ایک ہفتے تک جاری رہنے والی بہار تہوار تعطیلات کے دوران صارفین کی ایک مضبوط منڈی کے سبب جنوری کے دوران چین کی خدمات سرگرمیوں میں زبردست بحالی ہوئی ہے۔ قومی بیورو برائے شماریات کے مطابق چین کے غیر مینوفیکچرنگ شعبے کے لیے پرچیزنگ منیجرز انڈیکس جنوری میں بڑھ کر 54.4 ہوگیا جو کہ دسمبر میں 41.6 تھا۔ 50 سے اوپر ریڈنگ توسیع اور اس سے نیچے کی ریڈنگ سکڑا کی عکاسی کرتی ہے۔ یہ اعداد و شمار گزشتہ 12 ماہ میں دوسرے بلند ترین تھے جو کہ گزشتہ جون میں 54.7 کی ریڈنگ سے تھوڑا کم ہیں۔ جنوری میں خدمات اور تعمیراتی شعبوں کے ذیلی انڈیکس بالترتیب 54 اور 56.4 رہے۔ قومی بیورو برائے شماریات کے سینئر شماریات دان ژا ؤچھنگ ہی نے کہا کہ جنوری کے دوران خدمات سرگرمیوں بارے گزشتہ 6 ماہ سے جاری کمی کا رجحان ختم ہوا اور کاروباری ماحول میں تیزی سے اس کی مثبت سطح بحال ہوگئی۔ سروے میں شامل تمام 21 صنعتوں میں سے 15 نے کاروبار میں توسیع ریکارڈ کی ۔ ریلوے، ہوا بازی، ڈاک ، مالیاتی خدمات، اور انشورنس میں یہ شرح 60 سے اوپر رہی۔ خوردہ فروشی، ہوٹل اور کیٹرنگ کے شعبوں کو نوول کرونا وائرس نے سب سے زیادہ متاثر کیا تھا ۔ ان شعبوں میں بھی توسیع دوبارہ شروع ہوگئی۔ ژا ؤکے مطابق صارفین کا رجحان نمایاں طور پر بہتر ہوا ہے جس کے سبب مارکیٹ سرگرمیاں تیز ہوئی۔ دریں اثنا اعداد و شمار کے مطابق تعمیراتی شعبے میں نسبتا تیز رفتار توسیع ہوئی۔ ژاؤ نے کہا کہ چونکہ بڑے منصوبوں کے فروغ بارے مختلف حکومتی پالیسیاں مئوثر ثابت ہوئی ہیں اس لئے تعمیراتی ادارے پرامید ہیں۔

کریڈٹ: انڈیپنڈنٹ نیوز پاکستان-آئی این پی

ایک خصوصی ٹرین بلدیہ چھونگ چھنگ کے چھونگ چھنگ مغربی ریلوے اسٹیشن سے کام پر لوٹنے والے محنت کشوں لیکر چین کے جنوبی صوبہ گوانگ ڈونگ کے شہر گوانگ ژو روانہ ہوئی۔ گھر سے دور کام کرنے والے چھونگ چھنگ کے محنت کشوں کے لئے یہ رواں سال کی پہلی ٹرین تھی۔ اس کے ذریعے تقریبا 890 مہاجر محنت کش کام پر واپس گئے۔

کریڈٹ: انڈیپنڈنٹ نیوز پاکستان-آئی این پی

بنگلہ دیش۔چائنہ فر ینڈ شپ کا نفرنس سینٹر کے نا م سے معروف ڈھا کہ کے بنگاباندھوانٹر نیشنل کا نفر نس سینٹر میں تین روزہ "ڈیجیٹل بنگلہ دیش میلہ(ایکسپو) 2023" منعقد ہوا۔ میلے کا مقصد انتہائی تیز تر ین فا ئیو جی مو با ئل ٹیکنا لو جی اور ملک میں ڈیجیٹلا ئزیشن کے عمل با رے پیشرفت کا مظاہرہ کر نا تھا۔

کریڈٹ: انڈیپنڈنٹ نیوز پاکستان-آئی این پی

کراچی کے علی محمد گوٹھ میں پراسرار بیماری سے ایک اور بچہ انتقال کرگیا۔ کراچی میں کیماڑی ٹاون کے علی محمد گوٹھ میں ایک اور بچہ پراسرار بیماری کی بھینٹ چڑھ گیا۔ جاں بحق ہونے والے بچے کانام عبدالحلیم ولد عبدالوہاب اور اس کی عمر 3 سال تھی۔ اہل علاقہ کے مطابق عبدالحلیم کے انتقال کے بعد اب تک 20 افراد اس پراسررا بیماری سے لقمہ اجل بن چکے ہیں جب کہ سندھ حکومت نے 16 افراد کی تصدیق کی ہے۔ بچے کے والدین کا کہنا ہے کہ عبدالحلیم چند روز سے بیمار تھا ، محکمہ صحت کے میڈیکل کیمپ میں بھی اس کا علاج ہوتا رہا، گزشتہ رات اچانک طبیعت خراب ہوئی اور انتقال کرگیا۔ دوسری جانب علاقہ مکین نے شکوہ کیا ہے کہ محکمہ صحت کی ہدایت ہے 24 گھنٹے میڈیکل کیمپ ، ڈاکٹروں کی ٹیم اور ایمبولینس موجود رہے گی لیکن گزشتہ رات علاقے میں نا تو میڈیکل ٹیم موجود تھی اور نہ ہی کوئی ایمبولینس۔ واضح رہے کہ ان ہلاکتوں کی وجوہات کا تعین اب تک نہیں کیا جاسکا تاہm اس علاقے میں قائم چند فیکٹریوں کو سیل کیا گیا ہے۔

کریڈٹ: انڈیپنڈنٹ نیوز پاکستان-آئی این پی

پاکستانی کم عمر آئی ٹی ماہر ارفع کریم رندھاوا کا28واں یوم پیدائش 2فروری جمعرات کو منایاجائے گا۔محض نو برس کی عمر میںمائیکرو سافٹ سرٹیفائیڈپروفیشنل امتحان پاس کرکے انفارمیشن ٹیکنالوجی کی دنیا میں تہلکہ مچا دینے والی ارفع کریم2فروری1995ء کو ضلع فیصل آباد میں پیدا ہوئیںاس نے کم عمری میں ہی سافٹ وئیر سرٹیفکیٹ حاصل کرکے عالمی شہرت حاصل کی انہوں نے کئی انعامات بھی حاصل کیے تھے انہیں فاطمہ جناح گولڈ میڈل اور سلام پاکستان ایوارڈز سے نوازا گیا جبکہ حکومت پاکستان کی جانب سے ارفع کریم رندھاوا کوحسن کارکردگی کا صدارتی ایوارڈ بھی دیا گیا گیا۔ارفع کریم کو 22دسمبر 2011ء کو مرگی کا دورہ پڑا اور طبیعت زیادہ خراب ہونے پر اسے لاہور کے سی ایم ایچ ہسپتال میں داخل کروا دیا گیاجہاں وہ کومے کی حالت میں رہیں اور14جنوری2012ء کو انتقال کر گئیں۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کے رہنماء فرخ حبیب نے کہا ہے کہ دھماکے کے بعد الیکشن سے متعلق طے شدہ بیانیہ آگے بڑھانا شروع کردیا گیا، کہا جارہا ہے کہ الیکشن نہیں ہوسکتے حالات ٹھیک نہیں، پنجاب میں تو دہشتگردی نہیں ہے یہاں کیا وجہ ہے؟ انہوں نے فیصل آباد میں آئی این پی سے گفتگو کرتے ہوئے کہا کہ واٹس ایپ گروپ ہے جس میں الیکشن سے متعلق طے شدہ بیانیہ آگے بڑھایا جاتا ہیالیکشن ملتوی ہونے کی آئین میں گنجائش بالکل نہیں ہے، لیکن آج دیکھا گیا کہ دھماکے کے بعد الیکشن سے متعلق طے شدہ بیانیہ آگے بڑھانا شروع کردیا گیا، کہا جارہا ہے کہ الیکشن نہیں ہوسکتے حالات ٹھیک نہیں۔ انہوں نے کہا کہ پنجاب میں تو دہشتگردی نہیں ہے یہاں کیا وجہ ہے؟پنجاب میں کوئی سیلاب نہیں ہے، کوئی آفت بھی نہیں آئی ہوئی ہے۔خیبرپختونخواہ پہلے بھی دہشتگردی کے واقعات سے گزر چکا ہے، وہاں کے لوگوں نے بڑی قربانیاں دی ہیں۔آئین میں تاخیر کی باتیں بدنیتی پر مبنی ہیں، آئین میں کوئی چوائس نہیں ہے، فیصلے عوام کودیکھ کر کرنے ہیں۔

کریڈٹ: انڈیپنڈنٹ نیوز پاکستان-آئی این پی

پی ٹی آئی نے خیبرپختونخوا میں 90 دن کے اندرانتخابات کرانے کے لیے ہائیکورٹ سے رجوع کرلیا۔ تحریک انصاف کے صوبائی رہنماوں نے اس حوالے سے پشاور ہائیکورٹ میں درخواست دائر کی جس میں موقف اختیار کیا گیا کہ اسمبلی تحلیل ہونے کے بعد 90 دن میں الیکشن کرانا لازمی ہے، الیکشن کمیشن نے انتخابات کی تاریخ کے لیے گورنر کو خط لکھا لیکن گورنر خیبرپختونخوا نے ابھی تک انتخابات کے لیے تاریخ نہیں دی۔ درخواست میں کہا گیا ہیکہ قانون کے مطابق اسمبلی تحلیل ہونے کے بعد 90 دن کے اندر الیکشن نگران حکومت کی ذمہ داری ہے۔ ہائیکورٹ کے باہر میڈیا سے گفتگو میں سابق صوبائی وزیر عاطف خان نے کہا کہ انتخابات منعقد کرانے کے لیے ہائیکورٹ میں درخواست دائر کردی ہے، بروقت الیکشن کرانا آئینی ضرورت ہے، آئین میں درج ہے کہ اسمبلی تحلیل ہونے کے بعد 90 دن میں الیکشن کرانے ہوتے ہیں لیکن اب تک گورنر نے تاریخ نہیں دی جو غیر آئینی اقدام ہے۔ انہوں نے کہا کہ پتا نہیں پی ڈی ایم الیکشن سے کیوں بھاگ رہی ہے، نگران کابینہ غیرسیاسی ہوتی ہے لیکن ایسا لگ رہا ہے کہ یہ پی ڈی ایم کی کابینہ ہے۔ واضح رہے کہ پی ٹی آئی نے پنجاب میں بھی 90 روز میں الیکشن کرانے کے لیے ہائیکورٹ میں درخواست دائر کررکھی ہے جو زیر سماعت ہے۔

کریڈٹ: انڈیپنڈنٹ نیوز پاکستان-آئی این پی

الیکشن کمیشن نے چودھری شجاعت حسین کو مسلم لیگ ق کا صدر قرار دیتے ہوئے سینٹرل ورکنگ کمیٹی کی کارروائی کو غیر قانونی قرار دے دیا، چودھری شجاعت حسین پارٹی کے صدر برقرار رہیں گے۔ منگل کو مسلم لیگ ق کی صدارت سے ہٹانے کے معاملے پر الیکشن کمیشن نے چوہدری شجاعت کی درخواست پر محفوظ فیصلہ سنا دیا، جس میں قرار دیا گیا ہے کہ چوہدری شجاعت حسین ہی مسلم لیگ ق کے صدر برقرار رہیں گے۔الیکشن کمیشن نے چوہدری شجاعت حسین کی برطرفی پارٹی آئین سے متصادم قرار دیتے ہوئے فیصلے میں کہا کہ سینٹرل ورکنگ کمیٹی کی کارروائی بھی غیر قانونی ہے۔ الیکشن کمیشن نے اپنے فیصلے میں ق لیگ کی سینٹرل ورکنگ کمیٹی کا جاری کردہ پارٹی الیکشن شیڈول بھی کالعدم قرار دے دیا۔ پارٹی صدارت سے ہٹائے جانے کے خلاف چوہدری شجاعت نے الیکشن کمیشن کو درخواست دی تھی، جس پر الیکشن کمیشن نے گزشتہ برس اگست میں فیصلہ محفوظ اور حکم امتناع پر چوہدری شجاعت حسین کو بحال کیا تھا۔

کریڈٹ: انڈیپنڈنٹ نیوز پاکستان-آئی این پی

شہر میں جمعرات 2 فروری کو سمندری ہوائیں فعال ہونے کا امکان ہے جس سے سردی کی شدت میں کمی ہو سکتی ہے۔ محکمہ موسمیات کے مطابق(آج) بدھ کو کم سے کم پارہ 13 اور زیادہ سے زیادہ 28 ڈگری ریکارڈ ہوسکتا ہے جبکہ جمعرات کو درجہ حرارت کم سے کم 15 اور زیادہ سے زیادہ 29 ڈگری ریکارڈ کیا جا سکتا ہے۔ کراچی کے علاوہ سندھ کے بقیہ شہروں موسم سرد اور خشک رہنے کا امکان ہے جبکہ میدانی علاقوں میں صبح کے وقت دھند چھا سکتی ہے۔

کریڈٹ: انڈیپنڈنٹ نیوز پاکستان-آئی این پی

پشاور میں گزشتہ روز ہونے والے خودکش دھماکے میں جاں بحق افراد کی تعداد 93 ہوگئی ہے۔ گزشتہ روز پشاور پولیس لائنز کی مسجد میں عین اس وقت خودکش دھماکا ہوا تھا جب وہاں باجماعت نماز ظہر ادا کی جارہی تھی۔ دھماکے میں جاں بحق ہونے والوں کی تعداد 93 ہوگئی ہے، جن میں ڈی ایس پی عرب نواز، 5 سب انسپکٹرز، مسجد کے پیش امام اور ملحقہ پولیس کوارٹر کی رہائشی خاتون بھی شامل ہیں۔ ترجمان لیڈی ریڈنگ اسپتال کے مطابق اسپتال میں 88 لاشیں لائی گئیں جبکہ 57 زخمی ابھی بھی زیرعلاج ہیں۔ مسجد کے ملبے تلے اب بھی متعدد افراد کے دبے ہونے کا خدشہ ہے، بھاری مشینری سے ریسکیو آپریشن جاری ہے، سیکیورٹی فورسز کے دستے بھی امدادی کارروائیوں میں مصروف ہیں۔

کریڈٹ: انڈیپنڈنٹ نیوز پاکستان-آئی این پی

سربراہ پاکستان عوامی مسلم لیگ اور سابق وفاقی وزیر داخلہ شیخ رشید احمد نے پشاور دھماکے میں انسانی جانوں کے نقصان پر شدید دکھ کا اظہار کیا ہے۔ سماجی رابطے کی ویب سائٹ ٹوئٹر پر شیخ رشید احمد نے لکھا کہ پشاور پولیس لائن میں ہونے والا خودکش دھماکا اور انسانی شہادتوں پر انتہائی دکھ اور افسوس ہوا، میری دعائیں اور نیک تمنائیں شہید خاندانوں کے ساتھ ہیں، اللہ انکو صبر جمیل عطا کرے اور شہدا کے درجات بلند کرے۔ سابق وزیر کا کہنا تھا کہ اللہ تعالی پاکستان کو دہشتگردی سے محفوظ فرمائے اور ملکی وغیر ملکی سازشوں سے محفوظ رکھے۔

کریڈٹ: انڈیپنڈنٹ نیوز پاکستان-آئی این پی

الیکشن کمیشن آف پاکستان نے پنجاب اور خیبرپختونخوا انتخابات کی تاریخ کیلئے گورنرز کو دوبارہ خط لکھ دیا۔ خط میں کہا گیا ہے کہ پنجاب اسمبلی 14 جنوری کو تحلیل ہوئی، تاحال الیکشن کی تاریخ نہیں دی گئی، خیبرپختونخوا اسمبلی 18 جنوری کو تحلیل ہوئی مگر ابھی تک گورنر خیبر پی کے کی جانب سے الیکشن کی تاریخ کا اعلان نہیں کیا گیا۔ الیکشن کمیشن نے خط میں مزید کہا کہ آرٹیکل 105 کے تحت تحلیل کی صورت میں گورنر کا الیکشن کی تاریخ دینا ضروری ہے جبکہ اسمبلی تحلیل ہونے کے 90 روز کے اندر الیکشن کرانا آئینی ذمہ داری ہے۔ یاد رہے کہ اس سے قبل الیکشن کمیشن 24 جنوری کو دونوں گورنرز کو خط لکھ چکا ہے مگر تاحال الیکشن کمیشن کو جواب موصول نہیں ہوا۔

کریڈٹ: انڈیپنڈنٹ نیوز پاکستان-آئی این پی

سپریم کورٹ نے ہائی کورٹ کی جانب سے ازخود نوٹس لینے سے متعلق اہم فیصلہ جاری کرتے ہوئے قرار دیا ہے کہ ہائی کورٹ از خود نوٹس کا اختیار استعمال نہیں کر سکتی۔ عدالت عظمی نے پشاور ہائی کورٹ کا فیصلہ کالعدم قرار دیتے ہوئے کہا ہے کہ ہائی کورٹ آئین کے آرٹیکل 199 کے تحت ازخود نوٹس لینے کا اختیار نہیں رکھتی۔ صرف سپریم کورٹ کو آرٹیکل 184/3 کے تحت از خود نوٹس کا اختیار حاصل ہے۔ ہائی کورٹ کے از خود نوٹس کے اختیار سے متعلق 8 صفحات پر مشتمل فیصلہ سپریم کورٹ کے جسٹس اعجاز الاحسن نے تحریر کیا۔ فیصلے میں کہا گیا ہے کہ ہائی کورٹ کے سامنے صرف اشیا کی قیمتوں کا معاملہ زیر سماعت تھا۔ ہائی کورٹ نے ایک سے زائد مرتبہ از خود نوٹس کا اختیار استعمال کیا۔ ہائی کورٹ نے پولٹری اشیا کی برآمد پر پابندی عائد کرنے کا فیصلہ دیا۔ اشیا کی درآمد و برآمد کا اختیار عدالت نہیں بلکہ صرف انتظامیہ کے پاس ہے۔ ہائی کورٹ نے نہ صرف از خود نوٹس کا اختیار استعمال کیا بلکہ انتظامی دائرہ اختیار میں دخل اندازی بھی کی۔ سپریم کورٹ نے اپنے فیصلے میں کہا کہ ہائی کورٹ کے فیصلے میں عدالتی دائرہ اختیار سے متعلق کئی خامیاں موجود ہیں۔ واضح رہے کہ پشاور ہائی کورٹ نے لائیو اسٹاک اور پولٹری اشیا کی قیمتوں کے تعین کے لیے کمیٹی کی تشکیل کا حکم دیا تھا۔ عدالت نے حکومتی اہل کاروں کو معیاری دودھ و دیگر اشیاکی فروخت یقینی بنانے کے لیے مارکیٹس کے دورے کرنے کا حکم بھی دیا تھا۔

کریڈٹ: انڈیپنڈنٹ نیوز پاکستان-آئی این پی

تاندہ ڈیم جیل سے مزید19 افراد کی لاشوں کو نکال لیا گیا ہے۔ جھیل میں ڈوبنے سے شہید ہونے والے طلبہ کی تعداد 30 ہو گئی۔ کوہاٹ تاندہ ڈیم میں کشتی ڈوبنے کے واقعے میں مزید 19 طلبا کی لاشوں کو پانی سے نکال لیا گیاہے۔ کل 30طلبا کی لاشیں لواحقین کے حوالے کر دی گئی ہیں۔ جبکہ 5طلبا کو معجزانہ طور پر بچا لیا گیا ہے۔ زخمی طلبا ڈویژنل ہیڈکواٹر ہسپتال کے ڈی اے کوہاٹ میں زیر علاج ہیں۔ کشتی حادثے میں شہید ہونے والے تمام شہدا کی اجتماعی نماز جنازہ بھی ادا کردی گئی ہے۔

کریڈٹ: انڈیپنڈنٹ نیوز پاکستان-آئی این پی

گوادر فری زون (ساؤتھ) میں مچھلی اور ماہی گیری سے متعلق پہلی صنعت کے آغاز کے لیے، تعمیراتی سامان کے 11 کنٹینرز پر مشتمل ہائی شن تیان (Haixintian)کی پہلی کھیپ چین سے گوادر پورٹ پہنچے گی۔گوادر پرو کے مطابق ہائی شن تیان پیلیجک فشری اورسیز بیس کمپنی ( پرائیویٹ ) لمیٹیڈ گوادر فری زون کے سرمایہ کاروں میں سے ایک ہے، اس نے مچھلی اور ماہی گیری کی صنعت کی تعمیر کے لیے 5,911 مربع میٹر کا رقبہ حاصل کیا ہے۔ ایک ورکشاپ 2,000 مربع میٹر کے رقبے پر قائم کی جائے گی۔گوادر پرو کے مطابق کمپنی کے پاس کشتیوں کی دیکھ بھال اور مرمت، سامان ور اسپیئر پارٹس اور ماہی گیری کی کشتیوں کے لیے بنیادی زندگی کی فراہمی، ماہی گیری اور بندرگاہ سے متعلق انتظام، گودام، لاجسٹکس، کولڈ اسٹوریج گودام، سمندری غذا کی کولڈ چین پروسیسنگ، ماہی گیری ،بحری جہازوں اور عملے کی تربیت، آبی زراعت ، جھینگا ، اور مچھلی پالنے کے کاروبار کا وسیع دائرہ ہے۔ گوادر پرو کے مطابق یہ فری زون میں ماہی گیری اور مچھلی سے متعلق پہلی صنعت ہوگی۔

اس نے پاکستان میں کام کرنے کے لیے تمام قانونی اور دستاویزات کے طریقہ کار کو پہلے ہی مکمل کر لیا ہے۔ چونکہ انڈسٹری کا تعلق مقامی افرادی قوت کی مہارت سے ہے، اس لیے اس میں مقامی کمیونٹی کو ملازمت اور کاروباری مواقع دونوں میں فائدہ پہنچانے کی صلاحیت ہے۔ گوادر پرو کے مطابق چند روز قبل گوادر فری زون میں ہینگینگ ایگریکلچرل پارک کے اسٹیل اسٹرکچر کے لیے تعمیراتی سامان گوادر پورٹ پہنچ گیا۔ یہ سامان کے 31 کنٹینرز کی پہلی کھیپ تھی جس کا مقصد فیکٹری کی تعمیر کے لیے مارچ میں کمرشل آپریشن شروع کرنے کا امکان ہے۔ ہینگینگ ایگریکلچرل گروپ ایلو ویرا کی کاشت ، زرعی مصنوعات کی پروسیسنگ اور ایکسپورٹ کے ساتھ ساتھ مویشی پالنے میں مہارت رکھتا ہے۔

کریڈٹ: انڈیپنڈنٹ نیوز پاکستان-آئی این پی

چھوٹے پیمانے پر پن بجلی کے فروغ سے نہ صرف مقامی باشندوں کی بجلی کی کھپت کا مسئلہ حل ہو سکتا ہے بلکہ اس سے چھوٹی مقامی صنعتوں کی ترقی میں بھی مدد ملے گی، مقامی ٹیکسوں میں اضافہ ہو گا ۔ چین پاکستان سمال ہائیڈرو پاور تعاون پاکستان کی سبز اقتصادی ترقی کو فروغ دے رہا ہے۔ ان خیالات کا اظہار ہیروبوس ٹیکنالوجی گروپ کے چیئرپرسن وانگ چن پنگ نے چائنہ اکنامک نیٹ کو ایک حالیہ انٹرویو میں کیا۔ ہیروبوس ٹیکنالوجی بنیادی طور پر پاکستانی وزارت سائنس و ٹیکنالوجی اور توانائی کے مقامی اداروں کے ساتھ سائنسی اور تکنیکی تعاون میں مصروف ہے۔ یہ چین پاکستان چھوٹے ہائیڈرو پاور مشترکہ تحقیقی مرکز میں دونوں ممالک کے درمیان ایس اینڈ ٹی تعاون کا پلیٹ فارم قائم کرنے، پاکستان میں چینی سرکاری اداروں کی مشترکہ بات چیت کو مربوط کرنے اور مربوط ایس اینڈ ٹی ترقی کو فروغ دینے کا ذمہ دار ہے۔چائنہ اکنامک نیٹ کے مطابق چین پاکستان چھوٹے پیمانے پر ہائیڈرو پاور ٹیکنالوجی جوائنٹ ریسرچ سینٹر ''بیلٹ اینڈ روڈ انیشیٹو'' کے تحت مشترکہ لیبارٹریوں کے پہلے بیچ میں سے ایک ہے۔ 2021 کے اوائل میں چھوٹے پیمانے پر ہائیڈرو پاور ٹیکنالوجی پر چین پاکستان ''بیلٹ اینڈ روڈ'' مشترکہ لیبارٹری کے نفاذ کے بعد سے، 5 میٹنگز ہو چکی ہیں اور چھوٹے پن بجلی کی ترقی پر اتفاق رائے ہو چکا ہے۔ توانائی کا نمائشی ہال مکمل ہو چکا ہے اور چین کی طرف سے عطیہ کردہ سامان کا 80 فیصد پہنچ چکا ہے۔

اس نے کئی چھوٹے پن بجلی منصوبوں کی ترقی کے لیے مطالعہ بھی مکمل کیا ہے، اور پاکستان میں چھوٹے پن بجلی منصوبوں کے لیے متعلقہ ضوابط کی تالیف میں مدد کی ہے۔ چائنہ اکنامک نیٹ کے مطابق پاکستان میں سی جی جی سی کے داسو ہائیڈرو پاور پراجیکٹ کے پراجیکٹ مینیجر ، ریسرچ سینٹر کے کنسلٹنٹ تن بی شوان نے اس بات پر زور دیا کہ مرکز تمام ٹیکنالوجی کی منتقلی کو قومی اجازت ناموں کے دائرہ کار میں انجام دینے کے لیے تیار ہے، تاکہ آئرن برادر کو تیز اور بہتر ترقی کرنے کے قابل بنایا جا سکے۔ انہوں نے وضاحت کی کہ ''حال ہی میں، ہم نے بی آر آئی میں شامل بڑے کاروباری اداروں کے ساتھ ایک مشترکہ بات چیت کی ہے کہ مزید تکنیکی تبدیلی کو حاصل کرنے کے لیے مکمل کھیل کیسے دیا جائے۔ چائنہ اکنامک نیٹ کے مطابق پاکستان میں چین پاکستان اقتصادی راہداری کے تحت پن بجلی کے منصوبے زوروں پر ہیں۔ وانگ کے مطابق چھوٹے پن بجلی منصوبوں کا فروغ غریب پہاڑی علاقوں کی اقتصادی ترقی کے لیے بڑے پیمانے پر پن بجلی کے منصوبوں کے مقابلے میں زیادہ سازگار ہے۔ پاکستان میں 60 فی صد دریا ذیلی دریا ہیں جن کا جزوی سالانہ پانی کا بہاؤ 50 ایم3 / ایس ہے، اونچائی کا ایک بڑا فرق، اور ایک کلومیٹر لمبی لمبائی قدرتی حالات میں کثیر سطحی چھوٹے پن بجلی کی ترقی کی اجازت دیتی ہے۔

چائنہ اکنامک نیٹ کے مطابق پاکستان موسمیاتی تبدیلیوں سے سب سے زیادہ متاثر ہونے والے ممالک میں سے ایک ہے۔ جون 2022 کے وسط سے پاکستان کے مختلف صوبوں میں کئی بار بارشوں کے طوفان آئے ہیں، جس سے شدید سیلاب آیا ہے۔ تن کا خیال ہے کہ ایس اینڈ ٹی کو پاکستان کی آفات کے بعد کی تعمیر نو اور موسمیاتی تبدیلی سے نمٹنے کے لیے استعمال کیا جانا چاہیے۔ چائنہ اکنامک نیٹ کے مطابق تن نے مزید کہا کہ آفت کے بعد کی تعمیر نو کے لیے، ہم موبائل سولر پاور ہاؤسز، موبائل انرجی سٹوریج سسٹم اور موبائل کمیونیکیشنز پر سرگرمی سے مطالعہ اور تعاون کر رہے ہیں۔ انہوں نے کہا چین اور پاکستان کے درمیان پن بجلی، جیسے شمالی پہاڑوں میں چھوٹے پیمانے پر پن بجلی کی ترقی، شہری فضلہ سے بجلی پیدا کرنا، شمسی توانائی کی پیداوار، ہائیڈروجن توانائی، ہوا ذخیرہ کرنا وغیرہ سمیت قابل تجدید توانائی کے شعبے میں تعاون کی بہت گنجائش ہے ۔

کریڈٹ: انڈیپنڈنٹ نیوز پاکستان-آئی این پی

نیشنل الیکٹرک پاور ریگولیٹری اتھارٹی نے ماہانہ فیول ایڈجسٹمنٹ کی مد میں بجلی 2 روپے 31 پیسے سستی کرنے کی منظوری دے دی۔ نیشنل الیکٹرک پاور ریگولیٹری اتھارٹی(نیپرا) کے چیئرمین توصیف حسن فاروقی کی سربراہی میں ماہانہ فیول ایڈجسٹمنٹ کی مد میں بجلی 2 روپے 20 پیسے سستی کرنے سے متعلق سینٹرل پاور پرچیزنگ ایجنسی کی درخواست پر سماعت ہوئی۔ سینٹرل پاور پرچیزنگ ایجنسی (سی سی پی اے) کی جانب سے دائر درکواست میں موقف اختیار کیا گیا ہے کہ دسمبر میں 8 ارب 9 کروڑ 60 لاکھ یونٹس سے زائد بجلی پیدا کی گئی۔ درخواست میں کہا گیا کہ دسمبر کے لئے ریفرنس لاگت 9 روپے 31 پیسے فی یونٹ مقرر تھی لیکن مجموعی اخراجات 7 روپے 11 پیسے فی یونٹ رہی ، اس لئے بجلی ماہانہ فیول ایڈجسٹمنٹ کی مد میں 2 روپے 20 پیسے فی یونٹ سستی کی جائے۔ نیپرا نے دسمبر کے لیے بجلی 2 روپے 31 پیسے فی یونٹ سستی کرنے کی منظوری دے دی، بجلی سستی ہونے سے صارفین کو جنوری کے بل میں مجموعی طور پر 18 ارب 70 کروڑ روپے کا ریلیف ملے گا۔ بجلی سستی ہونے کا اطلاق لائف لائن اور کے الیکٹرک صارفین پر نہیں ہوگا۔

کریڈٹ: انڈیپنڈنٹ نیوز پاکستان-آئی این پی

پشاور پولیس لائنز میں دھماکے کی ابتدائی تحقیقاتی رپورٹ وزیراعظم کو پیش کردی گئی۔ سی ٹی ڈی نے تمام سی سی ٹی وی کیمروں کی فوٹیج حاصل کر لیں، پشاور پولیس لائن دھماکے کا واقعہ سکیورٹی غفلت قرار دیا گیا۔ رپورٹ میں بتایا گیا ہے کہ جائے وقوعہ سے خودکش حملے کے شواہد ملے ہیں، دھماکے کے بعد مسجد کے پلر گرنے سے چھت گری جس سے نقصان زیادہ ہوا، ملبہ ہٹانے کے بعد بارودی مواد کا پتہ چلے گا، پولیس لائن میں تمام اہلکاروں کا حاضری ریکارڈ تحویل میں لے لیا گیا۔ سینئر پولیس آفیسر کا کہنا تھا کہ پولیس لائن میں انویسٹی گیشن اہلکاروں کا اجلاس جاری تھا، اجلاس کے بعد اہلکار مسجد گئے، زیادہ تر تفتیشی اہلکار دھماکے کا نشانہ بنے۔ پولیس آفیسر نے کہا کہ فیملی کوارٹرز میں رہائش پذیر افراد کی تفصیلات طلب کر لی گئیں، مہمانوں کے کوائف کی معلومات کی چھان بین بھی جاری ہے۔ رپورٹ کے مطابق سکیورٹی لیپس کے حوالے سے اعلی تحقیقاتی کمیٹی قائم کردی گئی ہے، پولیس لائن گیٹ، فیملی کوارٹرز سائیڈ کی سی سی ٹی وی فوٹیجزپر تحقیقات جاری ہیں۔

کریڈٹ: انڈیپنڈنٹ نیوز پاکستان-آئی این پی

ایم کیو ایم پاکستان کے رہنما اور سابق وفاقی وزیر بابر غوری غیر ملکی پرواز سے وطن واپس پہنچ گئے۔ بابر غوری ای کے 606 کے ذریعے دبئی سے کراچی پہنچے ہیں، سابق وفاقی وزیر کے ہمراہ ان کی اہلیہ بھی ہیں، ضمانت پر ہونے کی وجہ سے امیگریشن کلیئرنس کے بعد بابر غوری اپنے گھر چلے گئے۔ ایف آئی اے حکام کے مطابق بابرغوری کو حفاظتی ضمانت ملنے کے باعث انہیں حراست میں نہیں لیا گیا ہے، ان کے خلاف ایف آئی اے میں ٹیرر فنانسنگ اور منی لانڈرنگ کے تحت مقدمات درج ہیں جبکہ بابرغوری کے خلاف نیب میں بھی کراچی پورٹ میں غیرقانونی بھرتیوں کی تحقیقات جاری ہیں۔ سابق وفاقی وزیر بابر غوری 2015 سے بیرون ملک تھے اور وہ 7 سال بیرون ملک مقیم رہے، بابر غوری 2015 کے بعد 4 جولائی 2022 کو وطن واپس لوٹے تھے اور اس موقع پر انہیں پولیس نے کراچی ایئرپورٹ سے ہی حراست میں لے لیا تھا۔ بابرغوری کو اشتعال انگیز تقاریر میں سہولت کاری کے الزام میں گرفتار کیا گیا تھا۔

کریڈٹ: انڈیپنڈنٹ نیوز پاکستان-آئی این پی

ملک بھر میں کورونا کیسز کی شرح میں نمایاں کمی، 08 افراد کے ٹیسٹ مثبت رپورٹ ۔قومی ادارہ صحت (این آئی ایچ) کی جانب سے جاری کردہ اعداد و شمار کے مطابق 24 گھنٹوں کے دوران 2 ہزار 358 کورونا ٹیسٹ کئے گئے جن میں سے 08 افراد کے کورونا ٹیسٹ مثبت آئے ہیں۔ اس طرح 24 گھنٹوں میں کئے گئے مثبت کورونا ٹیسٹ کی شرح 0.34 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 12 مریضوں کی حالت نازک ہے۔

کریڈٹ: انڈیپنڈنٹ نیوز پاکستان-آئی این پی

کمانڈر کینیا نیوی میجر جنرل جیمسن لانگریو متائی نے نیول ہیڈ کوارٹرز اسلام آباد کا دورہ کیا۔ ترجمان پاک بحریہ کے مطابق نیول ہیڈکوارٹرز آمد پر پاک بحریہ کے سربراہ ایڈمرل محمد امجد خان نیازی نے معزز مہمان کا استقبال کیا، پاک بحریہ کے چاقو چوبند دستے نے معزز مہمان کو گارڈ آ ف آنر پیش کیا۔ دونوں ممالک کی بحری افواج کے سربراہان کے درمیان ملاقات میں باہمی دلچسپی کے امور اور دو طرفہ بحری تعاون کے فروغ پر تبادلہ خیال کیا گیا، معزز مہمان کو پاک بحریہ کی ذمہ داریوں اور استعداد کار کے حوالے سے بریفنگ دی گئی۔ ترجمان پاک بحریہ نے مزید بتایا کہ معزز مہمان نے یادگار شہدا پر پھولوں کی چادر چڑھائی، نیول ہیڈکوارٹرز کے پرنسپل سٹاف آفیسرز سے معزز مہمان کا تعارف بھی کروایا گیا۔

کریڈٹ: انڈیپنڈنٹ نیوز پاکستان-آئی این پی

آئی جی پنجاب اور آئی جی اسلام آباد نے فواد چودھری کیخلاف درج مقدمات کی تفصیلات لاہور ہائی کورٹ میں جمع کروا دیں، فواد چودھری کے خلاف ریکارڈ کے مطابق 5 مقدمات درج ہوئے ۔ رپورٹ کے مطابق پنجاب میں فواد چودھری کے خلاف 3 مقدمات اور اسلام آباد میں 2 مقدمات درج ہوئے، فواد چودھری کیخلاف 2 مقدمات خارج، 1 میں بے گناہ اور 2 مقدمات زیر التوا ہیں۔ آئی جی پنجاب کے مطابق فواد چودھری کے خلاف 2 مقدمات خارج ہو چکے ہیں، جہلم میں 13 اکتوبر 2022 کو درج ہونے والا مقدمہ خارج ہو چکا ہے، فواد چودھری کے خلاف 25 ستمبر 2022 کو فیصل آباد میں درج مقدمہ بھی خارج ہوچکا ہے۔ رپورٹ کے مطابق فواد چودھری کے خلاف 30 اپریل 2022 کو درج ہونے والے مقدمے میں بھی ان کو بے گناہ قرار دیا گیا ہے۔ آئی جی اسلام آباد نے عدالت کو بتایا کہ 22 اگست 2022 کو فواد چودھری کے خلاف تھانہ آبپارہ میں مقدمہ درج ہوا جبکہ دوسرا مقدمہ 25 جنوری 2023 کو تھانہ کوہسار میں درج ہوا۔

کریڈٹ: انڈیپنڈنٹ نیوز پاکستان-آئی این پی

چیئرمین پاکستان تحریک انصاف اور سابق وزیراعظم عمران خان کے خلاف توشہ خانہ ریفرنس میں فوجداری کارروائی کے کیس میں بڑی پیش رفت ہوئی ہے۔ اسلام آباد کی ڈسٹرکٹ اینڈ سیشن کورٹ کے ایڈیشنل سیشن جج ظفر اقبال نے عمران خان کیخلاف توشہ خانہ ریفرنس میں فوجداری کارروائی کے کیس کی سماعت کی جس میں عدالت نے عمران خان کو ذاتی حیثیت میں طلب کررکھا تھا مگر وہ پیش نہ ہوئے۔ سماعت کے آغاز پر عدالت نے پی ٹی آئی کے وکیل سید علی بخاری سے استفسار کیا کہ عمران خان کی طرف سے وکالت نامہ کدھر ہے؟۔ الیکشن کمیشن کی جانب سے وکیل سعد حسن نے کہا کہ وکالت نامہ اس وقت تک نہیں آسکتا جب تک عمران خان خود نہ آئیں۔ عمران خان کے وکیل نہ کہا کہ ہم نے گزشتہ سماعت پر عمران خان کا میڈیکل سرٹیفکیٹ پیش کیا تھا ، اس پر عدالت نے کہا کہ آج وکالت نامہ بھی جمع کرادیں۔ الیکشن کمیش کے وکیل نے کہا کہ جب تک مچلکے نہیں آ جاتے تب تک یہ وکالت نامہ نہیں دے سکتے۔ اس دوران الیکشن کمیشن اور پی ٹی آئی کے وکلا کے درمیان تلخ کلامی بھی ہوئی، علی بخاری نے الیکشن کمیشن کے وکیل کو تنبیہ کرتے ہوئے کہا کہ آپ مجھے ڈائریکٹ نا کریں، کورٹ سے بات کریں۔ دریں اثنا الیکشن کمیشن کے وکیل کی جانب سے عدالت سے عمران خان کے وارنٹ گرفتاری جاری کرنے کی استدعا کی گئی۔ بعدازاں عدالت نے چیئرمین پی ٹی آئی عمران خان پر فرد جرم عائد کرنے کا فیصلہ کیا ہے، عدالت نے عمران خان پر فرد جرم عائد کرنے کے لئے 7 فروری کی تاریخ مقرر کر دی ہے۔ عدالت نے سابق وزیراعظم عمران خان کو 20 ہزار روپے کے مچلکے جمع کرانے کا حکم دیا ہے۔ بعدازاں عمران خان کی جانب سے آئندہ سماعت پر حاضری یقینی بنانے کیلئے 20 ہزار روپے کے مچلکے جمع کرا دیئے گئے۔

کریڈٹ: انڈیپنڈنٹ نیوز پاکستان-آئی این پی