اینٹی نارکوٹکس فورس پاکستان نے40کارروائیوں کے دوران27.854ملین ڈالر بین الاقوامی مالیت کی 1528.299کلوگرام منشیات برآمد کرلی۔ کاروائیوںمیں4 خواتین اور 2 غیر ملکی باشندوںسمیت 42ملزمان کو گرفتارکیا جبکہ منشیات کی اسمگلنگ میں استعمال ہونے والی 12گاڑیاں بھی قبضے میں لے لیں۔برآمد شدہ منشیات میں 134.25 کلوگرام افیون، 19.482 کلوگرام ہیروئن، 1366.081 کلوگرام چرس، 7.952 کلوگرام میتھ ایمفیٹامائن (آئس)، 350 گرام ماریجوانا، 56 گرام ایکسٹیسی گولیاں(100 عدد گولیاں) اور 128 گرام MDMAپائوڈرشامل ہے۔ بلوچستان نے5کاروائیوں میں1091.35کلوگرام منشیات برآمد کر کے غیرملکی باشندے سمیت 3ملزمان کو گرفتار کیا جبکہ2 گاڑیاں بھی قبضے میں لے لی ۔ برآمدہ منشیات میں1034کلوگرام چرس اور 57.35 کلوگرام افیون شامل ہے ۔ پنجاب نے6کاروائیوںکے دوران 53.04کلوگرام منشیات برآمدکرکے 3ملزمان کو گرفتار کرکے2 گاڑیاں بھی قبضے میں لے لی۔برآمدہ منشیات میں19.200 کلوگرام افیون، 1.052 کلوگرام ہیروئن، 32.438 کلوگرام چرس اور 350 گرام ماریجوانا شامل ہے ۔ خیبر پختونخوا نے7کاروائیوںکے دوران 55.818کلوگرام منشیات برآمد کر کے 5ملزمان کو گرفتار کر لیا ۔برآمدہ منشیات میں54.026 کلوگرام چرس اور 1.792 کلوگرام میتھ ایمفیٹامائن(آئس) شامل ہے۔سندھ نے 7کاروائیوں میں59.683کلوگرام منشیات برآمدکر کے8 ملزمان کو گرفتارکر کے2 گاڑیاں بھی قبضے میں لے لی۔برآمدہ منشیات میں4.095کلوگرام ہیروئن، 51.300 کلوگرام چرس،4.160کلوگرام میتھ ایمفیٹا مائن (آئس)اور 128 گرام MDMAپائوڈر شامل ہے۔ راولپنڈی نے 15کاروائیوںکے دوران268.408کلوگرام منشیات برآمدکرکے 4 خواتین اور غیر ملکی باشندے سمیت 23 ملزمان کو گرفتار کر کے 7گاڑیاں بھی قبضے میں لے لیں۔ برآمدہ منشیات میں57.700کلوگرام افیون ،14.335کلوگرام ہیروئن ، 194.317 کلوگرام چرس، 2 کلوگرام میتھ ایمفیٹامائن(آئس) اور 56 گرام ایکسٹیسی گولیاں(100عدد گولیاں) شامل ہیں ۔ تمام مقدمات انسداد ِ منشیات ایکٹ کے تحت متعلقہ تھانوں میں درج کرکے تفتیش کا آغاز کر دیا گیا ہے ۔

کریڈٹ: انڈیپنڈنٹ نیوز پاکستان-آئی این پی

وفاقی و زیر قانون اعظم نذیر تارڑ نے کہا ہے کہ بینچ چاروں صوبوں کے ججز پر مشتمل ہونا چاہئے، ایک صوبے سے ججز کا بینچ ایسا لگ رہا ہے جیسے تخت لاہور ہے ، جمہوریت ہی ملک کے مسائل کا حل ہے، تمام ادارے اپنا آئینی حق ادا کریں، ادارے کسی ایک شخص کے تابع نہیں ہوتے، سپریم کورٹ اجتماعی سوچ سے حل نکالے۔وفاقی وزار اعظم نذیر تارڑ اور رانا ثنا اللہ نے سپریم کورٹ کے باہر میڈیا سے گفتگو کرتے ہوئے ایک بر پھر سپریم کورٹ کے بینچ پر اعتراض کرتے ہوئے فل کورٹ کا مطالبہ کردیا۔ اعظم نذیر تارڑ کا کہنا تھا کہ بینچ سارے صوبوں کے ججز کا ہونا چاہیے ، ایک صوبے سے سارے ججز کو نہیں بیٹھنا چاہیے ، ایسا لگ رہا ہے کہ یہ تخت لاہور ہے ، جمہوریت کیلئے ہم نے بہت قربانیاں دی ہیںِ جمہوریت ہی ملک کے مسائل کا حل ہے ، جمہوریت ہی ہم سب کو اکٹھا رکھ سکتی ہے سارے اداروں کو اپنا آئینی کردار اورفرض ادا کرنا ہے ، گزشتہ روز پارلیمنٹ میں بھی یہی بات دہرائی گئی کہ ادارے اجتماعیت سے چلتے ہیں امید کرتے ہیں کہ نازک معاملے میں ملک ایک دہانے پر کھڑا ہے ، سپریم کورٹ بھی اجتماعی سوچ کے ساتھ معاملے کو آگے بڑھائے ۔

کریڈٹ: انڈیپنڈنٹ نیوز پاکستان-آئی این پی

چیئرمین تحریک انصاف عمران خان نے کہا ہے کہ مجھے دوبارہ اقتدار میں نہ لانے کا فیصلہ کرلیا گیا ہے، کیا ان کے پاس ملک کو بحران سے نکالنے کا کوئی منصوبہ ہے۔ ٹائم میگزین کو انٹرویو میں عمران خان کا کہنا تھا کہ ہماری معیشت زبوں حالی کا شکار ہو چکی ہے اور ہم تاریخ کے بدترین معاشی بحران سے گزر رہے ہیں۔ پاکستان میں سیاسی استحکام انتخابات کے ذریعے آئے گا اور یہیں سے معاشی بحالی کا سفر شروع ہوتا ہے۔ عمران خان نے اپنی حکومت کے خاتمے سے لے کر موجود معاشی صورتحال اور انتخابات کے بعد دوبار حکومت میں آنے کے منصوبوں کے متعلق بات چیت کی۔عمران خان نے کہا کہ طاقت کا منبہ سیاسی ادارے ہوں، یہ یقینی بنانے کے لیے نئے سماجی معاہدے کی ضرورت ہے۔ عمران خان کا مزید کہنا تھا کہ جن لوگوں نے مجھے مارنے کی کوشش کی وہ اب بھی اقتدار میں بیٹھے ہیں اور وہ گھبرائے ہوئے ہیں کہ اگر میں واپس آیا تو ان کا احتساب کیا جائے گا۔ وہ پریشان ہیں کہ مجھے کیسے باہر رکھا جائے کیونکہ لوگ مجھے واپس لانا چاہتے ہیں۔

کریڈٹ: انڈیپنڈنٹ نیوز پاکستان-آئی این پی

بین الاقوامی تعاون کو فروغ دینے میں سفارت کاری بہت ضروری ہے، چین کی سفارت کاری نے علاقائی استحکام کو فروغ دینے میں بھی مدد کی ہے، چین کی سفارتی کوششیں عالمی امن، استحکام اور تعاون کو فروغ دینے میں اہم ہیں،چین بین الاقوامی سفارت کاری میں حالیہ سب سے نمایاں شخصیت بن کر ابھرا ہے۔گوادر پرو کے مطابق ایران اور سعودی عرب کے درمیان امن مذاکرات میں ثالثی سے لے کر روس یوکرین تنازعہ میں اہم کردار ادا کرنے کے لیے بات چیت اور سفارت کاری کی طاقت کے استعمال تک، چین بین الاقوامی سفارت کاری میں حالیہ سب سے نمایاں شخصیت بن کر ابھرا ہے۔ چین کی سفارتی کوششیں عالمی امن، استحکام اور تعاون کو فروغ دینے میں اہم رہی ہیں۔ چینی سفارت کاری نے نہ صرف شراکت داری اور اتحاد بنانے میں مدد کی ہے بلکہ اپنے مفادات کو کم لاگت سے فروغ دینے میں بھی مدد کی ہے۔گوادر پرو کے مطابق چین کے مختلف سفارتی فوائد میں سے ایک بات چیت کی طاقت پر زور دینا ہے۔ عالمی مسائل پر بیانیہ کو تشکیل دینے اور اثر انداز کرنے کی صلاحیت۔ چین نے اپنی نرم طاقت اور اقتصادی اثر و رسوخ کا فائدہ اٹھاتے ہوئے موسمیاتی تبدیلی، عالمی گورننس اور بین الاقوامی تجارت جیسے مسائل پر بیانیہ تشکیل دیا ہے۔ گوادر پرو کے مطابق چین کی جانب سے بات چیت کی طاقت کا استعمال کرنے والے انتہائی ضروری طریقوں میں سے ایک نئی قسم کے بین الاقوامی تعلقات کو فروغ دینا ہے۔ بین الاقوامی تعلقات کی یہ نئی شکل باہمی احترام، جیت کے تعاون، اور مشترکہ ترقی کو اہمیت دیتی ہے۔ یہ روایتی عظیم طاقت کی سیاست سے ایک وقفے کی نمائندگی کرتا ہے جو صدیوں سے بین الاقوامی نظام پر حاوی ہے۔

چین اس نئی قسم کے بین الاقوامی تعلقات کو فروغ دینے اور اپنی سفارت کاری کے ذریعے دوسرے ممالک کی حمایت حاصل کرنے میں کامیاب رہا ہے۔ گوادر پرو کے مطابق بین الاقوامی تعاون کو فروغ دینے میں سفارت کاری بہت ضروری ہے۔ چین کی سفارت کاری نے علاقائی استحکام کو فروغ دینے میں بھی مدد کی ہے۔ گوادر پرو کے مطابق بین الاقوامی تجارت، سرمایہ کاری اور ترقی میں بڑھتے ہوئے اثر و رسوخ کے ساتھ ملک عالمی معیشت میں ایک بڑے کھلاڑی کے طور پر ابھرا ہے۔ بیلٹ اینڈ روڈ انیشیٹو ( بی آر آئی ) جس کا مقصد چین کو بنیادی ڈھانچے اور تجارت کے ذریعے دنیا کے مختلف حصوں سے جوڑنا ہے، کو عالمی اقتصادی ترقی میں ایک اہم شراکت کے طور پر سراہا گیا ہے۔ یہ بین الاقوامی تعاون کا ایک پلیٹ فارم اور عالمی اقتصادی ترقی کا انجن ہے۔ گوادر پرو کے مطابق بڑھتے ہوئے تحفظ پسندی اور عالمگیریت مخالف جذبات کے ساتھ، چین نے زیادہ کھلی، جامع اور باہم مربوط عالمی معیشت کی وکالت کی ہے۔ چین کی سفارت کاری نے عالمی نظم و نسق اور کثیرالجہتی کی ترقی میں بھی مدد کی ہے۔ چین دنیا کے بدلتے ہوئے حقائق کی بہتر عکاسی کرنے کے لیے عالمی نظام حکومت میں اصلاحات کے لیے دوسرے ممالک کے ساتھ تعاون کر رہا ہے۔ اس کے نتیجے میں، چین کی سفارتی کوششوں نے عالمی سیاست اور عالمی اقتصادی ترقی کے عروج میں اہم کردار ادا کیا ہے۔ ملک کے سفارتی لاگت سے فائدہ کے تجزیے کو اس کی تاثیر اور اسٹریٹجک نوعیت کے لیے سراہا گیا ہے۔ موجودہ بین الاقوامی کشیدگی میں ثالث کے طور پر چین کا کردار قابل ذکر رہا ہے، ملک تنازعات کے پرامن حل کو یقینی بنانے میں اہم کردار ادا کر رہا ہے۔ جیسے جیسے دنیا کے مختلف حصوں میں تناؤ بڑھ رہا ہے، چین کی عالمی استحکام کو فروغ دینے اور بین الاقوامی نظام کی تشکیل کے لیے سفارتی کوششیں اہم ہیں۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کے رہنماوں پر ہونے والے مقدمات کے معاملے پر قائم جے آئی ٹی نے (آج) بدھ کو عمران خان سمیت دیگر رہنماں کو دوبارہ طلب کر لیا۔ جے آئی ٹی (جوائنٹ انویسٹی گیشن ٹیم )نے بیان ریکارڈ کروانے کیلئے چئیرمین پی ٹی آئی عمران خان اور دیگر رہنماوں کو (آج) بدھ کو 1 بجے سی سی پی او آفس میں طلب کیا ہے، پی ٹی آئی رہنماں فواد چودھری، حماد اظہر، اعجاز چودھری، مسرت جمیشد چیمہ، فرخ حبیب، میاں محمود الرشید، میاں اسلم اقبال اور ڈاکٹر یاسمین راشد سمیت دیگر رہنماوں کو دوبارہ طلب کیا گیا ہے۔

کریڈٹ: انڈیپنڈنٹ نیوز پاکستان-آئی این پی

لاہور کی انسداد دہشت گردی کی عدالت نے زمان پارک میں پولیس پر تشدد، جلاو گھیراو، قتل اور اقدام قتل کے کیس میں پی ٹی آئی رہنماوں فواد چودھری اور حماد اظہر کی حاضری سے استثنی کی درخواست مسترد کر دی۔ انسداد دہشت گردی کی عدالت میں فواد چودھری اور حماد اظہر کے خلاف زمان پارک میں پولیس پر تشدد، جلاو گھیراو اور قتل، اقدام قتل کے کیس کی سماعت ہوئی۔ عدالت نے فواد چودھری اور حماد اظہر کی ضمانت کی درخواستیں عدم پیروی پر خارج کر دیں۔ عدالت نے ریمارکس دیتے ہوئے کہا کہ ملزموں نے ضمانتی مچلکے بھی جمع نہیں کرائے اور پیش بھی نہیں ہوئے۔

کریڈٹ: انڈیپنڈنٹ نیوز پاکستان-آئی این پی

انتخابات التوا کیس کے سلسلے میں وزارت دفاع نے سربمہر رپورٹ سپریم کورٹ میں جمع کرادی ۔ اٹارنی جنرل اور وزارت دفاع کے حکام کی جانب سے سکیورٹی اہل کاروں کی دستیابی سے متعلق سربمہر رپورٹ چیف جسٹس کو پیش کی گئی۔چیف جسٹس آف پاکستان عمر عطا بندیال، جسٹس منیب اختر اور جسٹس اعجاز الاحسن چیمبر میں رپورٹ کا جائزہ لیں گے۔ منگل کو سماعت کے موقع پر اٹارنی جنرل منصور عثمان اعوان سپریم کورٹ پہنچے۔ بعد ازاں وزیراعظم کے معاونین خصوصی ملک احمد خان اور عطا تارڑ سپریم کورٹ پہنچ گئے۔ سپریم کورٹ میں اہم کیس کی سماعت کے سلسلے میں اندر اورباہر سکیورٹی کے سخت انتظامات کیے گئے تھے۔ شاہراہ دستور کی حفاظت رینجرز اور ایف سی کے سپرد کی گئی تھی جب کہ سپریم کورٹ کی سکیورٹی پراسلام آباد پولیس اورایف سی اہلکار مامور کیے گئے تھے۔ سماعت کا آغاز ہوا تو بینچ کے تینوں ارکان نے معمول کے مقدمات کی سماعتیں مکمل کیں۔ چیف جسٹس، جسٹس اعجاز الاحسن اور جسٹس منیب اختر الگ الگ بنچز میں تھے ۔ تینوں ججز معمول کے مقدمات کی سماعت مکمل ہونے کے بعد اپنے چیمبرز میں پہنچے۔ بعد ازاں وزارت دفاع نے سکیورٹی اہلکاروں کی دستیابی سے متعلق رپورٹ چیف جسٹس کو پیش کردی۔تینوں ججز رپورٹ کا جائزہ لینے کے بعد الیکشن سے متعلق فیصلہ تحریر کریں گے۔

کریڈٹ: انڈیپنڈنٹ نیوز پاکستان-آئی این پی

وفاقی وزیر داخلہ رانا ثنا اللہ نے کہا ہے کہ ایمرجنسی کا آپشن آئین میں درج ہے، فل بینچ کی ڈیمانڈ ہر طرف سے آ رہی ہے،پی ٹی آئی نے بھی کہا ہے فل بینچ پر کوئی اعتراض نہیں،پوری قوم چیف جسٹس سے انصاف کی امید رکھتی ہے، ایک فتنے نے بڑی محنت سے ملک کو بحران کی طرف دھکیلا۔سپریم کورٹ کے باہر میڈیا سے گفتگو کرتے ہوئے وزیر داخلہ رانا ثنا اللہ نے کہا کہ توقع ہے الیکشن التوا کیس میں ایسا فیصلہ نہیں آئے گا جو ملک میں بحران کا سبب بنے۔ جب 4 ججز نے سوموٹو کو خارج کیا ایسی صورت میں فیصلہ آتا ہے تو انصاف نہیں ہو گا۔ آئین میں ایمرجنسی کا آپشن درج ہے۔ رانا ثنا اللہ کا کہنا تھا کہ فل بینچ کی ڈیمانڈ ہر طرف سے آ رہی ہے۔ پی ٹی آئی نے بھی کہا ہے فل بینچ پر کوئی اعتراض نہیں۔ فل بینچ کا مطالبہ ماننے میں کیا حرج ہے۔ پوری قوم چیف جسٹس سے انصاف کی امید رکھتی ہے۔ انہوں نے کہا کہ ایک فتنے نے بڑی محنت سے ملک کو بحران کی طرف دھکیلا۔ آئی ایم ایف سے معاہدے ہم نے نہیں کیے۔ وزیر داخلہ رانا ثنا اللہ نے مزید کہا کہ 3 رکنی بینچ کے سامنے حکومت کا مقف پیش کیا گیا، ہمارا آج بھی وہی مقف ہے آج بھی بہتری کی امید ہے، سیاسی عدم استحکام سے ملک معاشی بحران کا شکار ہوا، بحران کی وجہ 4 سال کی پالیسیاں ہیں۔ رانا ثنا اللہ کا کہنا ہے کہ جب عمران خان ہرطرف سے ناکام ہوا تو اسملبیاں توڑدیں، ملک میں الیکشن ایک وقت پر ہونے چاہئیں، 2 اسمبلیوں پر الیکشن ملک کو انارکی کی طرف لے جائیں گے۔

کریڈٹ: انڈیپنڈنٹ نیوز پاکستان-آئی این پی

اے این ایف کی جانب سے مختلف شہروں میں کی گئی انسداد منشیات کی کارروائیوں کے دوران کئی من منشیات برآمد کرلی گئی۔ ترجمان اینٹی نارکوٹکس فورس کے مطابق اے این ایف اور اے ایس ایف کی باچہ خان انٹرنیشنل ائرپورٹ پشاور پر مشترکہ کارروائی کے دوران فلائٹ نمبر ER 703 سے جدہ جانے والے ملزم کے شولڈر بیگ سے 1 کلو 792 گرام آئس برآمد کرکے مردان کے رہائشی ملزم کوگرفتار کرلیا گیا ہے۔ اے این ایف اور اے ایس ایف کی فیصل آباد ائرپورٹ پر ایک اور مشترکہ کارروائی کے دوران فلائٹ نمبر G 9583 سے شارجہ جانے والیملزم سے 38 گرام ہیروئن برآمد کرلی گئی، جسے جوتوں میں مہارت سے چھپایا گیا تھا۔ حکام نے فیصل آباد کے رہائشی ملزم کو گرفتار کرلیا۔علاوہ ازیں اسلام آباد موٹر وے ٹول پلازہ کے قریب کار سے 32 کلو 400 گرام چرس ، 2 کلو آئس اور 1 کلو 200 گرام افیون برآمد کرکے جہلم کے رہائشی ملزم کو گرفتار کرلیا۔ ادھر اٹک برہان انٹر چینج کے قریب کار سے 18 کلو چرس برآمد کرکے شیخوپورہ کے رہائشی 2 ملزمان کو گرفتار کرلیا گیا ہے۔ دوسری جانب کوسٹل ہائی وے پسنی زیرو پوائنٹ کے قریب گاڑی (وین )سے 50 کلو افیون برآمد کرلی گئی، جسے خفیہ خانوں میں چھپا کر کراچی اسمگل کیا جا رہا تھا۔ حکام نے تربت کے رہائشی 2 ملزمان کو گرفتار کرلیا ہے۔ تمام کارروائیوں میں گرفتار کیے گئے ملزمان کے خلاف انسدد منشیات ایکٹ کے تحت مقدمات درج کرکے تحقیقات شروع کردی گئی ہے۔

کریڈٹ: انڈیپنڈنٹ نیوز پاکستان-آئی این پی

پاکستان پیپلز پارٹی نے نبیل گبول کو پوڈ کاسٹ میں نامناسب الفاظ ستعمال کرنے پر شوکاز نوٹس جاری کر دیا۔ نبیل گبول کو شوکاز نوٹس پیپلز پارٹی سندھ کے صدر نثار کھوڑو کی جانب سے جاری کیا گیا۔ ترجمان پیپلز پارٹی نے بتایا کہ نبیل گبول کو ایک انٹرویو میں نامناسب الفاظ استعمال کرنے پر شوکاز جاری کیا گیا۔ ترجمان کے مطابق نبیل گبول کو 3 دن کے اندر وضاحت کرنے کی ہدایت کی گئی ہے، وضاحت نہ کرنے کی صورت میں خلاف تنظیمی نظم و ضبط کی کارروائی کی جائے گی، نامناسب گفتگو اور غیر پارلیمانی الفاظ کا استعمال پیپلز پارٹی کی پالیسی نہیں ہے۔

کریڈٹ: انڈیپنڈنٹ نیوز پاکستان-آئی این پی

جلاو گھیرا واور پولیس پر تشدد کے کیس میں پی ٹی آئی رہنما مسرت جمشید چیمہ اور جمشید اقبال چیمہ کو پولیس نے گرین چٹ دے دی۔ پولیس نے تحریک انصاف کی رہنما مسرت جمشید چیمہ اور جمشید اقبال چیمہ کو تفتیش میں بے گناہ قرار دیتے ہوئے کہا ہے کہ ملزمان کی گرفتاری پولیس کو مطلوب نہیں ہے۔ انسداد دہشت گردی کی عدالت نے پولیس رپورٹ کے بعد مسرت جمشید چیمہ اور جمشید اقبال چیمہ کی عبوری ضمانت کی درخواست واپس لینے کی بنیاد پر نمٹا دی۔ واضح رہے کہ مسرت جمشید چیمہ اور ان کے شوہر کے خلاف 3 مقدمات تھے۔ دریں اثنا انسداد دہشت گردی عدالت نے عدم پیروی کی بنیاد پر پی ٹی آئی رہنما حماد اظہر کی عبوری درخواست ضمانت مسترد کردی۔ انسداد دہشت گردی عدالت لاہور نے جلا گھیرا ،پولیس پر تشدد اور کارسرکار میں مداخلت کے مقدمے میں پاکستان تحریک انصاف کے رہنما فواد چوہدری کی عبوری ضمانت بھی عدم پیروی کی بنیاد پر خارج کردی۔

کریڈٹ: انڈیپنڈنٹ نیوز پاکستان-آئی این پی

وزیراعظم کے معاون خصوصی فہد حسین نے استعفی دے دیا، شہباز شریف نے ان کا استعفی منظور بھی کر لیا۔ وزیراعظم کے معاون خصوصی فہد حسین اپنے عہدے سے مستعفی ہو گئے ہیں جبکہ شہباز شریف نے فہد حسین کا استعفی منظور بھی کرلیا ہے۔ فہد حسین نے وزیراعظم سے ملاقات کی اور اپنا استعفی پیش کیا، شہباز شریف نے استعفی منظور کرتے ہوئے نیک خواہشات کا اظہار کیا۔ واضع رہے کہ فہد حسین وزیراعظم پاکستان میاں محمد شہباز شریف کے معاون خصوصی برائے پبلک پالیسی اورمیڈیا کمیونیکیشن تھے۔

کریڈٹ: انڈیپنڈنٹ نیوز پاکستان-آئی این پی

پاکستان پیپلز پارٹی رہنما اور سینیٹر شیری رحمان نے کہا ہے کہ قائد عوام ذوالفقار علی بھٹو کے قتل میں جو کردار ہمارے نظام عدل نے ادا کیا اس پر سر شرم سے جھک جاتا ہے۔ مائیکرو بلاگنگ ویب سائٹ ٹوئٹر پر اپنے پیغام میں رہنما پیپلز پارٹی شیری رحمان نے کہا کہ شہید ذوالفقار علی بھٹو کے 44ویں یوم شہادت کے موقع پر ان کی جرات، قربانیوں اور ملک وقوم کیلئے خدمات کو خراج پیش کرتی ہوں، 73 کے متفقہ آئین، جوہری طاقت اور جمہوریت کے خالق قائد عوام کو ہم کبھی نہیں بھول سکتے۔ شیری رحمان نے کہا کہ انہوں نے عوام اور پارلیمنٹ کو طاقت اور فیصلہ سازی کا مرکز بنایا، قائد عوام کو عدالتی قتل کے ذریعے ہم سے چھینا گیا، وہ تاریک ترین فیصلہ ہماری عدلیہ کی تاریخ میں ایک سیاہ ترین داغ ہے جو آج تک قائم ہے، ایک منظم منصوبے کے ذریعے قائد عوام کے خلاف فیصلہ دیا گیا۔ انہوں نے کہا کہ صدر زرداری نے شہید ذوالفقار علی بھٹو کے عدالتی قتل میں انصاف کیلئے 2011 میں ایک ریفرنس دائر کیا تھا، گزشتہ 12 سال سے وہ ریفرنس اعلی عدالت میں فائلوں تلے دبا ہوا ہے، گزشتہ 44 سالوں سے بھٹو خاندان، پیپلز پارٹی اور قوم اپنے قائد عوام کے عدالتی قتل کیس میں انصاف کے منتظر ہیں۔

کریڈٹ: انڈیپنڈنٹ نیوز پاکستان-آئی این پی

وادی لیپہ میں بارش اور برف باری سے موسم شدید سرد ہوگیا جبکہ اس دوران لینڈ سلائیڈنگ کا خدشہ بھی ظاہر کیا گیا ہے۔ مقامی ذرائع کے مطابق وادی لیپہ میں گزشتہ 4 روز سے موسلادھار بارش وقفے وقفے سے جاری ہے، اس دوران بالائی علاقوں میں برفباری سے موسم شدید سرد ہوگیا ہے۔ اسسٹنٹ کمشنر یاسر علی بخاری کا کہنا ہے کہ بارشوں کی وجہ سے لینڈ سلائیڈنگ کا خطرہ موجود ہے۔ وادی لیپہ انتظامیہ نے الرٹ جاری کیا ہے کہ لوگ بارشوں کے دوران غیر ضروری سفر نہ کریں، اس سلسلے میں مقامی افراد کو بھی محتاط رہنے کی ہدایت کی گئی ہے، وادی لیپہ میں بارش اور برف باری کے باعث معمولات زندگی متاثر ہوگئے ہیں۔ محکمہ موسمیات کے مطابق بارشوں کا یہ سلسلہ مزید چند روز جاری رہنے کا امکان ہے۔

کریڈٹ: انڈیپنڈنٹ نیوز پاکستان-آئی این پی

24 گھنٹوں میں کورونا سے متاثرہ ایک مریض انتقال کر گیا جبکہ 20 مریضوں کی حالت نازک ہے۔ قومی ادارہ صحت (این آئی ایچ) کے مطابق ملک بھر میں 24 گھنٹوں کے دوران کورونا کے 2 ہزار 946 ٹیسٹ کئے گئے، جس میں سے 47 افراد کے نتائج مثبت آئے اور اس کی شرح 1.60 فی صد ریکارڈ ہوئی۔ 24 گھنٹوں کے دوران مہلک وائرس سے متاثرہ ایک مریض انتقال کرگیا۔ این آئی ایچ کے مطابق انتقال کر جانے والے مریض کا تعلق پنجاب سے تھا۔ محکمے کے مطابق 24 گھنٹوں کے دوران لاہور میں مجموعی طور پر 485 افراد کے ٹیسٹ کیے گئے جن میں سے 19 افراد میں کورونا کی تصدیق ہوئی جس کی شرح 3.92 فی صد رہی۔ علاوہ ازیں وفاقی دارالحکومت اسلام آباد میں 24 گھنٹوں کے دوران 193 افراد کے کورونا ٹیسٹ کیے گئے، جن میں سے 6 افراد کے نتائج مثبت ریکارڈ ہوئے اور شرح 3.11 فی صد ریکارڈ ہوئی۔ ملک بھر میں کورونا سے متاثرہ مریضوں میں سے 20 کی حالت تشویش ناک بتائی جاتی ہے۔

کریڈٹ: انڈیپنڈنٹ نیوز پاکستان-آئی این پی

پی ٹی آئی رہنما شاندانہ گلزار کی بطور رکن اسمبلی استعفا منظوری کے خلاف درخواست کی سماعت کے بعد اسلام آباد ہائی کورٹ نے فیصلہ محفوظ کرلیا۔ دوران سماعت عدالتی حکم پر عمل درآمد نہ کرنے پر الیکشن کمیشن کے خلاف توہین عدالت کی درخواست پر بھی سماعت ہوئی جب کہ الیکشن کمیشن کے حکام بھی عدالت میں پیش ہوگئے۔ الیکشن کمیشن حکام نے عدالت میں دلائل دیتے ہوئے کہا کہ اسی نوعیت کا شکور شاد کا کیس چیف جسٹس کی عدالت میں چل رہا ہے۔ آخری سماعت میں چیف جسٹس کے اہم ریمارکس آئے ہیں۔ استعفا دے کر مکر جانا آگے چل کر غلط ٹرینڈ سیٹ ہو جائے گا۔ جسٹس میاں گل حسن اورنگزیب نے ریمارکس دیے کہ جو استعفیٰ دیدے، اس کو سیدھا کر کے رکھیں۔ دوران سماعت پی ٹی آئی رہنما شاندانہ گلزار بھی اپنے وکیل کے ہمراہ عدالت میں پیش ہوئیں۔ اسلام آباد ہائی کورٹ نے دلائل سننے کے بعد کیس کا فیصلہ محفوظ کرلیا۔

کریڈٹ: انڈیپنڈنٹ نیوز پاکستان-آئی این پی

سربراہ پاکستان عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ آج سپریم کورٹ کے فیصلے میں ریاست کی جمہوری زندگی یا غیر آئینی موت کا فیصلہ ہوگا۔ سماجی رابطے کی ویب سائٹ ٹوئٹر پر اپنے بیان میں شیخ رشید کا کہنا تھا کہ رجسٹرار کو ہٹانا، بنچ بنانا، سوموٹو لینا چیف جسٹس کا آئینی حق ہے، ایک طرف ججز کے بائیکاٹ کا اعلامیہ جاری کرتے ہیں، دوسری طرف عدالت میں دلائل دینے کی بھیک مانگتے ہیں۔ سابق وفاقی وزیر نے کہا کہ قوم عدلیہ کے ساتھ کھڑی ہے، سڑکوں پر آگئی تو ہر چیز بکھر جائے گی، قوم پہلے ہی ٹوٹ پھوٹ کا شکار ہے، شریفوں، زرداریوں کا قبضہ مافیا عوام کے انتقام کیلئے تیار رہے، ایک سال میں غریب موت کیلئے آٹے کی لائن میں لگا ہے یا آئی ایم ایف کی شرائط پر گھٹنے کے بل لیٹا ہے۔ انہوں نے کہا کہ نوازشریف کہتا ہے 3 ججوں کے فیصلے سے ڈالر 500 روپے کا ہو جائے گا، بلاول کہتا ہے ایمرجنسی یا مارشل لا لگ سکتا ہے، شہباز شریف کہتا ہے 3 ججوں کا فیصلہ منظور نہیں، پھر شہباز شریف توہین عدالت کے ریڈار میں آئے گا اور گھر جائے گا۔ سربراہ عوامی مسلم لیگ کا کہنا تھا کہ اگر ملک میں آئین اور قانون کی حکومت نہ ہوئی اور سپریم کورٹ کے فیصلے پر عمل نہ ہوا تو ریاست میں بغاوت کے مترادف ہوگا، ریاست عوام کا نام ہے، ساری عوام اور سارے ادارے سپریم کورٹ کے تابع ہیں۔

کریڈٹ: انڈیپنڈنٹ نیوز پاکستان-آئی این پی

احتساب عدالت نے ایل این جی ریفرنس میں نیب ترمیمی قوانین سے متعلق کیس کا فیصلہ آنے تک سماعت ملتوی کرنے کی استدعا منظور کرتے ہوئے کیس کی سماعت 2 مئی تک ملتوی کر دی۔ منگل کو احتساب عدالت میں سابق وزیراعظم شاہد خاقان عباسی سمیت دیگر کے خلاف ایل این جی ریفرنس کی سماعت ہوئی۔ شاہد خاقان عباسی اورنیب پراسیکیوٹر عدالت کے روبرو پیش ہوئے۔ ملزم ڈاکٹر امان اللہ کے وکیل نے موقف اختیار کیا کہ نیب ترمیمی قوانین کا معاملہ ہائی کورٹ اور سپریم کورٹ میں زیر التو ا ہے۔ اسلام آباد ہائی کورٹ نے 26 اپریل کو لارجر بینچ تشکیل دے رکھا ہے۔ نیب ترمیمی قوانین سے متعلق کیس کا فیصلہ آنے تک سماعت ملتوی کی جائے۔ عدالت نے استدعا منظور کرتے ہوئے کیس کی سماعت 2 مئی تک ملتوی کر دی۔

کریڈٹ: انڈیپنڈنٹ نیوز پاکستان-آئی این پی

پاکستان مسلم لیگ(ن)کے رہنما شاہد خاقان عباسی نے کہا ہے کہ جب بینچ پر انگلی اٹھ جائے تو جج فیصلہ نہیں کرسکتا۔ اسلام آباد میں جوڈیشل کمپلیکس کے باہر میڈیا سے گفتگو میں (ن)لیگ کے رہنما شاہد خاقان عباسی نے کہا کہ اعلی عدلیہ نے اپنی ساکھ کو خود بحال کرنا ہے۔ ہم عدلیہ کا احترام کرتے ہیں اس لیے عدالتوں کے سامنے پیش ہوتے ہیں۔ شاہد خاقان عباسی کا مزید کہنا تھا کہ عدالتیں سو موٹو تو لیتی ہیں مگر اس بات پر بھی نوٹس لیں کے کیسز کی سنوائی ہو۔ہم ہر ہفتے نیب کے کیسز میں پیش ہوتے ہیں اور یہاں کیس کوئی جانتا نہیں۔ اب تک 4 ججز تبدیل ہو چکے ہیں لیکن کیس کا فیصلہ نہیں ہورہا۔

کریڈٹ: انڈیپنڈنٹ نیوز پاکستان-آئی این پی

واشنگٹن(شِنہوا)امریکہ کی جنوبی ریاست الاباما میں ایک طبی ہیلی کاپٹر شمال مشرقی شیلبی کاؤنٹی میں گر کر تباہ ہو گیا جس میں عملے کے دو ارکان ہلاک ہو گئے۔

ہیلی کاپٹر ایک ایسے مریض کو نکالنے میں مدد کیلئے پرواز پر تھا جو اس علاقے میں ہائیکنگ پر گیا تھا اور اسے سانس لینے میں دشواری اور سینے میں درد محسوس ہورہا تھا۔

چین، مشرقی صوبہ ژے جیانگ کے صدرمقام ہانگ ژو کے شی شی ویٹ لینڈ میں ایک خاتون چینی روایتی لباس ہان فو زیب تن کئے کشتی میں سفر کررہی ہے۔(شِنہوا)

چین ، شمال مغربی سنکیانگ ویغور خوداختیار خطے کے قدیم شہر کاشغر کے دروازے پر سیاح فن کا مظاہرہ دیکھ رہے ہیں۔ (شِںہوا)

چین ، شمال مغربی سنکیانگ ویغور خوداختیار خطے کے شہر ارمچی کے گر ینڈ بازار میں مائرہ ابلیتی اپنے نسلی موسیقی آلات کی دکان پر سامان ترتیب سے رکھ رہی ہے۔(شِںہوا)

چین ، شمال مغربی سنکیانگ ویغور خوداختیار خطے کے قدیم شہر کاشغر کے خان بازار میں رات کا منظر۔(شِںہوا)