یروشلم(شِنہوا)اسرائیل کی سب سے بڑی مزدور تنظیم ہسٹاڈرٹ نے حکومت پر اپنے متنازعہ عدالتی بحالی کے منصوبے کو روکنے کے لیے دباؤ ڈالنے  کی غرض سے پیر کو کارکنوں کی ہڑتال شروع کی۔

ہسٹاڈرٹ کے چیئرمین آرنون بار ڈیوڈ نے ایک بیان جاری کیا جس میں کہا گیا ہے کہ کارکن اور ادارے مل کر عدالتی اصلاحات کو روکیں گے۔

ان کی کال کے بعد بین گوریون انٹرنیشنل ایئرپورٹ سے روانہ ہونے والی پروازوں کو روک دیا گیا ہے۔ ہڑتال میں شریک فیکٹریاں، بینک، شاپنگ مالز اور مقامی حکام نے بھی خدمات بند کر دیں ہیں۔

فاسٹ فوڈ چینز ریسٹورنٹ میکڈونلڈز بھی ہڑتال میں شامل ہو گیا اور اسرائیل بھر میں اپنے ریستوران بند کر دیے ہیں۔

پبلک ٹرانسپورٹ، سکول اور کنڈرگارٹنز متاثر نہیں ہوئے۔

دریں اثنا اسرائیلی میڈیکل ایسوسی ایشن نے اسی وجہ سے تمام سرکاری ہسپتالوں اور کمیونٹی کلینکوں میں ہڑتال کا اعلان کیا جس میں صرف زندگی بچانے والے فوری علاج کو ہڑتال سے مستسنیٰ قرار دیا گیا ہے۔

اسرائیل کی تمام سرکاری یونیورسٹیوں نے بھی اسی بنیاد پر ہڑتال کی تھی۔ اسرائیل کی ایسوسی ایشن آف یونیورسٹی ہیڈز نے ایک بیان میں اسرائیلی وزیر اعظم بینجمن نیتن یاہو اور ان کے حکمران اتحاد سے مطالبہ کیا ہے کہ وہ قانون سازی کے طریقہ کارکو فوری طور پر روکیں اور ایک متفقہ اور وسیع خاکہ تک پہنچنے کے لیے بات چیت شروع کریں۔

سڈنی(شِنہوا)آسٹریلیا کے مالیاتی خدمات فراہم کرنے والے ادارے لیٹی چوڈ نے تصدیق کی ہے کہ ایک حالیہ سائبر حملے کی وجہ سے کمپنی سے تقریباً 1 کروڑ 40 لاکھ ذاتی دستاویزات پر مبنی ریکارڈ چوری ہوا ہے۔

سائبر چوری کے واقعے پر اپنی اپ ڈیٹ میں لیٹی چوڈ  نے پیر کو کہا کہ آسٹریلیا اور نیوزی لینڈ کے تقریباً 79 لاکھ ڈرائیور لائسنس نمبرز چوری کیے گئے جن میں سے تقریباً 32 لاکھ  یا 40 فیصد گزشتہ 10 سالوں میں کمپنی کو فراہم کیے گئے تھے۔

اپ ڈیٹ کے مطابق بد نیتی پر مبنی حملے میں 53 ہزار پاسپورٹ نمبر بھی چوری کئے گئے  جبکہ 100 سے کم صارفین نے ماہانہ فنانشل سٹیٹمنٹ چوری ہونے کی اطلاع دی۔لیٹی چوڈ نے ان صارفین کو معاوضہ دینے کا وعدہ کیا جنہوں نے اپنی شناختی دستاویزات کو تبدیل کرنے کا انتخاب کیا ہے ۔

دریں اثنا کمپنی نے یہ بھی نشاندہی کی کہ  کم سے کم 2005 سے کپمنی کے پاس موجود 61 لاکھ اضافی ریکارڈز چوری کیے گئے ہیں جن میں سے تقریباً 57 لاکھ یا 94 فیصد 2013 سے پہلے فراہم کیے گئے تھے۔

ان ریکارڈز میں نام، پتہ، ٹیلی فون اور تاریخ پیدائش جیسی ذاتی معلومات میں سے کچھ  ریکارڈزشامل ہیں۔

لیٹی چوڈ فنانشل سروسز کے سی ای او احمد فہور نے کہا کہ یہ انتہائی مایوس کن ہے کہ اضافی صارفین اور درخواست دہندگان کی اتنی بڑی تعداد اس واقعے سے متاثر ہوئی ہےجس پر ہم غیر مشروط طور پرمعذرت خواہ ہیں۔

انہوں نے مزید کہا کہ ہم اپنے آپریشنز کو محفوظ طریقے سے بحال کرنے کے لیے چوبیس گھنٹے کام جاری رکھے ہوئے ہیں۔ ہم سائبر حملے میں متاثر ہونے والے پلیٹ فارمز کو درست کر رہے ہیں اور آنے والے دنوں میں آپریشنز پر واپس آنے کے ساتھ ہی اضافی سکیورٹی مانیٹرنگ بھی نافذ کر دی ہے۔

 یہ واقعہ فی الحال آسٹریلوی فیڈرل پولیس کے زیرِ تفتیش ہے جبکہ 16 مارچ سےلیٹی چوڈ  کے سسٹمز میں کوئی مشتبہ سرگرمی نہیں دیکھی گئی۔

آکرا(شِنہوا)گھانا کے مشرقی علاقے میں دو بسوں کے درمیان تصادم میں کم سے کم نو افراد ہلاک ہو گئے۔

گھانا نیشنل فائر سروس (جی این ایف ایس) کے مشرقی علاقائی ڈویژن کی کمانڈر جینیفرنا یارلے کوئے نے پیر کو شِنہوا کو بتایا کہ مخالف سمتوں سے آنے والی مسافروں سے بھری  دو بسیں اتوار کو آکرا-کماسی ہائی وے پر بونسو جنکشن کے قریب آپس میں ٹکرا گئیں۔

جی این ایف ایس اور گھانا پولیس سروس کے اہلکاروں نے کہا کہ دو خواتین اور سات مردوں سمیت نو افراد کی موقع پر ہی موت واقع ہوگئی جبکہ 11 افراد کو زخمی حالت میں بچایا اور انہیں قریبی علاقے کیبی  کے سرکاری ہسپتال منتقل کیا گیا۔

ماسکو(شِنہوا)روس کے ایک سفارت کار نے کہا ہے کہ کچھ ممالک کی جانب سے روس کو دیوار سے لگانے کی کوششوں کے باوجود روس کا ورلڈ ٹریڈ آرگنائزیشن (ڈبلیو ٹی او) سے نکلنے کا کوئی ارادہ  نہیں ہے۔

روسی وزارت خارجہ کے اقتصادی تعاون کے شعبہ کے ڈائریکٹر دمتری بری چیوسکی نے آرآئی اے نووستی کے ساتھ ایک انٹرویو میں کہا کہ ہم کثیرالجہتی تجارت میں اپنی شرکت کے لیے تمام امکانات پر غور کررہے ہیں اور ڈبلیو ٹی او میں مکمل رکنیت کے فوائد اور اخراجات کے توازن کا تجزیہ کر رہے ہیں۔

انہوں نے کہا کہ اس کے ساتھ ساتھ ہم اس حقیقت کے پیش نظر آگے بڑھ رہے ہیں کہ تنظیم میں ایک مکمل رکن کے طور پر رہنے کی بنیاد موجود ہے تاکہ ان ترقی پذیر ممالک کے ساتھ مستحکم تعلقات برقرار رہیں جو برابری کی بنیاد پر اور باہمی مفادات کے ساتھ تعاون جاری رکھنے کے لیے تیار ہیں۔

انہوں نے کہا کہ ڈبلیو ٹی او ایک ناقابل تبدیل عالمی پلیٹ فارم ہےجس پر روس نے ان ممالک کے ساتھ تجارتی اور اقتصادی تعلقات استوار کیے جنہوں نے روس کے خلاف غیر دوستانہ اقدامات نہیں کیے تھے۔

سفارت کار نے کہا کہ ہم ایشیا، مشرق وسطیٰ، افریقہ اور لاطینی امریکہ کے شراکت داروں سمیت ایشیائی ہم خیال ممالک  کے ساتھ بات چیت پر خصوصی توجہ دیتے ہیں۔ ان کے ساتھ تعلقات زیادہ سے زیادہ فعال اور متنوع ہوتے جا رہے ہیں۔

بیجنگ (شِنہوا)چین کی غیر مالیاتی براہ راست بیرونی سرمایہ کاری(او ڈی آئی) رواں  سال کے پہلے دو ماہ میں گزشتہ سال کے مقابلے میں 35.7 فیصد بڑھ کر 136 ارب 4کروڑ یوآن تک پہنچ گئی۔

وزارت تجارت کے مطابق، امریکی ڈالر کے لحاظ سے، جنوری سے فروری کے عرصے میں او ڈی آئی 19ارب 96کروڑ ڈالر رہی، جو ایک سال پہلے کے مقابلے میں 26.5 فیصد کا تیز رفتار اضافہ ہے۔ 2023 کے پہلے دو ماہ میں، لیزنگ اور کاروباری خدمات میں کی جانے والی بیرونی سرمایہ کاری ایک سال پہلے کے مقابلے میں 22.3 فیصد بڑھ کر 4ارب72کروڑ ڈالر تک پہنچ گئی،  جبکہ ہول سیل اور ریٹیل میں گزشتہ سال کے مقابلے میں 17.2 فیصد اضافے سے یہ 4ارب 9کروڑ ڈالر تک پہنچ گئی۔

مینوفیکچرنگ اور تعمیرات جیسے شعبوں کی جانب سے بھی بیرونی سرمایہ کاری میں اضافہ  ریکارڈ کیا گیا۔

گوانگ ژو (شِنہوا)133 ویں چائنہ امپورٹ اینڈ ایکسپورٹ فیئرکے لیے درآمدی نمائشی اشیا کی پہلی کھیپ  گزشتہ روز تھائی لینڈ سے چین کے  جنوبی صوبے گوانگ ڈونگ کے شہر گوانگ ژو پہنچ گئیں۔ کینٹن فیئرکے نام سے معروف یہ میلہ 15 اپریل سے آف لائن اور آن لائن شروع ہو گا۔

بنیادی طور پر تھائی لینڈ میں بنائی جانے والی ان نمائشی اشیاء میں پودوں کی کانٹ چھانٹ کرنے والے اوزار، ایئر کولر، اسپرے مشینیں اور زرعی پیداوار کے لیے دیگر مصنوعات شامل ہیں۔

کووڈ-19 کی روک تھام کے اقدامات کی وجہ سے 2020  کے بعد سے بڑے پیمانے پر آن لائن منعقد ہونے کے بعد، کینٹن میلہ 15 اپریل سے 5 مئی تک گوانگژو میں  اپنی تمام سرگرمیاں آن سائٹ دوبارہ شروع کر دے گا۔ اس میلے میں لگ بھگ 40 ممالک اور خطوں کے 500 سے زائد کاروباری اداروں کی جانب سے  درآمدی نمائشوں میں شرکت کی توقع ہے۔ 

ہنگری کے شہر بڈاپسٹ کےہوائی اڈے پرروایتی لباس میں ملبوس ہنگری کی ایک نوجوان خاتون  چینی سیاحوں کا استقبال کر رہی ہے جہاں کوویڈ-19 وبائی مرض کے تین سال بعد چینی سیاحوں کا پہلا گروپ اتوار کو بڈاپسٹ پہنچا۔(شِںہوا)

مغربی کنارے کے شہر رم اللہ کے شمال میں سنجیل قصبے میں ایک فلسطینی لڑکی اسرائیلی آباد کاروں کی طرف سےجلائے گئے مکان میں ہونے والا نقصان دیکھ رہی ہے۔ (شِنہوا)

مغربی کنارے کے شہر نابلس کے جنوب میں واقع قصبے حوارہ میں فلسطینی مرد ایک خالی سڑک پر بند دکانوں کے سامنے بیٹھے ہیں جہاں فلسطینیوں کو حوارہ میں فائرنگ کے بعد آباد کاروں کے حملوں میں اضافے کا خدشہ ہے۔(شِنہوا)

لبنان کے شہربیروت میں ایک جوس بیچنے والا اپنی مصنوعات کی تشہیر کر رہا ہے۔(شِنہوا)

چین کے دارالحکومت بیجنگ کے یویوان تان پارک میں سیاح چیری کے پھول دیکھ رہے ہیں۔(شِنہوا)

بیجنگ (شِنہوا) چین کی سافٹ وئیراورانفارمیشن ٹیکنالوجی سروس انڈسٹری کے رواں سال کے پہلے دو ماہ کے دوران آمدنی اور منافع میں مسلسل اضافہ ہوا ہے۔

وزارت صنعت وانفارمیشن ٹیکنالوجی کی جانب سے پیر کو جاری اعداد و شمارکے مطابق اس شعبے کا منافع جنوری سے فروری  تک گزشتہ سال کے مقابلے میں 12.2 فیصد بڑھ کر 176 ارب 90کروڑ یوآن (تقریباً 25 ارب 74کروڑ  ڈالر) ہو گیا، جبکہ آمدنی ایک سال پہلے کے مقابلے میں 11 فیصد بڑھ کر14کھرب50ارب یوآن ہو گئی۔

اعداد و شمارکے مطابق سافٹ ویئر پراڈکٹس سے حاصل ہونے والی آمدنی پہلے دو ماہ میں گزشتہ سال کی نسبت 9.5 فیصد بڑھ کر 337 ارب 90کروڑ یوآن جبکہ انفارمیشن ٹیکنالوجی کی خدمات  کی آمدنی گزشتہ سال کی نسبت 11.6 فیصد اضافے کے ساتھ  943 ارب 40کروڑ یوآن تک پہنچ گئی۔ کارپوریٹ انفارمیشن پروائڈر تیان یان چھا کے مطابق، چین میں اس وقت 20لاکھ سے زیادہ کاروباری ادارے ہیں، جن میں 3لاکھ 93 ہزار سے زیادہ  کلاؤڈ کمپیوٹنگ  کے ہیں۔

بیجنگ (شِنہوا) چا ئنہ ٹرسٹ انڈسٹری نے گزشتہ سال حقیقی معیشت کی بہتر خدمت کے لئے اپنی ادارہ جاتی اصلاح اور معیار کی ترقی کی کوششوں میں اضافے کے درمیان مستقل توسیع  دیکھی ہے۔

چائنہ  ٹرسٹی ایسوسی ایشن (سی ٹی اے) کے اعداد و شمار کے مطابق 2022 کی چوتھی سہ ماہی کے اختتام تک ملک کے کل ٹرسٹ اثاثے 211.4  کھرب  یوآن (تقریباً 30.9  کھرب  امریکی ڈالرز) تک پہنچ گئے جو  گزشتہ سال کی نسبت  2.87 فیصد اضافہ ہے۔

2022 کی چوتھی سہ ماہی کے اختتام تک ٹرسٹ فنڈز کی جانب سے صنعتی اور تجارتی اداروں میں واجب الادا سرمایہ کاری  گزشتہ سال کی نسبت 6.09 فیصد کم ہوکر 39.1  کھرب یوآن رہی۔

دریں اثنا، سیکیورٹیز مارکیٹ اور مالیاتی اداروں کے زیر انتظام ٹرسٹ اثاثوں کا حصہ بڑھتا رہا۔سی ٹی اے کے اعداد و شمار   کے مطابق ٹرسٹ فنڈز کی جانب سے سیکیورٹیز مارکیٹ اور مالیاتی اداروں میں واجب الادا سرمایہ کاری میں  گزشتہ سال کی نسبت  بالترتیب 29.84 فیصد اور 7.79 فیصد اضافہ ہوا۔

بیجنگ (شِنہوا) ایک انڈسٹری ایسوسی ایشن کے اعداد و شمار کے مطابق فروری کے آخر تک چین کے نجی طور پر پیش کردہ فنڈز کا پیمانہ 202.9 کھرب یوآن (تقریباً  30 کھرب امریکی ڈالرز) رہا۔

ایسٹ مینجمنٹ ایسوسی ایشن آف چائنہ کے مطابق حجم میں گزشتہ ماہ کے مقابلے میں 0.25 فیصد اضافہ ہوا ہے۔

نجی طور پر پیش کردہ اندراج  شدہ فنڈز کی تعداد فروری کے اختتام تک 148ہزار171 تھی جو  گزشتہ مہینے کے مقابلے میں 1826 زیادہ ہے۔

اعداد و شمار  کے مطابق 22،174 اداروں نے ان فنڈز کا انتظام کیا ، جو گزشتہ مہینے کے مقابلے میں 18 زیادہ ہے۔

2012 میں قائم ہونے والی ایسوسی ایشن ایک خود ریگولیٹری تنظیم ہے جو چین کی میوچل فنڈ انڈسٹری کی نمائندگی کرتی ہے۔

چین، مشرقی شہر شنگھائی میں منعقدہ شنگھائی فیشن ویک میں ایک بچہ ڈیزائنر چھین شیانگ فائی کے تیار کردہ ملبوسات پیش کررہا ہے۔(شِںہوا)

بیجنگ(شِنہوا) چینی وزیر اعظم لی چھیانگ ہائی نان میں  بوآؤ فورم برائے ایشیا کی سالانہ کانفرنس 2023 کی افتتاحی تقریب میں شرکت  اور 30 مارچ کو فورم کی دعوت پر کلیدی خطاب کریں گے۔

وزارت خارجہ کی ترجمان ماؤ ننگ نے پیر کو بتایا کہ سنگاپور کے وزیراعظم لی ہیسین لونگ، ملائیشیا کے وزیراعظم انورابراہیم،اسپین کے وزیراعظم پیڈرو سانچیز، کوٹ ڈی آئیوری کے وزیر اعظم پیٹرک آچھی اور بین الاقوامی مالیاتی فنڈ (آئی ایم ایف) کی منیجنگ ڈائریکٹر کرسٹالینا جارجیوا فورم کی دعوت پر سالانہ کانفرنس میں شرکت کریں گے۔ ترجمان نے کہا کہ وزیر اعظم لی چھیانگ کی دعوت پر سنگاپور کے وزیر اعظم لی ہسین لونگ، ملائیشیا کے وزیر اعظم انور ابراہیم اوراسپین کے وزیراعظم پیڈرو سانچیز سالانہ کانفرنس کے موقع پر چین کا سرکاری دورہ کریں گے۔

بیجنگ(شِنہوا) چینی پولیس نے جسم فروشی اور جوئے کے خلاف کریک ڈاؤن جاری رکھتے ہوئے گزشتہ سال کے دوران اس سے متعلقہ  50ہزار سے زیادہ مقدمات اور 4لاکھ سے زیادہ جرائم کے واقعات کو حل کیا۔

انٹرنیٹ پر اس طرح کے جرائم کے بڑھتے ہوئے رجحان کا ذکر کرتے ہوئے، وزارت پبلک سیکورٹی نے کہا کہ چینی پولیس نے جسم فروشی اور جوئے سے متعلقہ جرائم کی بیخ کنی کی کوششیں جاری رکھیں۔ پولیس نےجسم فروشی کو منظم کرنے والے مجرموں اور آن لائن جسم فروشی کا مطالبہ کرنے والے افراد کے خلاف خصوصی توجہ مرکوز کی۔

جوئے کے کیسز میں، پولیس نے زیر زمین کیسینو، آن لائن جوا اور جوئے کے نئے اقسام کے مراکز کے خلاف کارروائیاں کیں۔ وزارت نے کہا کہ پولیس جرائم کے ان شعبوں کے  اہم مقدمات اور بقایا مسائل کی پیروی جای  رکھتے ہوئے امن و امان کو یقینی بنانے کی کوششوں کے تحت  محکمانہ ہم آہنگی کو مضبوط کرے گی، وزارت نے مزید کہا کہ چین مجرمانہ جسم فروشی اور جوئے کے خلاف صفر برداشت کی پالیسی برقرار رکھے گا۔

گوانگ ژو (شِنہوا) چین کی سب سے بڑی مال بردار فضائی کمپنی ایس ایف ایئرلائنز نے اپنے مال بردار بیڑے کی تعداد کو بڑھا کر 80 کردیا ہے۔

چین کے معروف کوریئر ادارے ایس ایف ایکسپریس کی شہری ہوابازی شاخ ایس ایف ایئرلائنز کے بیڑے میں شامل ہونے کے لیے بوئنگ 300۔767 وائڈ باڈی مال بردار طیارہ گزشتہ روز شین ژین باؤآن بین الاقوامی ہوائی اڈے  پر پہنچا تھا۔

اتوار کے روز ایس ایف ایکسپریس کے قیام کی 30 ویں سالگرہ منائی گئی۔ اس نے گزشتہ دہائیوں میں 84 ممالک اور خطوں میں اپنی عالمی ایکسپریس خدمات کو توسیع دی ہے۔

چین کی پہلی نجی ایئرایکسپریس کمپنی  کا صدر دفتر شین ژین میں ہے جس کی بنیاد 2009 میں رکھی گئی تھی، اس کے پاس موجود مال بردار طیاروں میں تقریباً 30 فیصد وائڈباڈی کے حامل ہیں۔

تو سیع پا نے والے بیڑے سے ایس ایف ایئرلائنز کو اندرون ملک اور دنیا بھر میں نیٹ ورک پر ایئر ایکسپریس کی صلاحیتوں کو بڑھانے میں مدد ملی ہے۔ فضائی کمپنی اس وقت یومیہ 150 مال بردار پروازیں چلارہی ہے۔

مال بردار کمپنی نے کہا کہ اعلیٰ معیار کی ترقی کے فروغ کے لئے ملکی کوششوں کے سبب ایس ایف ایئرلائنز بیڑے میں توسیع کا سلسلہ جاری رکھنے کے ساتھ اپنی فضائی ترسیل خدمات کی صلاحیت کو مستحکم کرتی رہے گی۔

بیجنگ (شِنہوا) چین کے اسٹیٹ کونسلر اور وزیر خارجہ  چھن  گانگ نے دونوں ممالک کے درمیان سفارتی تعلقات کے قیام کی 41 ویں سالگرہ کے موقع پر وانواتو براڈکاسٹنگ اینڈ ٹیلی ویژن کارپوریشن کی جانب سے تیار کردہ ایک پروگرام میں ویڈیو تقریر کی ہے۔

اپنی تقریر میں چھن نے کہا کہ چین اور وانواتو کے درمیان سفارتی تعلقات کے قیام کے بعد سے گزشتہ 41 سالوں کے دوران دونوں ممالک نے ہمیشہ ایک دوسرے کا احترام کیا ہے، ایک دوسرے کے ساتھ برابری کا سلوک کیا ہے، ایک دوسرے پر اعتماد اور حمایت کی ہے، مخلصانہ تعاون میں مشغول  رہے اور باہمی فائدے اور جیت کے نتائج حاصل کیے ہیں۔

انہوں نے کہا   کہ دونوں فریقین نے ترقی پذیر ممالک کے درمیان یکجہتی اور تعاون کے با رے  باہمی احترام کے لئے ایک مثال قائم کی ہے۔

چھن نے کہا کہ چین وانواتو کے ساتھ جامع اسٹریٹجک شراکت داری کو فروغ دینے بارے بہت اہمیت دیتا ہے اور وانواتو کو ترقی کی راہ پر ایک ساتھی کے طور پر دیکھتا ہے۔

انہوں نے مزید کہا کہ چین وانواتو کے ساتھ دوستانہ تبادلوں اور مختلف شعبوں میں عملی تعاون کو مضبوط بنانے کے لئے کام کرنے بارے تیار ہے تاکہ دونوں ممالک اور ان کے عوام کو زیادہ سے زیادہ فوائد فراہم کیے جاسکیں۔

بیجنگ(شِنہوا)چین کے جنوب مغربی صوبہ گوئی ژو کے ایک سینئر سیاسی مشیر سے پارٹی نظم و ضبط اور قوانین کی مبینہ سنگین خلاف ورزیوں پر تحقیقات کی جا رہی ہیں۔

پیر کو جاری کردہ ایک سرکاری بیان کے مطابق چین کی عوامی سیاسی مشاورتی کانفرنس کی گوئی ژو صوبائی کمیٹی کے سرکردہ پارٹی ممبران گروپ کے رکن اور کمیٹی کے سابق نائب چیئرمین لی ژائی یونگ سے کمیونسٹ پارٹی آف چائنہ کے مرکزی نگران کمیشن برائے نظم و ضبط اور قومی نگران کمیشن تحقیقات کر رہے ہیں۔

بیجنگ (شِنہوا)چین کا پہلا گہرے سمندر میں تیرتا ہواونڈ پاورپلیٹ فارم جنوبی صوبے گوانگ ڈونگ کے شہر ژوہائی سے گزشتہ روز جنوبی صوبے ہائی نان کے سمندر کی طرف روانہ ہوگیا۔

چائنہ  نیشنل آف شور آئل کارپوریشن (سنوک) کے ایگزیکٹو نائب صدر یانگ یون نے بتایا کہ  سنوک گوآن لان نامی ملک کے پہلے آف شور ونڈ پاور پراجیکٹ کی پانی میں گہرائی 100 میٹرسے زیادہ اور ساحل سمندر سے فاصلہ  100 کلومیٹر سے زیادہ ہے۔

یانگ نے مزید کہا کہ اس پلیٹ فارم نے کم گہرے سمندرسے گہرے سمندر تک ملک کی ونڈ پاور کی ترقی کے لیے ایک مضبوط بنیادفراہم کی ہے۔

سنوک کی سرمایہ کاری اور اس کی جانب سے تعمیر کردہ،یہ پلیٹ فارم ہائی نان صوبے کے شہر وین چھانگ سے 136 کلومیٹر کے فاصلے پر واقع ایک آف شور آئل فیلڈ میں نصب کیا جائے گا۔

بیجنگ(شِنہوا) چین نے کہا ہے کہ ہونڈوراس کی جانب سے اس کے ساتھ سفارتی تعلقات قائم کرنا موجودہ رجحان کے مطابق اس کی جانب سے ایک صحیح انتخاب ہے۔  ریاستی کونسل کے تائیوان امور دفتر کے ترجمان ما شیاؤ گوانگ نے ان خیالات کا اظہار پیر کو چین اور ہونڈوراس کے درمیان سفارتی تعلقات کے قیام سے متعلق میڈیا کے استفسار کے جواب میں کیا۔ ما نے کہا کہ دنیا میں صرف ایک چین ہے اور تائیوان چین کا حصہ ہے، انہوں نے مزید کہا کہ ایک چین کے اصول  پر بین الاقوامی برادری کا مروجہ اتفاق رائے ہے جو بین الاقوامی تعلقات کے حوالے سے عالمی سطح پر ایک تسلیم شدہ اصول ہے۔

تہران(شِنہوا)ایران کے  وزیر خارجہ حسین امیر عبد اللہیان اور ان کے سعودی ہم منصب شہزادہ فیصل بن فرحان آل سعود نے ٹیلی فون پر بات چیت کے دوران  آئندہ  دنوں میں دو طرفہ ملاقات کے انعقاد پر تبادلہ خیال کیا۔

چین، سعودی عرب اور ایران نے 10 مارچ کو اعلان کیا  تھا کہ دونوں فریق ایک معاہدے پر پہنچ گئے ہیں جس میں دو ماہ کے اندر سفارتی تعلقات دوبارہ شروع کرنے اور سفارت خانے اور مشن دوبارہ کھولنے کا معاہدہ شامل ہے۔

ایرانی وزارت خارجہ کی ویب سائٹ کے مطابق بیجنگ میں ایران  اور سعودی عرب کے درمیان دوطرفہ تعلقات کو معمول پر لانے کے معاہدے پر دستخط کے بعد ایک ہفتے میں ایرانی اور سعودی وزرائے خارجہ کے درمیان ٹیلی فون پر یہ دوسری بات چیت تھی۔

دونوں وزرائے خارجہ نے تہران-ریاض معاہدے کی تازہ ترین شرط پر بھی تبادلہ خیال کیا اور اپریل کے آخر میں ختم ہونے والے ماہ رمضان میں اپنی دوطرفہ ملاقات کے انعقاد پر تبادلہ خیال کیا۔

انہوں نے اس ’’تعمیری راہ ‘‘ پر بھی روشنی ڈالی جس پر دو طرفہ تعلقات آگے بڑھ رہے ہیں۔

سعودی عرب نے 2016 کے اوائل میں ایران میں سعودی سفارتی مشن پر حملوں کے جواب میں ایران کے ساتھ سفارتی تعلقات منقطع کر لیے تھے جب سعودی حکومت نے ایک شیعہ عالم کو پھانسی دی تھی۔

بیجنگ (شِنہوا)عالمی بینک نے چین کے شمال مغربی صوبہ شانشی میں پلاسٹک کی آلودگی کو کم کرنے میں مدد کے لئے 25 کروڑ امریکی ڈالرز کے قرض کی منظوری دی ہے۔

بینک کے مطابق یہ فنڈز صوبہ کے دیہی علاقوں میں بلدیاتی سالڈ ویسٹ اور زرعی پلاسٹک فلم سے پلاسٹک آلودگی کم کرنے اور شانشی کے پلاسٹک ویسٹ مینجمنٹ کو بہتر بنانے کے لئے استعمال کئے جائیں گے جس میں قومی سطح کے لئے ممکنہ اسباق شامل ہیں۔

بینک نے کہا کہ اس قرض سے چین کو گرین ہاؤس گیسوں کے اخراج میں کمی، صوبائی ضوابط اور ادارہ جاتی صلاحیتوں کو مضبوط بنانے کے ساتھ ساتھ فضلے کے انتظام میں شہری اور دیہی انضمام کے لئے نمو نے قائم کرنے میں بھی مدد ملے گی۔

چین، منگولیا اور کوریا کے لیے عالمی بینک کی کنٹری ڈائریکٹر مارا واروک نے اس بات پر زور دیا کہ اس منصوبے کی توجہ منصوبہ بندی، ما لیات، علاج کی سہولت کی ترقی، شرا کت داروں کی شمولیت اور کارکردگی کی تشخیص کے لیے مربوط نظام پر مرکوز کی جائے گی۔

انہوں نے کہا کہ یہ منصوبہ چین میں بین الاقوامی طریقوں کو  متعارف کروائے گا اور ملک کے دیہی علاقوں میں فضلے کے انتظام کی تبدیلی کے لئے ایک وسیع نقطہ نظر کا مظاہرہ کرے گا۔

چین، مشرقی شہر شنگھائی میں منعقدہ شنگھائی فیشن ویک میں ایک بچی ڈیزائنر چھین شیانگ فائی کے تیار کردہ ملبوسات پیش کررہی ہے۔(شِںہوا)

چین ، مشرقی صوبہ آنہوئی کے شہر سوژو کی کاؤنٹی دانگ شان میں ناشپاتی کے باغ میں سیاح ناشپاتی کے کھلتے پھول سے لطف اندوز ہورہے ہیں۔ (شِنہوا)

چین ، مشرقی صوبہ آنہوئی کے شہر سوژو کی کاؤنٹی دانگ شان میں ناشپاتی کے باغ میں سیاح لوک فن کا مظاہرہ دیکھ رہے ہیں۔ (شِنہوا)

بیجنگ (شِنہوا) چین میں موسم بہار تہوار کے بعد بڑھتی طلب اور مارکیٹ کی مضبوط بحالی کے سبب فروری میں استعمال شدہ گاڑیوں کی فروخت میں زبردست اضافہ ہوا ہے۔

چائنہ آٹوموبائل ڈیلرز ایسوسی ایشن کے مطابق گزشتہ ماہ ملک میں تقریباً 14 لاکھ 60 ہزار استعمال شدہ گاڑیوں کے مالکان تبدیل ہوئے جو گزشتہ برس کی اسی مدت کی نسبت 35.48 فیصد زائد ہیں۔

رواں سال کے ابتدائی 2 ماہ کے دوران چین میں 27 لاکھ سے زائد استعمال شدہ گاڑیوں کا کاروبار ہوا جو گزشتہ برس کی نسبت 5.68 فیصد زیادہ ہے۔

ایسوسی ایشن نے کہا کہ استعمال شدہ کاروں کی مارکیٹ نے فروری میں مضبوط رفتار حاصل کی اور یہ بڑھتی ہوئی طلب مارکیٹ کے لئے بڑے مواقع لائے گی۔ چین کی نئی پالیسی اس شعبے میں بڑے پیمانے پر اور معیاری کاروباری آپریشنز کی حوصلہ افزائی کے لئے  مارکیٹ میں مثبت ترقی کو فروغ دے گی۔

ایسوسی ایشن نے مارکیٹ میں مستقبل کے امکانات بارے امید ظاہر کرتے ہوئے کہا ہے کہ استعمال شدہ کار کمپنیوں کا اعتماد بحال ہونے کے ساتھ مارکیٹ بھی اسی طرح بتدریج بحالی کی توقع کرے گی۔

ہاربن (شِنہوا) چائنہ نیشنل پیٹرولیم کارپوریشن کے ماتحت ادارے ڈ اچھنگ آئل فیلڈ نے کہا ہے کہ چین کی سب سے بڑی ساحلی آئل فیلڈ ڈا چھنگ آئل فیلڈ نے اتوار تک 2.5  ارب ٹن سے زیادہ خام تیل پیدا کیا ہے۔

1959میں دریافت ہونے والی آئل فیلڈ چین کی کل مقامی خام تیل کی پیداوار کا 36 فیصد ہے۔

گزشتہ  6 دہائیوں کے دوران، ڈا چھنگ  آئل فیلڈ نے تیل کی مستحکم پیداوار کو برقرار رکھا ہے، اور ایک بار لگاتار 27 سالوں تک سالانہ  5 کروڑ ٹن سے زیادہ خام تیل پیدا کیا ہے۔ حالیہ برسوں میں اس کی سالانہ تیل اور گیس کی پیداوار 4  کروڑ ٹن سے زیادہ تیل کے مساوی رہی ہے۔

ڈا چھنگ آئل فیلڈ چین کے سب سے بڑے تیل پیدا کرنے والے مراکز میں سے ایک ہے۔ شمال مشرقی صوبہ  حئی لونگ جیانگ میں واقع اس آئل فیلڈ نے چین کی جدید پیٹرولیم صنعت میں اہم کردار ادا کیا ہے۔

ڈھاکہ (شِںہوا) بنگلہ دیش کے دارالحکومت ڈھاکہ میں ایک صدی پرانی افطار منڈی رمضان المبارک کے دوران ایک مصروف مرکز میں تبدیل ہوچکی ہے۔

شہر کے مختلف حصوں سے بنگلہ دیشی چوک بازار منڈی میں قائم عارضی اسٹالز پر جمع ہوتے ہیں تاکہ شام میں افطار کے لئے  مزیدار اشیاء خرید سکیں۔

بنگلہ دیش، ڈھاکہ کی چوک بازار منڈی میں رمضان المبارک کے دوران افطار کی اشیاء کو بارش سے بچانے کے لئے تاجر پلاسٹک شیٹ کا استعمال کررہے ہیں۔(شِنہوا)

بنگلہ دیش، ڈھاکہ کی چوک بازار منڈی میں رمضان المبارک کے دوران افطار کی اشیاء کو بارش سے بچانے کے لئے تا جر پلاسٹک شیٹ کا استعمال کررہے ہیں۔ (شِنہوا)

بنگلہ دیش، ڈھاکہ کی چوک بازار منڈی میں رمضان المبارک کے دوران افطار کی اشیاء کو دیکھا جاسکتا ہے۔(شِنہوا)

بنگلہ دیش، ڈھاکہ کی چوک بازار منڈی میں رمضان المبارک کے دوران دکاندار افطار کا سامان فروخت کررہے ہیں۔(شِنہوا)

ہانگ کانگ (شِنہوا)ہانگ کانگ بین الاقوامی ہوائی اڈے پر گزشتہ ماہ مسافروں کی آمدورفت 21 لاکھ رہی جو گزشتہ برس کی نسبت 24 گنا زائد ہے۔

ا ئیر پورٹ اتھارٹی ہانگ کانگ نے بتایاکہ فروری میں مال برداری کے حجم اور پروازوں کی نقل و حرکت میں گزشتہ برس کی نسبت 6.7 فیصد اور 95.7 فیصد کا اضافہ ہوا جو بالترتیب 2 لاکھ 90 ہزار ٹن رہا اور  پروازوں کی تعداد 16 ہزار 305 رہی۔

ا ئیر پورٹ اتھارٹی ہانگ کانگ کے مطابق سفری پابندیوں میں نرمی کے سبب گزشتہ برس کی اسی مدت کی نسبت ہر طبقے کے مسافروں خاص طور پر ہانگ کانگ کے رہائشیوں کی تعداد میں نمایاں اضافہ ہوا۔

بتایا گیا ہے کہ جنوب مشرقی ایشیا اور جاپان سے آنے اور جانے والی  پروزاوں کی تعداد میں سب سے زیادہ اضافہ ہوا۔

ا ئیر پورٹ اتھارٹی ہانگ کانگ کے مطابق عالمی اقتصادی غیریقینی صورتحال کے مال برداری کے حجم پر اثرات جاری ہیں تاہم گزشتہ ماہ مال برداری کے حجم میں گزشتہ برس کی نسبت اضافے کی بنیادی وجہ فروری 2022 میں نسبتاً کم مال برداری تھی۔

ٹرانس شپمنٹس اور برآمدات میں گزشتہ برس کی نسبت بالترتیب 46 فیصد اور 3 فیصد اضافہ ہوا اور اس میں مال برداری حجم کے اعتبار سے مشرق وسطیٰ، چینی مین لینڈ اور شمالی امریکہ نمایاں رہے۔

مزارشریف، افغانستان (شِنہوا) افغانستان کے صوبہ بلخ میں افغان فورسز نے اتوار کے روز داعش کے ٹھکانوں پر چھاپہ مارا جس میں متعدد عسکریت پسند ہلاک ہوگئے۔

کاؤنٹر انٹیلی جنس ایجنسی نے پیر کے روز ایک بیان میں بتایا کہ جنرل ڈائریکٹوریٹ آف انٹیلی جنس کے اہلکاروں نے مزار شریف شہر کے پولیس اضلاع 5، 8 اور 10 میں داعش کے ٹھکانوں کو نشانہ بنایا جس میں متعدد باغی مارے گئے۔

بیان میں یہ بھی کہا گیا ہے کہ داعش کے متعدد عسکریت پسند گرفتار کرلئے گئے ہیں جو کابل، فریاب اور بلخ صوبوں میں دہشت گرد حملوں کی منصوبہ بندی اور کئی ہفتے قبل بلخ کے گورنر کے قتل میں ملوث تھے۔

افغان فورسز  کی جانب سے قومی دارالحکومت کابل اور شمالی مزار شریف شہر میں داعش کے ٹھکانوں کے خلاف گزشتہ ہفتوں کے دوران شروع کیا گیا یہ چوتھا آپریشن ہے جس میں داعش کے متعدد عسکریت پسند ہلاک ہوئے ہیں۔ حریف مسلح گروپ نے اس بارے کچھ نہیں بتایا ہے۔

افغانستان کی نگران انتظامیہ نے داعش کو سلامتی کے لیے خطرہ قرار دیتے ہوئے اس عزم کا اظہار کیا ہے کہ وہ جنگ زدہ ملک میں کسی بھی مقام پر مسلح مخالفین کو ختم کردیں گے۔

بیجنگ (شِنہوا) چین میں رواں سال کے ابتدائی دو ماہ کے دوران بڑی صنعتی کمپنیوں کے نفع میں کمی ہوئی تاہم طلب میں بہتری کے سبب بحالی کے اشارے ملے ہیں۔

قومی ادارہ شماریات کے مطابق کم از کم 2 کروڑ یوآن (تقریباً 29 لاکھ 10 ہزار امریکی ڈالرز) کی سالانہ کاروباری آمدن والی صنعتی کمپنیوں کا مشترکہ نفع اس عرصے میں تقریباً 887.21 ارب یوآن تک پہنچ گیا جو گزشتہ برس کی نسبت 22.9 فیصد کم ہے۔

قومی ادارہ شماریات کے شماریات دان سن شیاؤ نے بتایا کہ مارکیٹ طلب کی مکمل بحالی باقی ہے جس کے سبب ابتدائی 2 ماہ میں آمدن کم ہوئی ہے۔ اس کے علاوہ لاگت زیادہ ہے اور اشیا کی فیکٹری قیمت بھی گِری ہے جو کہ  منافع میں کمی کی وجہ بنی ہے۔

قومی ادارہ شماریات کے مطابق صنعتی اداروں کی مجموعی آمدن گزشتہ برس کی نسبت 1.3 فیصد کم ہوکر 193 کھرب یوآن رہی جبکہ آپریٹنگ اخراجات 0.2 فیصد کم ہوئے۔

اعداد و شمار کے مطابق بجلی کی پیداوار اور رسد کے شعبے میں ایک برس قبل کی نسبت 53.1 فیصد کا اضافہ ہوا ہے جس کی وجہ صنعتی اشیاء سازی میں تیزی ہے جبکہ کان کنی کے شعبے میں 0.1 فیصد کی کمی ہوئی۔

بڑھتی ہوئی کھپت نے روزمرہ کی اشیاء تیار کرنے والی کمپنیوں کے دسمبر کے اپنے نفع میں 13.4 فیصد پوائنٹس کی کمی کو کم کرنے میں مدد کی۔ تمباکو ، چائے اور مشروبات کے شعبے کا نفع بالترتیب 9.6 فیصد اور 2.4 فیصد بڑھ گیا۔

سن کے مطابق ابھرتے ہوئے شعبے مضبوط رہے۔ بجلی کی بیٹریوں اور فوٹو وولٹک آلات کی فروخت سے الیکٹرک مشینری کے شعبے میں نفع 41.5 فیصد بڑھ گیا۔

سن نے کہا کہ مستقبل قریب میں صنعتی منافع بتدریج بحال ہوگا کیونکہ معاشی سرگرمیوں کی بحالی اور مارکیٹ طلب مستحکم ہے۔