چین ، جنوب مغربی تبت خوداختیار خطے کے شہر  ننگ چھی کی کاؤنٹی بوم میں مویی پھنگ (بائیں) اپنی اہلیہ تانگ یان کے ساتھ اپنی کافی وین کے ساتھ کھڑے ہیں۔ (شِںہوا)

چین ، جنوب مغربی صوبہ گوئی ژو میں جن فنگ ووجیانگ دریائی پل کے تعمیراتی مقام کو دیکھا جاسکتا ہے۔(شِنہوا)

بھارت میں گرل فرینڈ کی کسی دوسرے شخص سے شادی پر ناراض نوجوان نے تحفے میں بم بھیج دیا جس کے پھٹنے سے دلہا ہلاک ہوگیا،بھارتی میڈیا کے مطابق ریاست چھتیس گڑھ کے ضلع کبیر دھام میں اپنی سابق گرل فرینڈ کی شادی پر نوجوان نے ہوم تھیٹر کا تحفہ بھیجا، دلہا نے جیسے ہی ہوم تھیٹر کا پلگ لگایا وہ دھماکے سے پھٹ گیا جس کے نتیجے میں دلہا موقع پر ہلاک ہوگیا جبکہ دلہا کا بھائی اور ڈیڑھ سالہ بچہ شدید زخمی ہوگئے،پولیس حکام کے مطابق دلہا کے بھائی اسپتال میں زخموں کی تاب نہ لاتے ہوئے دم توڑ گیا۔ شادی میں دئیے گئے تحائف کی لسٹ چیک کرنے پر دلہن کے سابق بوائے فرینڈ کے بارے میں انکشاف ہوا،پولیس نے بم نصب کرنے والے نوجوان کو گرفتار کرلیا جس نے اعتراف کیا کہ اس نے لڑکی سے بدلہ لینے کے لیے یہ قدم اٹھایا۔

کریڈٹ: انڈیپنڈنٹ نیوز پاکستان-آئی این پی

بھارت میں کورونا وائرس کا خطرہ ایک بار پھر بڑھنے لگا ہے اور 24گھنٹوں میں 4ہزار سے زائد کیسز اور 15اموات رپورٹ ہوئی ہیں،بھارتی میڈیا کے مطابق 24گھنٹوں میں کورونا کے 4ہزار 435کیسز اور 15اموات سامنے آئی ہیں، یہ گزشتہ سال ستمبرکے بعدکورونا کیسز میں سب سے زیادہ اضافہ ہے،بھارتی محکمہ صحت کیمطابق کورونا مثبت کیسز کی یومیہ شرح 3.38ریکارڈکی گئی، جب کہ کورونا سے اموات مہاراشٹر، چھتیس گڑھ، نئی دہلی، گجرات، ہریانہ، کرناٹک اور راجستھان میں رپورٹ ہوئیں،بھارت میں کورونا وائرس سے اب تک ہلاک افراد کی تعداد 5لاکھ 30ہزار سے تجاوز کرچکی ہے جو کہ دنیا میں امریکا کے بعد سب سے زیادہ ہے،بھارتی حکومت نے لوگوں سے محتاط رہنے کی اپیل کرتے ہوئے انہیں عوامی مقامات پر ماسک پہننے اور فاصلہ برقرار رکھنے کی ہدایت کی ہے۔

کریڈٹ: انڈیپنڈنٹ نیوز پاکستان-آئی این پی

طالبان نے اقوام متحدہ کے عملے کی افغان خواتین ورکرز کے پورے افغانستان میں کام کرنے پر پابندی عائد کر دی ہے ،غیر ملکی میڈیا کے مطابق اقوام متحدہ کے ترجمان نے کہا کہ یہ افغانستان میں امدادی تنظیموں کے کام کرنے کی صلاحیت کو کمزور کرنے والے پریشان کن رجحان کا تازہ ترین واقعہ ہے جہاں تقریبا 23ملین افراد (ملک کی نصف سے زیادہ آبادی )کو مدد کی ضرورت ہے،انہوں نے کہا کہ اقوام متحدہ کے سیکرٹری جنرل انتونیو گوتریس اقوام متحدہ کے لیے کام کرنے والی افغان خواتین پر کسی بھی پابندی کو ناقابل قبول اور واضح طور پر ناقابل فہم تصور کریں گے،اقوام متحدہ کے حکام ابھی تک اس بات پر غور کر رہے ہیں کہ اس پیش رفت سے ہماری کارروائیوں پر کیا اثر پڑے گا اور ہم توقع کر رہے ہیں کہ کابل میں ڈی فیکٹو حکام کے ساتھ مزید ملاقاتیں ہوں گی، ہم کچھ وضاحت تلاش کرنے کی کوشش کر رہے ہیں، ہمارے پاس ابھی تک تحریری طور پر کچھ نہیں ہے،علاوہ ازیں اقوام متحدہ کے مشن (یو این اے ایم اے)نے افغانستان میں اپنے تمام مرد و خواتین عملے کو سکیورٹی خدشات کی بنا پر آئندہ 48گھنٹوں تک کام پر نہ آنے کی ہدایت کی ہے۔

کریڈٹ: انڈیپنڈنٹ نیوز پاکستان-آئی این پی

اسرائیلی پولیس نے مسجد الاقصی کے احاطے میں درجنوں نمازیوں پر حملہ کردیا جس کے نتیجے میں متعدد افراد زخمی ہو گئے ،غیر ملکیمیڈیا کے مطابق اسرائیلی پولیس نے بدھ کو طلوع آفتاب سے قبل مسجد الاقصی میں نمازیوں پر حملہ کیا جس کے نتیجے میں 7افراد زخمی ہوئے ہیں جبکہ اسرائیلی پولیس کا کہنا تھا کہ یہ فسادات کا جواب ہے،فلسطینی ہلال احمر نے حملے کے نتیجے میں زخمیوں کی اطلاع دی لیکن یہ نہیں بتایا کہ کتنے لوگ زخمی ہوئے ہیں، اپنے ایک بیان میں فلسطینی ہلال احمر نے کہا کہ اسرائیلی فورسز ہمارے ڈاکٹروں کو الاقصی پہنچنے سے روک رہی ہیں،فلسطینی میڈیا کی رپورٹس کے مطابق ایک بزرگ خاتون ایک کرسی پر بیٹھی قرآن کی تلاوت کر رہی تھی کہ یہودی پولیس اہلکاروں نے سٹن گرینیڈ پھینکنے شروع کر دیئے اور ان میں ایک خاتون کو لگا، خاتون کو سانس لینے میں دشواری پیش آرہی تھی،فلسطینی گروپوں نے نمازیوں پر تازہ ترین حملوں کی مذمت کی اوراسے جرم قرار دیا ہے، دوسری جانب عرب ممالک نے اسرائیل کی تازہ جارحیت کی شدید مذمت کی ہے ،سعودی عرب، اردن اور مصر، اردن کی جانب سے اسرائیلی فوج کی جانب سے مسجد اقصی پر حملے، نمازیوں کو زخمی کرنے اور متعدد کو گرفتار کرنے کی مذمت کی گئی ہے،سعودی میڈیا کی رپورٹ کے مطابق وزارت خارجہ کی جانب سے جاری بیان میں سعودی عرب نے مسجد اقصی کے احاطے میں اسرائیل کے نمازیوں پر حملے کی مذمت کرتے ہوئے اسے مسترد کیا ہے

بیان میں کہا گیا ہے کہ ایسا طرز عمل امن کی کوششوں کو نقصان پہنچانے کے ساتھ ساتھ قبضے کو ختم کرنے اور مسئلہ فلسطین کے منصفانہ اور جامع حل تک پہنچنے کے لیے تمام کوششوں کی حمایت میں اس کے مضبوط موقف کی تصدیق کرتا ہے،یہ حملہ رمضان کے مقدس مہینے میں کیا گیا جو اسلام میں روحانیت اور عبادات کا اہم وقت ہے،بیان میں مزید کہا گیا ہے کہ اس طرح کے اقدامات مقدس مذہبی مقامات کے احترام کے حوالے سے بین الاقوامی اصولوں اور ضابطوں کی خلاف ورزی ہیں،فلسطینی گروپوں نے بھی نمازیوں پر اسرائیل کے حملوں کی مذمت کرتے ہوئے اسے جرم قرار دیا ہے ،اردن نے اسرائیل کی طرف سے کمپائونڈ پر پرتشدد طوفان کی مذمت کی جبکہ مصر کی وزارت خارجہ نے الاقصی کے عبادت گزاروں پر اسرائیل کی جانب سے حملے کی مذمت کرتے ہوئے اسے فوری طور پر روکنے کا مطالبہ کیا ہے،دوسری جانب حماس نے تازہ حملے کی مذمت کرتے ہوئے اسے بے مثال جرم قرار دیا اور مغربی کنارے میں فلسطینیوں سے مسجد اقصی پہنچنے کی اپیل کی جس کے بعد فلسطینی خواتین اور بچوں سمیت شہریوں کی بڑی تعداد مسجد الاقصی پہنچ گئی،فلسطینی مسجد الاقصی کو ان چند قومی علامتوں میں سے ایک کے طور پر دیکھتے ہیں جن پر ان کا کنٹرول کا کچھ عنصر برقرار ہے، تاہم، وہ یہودی گروہوں کی طرف سے آہستہ آہستہ تجاوزات سے خوفزدہ ہیں جیسا کہ ہیبرون میں ابراہیمی مسجد میں ہوا ہے، جہاں 1967کے بعد مسجد کا نصف حصہ عبادت گاہ میں تبدیل ہو گیا تھا،فلسطینی انتہائی دائیں بازو کی اسرائیلی تحریکوں سے بھی پریشان ہیں جو مسجد الاقصی کے احاطے میں موجود اسلامی ڈھانچے کو منہدم کر کے ان کی جگہ یہودی مندر بنانا چاہتے ہیں۔

کریڈٹ: انڈیپنڈنٹ نیوز پاکستان-آئی این پی

بھارتی ہمالین ریاست سکم میں برفانی تودہ گرنے سے 7افراد ہلاک ہوگئے،میڈیا رپورٹس کے مطابق بھارت کے شمال مشرق میں ریاست سکم کے ناتھولا مانٹین پاس پر مقامی وقت کے مطابق 12:20پر برفانی تودہ گرا،برفانی تودہ گرنے سے سیاحوں کی متعدد گاڑیاں برفانی تودے کی زد میں آگئیں، امدادی کارروائیوں کے دوران برفانی تودے تلے دبنے والے 20افراد کو بچا لیا گیاہے اور مقامی ہسپتالوں میں منتقل کر دیا گیا،زندہ بچ جانے والے افراد میں سے 8کی حالت تشویشناک بتائی جارہی ہے ، امدادی ٹیموں کی جانب سے تلاش اور بچانے کی کوششیں جاری ہیں کیونکہ برفانی تودے کے نیچے اب بھی زندہ بچ جانے کا امکان موجود ہے،بھارتی حکام کا کہنا ہے کہ اپریل میں اس علاقے میں برفانی تودہ گرنا غیر معمولی ہے جبکہ ایک روز پہلے تک یہاں غیر موسمی بارشیں بھی ہوتی رہی ہیں،گزشتہ دو سالوں کے دوران بھارتی ہمالیہ میں برفانی تودے گرنے کے واقعات میں کم از کم 120افراد ہلاک ہو چکے ہیں۔

کریڈٹ: انڈیپنڈنٹ نیوز پاکستان-آئی این پی

ہندوتوا انتہا پسندوں نے مودی سرکار کی خاطر مسجد پر حملہ کر کے ایک اور سیاہ باب رقم کر دیا، بھارت میں اقلیتوں کا رہنا ہمیشہ سے محال رہا ہے، اب مودی کی بہیمانہ مسلم دشمنی نے بھارت کو جہنم بنا دیا ہے،ہندوتوا انتہا پسندوں نے جھارکھنڈ میں ہزاری باغ کی جامع مسجد پر دھاوا بول دیا، ہندو، مسلم اور ہندو، سکھ فسادات پہلے ہی پورے بھارت کو اپنی لپیٹ میں لے چکے ہیں، ہندوتوا انتہا پسندوں نے جامع مسجد کے دروازے کو توڑتے ہوئے مسلمانوں کے خلاف شدید نعرے بازی کی،مسلم دشمنی نے مودی سرکار کو اتنا اندھا کر دیا ہے کہ وہ مسلمانوں کے مقدسات اور ان کے بنیادی حقوق کو بھی فراموش کر رہی ہے، سوال یہ ہے کہ کیا اقوام متحدہ مودی کی اس بے حسی کا نوٹس لے گی؟ کیا مودی کے مسلمانوں اور سکھوں پر ظلم و زیادتی سے بھارت کے ٹکڑوں میں تقسیم ہونے کی راہ ہموار ہو رہی ہے؟۔

کریڈٹ: انڈیپنڈنٹ نیوز پاکستان-آئی این پی

ایران نے متحدہ عرب امارات کے لیے 8سال بعد اپنا نیا سفیر مقرر کردیا،ایران نے سینئر سفارتکار رضا امیری کو سفیر نامزد کیا ہے جو 8 سال بعد متحدہ عرب امارات میں ایران کے سفیر کے طور پر تعینات ہوں گے،واضح رہے کہ ایران اورسعودی عرب نے اپنے سفارتی تعلقات بحال کرنے کا فیصلہ کیا ہے جس کے بعد سعودی فرماں روا شاہ سلمان نے ایرانی صدر کو سعودی عرب کے دورے کی دعوت بھی دی ہے، 2016میں، متحدہ عرب امارات نے ایران کے ساتھ اپنے تعلقات ختم کرلیے تھے ۔

کریڈٹ: انڈیپنڈنٹ نیوز پاکستان-آئی این پی

امریکا کے سابق صدر ڈونلڈ ٹرمپ نے اڈلٹ اداکارہ سٹورمی ڈینیئلز کو معاملات چھپانے کے لیے رقوم کی ادائیگی کے کیس میں فردجرم عائد ہونے کے معاملے میں نیویارک کی عدالت میں پیش ہوکر خود کو قانون کے حوالے کر دیا، جج نے سماعت سے پہلے کی پابندیوں کے بغیر حراست سے رہا کیا،امریکیمیڈیا کے مطابق ڈونلڈ ٹرمپ پر 2016کی انتخابی مہم کے فنڈز کا غلط استعمال اور بزنس ریکارڈز میں کرپشن کرنے کے الزامات پر فرد جرم عائد کی گئی جس میں سے 34الزامات کو سابق صدر نے مسترد کردیا،سابق امریکی صدر مین ہٹن کریمنل کورٹ میں پیش ہوئے، اس موقع پر عدالت کے باہر سکیورٹی کے سخت انتظامات کیے گئے جبکہ پیشی کے موقع پر ان کے مخالفین اور سپورٹرز کے درمیان کشیدگی کا ماحول دیکھا گیا،ٹرمپ عدالت میں پیشی کے موقع پر 4وکیلوں کے ساتھ عدالت آئے اور سیکرٹ سروس کے اہلکار بھی ان کے ہمراہ تھے ، انہیں ہتھکڑیاں نہیں پہنائی گئیں ، عدالت میں ان کے فنگر پرنٹس لئے گئے، کمرہ عدالت میں پیشی کے موقع پر ٹی وی کیمرے موجود نہیں تھے،بعدازاں سابق صدر کیس کی سماعت مکمل ہونے کے بعد مین ہٹن کی عدالت سے واپس فلوریڈا روانہ ہوگئے،امریکی ججوںکا کہنا ہے کہ سابق صدر ڈونلڈ ٹرمپ کیخلاف مقدمے کی سماعت جنوری 2024میں شروع ہوسکتی ہے، دوسری جانب سابق صدر ڈونلڈ ٹرمپ نے کہا ہے کہ مجھ پر بے بنیاد الزامات لگائے گئے ہیں اور میرے خلاف عدالتی کارروائی انتخابی عمل میں مداخلت ہے-

امریکی میڈیا کے مطابق عدالت سے واپسی کے بعد فلوریڈا میں ایک ریلی کے دوران اپنے حامیوں سے خطاب کرتے ہوئے سابق امریکی صدر نے کہا کہ میرے خلاف جعلی کیس 2024کے الیکشن کے سلسلے میں سامنے لایا گیا، میرا واحد جرم یہ ہے کہ میں نے اپنی قوم کا ان لوگوں سے بلا خوف و خطرہ دفاع کیا جو اسے تباہ کرنا چاہتے ہیں،ٹرمپ کا کہنا تھا کہ ساڑھے 7کروڑ ووٹ لینے والے امریکی صدر پر فرد جرم عائد کی جا رہی ہے، میں نے کبھی نہیں سوچا تھا کہ امریکا میں ایسا ہو سکتا ہے ،ہمارا ملک جہنم میں جا رہا ہے، دنیا پہلے ہی بہت سی دوسری وجوہات کی بنا پر ہم پر ہنس رہی ہے،انہوں نے کہا کہ امریکا بدنظمی کا شکار ہوچکا ہے، معیشت تباہ ہو رہی ہے، افراط زر قابو سے باہر ہو رہا ہے، روس نے صدر بائیڈن کے دور اقتدار میں چین سے اور سعودی عرب نے ایران سے شراکت کر لی ہے، اگر وہ امریکا کے صدر ہوتے تو ایسا کبھی نہ ہوتا،انہوں نے فرد جرم عائد کرنے والے جج کو متعصب جبکہ نیویارک کے ڈسٹرکٹ اٹارنی کو مجرم قرار دیتے ہوئے کہا کہ جج ٹرمپ سے نفرت کرنے والا ہے اور ڈسٹرکٹ اٹارنی براگ کو مستعفی ہوناچاہیے ، ان کیخلاف کارروائی کی جانی چاہیے،یاد رہے کہ ڈونلڈ ٹرمپ پر 2016کی انتخابی مہم کے فنڈز کا غلط استعمال اور بزنس ریکارڈز میں کرپشن کرنے کے الزامات پر فرد جرم عائد کی گئی ہے جس میں سے 34الزامات کو سابق صدر نے مسترد کردیا ہے۔

کریڈٹ: انڈیپنڈنٹ نیوز پاکستان-آئی این پی

ٹیسلا کے شنگھائی پلانٹ نے مارچ کے دوران 88 ہزار 869 گاڑیاں فراہم کیں جو گزشتہ برس کی نسبت 35 فیصد زائد ہے۔ چائنہ پیسنجر کار ایسوسی ایشن کے مطابق شنگھائی میں امریکی کار ساز ادارے کا تحقیق و ترقی اور اختراع مرکز اب تیار شدہ گاڑیوں اور چارجنگ آلات پر زیادہ سے زیادہ اصل ترقیاتی کام کررہا ہے۔ ٹیسلا میں سافٹ ویئر انجینئرنگ کے نائب صدر ڈیوڈ لا کے مطابق چین میں کمپنی کی ٹیمز اس بات کو یقینی بناتی ہیں کہ یہ چینی صارفین کے لئے مصنوعات کو اپنی مرضی کے مطابق بنا سکتی ہے۔ کمپنی کے شنگھائی پلانٹ نے 2022 میں 7 لاکھ 10 ہزار گاڑیاں فراہم کی تھیں جو 2021 کی نسبت 48 فیصد زائد ہیں۔ ٹیسلا گیگا فیکٹری کا قیام 2019 میں عمل میں آیا تھا۔ یہ کار ساز کمپنی کی امریکہ سے باہر پہلی گیگا فیکٹری ہے ۔ اس کا صنعتی چین میں مقامی حصہ 95 فیصد سے زائد ہے جبکہ اس کے 99.99 فیصد ملازمین چین کے شہری ہیں۔ چائنہ ایسوسی ایشن آف آٹوموبائل مینوفیکچررز کے مطابق چین عالمی سطح پر نئی توانائی گاڑیوں کی سب سے زیادہ پیداوار اور فروخت کی منڈی ہے۔ رواں سال کے ابتدائی دو ماہ کے دوران ملک بھر میں 9 لاکھ 33 ہزار نئی توانائی گاڑیاں فروخت ہوئی تھیں۔

کریڈٹ: انڈیپنڈنٹ نیوز پاکستان-آئی این پی

چین کی وزارت خارجہ کی ایک ترجمان نے کہا ہے کہ تسائی انگ وین کے امریکہ کے "ٹرانزٹ" دورے اور ان کی امریکی ایوان نمائندگان کے اسپیکر کیون میک کارتھی سے ملاقات کے امریکی انتظام کی چین سختی سے مخالفت کرتا ہے،جو امریکی حکومت کے تیسرے اعلی ترین عہدے دار ہیں۔ ترجمان ما ننگ نے یومیہ پریس بریفنگ میں کہا کہ یہ ایک چین اصول اور چین ۔ امریکہ مشترکہ تین اعلامیوں کی شقوں کی سنگین ترین خلاف ورزی ہے۔ اس سے چین کی خودمختاری وعلاقائی سلامتی کو شدید نقصان پہنچتا ہے۔ ما نے کہا کہ ہم امریکہ پر زور دیتے ہیں کہ وہ ایک چین اصول اور تین چین-امریکہ مشترکہ اعلامیوں کی شقوں کی پاسداری کرے۔ اس میں تسائی انگ وین کے امریکہ کے "ٹرانزٹ" دورے کی اجازت نہ دینے اور ان کے امریکی سیاسی شخصیات اور عہدیداروں کے درمیان کسی ملاقات یا رابطے کا انتظام نہ کرنے کا کہا گیا ہے۔ ترجمان نے کہا کہ چین صورتحال پر گہری نظر رکھے گا اور ملک کی خودمختاری و علاقائی سلامتی کا بھرپور دفاع کرے گا۔

کریڈٹ: انڈیپنڈنٹ نیوز پاکستان-آئی این پی

کمیونسٹ پارٹی آف چائنہ(سی پی سی) کی مرکزی کمیٹی کے بین الاقوامی شعبے کے سربراہ لیو جیان چھا نے پاکستان مسلم لیگ۔نواز(پی ایم ایل۔ ن) کے سیکرٹری جنرل اور وزیر منصوبہ بندی، ترقی اور خصوصی اقدامات احسن اقبال سے ملاقات کی۔ دونوں فریقین نے چین اور پاکستان کے درمیان بین الجماعتی پارٹی تبادلوں کو مضبوط بنانے اور ریاستوں کے درمیان ترقی کے فروغ بارے جا مع طور پر خیالات کا تبادلہ کیا۔

کریڈٹ: انڈیپنڈنٹ نیوز پاکستان-آئی این پی

شنگھائی نے ثقافت اور سیاحت کے فروغ بارے 28 منصوبوں کا اعلان کیا ہے جس پر مجموعی طور پر 108 ارب یوآن(تقریبا 15.7 ارب امریکی ڈالرز) کی سرمایہ کاری کی جائے گی۔ ان منصوبوں کا مقصد شنگھائی کو ایشیا بحرالکاہل کے خطے میں سیاحت کے شعبے میں سرمایہ کاری کا ایک اہم مقام بنانا ہے۔ شنگھائی بلدیاتی انتظامیہ برائے ثقافت و سیاحت کے ڈائریکٹر فانگ شی ژونگ نے دوسری شنگھائی سیاحتی سرمایہ کاری فروغ کانفرنس میں بتایا کہ اس سے چین کے اقتصادی مرکز کا اعتماد مستحکم ہوگا۔ کھپت میں توسیع ہوگی، سرمایہ کاری کا حصول ممکن ہوسکے گا اور وہ پائیدار شرح نمو کے ساتھ عالمی شہرت یافتہ سیاحتی شہر بننے کی سمت قدم بڑھاسکے گا۔ ان 28 منصوبوں میں ثقافتی آثار، قدیم رہائش گاہیں، فیشن اور فنون کے ساتھ ساتھ شہدا کے یادگاری ہال بھی شامل ہیں۔ بڑے منصوبوں میں سے ایک میں ایک انڈور اسکی ریزورٹ کی تعمیر بھی شامل ہے جس کا رقبہ 90 ہزار مربع میٹر ہوگا۔ کانفرنس کے مطابق یہ ریزورٹ 2024 کی پہلی ششماہی میں عوام کے لئے کھول دیا جائے گا۔ اس ریزورٹ سے نہ صرف شنگھائی کی سیاحتی صنعتی چین میں توسیع ہوگی بلکہ شہر رہائشیوں میں موسم سرما کے کھیلوں کا جوش و خروش بھی پیدا ہوگا۔ چائنہ ٹورازم گروپ کے جنرل منیجر وانگ ہائی مین نے کہا کہ گروپ اور شنگھائی حکومت دریائے ہوانگ پو کے آرپار مسافر کیبل وے کی تعمیر کرتے ہوئے مستقبل میں مزید اسمارٹ سیاحتی اور تحقیقی سیاحتی مصنوعات کی تیاری میں معاونت کرے گی۔

کریڈٹ: انڈیپنڈنٹ نیوز پاکستان-آئی این پی

چین کے صدر شی جن پھنگ نے بیجنگ میں شجرکاری مہم کی ایک سرگرمی میں رضاکارانہ طور پر شرکت کی۔ انہوں نے ایک نیا باب رقم کر نے بارے خوبصورت چین کی تعمیر کیلئے شجرکاری مہم جاری رکھنے پر زور دیا۔ کمیونسٹ پارٹی آف چائنہ کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین شی جن پھنگ نے یہ بات بیجنگ کے ضلع چھا یانگ میں شجرکاری مہم کے سلسلے میں منعقدہ سرگرمی میں شرکت کے دوران کہی۔

کریڈٹ: انڈیپنڈنٹ نیوز پاکستان-آئی این پی

چائنہ ایوربرائٹ گروپ کے سابق چیئرمین اور سابق پارٹی سربراہ لی شیا پھنگ کو پارٹی کے قواعد و ضوابط اور قوانین کی شدید خلاف ورزی کرنے کے الزام میں تحقیقات کا سامنا ہے۔ بدھ کے روز جا ری کردہ ایک سرکا ری بیان کے مطا بق لی کے خلاف تحقیقات کمیونسٹ پارٹی آف چائنہ سینٹرل کمیشن فار ڈسپلن انسپکشن اینڈ نیشنل کمیشن آف سپرویژن کر رہی ہے۔

کریڈٹ: انڈیپنڈنٹ نیوز پاکستان-آئی این پی

پاکستان میں مونگ پھلی کا کاشت کا رقبہ ڈیڑھ لاکھ ہیکٹر ، کل پیداوار ایک لاکھ چالیس ہزارمیٹرک ٹن اور اوسط پیداوار 0.93 میٹرک ٹن فی ہیکٹر ہے،مونگ پھلی کی پیداوار میں خود کفالت خوردنی تیل کی درآمدات کو کم کرسکتی ہے،مونگ پھلی کے بیج میں 50فیصدتیل ہوتا ہے،پاکستان میں مونگ پھلی کے تیل کے لیے کمرشل آئل پروڈکشن یونٹس کی عدم موجودگی،حکومت نے مونگ پھلی کے تیل کی پیداوار کو فروغ دینے کے لیے تحقیق اور ترقی میں خاطر خواہ سرمایہ کاری نہیں کی ۔ویلتھ پاک کی رپورٹ کے مطابق مونگ پھلی کی پیداوار میں خود کفالت ہمارے خوردنی تیل کی درآمدات کو کم کرنے کا ایک حل ہو سکتا ہے جس کی وجہ سے سالانہ بڑے زرمبادلہ کا استعمال ہوتا ہے۔پاکستان ایک زرعی ملک ہے جس میں تیل کے بیجوں کی پیداوار کے وسیع امکانات ہیں، اس کے باوجود وہ ملکی طلب کو پورا کرنے کے لیے اپنے خوردنی تیل کا 80 سے 90 فیصد بیرونی ممالک سے درآمد کرتا ہے۔ درآمدات پر انحصار نہ صرف غیر ملکی زرمبادلہ کے نمایاں اخراج کا باعث بنتا ہے بلکہ ملک کو عالمی قیمتوں میں اتار چڑھاو اور سپلائی چین میں رکاوٹوں کا شکار بنا دیتا ہے۔ قومی زرعی تحقیقی مرکز کے پرنسپل سائنٹیفک آفیسر نزاکت نواز نے ویلتھ پاک سے بات کرتے ہوئے کہا کہ مونگ پھلی کی مقامی پیداوار میں اضافہ کر کے پاکستان اپنے درآمدی بل کو کم کر سکتا ہے اور غذائی تحفظ کو بہتر بنا سکتا ہے۔

انہوں نے کہاکہ مونگ پھلی کے بیج میں 50فیصدتیل ہوتا ہے۔ یہ پوری دنیا میں ایک بہت اہم تیل ہے اور اس کی پیداوار ان ممالک کے لیے گیم چینجر ثابت ہو سکتی ہے جو درآمد شدہ خوردنی تیل پر بہت زیادہ انحصار کرتے ہیں۔ پاکستان ایک ایسا ملک ہے جو مونگ پھلی کی پیداوار میں خود کفیل ہونے اور درآمدات پر انحصار کم کرنے کی بے پناہ صلاحیت رکھتا ہے۔ریاستہائے متحدہ کے محکمہ زراعت کے اعدادوشمار کے مطابق 2022/23 میں پاکستان میں مونگ پھلی کا کاشت کا رقبہ تقریبا 150,000 ہیکٹر ہے جس کی کل پیداوار 140,000 میٹرک ٹن ہے اور اوسط پیداوار تقریبا 0.93 میٹرک ٹن فی ہیکٹر ہے۔ اس قدر نسبتا کم پیداوار کو بہتر بنانے کی ضرورت ہے ۔مونگ پھلی کے تیل کے صحت کے لیے بہت سے فوائد ہیں لیکن پاکستان میں مونگ پھلی کے تیل کی تجارتی پیمانے پر پیداوار نہیں ہے اور زیادہ تر لوگ اس بات سے بے خبر ہیں کہ اسے خوردنی تیل کے طور پر استعمال کیا جا سکتا ہے۔ اس لیے ہمیں تیل کی پیداوار کے لیے اس فصل کو تلاش کرنا چاہیے۔مونگ پھلی کی پیداوار میں خود کفالت حاصل کرنے کے لیے ہمیں اپنے زرعی شعبے کی پیداواریت اور کارکردگی کو بہتر بنانے پر توجہ دینی چاہیے۔ یہ ٹیکنالوجی تک رسائی کو بہتر بنانا، آبپاشی کی بہتر سہولیات فراہم کرنا اور زرعی شعبے میں تحقیق اور ترقی کو بڑھاکر حا صل کیا جاسکتا ہے۔پاکستان میں مونگ پھلی کے تیل کے لیے کمرشل آئل پروڈکشن یونٹس کی عدم موجودگی کی بنیادی وجہ اس شعبے میں تحقیق اور ترقی کا فقدان ہے۔ حکومت نے مونگ پھلی کے تیل کی پیداوار کو فروغ دینے کے لیے تحقیق اور ترقی میں خاطر خواہ سرمایہ کاری نہیں کی ہے۔

کاشتکار مونگ پھلی اگانے کے فوائد سے واقف نہیں ہیںاور صنعت ترقی نہیں کر پائی ہے۔حکومت کو مونگ پھلی کی پیداوار کو فروغ دینے کے لیے تحقیق اور ترقی میں سرمایہ کاری کرنی چاہیے۔ اس میں مونگ پھلی کی زیادہ پیداوار دینے والی اقسام کی ترقی، کاشتکاری کی جدید تکنیکوں کا استعمال اور خوراک کی صنعت میں مونگ پھلی کے تیل کے استعمال کو فروغ دینا شامل ہو سکتا ہے۔ پاکستان میں زیادہ تر کسانوں کے پاس چھوٹی زمینیں ہیںجس کی وجہ سے ان کے لیے تیل کی پیداوار کے لیے درکار ٹیکنالوجی اور انفراسٹرکچر میں سرمایہ کاری کرنا مشکل ہو جاتا ہے۔مونگ پھلی کے تیل کی پیداوار میں کمی کی ایک اور وجہ پروسیسنگ کی سہولیات کی عدم موجودگی ہے۔ کسانوں کو اپنی فصلیں کم قیمت پر بیچنی پڑتی ہیںجس کے نتیجے میں ان کی آمدنی کا نقصان ہوتا ہے۔حکومت کو ملک میں تیل کے تجارتی یونٹس کے قیام کو فروغ دینا چاہیے۔ اس طرح کے یونٹوں کے قیام کے لیے ٹیکس میں چھوٹ، کم سود پر قرضے اور سبسڈی جیسی مراعات فراہم کر کے حاصل کیا جا سکتا ہے۔ حکومت کسانوں کو تکنیکی مدد بھی فراہم کر سکتی ہے تاکہ وہ اپنے تیل کی پیداوار کے یونٹ قائم کر سکیں۔ حکومت کو پروسیسنگ کی سہولیات کی ترقی میںسرمایہ کاری کرنی چاہیے تاکہ ہمارے کسان اپنی فصلوں کو مقامی طور پر پروسیس کر سکیں۔ اس کے نتیجے میں کسانوں کے لیے قیمتیں زیادہ ہوں گی اور پروسیسنگ انڈسٹری میں روزگار کے مواقع بھی پیدا ہوں گے اور درآمد شدہ خوردنی تیل پر ملک کا انحصار کم ہو جائے گا۔

کریڈٹ: انڈیپنڈنٹ نیوز پاکستان-آئی این پی

پاکستان میں ماہی گیر کسمپرسی کی زندگی گزارنے پر مجبور،79 فیصد آبادی غربت کی لکیر سے نیچے،90 فیصد ماہی گیر بے گھر،شرح خواندگی نہ ہونے کے برابر، ساحلی پٹی کے ساتھ مقیم ماہی گیرکمیونٹیز شدید مشکلات کا شکار،سکول نہ ہسپتال،مزدور کا درجہ بھی حاصل نہیں،سیکورٹی نہ انشورنس،بینک اور قرض کی سہولیات تک رسائی سے بھی محروم،کوئی پرسان حال نہیں،حکومت نے بھی چپ سادھ لی۔ویلتھ پاک کی رپورٹ کے مطابق ماہی گیری پاکستان کے لیے بھاری زرمبادلہ کمانے والا ایک منافع بخش پیشہ ہے تاہم ملک کی ساحلی پٹی کے ساتھ رہنے والی ماہی گیری کی کمیونٹیز زیادہ تر شدید مشکلات کا شکار ہیں۔ایشیائی ترقیاتی بینک نے 79 فیصد آبادی کو غریب قرار دیا ہے جب کہ 54 فیصد غریب ترین طبقے میں آتے ہیں۔ تقریبا 90 فیصد باشندے بغیر کسی سہولت کے بکھری ہوئی بستیوں میں سرکنڈے کی جھاڑیوں میں رہتے ہیں۔وسائل اور خدمات کی کمی کا سب سے زیادہ اثر خواتین اور بچوں پر پڑتا ہے۔ اوسط خواندگی کی شرح مردوں کے لیے 47فیصداور خواتین کے لیے 14فیصدریکارڈ کی گئی۔ ماہی گیری کے شعبے کی ترقی ہنر مند افراد کے بغیر ممکن نہیں۔ خواندگی، تربیت، تحقیق اور جدید ٹیکنالوجی اس کمیونٹی کی سماجی و اقتصادی حالت کو بہتر بنانے میں اہم کردار ادا کرتی ہیں۔بلوچستان کے میرین فشریز لسبیلہ کے ڈائریکٹر احمد ندیم کے مطابق ان دیہی برادریوں کی معیشت اور معاش کا براہ راست تعلق ان کے فوری ماحول سے ہے جس میں مینگروو کی دلدل، کریک اور فش فارمنگ شامل ہیں۔سب سے پہلے ان کمیونٹیز کو صحت کی حفاظت اور انشورنس فراہم کی جانی چاہیے کیونکہ ان کی سرگرمیاں بہت سخت اور تھکا دینے والی ہیں۔

وہ سانپ کے کاٹنے، مچھلی کے کاٹنے اور دیگر بیماریوں کا شکار ہوتے ہیں لیکن ان کے پینل پر کوئی ہسپتال نہیں ہے اور انہیں علاج کے لیے خود خرچ کرنا پڑتا ہے۔ اس لیے ان کی کمائی بہت کم ہے اور پاکستان میں ان کی کوئی پہچان نہیں ہے۔ انہیں کسانوں یا مزدوروں کے طور پر سمجھا جانا چاہئے تاکہ وہ بھی فائدہ اٹھا سکیں۔ بلوچستان حکومت نے حال ہی میں ایک پالیسی منظور کی ہے کہ ماہی گیروں کو مزدور سمجھا جائے۔ تاہم پالیسی صرف ایک دستاویز ہے جس پر عمل درآمد کا انتظار ہے۔ماہی گیروں کو مچھلیاں تلاش کرنے کے لیے گہرے سمندر میں جانا پڑتا ہے۔ مچھلیوں کے کم ہوتے ذخیرے نے ان کی زندگی کو بدتر بنا دیا ہے کیونکہ وہ خوراک اور آمدنی کے لیے مچھلیوں پر منحصر ہیں۔ مچھلیوں کے کم ہوتے ذخیرے نے انہیں ماہی گیری کے طریقوں کو اپنانے یا تبدیل کرنے پر مجبور کر دیا ہے۔ ماہی گیر سمندری خوراک کی برآمد کے ذریعے ملک کو زرمبادلہ کمانے میں مدد کرتے ہیںلیکن وہ برآمدات میں اضافہ کرنے سے قاصر ہیں کیونکہ ان کی اپنی زندگیوں میں بہتری نہیں آرہی اور انہیں ان کی کوششوں کے مطابق منافع نہیں ملتا۔ تربیت یافتہ اور ہنر مند پیشہ ور افراد کی بڑی کمی ہے۔ حکومت کو ملکی بحری سرگرمیوں کے تقاضوں کو پورا کرنے کے لیے ہنر مند پیشہ ور افراد کو تربیت اور تیار کرنے کی ضرورت ہے۔زیادہ تر ماہی گیر بینک اور قرض کی سہولیات تک رسائی سے محروم ہیں۔ مائیکرو فنانس اداروں کی طرف سے فراہم کردہ کریڈٹ سہولیات کے ذریعے ان کی ترقی کے مواقع کو بڑھایا جا سکتا ہے۔

دوسرے ممالک میںساحلی کمیونٹیز نے مائیکرو فنانس سہولیات تک رسائی کے ذریعے نمایاں طور پر فائدہ اٹھایا ہے جس سے ان کے اثاثوں اور آمدنی میں اضافہ ہوا ہے۔ ہمیں اپنی دیہی برادریوں کو بھی ایسی سہولیات فراہم کرنی چاہئیں۔ انہوں نے کہا کہ ان ماہی گیروں کی مدد کے لیے پچھلی حکومت نے کامیاب پاکستان پروگرام شروع کیا۔ یہ پروگرام افراد کو مائیکرو قرضے کی پیشکش کرتا ہے، بینک ایسے مائیکرو فنانس اداروں کو سرمایہ فراہم کرتے ہیں جو بینک سے محروم کمیونٹیز کو مزید قرض دیتے ہیں۔ کاروبار کے قیام، اثاثوں کی خریداری، گھر کی تعمیر اور پیشہ ورانہ تربیت کے لیے رعایتی نرخوں پر مائیکرو قرضے پیش کیے جاتے ہیں۔ساحلی کمیونٹیز دیگر پسماندہ کمیونٹیز کی طرح ان سبسڈی والی اسکیموں سے بہت فائدہ اٹھا سکتی ہیں۔ پاکستان میں ماہی گیروں کے معیار زندگی کو بہتر بنانے کے لیے اس قسم کے اقدام کو فروغ دینا چاہیے۔

کریڈٹ: انڈیپنڈنٹ نیوز پاکستان-آئی این پی

پاکستان میں ہر سال 870 ملین ڈالر مالیت کی باغبانی مصنوعات درآمد کی جاتی ہیں جبکہ برآمدات 674 ملین ڈالر ہیں،باغبانی کی مصنوعات کی کل طلب 17 ملین ٹن سالانہ ہے جو 2040 میں 50 ملین ٹن سے تجاوز کرجائیگی،زراعت کے 22 ملین ہیکٹر رقبے میں سے صرف 6فیصدباغبانی کیلئے مختص،3.5فیصدسبزیوں ، 2فیصدپھلوں اور 0.5فیصدسجاوٹی پودوں کے لیے زیر استعمال،عالمی منڈیوں میں تازہ اور اعلی معیار کی ہارٹیکلچرسپلائی یقینی بنانے کے لیے بہتر انفراسٹرکچر پیشگی شرط،تجارتی خسارے کو کم کرنے کے لیے باغبانی میں بڑی صلاحیت موجود،پاکستان کو باغبانی کی مصنوعات کے لیے مزید زمین محفوظ کرنے کی ضرورت۔ وائٹل گرین لمیٹڈ کے سی ای او احمد عمیر ملک نے ویلتھ پاک سے بات کرتے ہوئے کہا ہے کہ پاکستان میں باغبانی کو زیادہ تر نظرانداز کیا جاتا ہے۔ تجارتی خسارے کو کم کرنے کے لیے باغبانی میں بہت بڑی صلاحیت ہے۔انہوں نے کہا کہ اگرچہ پاکستان میں زرخیز سرزمین ہے اور زراعت کے لیے سازگار آب و ہوا ہے لیکن اس شعبے کی حقیقی صلاحیت کو ابھی تک عملی شکل نہیں دی جا سکی ہے۔پاکستان میں زراعت سے متعلق کل درآمدات کا ایک بڑا حصہ باغبانی پر مشتمل ہے۔ پاکستان بیورو آف شماریات کے مطابق ہر سال 870 ملین ڈالر مالیت کی باغبانی مصنوعات درآمد کی جاتی ہیں جبکہ برآمدات 674 ملین ڈالر ہیں۔انہوں نے مانگ میں مزید اضافے پر تشویش کا اظہار کیا۔ اس وقت باغبانی کی مصنوعات کی کل طلب 17 ملین ٹن سالانہ ہے جبکہ 2040 میں یہ 50 ملین ٹن سالانہ سے تجاوز کرنے کی توقع ہے۔

انہوں نے کہاکہ پاکستان کو باغبانی کی مصنوعات کے لیے مزید زمین محفوظ کرنے کی ضرورت ہے جن کی عالمی منڈیوں میں مانگ ہے۔ ان میں سے ہمارے ملک کے سجاوٹی پودوں کی بیرون ملک بہت قدر کی جاتی ہے۔پاکستان میں زراعت کے لیے کل احاطہ شدہ رقبہ 22 ملین ہیکٹر ہے جس میں سے صرف 6فیصدباغبانی کی پیداوار کے تحت ہے 3.5فیصدسبزیوں کے لیے، 2فیصدپھلوں کے لیے اور 0.5فیصدسجاوٹی پودوں کے لیے ہے۔انہوں نے چھوٹی زمینوں والے کسانوں کو برآمدی سپلائی چین سے جوڑنے کی ضرورت پر زور دیا۔ چھوٹی زمینوں والے کسان باغبانی کے طریقوں سے پھل کاٹ سکتے ہیں۔ چھوٹی زمینوں پر روایتی فصلیں کسانوں کو کم منافع دیتی ہیں۔ انہیں برآمدی سپلائی چینز سے جوڑنے سے پاکستان کو درآمدات اور برآمدات کے درمیان فرق کو ختم کرنے میں مدد ملے گی۔باغبانی کی مصنوعات کی خرابی کو مدنظر رکھتے ہوئے عمیر نے بہتر انفراسٹرکچر کی ضرورت پر زور دیا۔انہوں نے مزید کہاکہ عالمی منڈیوں میں تازہ اور اعلی معیار کی سپلائی کو یقینی بنانے کے لیے بہتر انفراسٹرکچر ایک پیشگی شرط ہے۔ حکومت اس سلسلے میں اسٹوریج کی سہولیات بھی فراہم کر سکتی ہے۔انہوں نے کہا کہ پاکستان کو دو دہائیوں سے تجارتی خسارے کا سامنا ہے اور سازگار موسمی حالات کے باوجود وہ اپنی حقیقی صلاحیت کو سمجھنے میں پیچھے رہ گیا ہے۔ اس منظر نامے میںباغبانی کے طریقوں کو فروغ دینے کے لیے برآمدات کا ایک بہترین موقع ہے۔

کریڈٹ: انڈیپنڈنٹ نیوز پاکستان-آئی این پی

پاکستان جوتے تیار کرنے والا ساتواں بڑا ملک،جوتے کی صنعت سالانہ 400 ملین جوڑے تیار کرنے کی صلاحیت رکھتی ہے، جوتے بنانے والی کم از کم 70 کمپنیوں کو برآمدی آرڈر مل رہے ہیں،پاکستان یورپ میں برطانیہ، فرانس، ہالینڈ اور جرمنی سمیت 60 سے زائد ممالک اور مشرق وسطی میں دبئی، سعودی عرب اور یمن کو جوتے برآمد کرتا ہے،2022-23 کے پہلے آٹھ ماہ کے دوران پاکستان کی جوتوں کی برآمدات میں 20 فیصد اضافہ ہوا ، برآمدات 124.47 ملین ڈالر ریکارڈ کی گئیں۔ویلتھ پاک کی رپورٹ کے مطابق پاکستان فٹ ویئر مینوفیکچررز ایسوسی ایشن کے وائس چیئرمین حمزہ حفیظ نے کہا ہے کہ اگر حکومتی مراعات فراہم کی جائیں تو پاکستان کی جوتے کی صنعت میں اربوں ڈالر کی برآمدی صلاحیت موجود ہے۔ حالیہ برسوں کے دوران جوتے کی برآمدات میں بتدریج اضافہ دیکھا گیا ہے جو برآمد کنندگان اور ملک کے لیے بھی حوصلہ افزا ہے۔انہوں نے کہا کہ جوتوں کی برآمدات میں کئی گنا اضافہ کیا جا سکتا ہے اگر ایک مراعاتی پیکیج فراہم کیا جائے۔انہوں نے کہا کہ مراعاتی پیکج میں خام مال کی درآمد پر ٹیکسوں کی چھوٹ شامل ہوسکتی ہے۔ حمزہ حفیظ نے کہا کہ صنعت کو اپنی مصنوعات کو مزید مسابقتی بنانے کے لیے مناسب قیمت پر بلاتعطل بجلی کی ضرورت ہے۔ پی ایف ایم اے کے وائس چیئرمین نے بتایا کہ پاکستان میں جوتے کی صنعت سالانہ 400 ملین جوڑے تیار کرنے کی صلاحیت رکھتی ہے۔

پاکستان میں جوتے بنانے والی کم از کم 70 کمپنیوں کو برآمدی آرڈر مل رہے ہیں۔ انہوں نے کہا کہ چمڑے سے بنے جوتے پاکستان کی خاصیت ہیں۔کینوس کے جوتے بھی برآمد کیے جا رہے ہیں لیکن کم مقدار میںہیں۔ انہوں نے تجویز پیش کی کہ جوتے کی تیاری کی صنعت سے متعلقہ سرکاری محکموں کو موثر اور زیادہ تعاون پر مبنی ہونا چاہیے۔ بیرون ملک پاکستان کے سفارتی مشنز کو ہماری مصنوعات کی مارکیٹنگ میں مدد کرنی چاہیے۔ پاکستان یورپ میں برطانیہ، فرانس، ہالینڈ اور جرمنی سمیت 60 سے زائد ممالک اور مشرق وسطی میں دبئی، سعودی عرب اور یمن کو جوتے برآمد کرتا ہے۔ پاکستان بزنس کونسل کے مطابق پاکستان جوتے تیار کرنے والا ساتواں بڑا ملک ہے جو دنیا بھر میں پیدا ہونے والے تمام جوتے کا 2فیصد ہے۔ یہ جوتوں کا ساتواں سب سے بڑا صارف بھی ہے جو عالمی کھپت کا 2.2 فیصد بنتا ہے۔ وزارت تجارت کے مطابق اسی مدت کے مقابلے 2022-23 کے پہلے آٹھ ماہ کے دوران پاکستان کی جوتوں کی برآمدات میں 20 فیصد اضافہ ہوا ہے۔ جولائی تا فروری کے دوران ملک کی جوتوں کی برآمدات 124.47 ملین ڈالر ریکارڈ کی گئیں جو گزشتہ مالی سال کے اسی مہینوں کے دوران 103.73 ملین ڈالر تھیں۔

مقدار کے لحاظ سے پاکستان کی جوتوں کی برآمدات میں زیر جائزہ مدت کے دوران 37.80 فیصد اضافہ ہوا۔ 2022-23 کے پہلے آٹھ مہینوں کے دوران برآمدات بڑھ کر 16.39 ملین جوڑوں تک پہنچ گئیں جو 2021-22 کی اسی مدت کے دوران 11.89 ملین جوڑوں کی تھیں۔ گزشتہ مالی سال کی اسی مدت میں، 21.72 فیصد کی نمو درج کی گئی۔ چمڑے اور کینوس کے علاوہ دیگر جوتوں کی برآمدات جولائی تا فروری کے دوران 14.35 فیصد بڑھ کر 22.65 ملین ڈالر تک پہنچ گئیں جو گزشتہ سال کے اسی مہینوں کے دوران 19.80 ملین ڈالر تھیں۔ پی ایف ایم اے کے چیئرمین منصور احسان نے کہا کہ جوتے کی صنعت چینی مینوفیکچررز کے ساتھ تعاون کرنا چاہتی ہے اور چین پاکستان اقتصادی راہداری کے ساتھ بنائے جانے والے مجوزہ اقتصادی زونز میں مشترکہ منصوبے قائم کرنا چاہتی ہے۔ یہ اقدام پاکستان کے جوتوں کی برآمدات کو بڑھا سکتا ہے اور مزدوروں کی مہارت اور پیداواری صلاحیت کو بہتر بنا سکتا ہے۔ انہوں نے بتایا کہ جوتے کی صنعت نے گزشتہ تین سالوں کے دوران اپنے درآمدی حصے میں خاطر خواہ کمی کی ہے۔

کریڈٹ: انڈیپنڈنٹ نیوز پاکستان-آئی این پی

پنجاب کی جامعات میں رائیڈ فار چینج پروگرام کے تحت طالبات کے لیے اسکوٹی ٹریننگ کا آغاز ہوگیا۔ سٹی ٹریفک پولیس اور ملٹی نیشنل کمپنی کے تعاون سے جاری پروگرام کے تحت لمز یونیورسٹی کے بعد اب یونیورسٹی آف سینٹرل پنجاب میں طالبات کو اسکوٹی چلانے کی ٹریننگ دی جارہی ہے۔ اس موقع پر طالبات کو فری ڈرائیونگ لرنر پرمٹ بھی جاری کیے جارہے ہیں۔ لمز یونیورسٹی میں 500 سے زائد طالبات کو لرنر پرمٹ اور اسکوٹی رائیڈ کے بارے بریفنگ دی گئی۔ ویمن آن ویل پروجیکٹ کے تحت بھی خواتین کو موٹر سائیکل چلانے کی تربیت مفت فراہم کی جا رہی ہے۔ سی ٹی او لاہور کے مطابق وویمن آن ویلز اسکول ایل او ایس میں خواتین کی ٹریننگ کا 70 واں بیج زیر تربیت ہے اور اب تک 6 ہزار سے زائد خواتین کو ٹرینڈ کیا جا چکا ہے۔کورس کے اختتام پر خواتین کو ڈرائیونگ لائسنس بھی جاری کئے جارہے ہیں۔ انہوں نے مزید کہا کہ خواتین ویمن آن ویل اسکول میں داخلے کیلیے ہیلپ لائن 15 پر کال یا راستہ ایپ سے رہنمائی حاصل کر سکتی ہیں۔ وومن آن ویلز پروجیکٹ اور رائیڈ فار چینج پروگرام کامقصد خواتین کو زیادہ پر اعتماد اور خود مختار بنانا ہے۔

کریڈٹ: انڈیپنڈنٹ نیوز پاکستان-آئی این پی

معروف صوفی بزرگ حضرت سچل سرمست کے3روزہ عرس کی تقریبات کا آغازہوگیا۔ وزیر اعلی سندھ مراد علی شاہ نے مزار پر چادر چڑھا کرعرس مبارک کا افتتاح کیا۔عرس پر سیکورٹی کے سخت اقدامات کیے گئے۔500 سے زائد پولیس اہلکارتعینات کئے گئے ہیں۔ زائرین کی بڑی تعداد عرس میں شرکت کیلئے پہنچ رہی ہے۔

کریڈٹ: انڈیپنڈنٹ نیوز پاکستان-آئی این پی

انسداد دہشت گردی عدالت لاہورمیں پولیس پرتشدد اورجلا گھیراکا مقدمے میں پی ٹی آئی رہنماوں کو ریلیف مل گیا۔ انسداد دہشت گردی عدالت لاہورنے پی ٹی آئی حماد اظہراور فواد چوہدری کی عبوری ضمانت13اپریل تک منظور کرلی ہے۔عدالت نے دونوں کو شامل تفتیش ہونے کا حکم دے دیا۔ عدالت نے ایک ایک لاکھ روپے کے مچلکے جمع کرانے کی ہدایت کردی۔

کریڈٹ: انڈیپنڈنٹ نیوز پاکستان-آئی این پی

گورنر سندھ کامران ٹیسوری نے کراچی میں سیف سٹی منصوبہ جلد مکمل کرنے پر زور دیا ہے۔ کراچی میں گورنر سندھ سحری کرنے سمن آباد فوڈ سٹریٹ پہنچے جہاں انہوں نے سحری عوام کے ساتھ کی اور لوگوں میں گھل مل گئے۔ اس موقع پر میڈیا سے گفتگو کرتے ہوئے کامران ٹیسوری کا کہنا تھا لوگ پورے کراچی میں اب مجھے دعوت دیتے ہیں، گھر میں بیٹھ کر مسائل کو حل نہیں کیا جا سکتا ، لوگ ووٹ لے کر اقتدار تو لے لیتے ہیں لیکن کام کوئی نہیں کرتا۔ ان کا مزید کہنا تھا کہ اس شہر کے کاروبار پر خاص توجہ دینا ہے، جس نے بڑے دعوے اور وعدے کیے وہ ملک کا وزیراعظم بنا، ایک کروڑ نوکری کا وعدہ کیا لیکن عمل نہیں کرسکا۔ گورنر سندھ نے کہا کہ گیس لوڈشیڈنگ سحر و افطار میں بند کی جائے، ایم ڈی سوئی گیس سے میری بات چیت ہوچکی ہے، ایک دن بعد ملاقات میں حتمی اقدامات کریں گے۔ کامران ٹیسوری نے مزید کہا کہ 34 قتل کے بعد ایس ایچ او نہیں بلکہ پولیس چیف بدل جانا چاہیے، صوبے کا آئی جی یہ کہے کہ 5000 اہلکاروں کی کمی ہے، سکیورٹی کیمرہ نہیں ہیں تو میں بھی خاموش ہوجاتا ہوں، یہ حکومت کے کام ہیں۔ گورنر سندھ کامران ٹیسوری نے اس موقع پر شہر میں مستحق لوگوں کے گھر جا کر سحری بانٹے کا اعلان بھی کیا۔

کریڈٹ: انڈیپنڈنٹ نیوز پاکستان-آئی این پی

وزیراعلی سندھ مراد علی شاہ نے الیکشن سے متعلق سپریم کورٹ کا فیصلہ جلد بازی کا فیصلہ قرار دے دیا۔ کراچی میں میڈیا سے گفتگو کرتے ہوئے مراد علی شاہ نے کہا کہ الیکشن سے متعلق سپریم کورٹ نے جلد بازی میں فیصلہ کیا، جب ججز اس فیصلے سے متفق نہیں تو عوام کیسے ہوسکتے ہیں، جن ججز نے انکارکیا ان کے علاوہ فل کورٹ بنائیں۔ انہوں نے کہا کہ الیکشن کا فیصلہ الیکشن کمیشن پر چھوڑ دینا چاہیے، ادارے اپنی حدود میں کام کریں گے تو حالات میں بہتری آئے گی، آئین میں ہر ادارے کی پاور اور حدود کا تعین کیاگیا ہے، الیکشن تب ہوں گے جب الیکشن کمیشن چاہے گا، الیکشن ضرور ہوں لیکن لیول پلیئنگ فیلڈ ہونی چاہیے اور الیکشن ایسے نہ ہوں کہ 2018 والی صورتحال ہو۔ اس موقع وزیراعلی سے صحافی نے سوال کیا کہ حکومت سندھ کاکام ہے فنڈ دینا تاہم ملٹری گریڈاسلحے پرلوگوں کے تحفظات ہیں، ایسانہ ہو ملٹری گریڈ اسلحیکے استعمال سے دوسریبھی زدمیں نہ آجائیں، گھوٹکی کیکچے میں ڈاکوں کے خلاف آپریشن چل رہاہے، کچے کے علاقے میں اسلحہ کی اسمگلنگ کو روکنا ہوگا، کچے میں چوکیاں بنائی ہیں تاکہ ڈاکوں کے پاس آنے والا اسلحہ روکا جائے۔ مراد علی شاہ کا کہنا تھا کہ سندھ حکومت بی آئی ایس پی کے تحت کم قیمت آٹا لوگوں کو دے رہی ہے، سندھ حکومت بحران کے باوجود آٹا 65 روپے کلو دے رہی ہے۔

کریڈٹ: انڈیپنڈنٹ نیوز پاکستان-آئی این پی

اسلام آباد کی مقامی عدالت نے خاتون جج دھمکی کیس میں سابق وزیراعظم عمران خان کے ناقابل ضمانت کو قابل ضمانت وارنٹ میں تبدیل کرنے کا تفصیلی فیصلہ جاری کردیا۔ ایڈیشنل سیشن جج سکندرخان نے 2 صفحات پر مشتمل تفصیلی فیصلہ جاری کیا۔ ایڈیشنل سیشن جج نے تفصیلی فیصلے میں کہا کہ اس سے قبل بھی 24مارچ کو عمران خان کے ناقابل ضمانت وارنٹ کو قابل ضمانت وارنٹ میں تبدیل کیا گیا، جوڈیشل مجسٹریٹ کے سامنے 24 مارچ کا سیشن عدالت کا فیصلہ دستیاب تھا، جوڈیشل مجسٹریٹ کے فیصلے کے ساتھ ناقابل ضمانت وارنٹ کی کوئی کاپی منسلک نہیں۔ فیصلے میں کہا گیا کہ تفتیشی افسر نے کہا عمران خان کی رہائشگاہ پر قابل ضمانت وارنٹ کی تعمیل بھی نہیں کی گئی۔ فیصلے کے مطابق جوڈیشل مجسٹریٹ کو ناقابل ضمانت کی جگہ پہلے قابل ضمانت وارنٹ جاری کرنا چاہیے تھا، اعتراضات پر مبنی ٹرائل کورٹ کے فیصلے کو قابل ضمانت وارنٹ میں تبدیل کیا جاتا ہے۔ اسلام آباد کی مقامی عدالت نے 14 مارچ کو خاتون جج دھمکی کیس میں عمران خان کے ناقابل ضمانت وارنٹ گرفتاری معطل کرتے ہوئے 16 مارچ تک سابق وزیراعظم کو گرفتار کرنے سے روک دیا تھا۔ اس کے بعد 16 مارچ کو ہونے والی سماعت میں عدالت نے دلائل سننے کے بعد ایک بار پھر چیئرمین پی ٹی آئی کے وارنٹ گرفتاری معطل کیے تھے۔ عدالت نے عمران خان کو 20 مارچ تک متعلقہ عدالت میں پیش ہونے کا حکم دیا تھا۔ خیال رہے کہ خاتون جج کو دھمکی دینے کے کیس میں 13 مارچ کو سول جج ڈسٹرکٹ سیشن کورٹ رانا مجاہد رحیم نے عمران خان کے نا قابل ضمانت وارنٹ گرفتاری جاری کیے تھے۔ عدالت نے عدم پیشی پر عمران خان کو 29 مارچ تک گرفتار کرکے پیش کرنے کا حکم جاری کیا تھا۔

کریڈٹ: انڈیپنڈنٹ نیوز پاکستان-آئی این پی

کراچی کی 6 یونین کونسلز میں دوبارہ گنتی روکنے کے حکم میں عدالت میں توسیع کردی۔ جماعت اسلامی کی جانب سے کراچی کی 6 یو سیز میں دوبارہ گنتی روکنے کی درخواست پر سماعت اسلام آباد ہائی کورٹ میں ہوئی، جس میں عدالت نے آئندہ سماعت کی تاریخ 11 اپریل تک دوبارہ گنتی روکنے کے حکم میں توسیع کردی۔ درخواست پر سماعت اسلام آباد ہائی کورٹ کے جسٹس سردار اعجاز اسحاق خان نے کی، تاہم جماعت اسلامی کی جانب سے آج کوئی پیش نہیں ہوا۔ عدالت نے ریمارکس دیے کہ آئندہ سماعت پر اگر درخواست گزار پیش نہ ہوئے تو حکم امتناعی خارج کردیں گے۔ سماعت کے موقع پر الیکشن کمیشن کے وکیل سعد حسن عدالت میں پیش ہوئے۔ واضح رہے کہ جماعت اسلامی نے کراچی کی 6 یونین کونسلز میں دوبارہ گنتی روکنے کی درخواست دائر کر رکھی ہے ، جس پر آج عدالت نے کیس کی مزید سماعت 11 اپریل تک ملتوی کردی۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ نے عمران خان کے خلاف 121 مقدمات کے اخراج کے لئے درخواست میں مقدمات کی مصدقہ نقول فراہم کرنے سمیت دیگر اعتراضات دور کرنے کی ہدایت کر دی۔ لاہور ہائیکورٹ کے جسٹس علی باقر نجفی کی سربراہی میں قائم 2 رکنی بنچ نے اعتراضی درخواست پر سماعت کی۔ عمران خان کے وکیل بیرسٹر سلمان صفدر نے بتایا کہ مقدمات کی مصدقہ نقول کی فراہمی بڑا مسئلہ نہیں ہے، عمران خان کے خلاف سیاسی دباو پر 121جھوٹے مقدمات درج کر دئیے گئے ہیں، عمران خان پردہشت گردی اور قتل کے مقدمات سیاسی جدوجہد سے باز رہنے کے لئے درج کیے گئے، آئین پاکستان ہر شہری کو سیاسی اور جمہوری جدوجہد کی آزادی دیتا ہے۔ وکیل نے استدعا کی کہ عدالت پنجاب میں بے بنیاد اور جھوٹے درج 13مقدمات کو فوری خارج کرنے کا حکم دے۔ عدالت نے مصدقہ نقول کی فراہمی کے لئے رجسٹرار آفس کا اعتراض برقرار رکھتے ہوئے قرار دیا کہ رجسٹرار آفس کے اعتراض کو دور کرنے کے لئے مناسب وقت دیا جا رہا ہے۔ لاہور ہائیکورٹ نے دفتری اعتراضات دور کرنے کی ہدایت کرتے ہوئے کیس کی سماعت آئندہ ہفتے تک ملتوی کردی۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائی کورٹ نے پی ٹی آئی رہنما شاندانہ گلزار کے خلاف بغاوت کا مقدمہ خارج کرنے کا تفصیلی فیصلہ جاری کر دیا۔ جسٹس محسن اختر کیانی کی جانب سے جاری 9 صفحات کے فیصلے کے مطابق اس میں کوئی شک نہیں کہ شاندانہ گلزار کا بیان انفرادی شخصیات اور حکام کے خلاف تھا البتہ بیان میں عوام کو بغاوت پر اکسانے کے حوالے سے کوئی عنصر موجود نہیں۔ فیصلے کے مطابق آرٹیکل 19 چند مخصوص پابندیوں کے ساتھ مکمل اظہار رائے کا حق دیتا ہے۔ شاندانہ گلزار کے خلاف مقدمے میں قانونی طریقہ کار کی پیروی نہیں کی گئی۔ اسلام آباد ہائیکورٹ نے قرار دیا ہے کہ استغاثہ کا ریکارڈ بھی یہ ثابت نہیں کرتا کہ مقدمہ درج کرنا درست ہے۔ اس قسم کے مقدمات وقت اور ریاستی وسائل کا ضیاع ہیں۔ عدالت نے بغاوت کا مقدمہ درج کرنے کے لیے وفاقی یا صوبائی حکومت کی منظوری کو ضروری قرار دیا ہے۔ خیال رہے کہ اسلام آباد پولیس نے یکم اپریل کو تحریک انصاف کی سابق رکن قومی اسمبلی شاندانہ گلزارکیخلاف بغاوت کا مقدمہ درج کرلیا تھا۔ ایف آئی آر کے متن کے مطابق شاندانہ گلزار ملک بدامنی اور عوام میں نفرت پیدا کرنا چاہتی ہے، شاندانہ گلزار نے ملک بد امنی اورانتشار پھلانے کی کوشش کی۔ مقدمے میں کہا گیا ہے کہ نجی ٹی وی پروگرام میں شاندانہ گلزار نے اداروں کیخلاف ہرزہ سرائی کی۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائیکورٹ نے ممنوعہ فڈنگ کیس میں عمران خان کی ضمانت منسوخی کی درخواست خارج کرنے کا تفصیلی فیصلہ جاری کردیا۔ فارن ایکسچینج ایکٹ کے تحت درج مقدمے کے شواہد پر سوالات بھی اٹھا دیے گئے۔ جسٹس محسن اختر کیانی اور جسٹس طارق محمود جہانگیری پر مشتمل بینچ کی جانب سے جاری فیصلے کے مطابق ایک بھی ثبوت نظر نہیں آیا کہ عارف نقوی کی بھیجی گئی رقم جرم کی تھی۔۔ ایف آر میں لگائے گئے الزامات کا عمران خان یا طارق شفیع سے تعلق ہی نہیں۔ عمران خان نے تو کسی ایک بھی بینک دستاویز پر دستخط نہیں کئے۔ فیصلے میں لکھا گیا ہے کہ بینک حکام سے متعلق اختیار اسٹیٹ بنک کا ہے جس نے کوئی کارروائی نہیں کی۔ اسٹیٹ بینک نے انکوائری کی نہ ہی تحریک انصاف کو وصول کسی ٹرانزیکشن کو غیر قانونی کہا۔ تحریری فیصلے کے مطابق ایک الزام پی ٹی آئی اکانٹ کو نیا پاکستان اکانٹ میں تبدیل کرنے کا ہے جو کوئی جرم نہیں۔ کیس کے تفتیشی افسر نے اسٹیٹ بینک حکام کا بھی کوئی بیان قلمبند نہیں کیا۔ فیصلے کے مطابق ایف آئی اے مطمئن نہیں کر سکی کہ عمران خان کی ضمانت خارج کیوں کی جائے؟ بینکنگ کورٹ نے درست کہا کہ کیس میں تمام شواہد دستاویزی ہیں اور گرفتاری ضروری نہیں۔

کریڈٹ: انڈیپنڈنٹ نیوز پاکستان-آئی این پی

ترجمان دفتر خارجہ ممتاز زہرا بلوچ نے کہا ہے کہ مسئلہ کشمیر کے حل تک کشمیریوں کی ہر فورم پر مدد جاری رکھیں گے، بھارت میں 4 ہزار سے زائد اسلامی کتب اور قرآن پاک کو نذر آتش کیا گیا، بھارت میں مسلمانوں پر مظالم کی شدید مذمت کرتے ہیں، بھارت کی 9 ریاستوں میں مسلمانوں پر بدترین مظالم کیے جارہے ہیں ۔ہفتہ وار بریفنگ دیتے ہوئے ترجمان دفتر خارجہ نے کہا کہ بھارت میں مسلمانوں پر مظالم کی شدید مذمت کرتے ہیں، بھارت کی 9 ریاستوں میں مسلمانوں پر بدترین مظالم ڈھائے جا رہے ہیں، بھارت میں 4 ہزار سے زائد اسلامی کتب اور قرآن پاک کو نذر آتش کیا گیا، بھارت میں مسلمانوں پر جاری مظالم پر او آئی سی کے مذمتی بیان کی حمایت کرتے ہیں۔ ترجمان دفتر خارجہ نے بتایا کہ مقبوضہ کشمیر میں سول سوسائٹی کو انسانی حقوق کے مسائل کو سامنا ہے، انسانی حقوق کی علمبردار تنظیموں کو بھارت سے جواب لینا ہوگا، مقبوضہ وادی میں نہتے کشمیریوں کی زندگی شدید مشکلات کا شکار ہے، مقبوضہ کشمیر میں جاری مظالم پر اقوام متحدہ کے حکام کے مذمتی بیان کی بھی حمایت کرتے ہیں۔ ترجمان نے بتایا کہ وفاقی وزیر منصوبہ بندی احسن اقبال چین کے سرکاری دورے پر ہیں، وزیر منصوبہ بندی چین کی کانفرنس میں شرکت اور اعلی چینی حکام سے ملاقاتیں کریں گے، وزیر اعظم کے مشیر امیر مقام نے بھارت میں ایس سی او کانفرنس میں ورچوئل شرکت کی جبکہ آمنہ بلوچ کو بیلجیم اور لکسمبرگ کا سفیر تعینات کردیا گیا ہے۔ ترجمان دفتر خارجہ کا کہنا تھا کہ بھارتی وزیر خارجہ جے شنکر کا بیان سفارتی محاذ پر پاکستان کو بدنام کرنے کی کوشش ہے، پاکستان کے خلاف الزام تراشی کرتے ہوئے بھارتی رہنما اپنے ملک کے سماجی ڈھانچے کو نظر انداز کر دیتے ہیں، بھارتی سماج ہندوتوا کے باعث ٹوٹ پھوٹ کا شکار ہے، بھارتی وزیر خارجہ کی پاکستانی قیادت بارے ہرزہ سرائی ان کی بے بسی کا ثبوت ہے۔ انہوں نے مزید کہا کہ پاکستان نے سندھ طاس معاہدے کے بارے میں بھارتی خط کا جواب دیا ہے، پاکستان سندھ طاس معاہدہ پر عملدرآمد کا عزم کیے ہوئے ہے، فائرنگ کے واقعے پر ایرانی حکومت سے ہر سطح پر رابطہ کیا گیا، 26 مارچ کو ڈھاکا میں پاکستانی سفارتخانے نے بنگلا دیش کے قومی دن پر مبارک کا پیغام دیا۔

کریڈٹ: انڈیپنڈنٹ نیوز پاکستان-آئی این پی