ترجمان دفترخارجہ ممتاز زہرا بلوچ نے کہا ہے کہ اسرائیلی جنگی جرائم پر انصاف کے عالمی اداروں کو متحرک ہونا ہوگا، غزہ میں اسرائیلی جارحیت جاری ہے، اسرائیلی فوج نہتے فلسطینی عوام پر مظالم ڈھا رہی ہے، ہسپتالوں پر حملے انسانی و جنگی قوانین کی سنگین خلاف ورزی ہے۔ ہمارے پاس انٹیلیجنس معلومات ہیں کہ دہشتگرد پاکستان میں غیر قانونی مقیم افراد سے رابطے میں ہیں، ہم کالعدم ٹی ٹی پی کے خلاف ٹھوس کارروائی کے خواہاں ہیں، بھارت مقبوضہ کشمیر میں زمینوں پر قبضے میں مصروف ہے، بھارت نے پلوامہ میں انسانی حقوق کے محافظین کی زمین قبضے میں لیں، پاکستان مسئلہ کشمیر کے حل کے لیے کشمیریوں کی حمایت جاری رکھے گا، پاکستان نے یوکرائن یا روس کو ہتھیار فروخت نہیں کیے، ہفتہ وار میڈیابریفنگ میں ترجمان دفترخارجہ ممتاز زہرا نے کہا کہ نگران وزیراعظم انوار الحق کاکڑ نے اسرائیلی جارحیت و بربریت کی شدید مذمت کی ہے اور فلسطین کی مکمل حمایت کا اعادہ کیا ہے،ترجمان دفتر خارجہ نے بریفنگ میں بتایا کہ نگران وزیراعظم انوار الحق کاکڑ نے او آئی سی عرب لیگ کے مشترکہ اجلاس میں 11نومبر کو ریاض میں شرکت کی، نگران وزیراعظم نے اجلاس سے خطاب میں غزہ میں جاری اسرائیلی جارحیت کی مذمت کی،انہوں نے کہا کہ پاکستان او آئی سی اور عرب لیگ کے مشترکہ سمٹ کے اعلامیہ کا خیرمقدم کرتا ہے، پاکستان اسرائیل کی غزہ میں ہسپتالوں پر حملوں کی مذمت کرتا ہے، عالمی برادری سے مطالبہ کرتے ہیں کہ غزہ میں ہسپتالوں پر اسرائیلی حملوں کا نوٹس لے، ترجمان دفتر خارجہ نے کہا کہ ہم نے انٹیلیجنس معلومات پر افغانستان کی عبوری حکومت کو دہشتگردوں کے ٹھکانوں کے خلاف کارروائی کا کہا ہے، ہم کالعدم ٹی ٹی پی کے خلاف ٹھوس کارروائی کے خواہاں ہیں، ہم چاہتے ہیں پاکستان کی سکیورٹی کیلئے خطرہ پیدا کرنے والا یہ گروپ ختم کیا جائے۔غیرقانوی تارکین وطن کے حوالے سے انہوں نے کہا کہ کابل میں طالبان کی حکومت آنے کے بعد پاکستان سے 58ہزار 368افغان شہری جا چکے ہیں،یہ افغان شہری پاکستان سے دنیا کے مختلف ممالک میں جا چکے ہیں، افغانستان میں ٹی ٹی پی کے حوالے سے کوئی براہ راست کارروائی زیر غور نہیں،

پاکستان افغانستان کے ساتھ دوطرفہ تجارت اور ٹرانزٹ ٹریڈ کی سہولت دیتا رہے گا، جعلی دستاویزات پر بنائے گئے کاروبار کو پاکستانی قوانین کے تحت نمٹا جائے گا، اس حوالے سے سیکرٹری داخلہ کی سربراہی میں ایک ٹاسک فورس قائم ہے، یہ ٹاسک فورس غیر قانونی طور پر مقیم افراد کی پراپرٹیز کا جائزہ لے رہی ہے،مسئلہ کشمیر کے حوالے سے گفتگو کرتے ہوئے ممتاز زہرا بلوچ کا کہنا تھا بھارت مقبوضہ کشمیر میں زمینوں پر قبضے میں مصروف ہے، بھارت نے پلوامہ میں انسانی حقوق کے محافظین کی زمین قبضے میں لیں، پاکستان مسئلہ کشمیر کے حل کے لیے کشمیریوں کی حمایت جاری رکھے گا۔ترجمان دفتر خارجہ نے کہا کہ افغانستان کے ساتھ بات چیت کا راستہ تاحال کھلا ہے، اس حوالے سے مسلسل افغان عبوری حکومت کے ساتھ رابطے میں ہیں، ہم تمام پڑوسی ممالک سے اچھے روابط چاہتے ہیں،163ریٹائرڈ فوجی اور سویلین افسران کو غیر ملکی کرنسی میں پنشن دینے کے معاملے پر بات کرتے ہوئے ان کا کہنا تھا کہ معلومات تک رسائی کے قانون کے تحت یہ معلومات دفتر خارجہ نے ایک درخواست گزار کو مہیا کیں،ممتاز زہرا بلوچ کا کہنا تھا کہ ہم نے پرائیویسی کو مدنظر رکھتے ہوئے غیر ملکی کرنسی میں پنشن حاصل کرنے والوں کے نام مہیا نہیں کیے، پنشن غیر ملکی کرنسی میں کیوں مل رہی ہے اس کا اس سے تعلق نہیں، اس معاملے پر اکائونٹنٹ جنرل آف پاکستان سے موقف لیا جائے۔ یوکرین کو ہتھیاروں کی فراہمی سے متعلق سوال پر ترجمان دفتر خارجہ نے ایک بار پھر واضح کیا کہ پاکستان نے یوکرائن یا روس کو ہتھیار فروخت نہیں کیے، ہم جو ہتھیار کسی کو فروخت کرتے ہیں اس کا اینڈ یوزر سرٹیفیکٹ ہوتا ہے، ہم اس پوزیشن میں بھی نہیں کہ بتا سکیں کہ اس تنازع میں کون سا فریق کیا ہتھیار استعمال کر رہا ہے،ان کا کہنا تھا پاکستان اور روس کے درمیان دہشتگردی کی روک تھام کیلئے اجلاس جاری ہے، پاکستان کی طرف سے ایڈیشنل سیکرٹری حیدر شاہ وفد کی قیادت کر رہے ہیں۔

کریڈٹ: انڈیپنڈنٹ نیوز پاکستان-آئی این پی

صدر مملکت عارف علوی نے کہا ہے کہ عمران خان اور فوج کے درمیان مصالحت میں ناکامی کی بہت سی وجوہات تھیں،امریکی نشریاتی ادارے کو دئیے گئے انٹرویو میں صدر عارف علوی نے کہا کہ وزیراعظم سے زیادہ تر سرکاری امور کے سلسلے میں ہی رابطہ ہوتا ہے۔ عمران خان وزیراعظم تھے تو ان سے بھی ذاتی معاملات پر کم بات ہوتی تھی،عارف علوی نے کہا کہ عمران خان اور فوج کے درمیان مصالحت نہ ہونے بہت سی وجوہات تھیں جن کی تفصیل میں نہیں جانا چاہتا۔ چیئرمین پی ٹی آئی کے خلاف مقدمات عدالت میں زیر سماعت ہیں اور بحیثیت صدر عدلیہ پر یقین رکھتا ہوں،صدر مملکت کا مزید کہنا تھا کہ شفاف اور قابل اعتماد الیکشن کے لیے ضروری ہے ہے کہ تمام سیاسی جماعتوں کو لیول پلئنگ فیلڈ ملے۔ نوازشریف یا جو بھی منتخب ہو کر آئے گا عہدے کے تقاضے کے مطابق اس سے حلف لینے کی ذمہ داری پوری کروں گا،الیکشن سے قبل کنگز پارٹی سے متعلق باتوں پر صدر علوی نے کہا کہ اس بارے میں بات نہیں کروں گا کیونکہ اس سے صدر کا منصب متنازع ہوجائے گا۔تشدد کی سیاست پر یقین نہیں رکھتا۔ نو مئی کے واقعات کی مذمت کی ہے تاہم حکومتوں کو بھی سوچنا چاہیے کہ ایسے حالات پیدا نہ ہوں کہ احتجاج پر تشدد ہوجائے،صدر عارف علوی نے کہا کہ افغان مہاجرین کی واپسی کے فیصلے پر دنیا اور افغان حکومت سے بات چیت کے نیتیجے میں نظر ثانی ہوسکتی ہے تاہم یہ فیصلہ وہ فورم ہی کرے گا جہاں اس کا فیصلہ ہوا تھا۔

کریڈٹ: انڈیپنڈنٹ نیوز پاکستان-آئی این پی

سینیٹ کا اہم اجلاس آج ہوگا ، چیئرمین سینیٹ صادق سنجرانی اجلاس کی صدارت کریں گے ، اجلاس دن 11بجے شروع ہوگا ، اجلاس میں قانون بازی سمیت دیگر امور پر زیر غور آئیں گے ۔

کریڈٹ: انڈیپنڈنٹ نیوز پاکستان-آئی این پی

مسلم لیگ ن کے سینئر رہنما و سابق وفاقی وزیر میاں جاوید لطیف نے الیکشن سے قبل فیض آباد دھرنا کیس کی رپورٹ پبلک کرنے کا مطالبہ کر دیا،ماڈل ٹائون میں پریس کانفرنس کرتے ہوئے لیگی رہنما جاوید لطیف کا کہنا تھا کہ آج فیض آباد دھرنے پر کمیشن بنا ہے، جتنا اختیار اسے دیا گیا ہے میری گزارش ہے کمیشن کو پابند کیا جائے کہ وہ ٹائم فریم سے آگے نہ جائے تاکہ انتخابات صاف شفاف ہوسکیں، انتخابات سے پہلے پہلے کمیشن کی رپورٹ پبلک ہوجانی چاہیے،انہوں نے کہا کہ آج بھی چیئرمین پی ٹی آئی وکٹ کے دونوں جانب کھیل رہے ہیں، جہاں 6،6گھنٹے بغیر گرفتاری کے ہمیں کھڑا کیا جاتا تھا وہاں ان کو کھڑا کریں، ان لوگوں نے پاکستان کا پیسہ لوٹ کر باہر شفٹ کیا، ان لوگوں نے پاکستان کو کیسے لوٹا،اس پر بات کرنے کو کوئی تیار نہیں،لیگی رہنما کا کہنا تھا کہ پی ٹی آئی کو 2018کی طرح لیول پلیئنگ فیلڈ چاہئے، جس طرح ہمارے خلاف کیسز چلے کیا ان کے خلاف بھی چل رہے ہیں؟ کیا چیئرمین پی ٹی آئی نے صرف 190ملین پائونڈ کی کرپشن کی، البتہ ملک میں کوئی شخص ریاست سے بالاتر نہیں ہونا چاہئے،سابق وزیر نے مزید کہا کہ گزشتہ 4سال لوگوں کی ذہن سازی کی گئی تھی، لوگ پاکستان کے مفادات میں اپنا ووٹ ڈالیں، کسی کے بہکاوے میں نہ آئیں۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائی کورٹ نے پنجاب اور خیبرپختونخوا کے مختلف علاقوں میں درج مقدمات میں مسلم لیگ ن کی رہنما مریم اورنگزیب اور جاوید لطیف کی گرفتاری روکنے کے حکم میں توسیع کر دی،اسلام آباد ہائی کورٹ کے جسٹس طارق محمود جہانگیری نے سابق وزیر مریم اورنگزیب اور جاوید لطیف کے خلاف مختلف شہروں میں درج مقدمات کی درخواستوں پر سماعت کی،پشاور میں مریم اورنگزیب اور پی ٹی وی ملازمین کے خلاف درج مقدمے کے مدعی نے عدالت میں پیش ہو کر مزید کوئی کارروائی نہ کرنے کا بیان دے دیا،دوران سماعت تفتیشی افسر نے کہا کہ جاوید لطیف کے خلاف تھانہ گرین ٹائون لاہور کے مقدمے میں چالان جمع کرایا جا چکا ہے،دوران سماعت پراسیکیوٹر کا کہنا تھا کہ پشاور میں مریم اورنگزیب کے خلاف درج مقدمہ ایف آئی اے کو منتقل ہو چکا ہے جس پر ایف آئی اے حکام نے کہا کہ ایف آئی اے کی جانب سے متعلقہ مقدمے کی انکوائری کو بند کر دیا گیا ہے،بعدازاں اسلام آباد ہائی کورٹ نے درخواستوں پر سماعت جنوری 2024 تک ملتوی کر دی۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ نے سابق وزیراعلی پنجاب چودھری پرویز الہی کی سنگل بنچ کے فیصلے کیخلاف انٹرا کورٹ اپیل پر سماعت 23نومبر تک ملتوی کردی،لاہور ہائیکورٹ میں پرویز الہی کو مجسٹریٹ کی جانب مقدمے سے ڈسچارج کرنے کا فیصلہ معطل کرنے کیخلاف انٹرا کورٹ اپیل پر سماعت ہوئی، جسٹس شہرام سرور چودھری کی سربراہی میں دو رکنی بنچ نے کیس کی سماعت کی، پرویز الہی کی طرف سے آفتاب باجوہ ایڈووکیٹ عدالت پیش ہوئے،دوران سماعت وکیل پرویز الہی نے موقف اختیار کیا کہ مجسٹریٹ نے ریکارڈ دیکھ کر ہی سابق وزیراعلی کو مقدمے سے ڈسچارج کیا، جس پر عدالت نے ریمارکس میں کہا کہ آپ کے کیس میں نظر ثانی کی درخواست مسترد ہو چکی ہے، مناسب تھا آپ نظر ثانی کے فیصلہ کے خلاف سپریم کورٹ جاتے،عدالت میں ایڈووکیٹ جنرل پنجاب نے اپیل کے قابل سماعت نہ ہونے پر دلائل دیتے ہوئے کہا کہ انٹر کورٹ اپیل قابل سماعت نہیں ہے جس پر جسٹس شہرام نے ریمارکس دیئے کہ آپ یہ بات نہ کریں ،آپ کا سنگل بنچ سے رجوع کرنا کیا درست تھا؟ بادی النظر میں سرکار نے بھی قانون کو بائی پاس کرکے سنگل بنچ سے رجوع کیا،ایڈووکیٹ جنرل پنجاب نے اپیل کے قابل سماعت ہونے پر تیاری کے لیے مہلت طلب کی، عدالت نے سرکاری وکیل کی استدعا منظور کرتے ہوئے کیس کی مزید سماعت 23نومبر تک ملتوی کر دی۔

کریڈٹ: انڈیپنڈنٹ نیوز پاکستان-آئی این پی

ملک میں تیل اور گیس کی غیر ملکی سرمایہ کاری کے حوالے سے اہم ڈیولپمنٹ ہوئی ہے،ماڑی پیٹرولیم اور کویت فارن پیٹرولیم ایکسپلوریشن کمپنی کے درمیان ایم او یو طے پا گیا،ماڑی پیٹرولیم کے اعلامیے کے مطابق کویت فارن پیٹرولیم ایکسپلوریشن کمپنی پاکستان میں سرمایہ کاری کرے گی اور دونوں کمپنیاں پاکستان سمیت دنیا بھر میں منتخب کردہ بلاکس میں مل کر کام کریں گی،اعلامیے میں بتایا گیا ہے کہ دونوں کمپنیاں منتخب ممالک میں تیل و گیس کی تلاش کے لیے مشترکہ اسٹڈیز کرائیں گی،اعلامیے میں کہا گیا ہے کہ دونوں کمپنیوں کے درمیان اسٹریٹجک تعلقات تیکنیکی صلاحیتوں اور انفارمیشن شیئرنگ کو بہتر بنانے پر بھی اتفاق ہوا ہے۔

کریڈٹ: انڈیپنڈنٹ نیوز پاکستان-آئی این پی

جوڈیشل مجسٹریٹ صوابی نے سابق اسپیکر قومی اسمبلی اسد قیصر کو گجوخان میڈیکل کالج کے لیے طبی آلات کی خریداری میں کرپشن کے الزام میں جوڈیشل ریمانڈ پر جیل بھیج دیا،اسد قیصر کو 2روزہ جسمانی ریمانڈ کے بعد جوڈیشل مجسٹریٹ محمد خلیل خان کی عدالت میں پیش کیا گیا،جوڈیشل مجسٹریٹ کی عدالت نے اسد قیصر کو جوڈیشل ریمانڈ پر جیل بھیج دیا،یاد رہے کہ اسد قیصر کو 2 روزہ جسمانی ریمانڈ پر اینٹی کرپشن کے حوالے کیا گیا تھا،اسد قیصر پر گجو خان میڈیکل کالج صوابی کے لیے طبی آلات کی خریداری میں کرپشن کا الزام ہے۔

کریڈٹ: انڈیپنڈنٹ نیوز پاکستان-آئی این پی

وفاقی تحقیقاتی ایجنسی (ایف آئی اے )نے ملتان ائیر پورٹ پر کارروائی کے دوران خواتین کی بیرون ملک اسمگلنگ کی کوشش ناکام بنا دی،حکام کے مطابق ایف آئی اے ملتان زون کی ٹیم نے ایئرپورٹ پر کامیاب کارروائی کرتے ہوئے 4خواتین کو بیرون ملک اسمگل کرنے کی کوشش کو ناکام بنا دیا ہے،حکام نے بتایا کہ چاروں خواتین کو بیرون ملک استحصال کے لئے جایا رہا تھا اور انہیں ایئرپورٹ سے آف لوڈ کردیا گیا ہے،حکام نے مزید بتایا کہ خواتین مسافروں کے پاس کسی قسم کی ہوٹل کی بکنگ نہیں تھی جبکہ ان کے ویزوں اور ٹکٹس کا بندوبست ایجنٹ نے کیا تھا۔

کریڈٹ: انڈیپنڈنٹ نیوز پاکستان-آئی این پی

چیئرمین پی ٹی آئی کی اہلیہ بشری بی بی نے چیف جسٹس اسلام آباد ہائی کورٹ پر عدم اعتماد کا اظہار کرتے ہوئے درخواست کسی دوسرے بینچ کو منتقل کرنے کی استدعا کردی،سابق خاتون اول کی جانب سے وکیل انتظار پنجوتھہ نے عدالت سے استدعا کی کہ چیئرمین پی ٹی آئی سے تنہائی میں ملاقات کی درخواست کسی اور بینچ کے روبرو مقرر کردی جائے۔ وکیل نے کہا کہ ہمارے جتنے بھی کیسز آپ کے روبرو مقرر ہوئے، ان میں ایک ہی طرح کے فیصلے آرہے ہیں ۔ ہمارے اس بینچ میں جتنے بھی مقدمات ہیں، انہیں کسی اور بینچ کو منتقل کردیا جائے،چیف جسٹس اسلام آباد ہائی کورٹ جسٹس عامر فاروق نے ریمارکس دیے کہ آپ بالکل نامناسب بات کررہے ہیں ۔ ایسے نہ کریں۔ چلیں پھر اس کو دیکھ لیتے ہیں ۔ ایسا نہیں ہے، جو فیصلے بھی ہیں وہ آپ چیلنج کو سکتے ہیں، کیے بھی ہوئے ہیں۔ عدالت کے سامنے بینچ پر اعتراض کی کوئی وجہ نہیں بتائی گئی ،عدالت نے بشری بی بی کی استدعا پر سپریم کورٹ بار ایسوسی ایشن، اسلام آباد ہائی کورٹ بار، پاکستان بار کونسل، اسلام آباد بار کونسل کو نوٹس جاری کردیے۔ بعد ازاں عدالت نے کیس کی سماعت غیر معینہ مدت کے لیے ملتوی کردی۔

کریڈٹ: انڈیپنڈنٹ نیوز پاکستان-آئی این پی

پاکستان مسلم لیگ ن کے مرکزی رہنما اور سابق وفاقی وزیر داخلہ رانا ثنا اللہ نے کہا ہے کہ الیکشن میں کامیابی کیلئے حکمت عملی کے تحت آگے چل رہے ہیں،ایم کیو ایم اور جی ڈی اے سے سیٹ ایڈجسٹمنٹ ہو گی،الیکشن میں کامیاب ہونے کیلئے ممکن اور ضرورت کو مدنظر رکھا جاتا ہے، الیکشن میں کامیابی کیلئے ایڈجسٹمنٹ اور حمایت کیلئے کوشش کی جاتی ہے، سندھ اور کراچی میں جے ڈی اے اور ایم کیو ایم کے ساتھ بات ہو رہی ہے، خیبر پختونخوا میں جے یو آئی اور دوسروں سے بات فائنل سٹیج پر نہیں، سمجھتے ہیں خیبر پختونخوا میں بھی سیٹ ایڈجسٹمنٹ ضروری ہو گی۔اپنے بیان میںصدر مسلم لیگ ن پنجاب رانا ثنا اللہ نے کہا کہ پنجاب میں ہمیں سیٹ ایڈجسٹمنٹ کی ضرورت تو نہیں، اگر کہیں ضرورت ہوئی تو اس پر سوچا جاسکتا ہے، مسلم لیگ ق بھی اس بات کی خواہشمند ہے، ہمارا بھی ادارہ ہے اگر انہیں کسی سیٹ پر ایڈجسٹ کرنے میں آسانی ہو تو ہم کرسکتے ہیں،ان کا کہنا تھا کہ نوازشریف کو سپریم کورٹ کے ایک فیصلے کی بنیاد پر کہا جارہا ہے کہ وہ تاحیات نااہل ہیں، نواز شریف کے فیصلے پر قانون اس وقت موجود ہے، قانون کی روح سے آئین کی تشریح یا وضاحت کردی گئی ہے جہاں مدت کا تعین نہیں وہاں نا اہلی زیادہ سے زیادہ 5سال ہو گی، پانچ سال کا عرصہ گزر گیا ہے۔لیگی رہنما نے کہا کہ پارلیمنٹ نے قانون پاس کر لیا ہے، نواز شریف کی نااہلی ختم ہوچکی ہے، اس قانون کو پارلیمنٹ سے پاس ہوئے 5ماہ ہو گئے ہیں، کسی نے چیلنج نہیں کیا، نوازشریف کی نااہلی ختم ہوچکی ہے، ابھی ان کی کچھ اپیلیں زیر سماعت ہیں، وہ کیسز ایسے ہیں کہ نواز شریف کے باعزت بری ہونے کے بہت زیادہ امکانات ہیں، رانا ثنا للہ نے کہا کہ سندھ میں گرینڈ ڈیموکریٹک الائنس (جی ڈی اے)اور متحدہ قومی موومنٹ (ایم کیو ایم)پاکستان سے بات ہو رہی ہے، ایم کیو ایم اور جی ڈی اے سے سیٹ ایڈجسٹمنٹ ہو گی۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائیکورٹ نے سربراہ عوامی مسلم لیگ اور سابق وفاقی وزیر شیخ رشید احمد کی گرفتاری روکنے کے حکم میں جنوری تک توسیع کر دی،اسلام آباد ہائیکورٹ کے جسٹس طارق محمود جہانگیری نے سابق وزیر شیخ رشید کی سندھ کے تھانہ موچکو اور لسبیلہ میں درج مقدمات کیخلاف درخواست پر سماعت کی، عدالت نے ایس ایس پی انویسٹی گیشن کیماڑی کو نوٹس جاری کر کے آئندہ سماعت پر ذاتی حیثیت میں طلب کر لیا،سماعت کے دوران عدالت نے کہا کہ ایس ایس پی کیماڑی بتائیں کہ عدالتی حکم کے باوجود مقدمے کے آپریشنز کیسے جاری رکھے گئے،عدالت کی جانب سے لسبیلہ مقدمے کے مدعی کے ناقابل ضمانت وارنٹ گرفتاری بھی جاری کر دیئے گئے،تفتیشی افسر نے عدالت کو بتایا کہ لسبیلہ میں درج مقدمے کے اخراج کیلئے رپورٹ بھجوا دی ہے اور محکمے کو مراسلہ بھی بھجوا دیا ہے،سماعت کے دوران جسٹس طارق محمود جہانگیری نے ریمارکس دیئے کہ شیخ صاحب چلے سے بھی جان نہیں چھوٹی آپ کی ، سندھ میں بھی آپ پر 7اے ٹی اے لگ گئی ہے سندھ پولیس کے تفتیشی افسر نے عدالت کو بتایا کہ ہماری تفتیش مکمل ہوگئی ہے بس چالان جمع کرانا ہے، سابق تفتیشی افسر نے تفتیش مکمل کی اور 7اے ٹی اے کا اضافہ بھی کیا ، اندارج کے وقت شاید کوئی سیاسی معاملہ تھا ، میرے حساب سے تو یہ ایف آئی آر ہی نہیں بنتی اور اگر میرے پاس یہ کیس ہوتا تو ایف آئی آر خارج ہو چکی ہوتی،انہوں نے بتایا کہ میرا اب تبادلہ ہوچکا ہے، آئندہ سماعت پر شاید کوئی اور افسر پیش ہو،اس موقع پر اسسٹنٹ اٹارنی جنرل نے استدعا کی کہ پولیس افسر کا بیان نہ لکھیں یہ تو ویسے ہی ایمانداری سے یہ بات بتا رہے ہیں جس پر جسٹس طارق محمود جہانگیری نے ریمارکس دیئے کہ آپ کا بیان ہم کارروائی کا حصہ نہیں بنا رہے ، یہ نہ ہو آپ کی نوکری چلی جائے،بعدازاں اسلام آباد ہائی کورٹ کی جانب سے کیس کی مزید سماعت جنوری تک ملتوی کردی گئی۔

کریڈٹ: انڈیپنڈنٹ نیوز پاکستان-آئی این پی

پاکستان نے افغانستان کے ساتھ بین الاقوامی سرحد پر ایک دستاویزاتی نظام رائج کر دیا ہے ، افغانستان کے شہریوں کو بھی اب بارڈر پار کرنے کے لئے پاسپورٹ دکھانا ہو گا،نگران صوبائی وزیر اطلاعات جان اچکزئی نے کہا ہے کہ بارڈر پر پاسپورٹ پر کامیابی سے عمل درآمد شروع کر دیا گیا ہے، چمن پاسپورٹ آفس میں تقریبا 1000ٹوکن جاری کیے گئے اور 200پاسپورٹ ڈیلیور کیے گئے ہیں۔جان اچکزئی نے کہا کہ قلعہ عبداللہ پاسپورٹ آفس بھی مکمل طور پر فعال ہے، ریاست پاکستان نے تمام پریشر کے باوجود ایک دستاویزاتی نظام پر عملدرآمد یقینی بنایا، ایک دستاویزاتی نظام پر عملدرآمد کا کریڈٹ وزیراعظم پاکستان، آرمی چیف اور وزیر اعلی بلوچستان کو جاتا ہے جنہوں نے اس کو یقینی بنایا،انہوں نے کہا کہ غیر قانونی تارکین وطن کو ایک بار بارڈر پار کرنے کی اجازت دی گئی ہے تاکہ وہ اپنے وطن واپس پہنچ سکیں، آئندہ بارڈر کراسنگ پاسپورٹ کی موجودگی سے مشروط ہو گی،ان کا کہنا تھا کہ افغانستان کے شہریوں کو بھی اب بارڈر پار کرنے کے لئے پاسپورٹ دکھانا ہو گا، ایک دستاویزاتی نظام سے بارڈر پر آمدورفت قانونی طریقے سے ممکن ہو گی۔

کریڈٹ: انڈیپنڈنٹ نیوز پاکستان-آئی این پی

و فاقی کابینہ نے بجلی کمپنیوں کے افسران کیلئے مفت بجلی ختم کرکے رقم دینے کی اسکیم کی منظوری دیدی،ذرائع کے مطابق کابینہ نے انڈسٹریل سیکٹر کو موسم سر ما کے چار ماہ کیلئے بجلی کا رعایتی ٹیرف دینے کی تجویز مسترد کردی،ذرائع کے مطابق یہ سمری منظوری کیلئے بدھ کو وفاقی کابینہ کے اجلاس میں پیش کی گئی جو نگران وزیراعظم انوار الحق کا کڑ کی زیر صدارت ہوا،مونا ٹائزیشن پالیسی کے مطابق بجلی کی تقسیم کار کمپنیوں اور پیداواری کمپنیوں کے گریڈ 17اور اس سے اوپر کے افسران کو مفت یونٹس کی بجائے رقم دینے کا فیصلہ کیا گیا ہے، تقسیم کار کمپنیوں کے گریڈ 17کے افسر کو 450ماہانہ مفت یونٹس کی بجائے 15ہزار 858روپے،گریڈ 18کے افسر کو ماہانہ600مفت یونٹس کی بجائے ہزار 996روپے، گریڈ 19کے افسر کو ماہانہ880مفت یونٹس کی بجائے37ہزار 594روپے،گریڈ20کے افسرکو 1100یونٹس کی بجائے 46 ہزار992روپے اور ڈسکوز کے گریڈ21کے افسر کو 1300مفت یونٹس کی بجائے ماہانہ55ہزار536روپے ملیں گے،بجلی کی پیداواری کمپنیوں کے گریڈ 17کے افسر کو ماہانہ 650یونٹس کی بجائے 24ہزار 570روپے اور گریڈ 18کے افسر کو ماہانہ 700یونٹس کی بجائے 26ہزار 460روپے ملیں گے،جینکوز کے گریڈ 19کے افسر کو ماہانہ ایک ہزار مفت یونٹس کی بجائے 42ہزار720روپے، گریڈ 20کے افسر کو ماہانہ 1100یونٹس کی بجائے 46ہزار 992 روپے اور گریڈ 21کے افسر کو 1300یونٹس ماہانہ کی بجائے 55ہزار 536روپے دیے جائینگے۔،اس سکیم کی منظو ری قبل ازیں کابینہ کی توانائی کمیٹی نے دی تھی جس کی توثیق وفاقی کا بینہ نے کی ہے اور اس سکیم کا اطلاق فوری طور پر ہوگا۔

کریڈٹ: انڈیپنڈنٹ نیوز پاکستان-آئی این پی

امریکی سفیر ڈونلڈ بلوم نے قونصل جنرل کرسٹن ہاکنز کے ساتھ ملتان میں دربارِ حضرت شمس تبریز اور بہائو الدین زکریا یونیورسٹی کا دورہ کیا، اس موقع پر ڈونلڈ بلوم کو دربارِ حضرت شاہ شمس تبریز پر جاری ترقیاتی کام پر بریفنگ دی گئی،ڈونلڈ بلوم نے قونصل جنرل کرسٹن ہاکنز کے ہمراہ وائس چانسلر زکریا یونیورسٹی سے ملاقات کی،امریکی سفیر نے سینٹرل لائبریری میں قائم لنکن کارنر میں طلبا و طالبات سے ملاقات کی،ڈونلڈ بلوم نے لنکن کارنر میں موجود طلبا و طالبات سے گفتگو کرتے ہوئے کہا کہ یہ میرا جنوبی پنجاب کا پہلا دورہ ہے، امریکا پاکستان کے ساتھ تعلیم کے شعبے میں تعاون جاری رکھے ہوئے ہیں، لنکن کارنر منصوبہ بھی تعلیمی شعبے میں فروغ کا مظہر ہے،اس موقع پر گفتگو کرتے ہوئے کرسٹن ہاکنز نے کہا کہ مجھے امریکی قونصل جنرل لاہور تعینات ہوئے ڈھائی ماہ ہوا ہے، جنوبی پنجاب میں ملتان تاریخی اہمیت کا حامل ہے،انہوں نے کہا کہ امریکی قونصل جنرل لاہور جنوبی پنجاب میں کلچر اور تعلیم و تجارت میں فروغ کے لیے کوشاں ہیں۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائی کورٹ کے چیف جسٹس عامر فاروق نے بغیر گائون پہنے پیش ہونے پر وکیل پر برہمی کا اظہار کیا ہے،چیف جسٹس اسلام آباد ہائی کورٹ نے وکیل سے سوال کیا کہ آپ یونیفارم میں کیوں نہیں، کیا آپ ہائی کورٹ کے وکیل ہیں، آپ کا گائون کہاں ہے، کیا آپ نے ہائی کورٹ کا نوٹیفکیشن نہیں پڑھا؟وکیل نے جواب دیا کہ میں معذرت خواہ ہوں، ایمرجنسی ہو گئی تھی، گائون نہیں پہن سکا۔،چیف جسٹس نے کہا کہ ایمرجنسی ہو گئی ہے؟ کیا ایمبولینس منگوائیں، یہ کیا طریقہ ہے، کل کو میں اگر ٹی شرٹ اور جینز پہن کر یہاں بیٹھ جائوں تو کیسا لگے گا؟انہوں نے کہا کہ گزشتہ روز بھی بتایا تھا کہ گائون لازمی پہننے کا ایک نوٹیفکیشن جاری ہو چکا ہے، تمام وکلا گائون پہن کر ہائی کورٹ میں پیش ہوں۔

کریڈٹ: انڈیپنڈنٹ نیوز پاکستان-آئی این پی

نگران وزیراعلی پنجاب نے کیولری انڈر پاس اور گھوڑا چوک فلائی اوور پراجیکٹس کا دورہ کیا اور تعمیراتی کاموں کا جائزہ لیا،محسن نقوی کی کوششوں سے شہر کے دو او ر ترقیاتی منصوبے تکمیل کے قریب پہنچ گئے، کیولری گرائونڈ انڈرپاس 25نومبر اور گھوڑا چوک فلائی اوور 7دسمبر کو مکمل ہوگا،وزیراعلی پنجاب محسن نقوی نے صوبائی وزرا عامر میر، بلال افضل اور ابراہیم حسن مراد کے ہمراہ علی الصبح کیولری انڈر پاس اور گھوڑا چوک فلائی اوور پراجیکٹس کا دورہ کیا، انسپکٹر جنرل پولیس ڈاکٹر عثمان انور بھی ان کے ہمراہ تھے،محسن نقوی نے گھوڑا چوک سے کیولری گرائونڈ تک سوا کلو میٹر پیدل چل کر دونوں پراجیکٹس کے تعمیراتی کاموں کا جائزہ لیا، وزیراعلی نے بھاری گرڈر انڈرپاس کی چھت پر رکھنے کے عمل کا مشاہدہ کیا اور دونوں پراجیکٹس کے تعمیراتی کاموں کا معائنہ کیا،کمشنر لاہورڈویژن و ڈی جی ایل ڈی اے محمد علی رندھاوا، چیف انجینئر ایل ڈی اے اور کنٹریکٹر نے کیولری انڈر پاس پراجیکٹ کے بارے میں بریفنگ دی، سینٹرل بزنس ڈسٹرکٹ اتھارٹی کے چیف ایگزیکٹو آفیسر عمران امین نے گھوڑا چوک فلائی اوور منصوبے کی پیش رفت سے آگاہ کیا،بریفنگ میں وزیراعلی کو بتایا گیا کہ گھوڑا چوک فلائی اوور کی شٹرنگ، سٹیل فکسنگ کے ساتھ 75فیصد کام مکمل کر لیا گیا ہے جبکہ کیولری انڈر پاس میں اسفالٹ کا کام شروع کیا گیا ہے، گھوڑا چوک فلائی اوور تین لینز پر مشتمل ہے، منصوبے کی تمام پائلز، پائل کیپس، تمام پئیز مکمل ہیں،وزیراعلی محسن نقوی نے گفتگو کرتے ہوئے کہا کہ سائٹس پر باقاعدگی سے پانی کا چھڑکا کیا جائے، منصوبوں کی تکمیل سے سنٹر پوائنٹ گلبرگ سے گھوڑا چوک ڈیفنس موڑ تک سگنل فری کوریڈور مکمل ہوجائے گا، گلبرگ، کلمہ چوک، سی بی ڈی، کینٹ، کیولری گرانڈ، ڈی ایچ اے اور والٹن میں رہنے والے شہری منصوبے سے مستفید ہوں گے،سی سی پی او بلال صدیق کمیانہ، کمشنر محمد علی رندھاوا، ڈپٹی کمشنر لاہور رافعہ حیدر، چیف انجینئر ایل ڈی اے، ڈی جی پی ایچ اے، سی بی ڈی کے ایگزیکٹو ڈائریکٹر ٹیکنیکل، ڈائریکٹر پراجیکٹ مینجمنٹ، ڈائریکٹر کنسٹرکشن، ٹیکنیکل ٹیم اور کنٹریکٹر بھی اس موقع پر موجود تھے۔

کریڈٹ: انڈیپنڈنٹ نیوز پاکستان-آئی این پی

سان فرانسسکو (شِنہوا) ایپیک وزارتی اجلاس 2023 کا آغاز ہوگیا جس میں لچکدار اور پائیدار مستقبل کے قیام پر توجہ مرکوز کی گئی ہے۔

امریکی وزیرخارجہ انتھونی بلنکن کے مطابق باہمی رابطے، اختراع ، جامع پن مضبوط بنانا اور لوگوں کی ناقابل استعمال صلاحیتیں سامنے لانا آمدہ دنوں میں 3 ترجیحات ہیں۔ انہوں نے امریکی تجارتی نمائندہ کیتھرین تائی کے ساتھ افتتاحی مکمل اجلاس کی مشترکہ میزبانی بھی کی ۔

بلنکن نے گزشتہ 3 دہائیوں میں زیادہ خوشحال مستقبل کی سمت پیشرفت کے باوجود متعدد معاشی مشکلات کا ذکر کیا۔

تائی نے کمزور سپلائی چین، بڑھتی عدم مساوات اور بڑھتے معاشی عدم تحفظ، بگڑتے ماحولیاتی بحران اور بڑھتے جغرافیائی سیاسی تناؤ کے خطرے پر روشنی ڈالی۔

دو روزہ وزارتی اجلاس کے بعد 15 سے 17 نومبر تک ا یپیک اقتصادی رہنماؤں کا اجلاس منعقد ہوگا۔

سان فرانسسکو (شِنہوا) ایپیک وزارتی اجلاس 2023 کا آغاز ہوگیا جس میں لچکدار اور پائیدار مستقبل کے قیام پر توجہ مرکوز کی گئی ہے۔

امریکی وزیرخارجہ انتھونی بلنکن کے مطابق باہمی رابطے، اختراع ، جامع پن مضبوط بنانا اور لوگوں کی ناقابل استعمال صلاحیتیں سامنے لانا آمدہ دنوں میں 3 ترجیحات ہیں۔ انہوں نے امریکی تجارتی نمائندہ کیتھرین تائی کے ساتھ افتتاحی مکمل اجلاس کی مشترکہ میزبانی بھی کی ۔

بلنکن نے گزشتہ 3 دہائیوں میں زیادہ خوشحال مستقبل کی سمت پیشرفت کے باوجود متعدد معاشی مشکلات کا ذکر کیا۔

تائی نے کمزور سپلائی چین، بڑھتی عدم مساوات اور بڑھتے معاشی عدم تحفظ، بگڑتے ماحولیاتی بحران اور بڑھتے جغرافیائی سیاسی تناؤ کے خطرے پر روشنی ڈالی۔

دو روزہ وزارتی اجلاس کے بعد 15 سے 17 نومبر تک ا یپیک اقتصادی رہنماؤں کا اجلاس منعقد ہوگا۔

لاطینی امریکہ کے ملک وینزویلا کے صدر نکولس مادورو نے دنیا سے اپیل کی ہے کہ غزہ پر جاری اسرائیلی حملوں کو روکا جائے،انہوں نے کہا کہ وینزویلا سعودی عرب کے دارالحکومت ریاض میں منعقدہ اسلامی تعاون تنظیم اور عرب لیگ کے مشترکہ ہنگامی اجلاس کے بعد جاری کئے گئے اعلامیے کی حمایت کرتا ہے،غزہ پر اسرائیلی حملوں کی طرف توجہ مبذول کرواتے ہوئے صدر مادورو نے کہا کہ میں پوری دنیا سے اپیل کرتا ہوں کہ احتجاجی مظاہرے جاری رکھیں، سڑکوں پر رہیں کیونکہ فلسطینیوں کے زندہ رہنے کے حق ، ان کی اپنی ریاستِ، حقِ آزادی اور فلسطینی حکومت کی خاطر ہمیں یہ جنگ جیتنا ہو گی، اس دنیا میں ہمیں اور فلسطینی عوام کو چاہنے والوں کی تعداد کہیں زیادہ ہے۔

کریڈٹ: انڈیپنڈنٹ نیوز پاکستان-آئی این پی

امریکی امور دفاع پینٹاگون نے بتایا ہے کہ 17 اکتوبر سے اب تک عراق اور شام میں ہمارے اڈوں پر 55حملے کیے گئے ہیں، ترک میڈیا کے مطابق پینٹاگون کی نائب ترجمان صابرینہ سنگھ نے اپنی یومیہ پریس کانفرنس میں اس حوالے سے بتایا کہ سترہ اکتوبر سے اب تک عراق میں ہمارے اڈوں پر 27اور شام میں 28کل 55بار حملے کیے گئِے ہیں جن میں ہمارے 59اہلکار معمو لی زخمی ہوئے تھے،ترجمان نے کہا کہ ہمارے اڈوں پر حملوں میں ایرانی نواز گروپ ملوث ہیں جنہیں جواب دینے کا امریکہ پورا اختیار رکھتا ہے ، ترجمان نے مزید کہا کہ مشرق وسطی کی موجودہ کشیدہ صورتحال کے غزہ سے باہر پھیلاو روکنے کے لیے ہماری کوششیں جاری ہیں۔

کریڈٹ: انڈیپنڈنٹ نیوز پاکستان-آئی این پی

سابق برطانوی وزیر داخلہ سویلا بریور مین نے منصب سے ہٹائے جانے کے بعد برطانوی وزیر اعظم پر الزامات کی بوچھاڑ کرتے ہوئے رشی سونک کو ناکام، نااہل اور دھوکے باز قرار دے دیا،سویلا بریورمین نے وزیراعظم رشی سونک پر ان کے منصوبوں کی ناکامی کا الزام لگاتے ہوئے کہا کہ وزیر اعظم نے کشتیوں کے ذریعے آنے والوں کو روکنے کا وعدہ کیا لیکن وعدہ پورا کرنے کے بجائے ان کے ساتھ دھوکا کیا،سابق برطانوی وزیر داخلہ نے مزید کہا کہ رشی سونک اپنے وعدے پورے کرنے کے اہل ہی نہیں یا ان کا ارادہ ہی نہیں تھا،سویلا بریورمین کا کہنا تھا کہ ضمنی انتخابات میں ہمیں مسلسل شکست ہو رہی ہے، منصوبے ناکام ہو رہے ہیں اور رشی سونک معاملات کو منظم کرنے میں ناکام رہے، اب زیادہ وقت نہیں ، ہنگامی بنیادوں پر اقدامات کرنا ہوں گے،انہوں نے کہا کہ رشی سونک سڑکوں پر بڑھتی انتہا پسندی اور یہودیوں کی مخالفت کو چیلنج کرنے میں بھی ناکام رہے،سویلا برویور مین کا کہناتھا کہ میں ہیٹ مارچوں پر پابندی لگانے، تعصب کی بڑھتی لہر کو روکنے کیلئے قانون سازی کرنے پر زور دیتی رہی،ایک برس غیرقانونی مائیگریشن ایکٹ بنانے پر ضائع کیا،انہوں نے کہا کہ مائیگریشن ایکٹ کا مقصد غیر قانونی تارکین کی آمد کو روکنا تھا، اب معاملہ وہیں پہنچ گیا ہے جہاں سے شروع کیا تھا۔

کریڈٹ: انڈیپنڈنٹ نیوز پاکستان-آئی این پی

اسرائیل نواز پالیسی پر امریکی حکومت کے 500سے زائد اہلکار صدر جو بائیڈن کے خلاف سراپا احتجاج ہیں،امریکی اہلکاروں نے غزہ میں جاری فلسطینیوں پر مظالم کے خلاف آواز نہ اٹھانے پر صدر بائیڈن کو احتجاجی خط لکھ دیا جس میں فلسطین میں فوری جنگ بندی اور اسرائیل پر زور دے کر فلسطینیوں کے لیے سامان غزہ جانے کی اجازت دلوانے کا مطالبہ کیا،صدربائیڈن کو خط لکھنے والوں میں محکمہ انصاف، ایف بی آئی، قومی سلامتی کونسل کے اہلکار شامل ہیں جب کہ خط پر دستخط کرنے والوں میں 40حکومتی اداروں کے اہلکار شامل ہیں،اہلکاروں نے مراسلے میں کہا کہ اسرائیلی یرغمالیوں اور فلسطینی قیدیوں کو رہائی دلائی جائے،اس کے علاوہ امریکی وزیرخارجہ کو بھی محکمہ خارجہ کے درجنوں اہلکاروں کی جانب سے تین احتجاجی مراسلے لکھے گئے ہیں،امریکی ایجنسی برائے بین الاقوامی ترقی کے ایک ہزار اہلکاروں نے بھی بلنکن کو مراسلہ تحریر کیا۔

کریڈٹ: انڈیپنڈنٹ نیوز پاکستان-آئی این پی

غزہ میں اسرائیلی مظالم کے خلاف امریکا کے یہودی بھی سراپا احتجاج ، امریکی شہر آکلینڈ کی سرکاری عمارت کے اندر یہودی مظاہرین نے دھرنا دے دیا،دھرنے میں شریک مظاہرین نے غزہ میں جنگ بندی کے نعرے لگائے جب کہ شکاگو میں بھی جنگ بندی کے پلے کارڈز اٹھائے یہودیوں نے مظاہرہ کیا اور اس دوران ٹرانسپورٹیشن سینٹر کے راستے بلاک کردیے،دوسری جانب پولیس نے مظاہرین کے خلاف کارروائی کی اور اس دوران 100سے زیادہ مظاہرین کو گرفتار کرلیا۔

کریڈٹ: انڈیپنڈنٹ نیوز پاکستان-آئی این پی

لاطینی امریکی ملک بلیز نے بھی اسرائیل سے سفارتی تعلقات منقطع کردیے، بلیز اسرائیل سے تعلقات ختم کرنے والا دوسرا لاطینی امریکی ملک بن گیا ہے، لاطینی ملک بلیز کی حکومت کی جانب سے بیان میں کہا گیا ہے کہ اسرائیل نے 7اکتوبر کے بعد سے مستقل عالمی قوانین کی خلاف ورزی کی ہے،اس کے علاوہ بولیویا نے یکم نومبر کو اسرائیل سے سفارتی تعلقات منقطع کردیے تھے جب کہ کولمبیا، چلی اور ہونڈوراس اسرائیل سے اپنے سفیر واپس بلا چکے ہیں۔

کریڈٹ: انڈیپنڈنٹ نیوز پاکستان-آئی این پی

امریکی جریدے بلوم برگ نے اپنی رپورٹ میں انکشاف کیا ہے کہ امریکا خاموشی سے اسرائیل کو ہتھیاروں کی منتقلی بڑھا رہا ہے، بلوم برگ کی رپورٹ میں بتایا گیا ہے کہ پینٹاگون کو دی گئی درخواست میں اپاچی گن شپ بیڑے کے لیے مزید لیزر گائیڈڈ میزائل شامل ہیں،رپورٹ کے مطابق 155ایم ایم گولے، نائٹ ویژن ڈیوائسز، بنکربسٹر گولہ بارود اور فوجی گاڑیاں بھی درخواست میں شامل ہیں،اس کے علاوہ امریکی محکمہ دفاع امریکا اور یورپ کے ذخائر سے ان ہتھیاروں کو دستیاب کرانے کے لیے کام کررہا ہے،رپورٹ کے مطابق امریکا اسرائیل کو ہر سال 3.8ارب ڈالر کی فوجی امداد فراہم کرتا ہے۔

کریڈٹ: انڈیپنڈنٹ نیوز پاکستان-آئی این پی

امریکی سپریم کورٹ نے اپنے 9ججوں کے اخلاقی رویے کے حوالے سے اپنے پہلے ضابطہ اخلاق کا اعلان کر دیا ہے۔غیر ملکی میڈیا کے مطابق 9صفحات پر مشتمل ضابطے میں طے پایا ہے کہ تمام ججز کو اپنے نجی تعلقات کو اپنے سرکاری طرز عمل یا فیصلے پر اثر انداز نہیں ہونے دینا چاہیے،نئے ضابطہ اخلاق میں فنڈریزنگ میں ججز کی شرکت پر پابندیوں اور تحائف قبول کرنے کی حدود کا بھی اعادہ کیا گیا، ججوں کو کسی بھی حد تک عدالتی وسائل یا عملے کو غیر سرکاری سرگرمیوں کیلئے استعمال نہ کرنے کا پابند کیا گیا ہے۔

کریڈٹ: انڈیپنڈنٹ نیوز پاکستان-آئی این پی

اسرائیل کی فوج نے حماس کی قید میں موجود اپنی ہی خاتون فوجی نوا مارسیانو کی ہلاکت کی تصدیق کر دی،غیر ملکیمیڈیاکے مطابق اسرائیلی ڈیفنس فورسز نے حماس کی قید میں 19سالہ خاتون فوجی کارپورل نوا مارسیانو کی موت کی تصدیق کرتے ہوئے ان کے اہل خانہ کو اطلاع کر دی، حماس ملٹری ونگ القسام بریگیڈز کے ترجمان نے خاتون فوجی کے اسرائیلی حملے میں ہلاک ہونے کا اعلان کیا تھا، فوجی نوا مارسیانو کو 7 اکتوبر کو یرغمال بنایا گیا تھا،حماس کے عسکری ونگ نے دعوی کیا تھا کہ خاتون فوجی نوا مارسیانو 9نومبر کو اسرائیلی فضائی حملے میں ہلاک ہوئیں تاہم اس کی آزادانہ طور پر تصدیق نہیں ہو سکی، نوا مارسیانو ان تقریبا 240یرغمالیوں میں سے ایک تھیں جنہیں حماس نے گزشتہ ماہ حملے کے دوران یرغمال بنایا تھا۔

کریڈٹ: انڈیپنڈنٹ نیوز پاکستان-آئی این پی

برلن (شِنہوا) اقوام متحدہ کے کنونشن ٹو کامبیٹ ڈیزرٹیفیکیشن (یو این سی سی ڈی) کے مطابق دنیا بھر میں کچھ مقامات پر ریت اور مٹی کے طوفان "ڈرامائی طور پر" زیادہ آرہے ہیں، جن میں کم از کم ایک چوتھائی طوفانوں کا سبب  انسان  خود ہیں۔

یو این سی سی ڈی کے ایگزیکٹو سیکرٹری ابراہیم تھیو نے کہا کہ ریت اور دھول کے گہرے بادلوں کو اپنے راستے میں آںے والی ہر چیز کو لپیٹنے اور دن کو رات میں تبدیل کرنے کا نظارہ فطرت کے سب سے خوفناک تماشوں میں سے ایک ہے۔ یہ نقصان دہ واقعات ہیں جو شمالی اور وسطی ایشیا سے سب صحارا افریقہ تک ہر جگہ تباہی مچا دیتے ہیں۔

تھیو  نے کہا کہ پائیدار ترقی کے حصول کے لیے ریت اوردھول کے طوفان ایک زبردست چیلنج ہیں۔ تاہم، جس طرح ریت اور مٹی کے طوفانوں میں انسانی سرگرمیوں سے اضافہ ہوا ہے اسی طرح ان کو انسانی اعمال کے ذریعے بھی کم کیا جا سکتا ہے۔

یو این سی سی ڈی کے ماہرین کے مطابق، اگرچہ ریت اور مٹی کے طوفان کچھ خطوں میں ایک عام اور موسمی قدرتی رجحان ہیں، لیکن یہ مسئلہ زمین اور پانی کے ناقص انتظام، خشک سالی اور موسمیاتی تبدیلیوں کی وجہ سے بڑھ گیا ہے۔

بیجنگ (شِنہوا) چین کے جنرل پبلک بجٹ کی آمدنی 2023 کے پہلے 10 ماہ میں گزشتہ سال کے مقابلے میں  8.1 فیصد بڑھ کر187کھرب 50ارب یوآن (تقریباً 26کھرب 10ارب  ڈالر) ہو گئی۔وزارت خزانہ کی جانب سے بدھ کو جاری اعدادوشمار کے مطابق، مرکزی حکومت نے85کھرب90ارب یوآن ریونیو اکٹھا کیا، جو گزشتہ سال سے 7.3 فیصد زیادہ ہے جبکہ  مقامی حکومتوں کی آمدنی  8.8 فیصد اضافے سے 101کھرب 60ارب یوآن ہوگئی۔ پہلے 10 ماہ میں ٹیکسوں کی مد میں157کھرب80ارب  یوآن کا ریونیو اکٹھا ہوا، جو گزشتہ سال سے 10.7 فیصد زیادہ ہے۔  اعداد و شمار کے مطابق  پہلے 10 ماہ عمومی سرکاری بجٹ کے اخراجات 4.6 فیصد سالانہ اضافے سے 215کھرب 70ارب یوآن ہو گئے۔  عام عوامی بجٹ کی آمدنی سے مراد سماجی مصنوعات کی تقسیم میں شرکت کے ذریعے حکومتی مالیات کے لیے آمدنی ہوتی ہے۔ یہ حکومتی کام کو یقینی بنانے کی مالی ضمانت ہے۔ 

نئی دہلی(شِنہوا) بھارت کے زیر انتظام کشمیر میں مسافر بس کے پہاڑی سڑک سے پھسل کر گہری کھائی میں گرنے سے 36افراد ہلاک اور 19 زخمی ہو گئے، جن میں سے بعض کی حالت نازک ہے۔ 

حکام کے مطابق   یہ حادثہ بھارت  کے زیر انتظام کشمیر کے گرمائی دارالحکومت سری نگر سے تقریباً 149 کلومیٹر جنوب میں ڈوڈا ضلع کے علاقے  اسار میں پیش آیا۔ بدقسمت بس کشتواڑ سے جموں شہر جا رہی تھی۔    ایک پولیس اہلکار نے فون پر شِنہوا کو بتایا کہ بس جس میں 55 افراد سوار تھے جو  سڑک سے پھسل کر 300 فٹ گہری کھائی میں جا گری، اب تک کی اطلاعات  کے مطابق  المناک حادثے میں 36 افراد اپنی جانوں سے ہاتھ دھو بیٹھے ہیں اور 19 دیگر زخمی ہیں۔    حکام کے مطابق سب سے پہلے مقامی لوگوں نے موقع پر پہنچ کر زخمیوں کی مدد کی۔

حادثے کی وجہ فوری طور پر معلوم نہیں ہو سکی۔

   بھارتی صدر دروپدی مرمو اور وزیراعظم نریندر مودی نے حادثے میں ہلاکتوں پر دکھ کا اظہار کرتے ہوئے سوگوار خاندانوں سے تعزیت کا اظہار کیا ہے۔

بیجنگ(شِنہوا) چینی مین لینڈ کی ترجمان نے تائیوان کی ڈیموکریٹک پروگریسو پارٹی (ڈی پی پی) کے حکام کی جانب سے تجارتی رکاوٹوں کو کم کرنے کے لیے جامع کراس سٹریٹ اقتصادی معاہدے کے حوالے سے ان کے دوہرے برتاواور دوہرے معیار پر مبنی اقدامات کو تنقید کا نشانہ بنایا ہے۔

ریاستی کونسل کے تائیوان امور دفتر کی ترجمان ژو فینگ لیان نے بدھ کو ایک پریس کانفرنس میں کہا کہ اس طرح کے موقف سے اقتصادی تعاون فریم ورک معاہدے (ای سی ایف اے) پر عمل درآمد میں غیر یقینی صورتحال پیدا ہوئی ہے، جس سے تائیوان میں ہم وطنوں کے مفادات کو براہ راست نقصان پہنچ رہا ہے۔

ژو کے مطابق  اگرچہ ڈی پی پی حکام نے کہا کہ وہ ای سی ایف اے کو ختم نہیں کرنا چاہتے لیکن انہوں نے بیرونی طاقتوں کے ساتھ مل کر آبنائے پار اقتصادی تبادلوں اور تعاون کو روکا اور اقتصادی "ڈی کپلنگ" کی کوشش کی ۔

ژو نے کہا کہ ای سی ایف اے کے نفاذ کے بعد سے کاروباری شعبوں اور دونوں طرف کے لوگوں کو ٹھوس فوائد حاصل ہوئے ہیں۔

تائیوان کے ہم وطنوں کے مفادات اور بہبود کو یقینی اور بہتر بنانے کے لیے، ترجمان  نے "تائیوان کی آزادی"  کی خواہاں علیحدگی پسند سرگرمیوں کی مخالفت کرنے اور آبنائے پار تعلقات کی پرامن ترقی کو فروغ دینے کامطالبہ کیا۔