت سے نوازتا ہے، مجوزہ بل آرٹیکل 184 تین، عدالت کے ابتدائی اختیار سماعت سے متعلق ہے، مجوزہ بل کا مقصد ابتدائی اختیار سماعت استعمال کرنے اور اپیل کرنے کا طریقہ فراہم کرنا ہے۔ صدر مملکت نے سوال اٹھایا کہ یہ خیال قابل تعریف ہو سکتا ہے مگر کیا اس مقصد کو آئین کی دفعات میں ترمیم کے بغیر حاصل کیا جا سکتا ہے؟ ان کا کہنا تھا کہ تسلیم شدہ قانون تو یہ ہے کہ آئینی دفعات میں عام قانون سازی کے ذریعے ترمیم نہیں کی جاسکتی، آئین ایک اعلی قانون ہے اور قوانین کا باپ ہے، آئین کوئی عام قانون نہیں بلکہ بنیادی اصولوں، اعلی قانون اور دیگر قوانین سے بالاتر قانون کا مجسمہ ہے۔

کریڈٹ: انڈیپنڈنٹ نیوز پاکستان-آئی این پی

ہرارے(شِنہوا) زمبابوے کے دارالحکومت ہرارے کے جنوب میں ایک سڑک پر دو مسافر گاڑیوں کے تصادم کے نتیجے میں نو افراد ہلاک اور 31  زخمی ہو گئے۔

زمبابوے ریپبلک پولیس نے بتایا کہ جمعہ کی صبح  زمبابوے کے باشندے  ایسٹر کے طویل تہوار کے لیے مختلف مقامات کا سفر کر رہے تھے  کہ تباہ کن سڑک ٹریفک حادثہ صبح 6 بجے کے قریب پیش آیا جہاں ہرارے-ماسونگو روڈ پر ایک ٹویوٹا کاروان کومبی جس میں 18 افراد سوار تھے، ایک منی بس کے ساتھ ٹکرا گئی جس میں 22 افراد سوار تھے۔ تصادم کے نتیجے میں نو افراد ہلاک جبکہ 31 دیگر زخمی ہو گئے۔پولیس نے  بیان میں کہا کہ 20 مسافروں کو قریبی موما ہسپتال میں جبکہ 11 دیگر کو گویرو ہسپتال منتقل کیا گیا۔