شنگھائی (شِنہوا) چینی ساختہ بڑے مسافر طیارے سی 919 نے  سنکیانگ ویغور خود اختیار خطے کے صدرمقام ارمچی کے ارمچی دی وو پو بین الاقوامی ہوائی اڈے پر لینڈ نگ کی ہے۔

کمرشل ایئرکرافٹ کارپوریشن آف چائنہ لمیٹڈ کے مطابق اس لینڈنگ کے ساتھ ہی سنکیانگ کے 25 ہوائی اڈوں پر طیارے کی دو ہفتے کی نمائشی پروازوں کا آغاز ہوگیا ہے۔

پروگرام کے تحت کمرشل ایئرکرافٹ کارپوریشن آف چائنہ لمیٹڈ نمائشی پروازوں کے لئے 2  سی 919 طیارے استعمال کرے گا ۔ یہ نمائشی پروازیں کرامے، یی ننگ، کو چھا، آلتے اور اور سنکیانگ کے دیگر بڑے ہوائی اڈوں کے لئے ہوں گی ۔

سنکیانگ میں وسیع اور پیچیدہ علاقے اور کئی ہوائی اڈے ہیں جہاں ان خطوں کے درمیان ہوائی سفر نقل و حمل کا سب سے آسان ذریعہ سمجھا جاتا ہے۔

کمرشل ایئرکرافٹ کارپوریشن آف چائنہ لمیٹڈ کے مطابق سی 919 کی نمائشی پروازیں اعلیٰ معیار کے فضائی سفر میں مسافروں کی طلب پورا کرنے اور مقامی مسافر طیاروں کے تجارتی آپریشن کے لئے ایک نیا راستہ تلاش کرنے میں مدد دیں گی۔

پاکستان انٹرنیشنل ائیرلائن کے مالی حالات سنگین ہوگئے ،ملازمین کو تنخواہ دینے کے لیے بھی پیسے نہیں ہیں ،12تاریخ ہونے کے باوجود ملازمین کو اگست کی تنخواہیں نہ مل سکیں،وزارت خزانہ نے پیسے نہ دینے کے خبروں کی تردید جاری کی مگر پی آئی اے کو پیسے جاری نہیں کئے ،حکومت کی طرف سے مالی امداد نہ ملی تو پی آئی اے چند ماہ میں مکمل گراؤنڈ ہوجائے گی ترجمان پی آئی اے سے موقف کے لیے رابطہ کیاگیامگر انہوں نے کوئی جوا ب نہیں دیا۔  اس خبر رساں ادارے کے مطابق پاکستان انٹرنیشنل ائیرلائن کے مالی حالات  انتہائی سنگین ہوگئے پی آئی اے کے پاس اپنے ملازمین کو تنخواہ دینے کے بھی پیسے نہیں ہیں جس کی وجہ سے اگست کی تنخواہ ستمبر کی 12تاریخ ہونے کے باوجود ادا  نہ ہوسکی عام روٹین میں ملازمین کو 5تاریخ تک تنخواہ  مل جاتی ہے ۔پی آئی اے نے حکومت سے مالی مدد کرنے کی درخواست کی تھی جس پر ای سی سی نے پیسے دینے کے بجائے معاملے پر کمیٹی بنادی وزارت خزانہ کی طرف سے پیسے نہ دینے کے حوالے سے خبر پر وزارت خزانہ نے ترید جاری کی مگر اب پی آئی اے  کے مالی  حالات مزید خراب ہوگئے ہیں کہ پی آئی اے کے پاس اپنے ملازمین کو تنخواہ دینے کے بھی پیسے نہیں ہیں

۔وزارت خزانہ نے ابھی تک  پی آئی اے کو عارضی ریلیف دینے کے لیے بھی پیسے جاری نہیں کئے ہیں۔ پی آئی اے نے قرضوں کے سود لیزنگ جہازوں کے کرائیوں اور گراؤنڈ سروسز کے بقایاجات کے لیے حکومت سے فوری طور پر خطیررقم مانگی تھی ۔ذرائع نے اس خبر رساں ادارے کو بتایاکہ اگر حکومت نے مالی مدد نہ کی تو چند ماہ کے اندار پوری پی آئی اے گراؤنڈ ہوجائے گی  واضح رہے کہ پی آئی اے کے پہلے ہی 35جہازوں میں سے 15جہازگراؤنڈ ہیں۔ اس حوالے سے ترجمان پی آئی اے سے رابطہ کیاگیامگر انہوں نے کوئی جواب نہیں دیا۔(محمداویس)

کریڈٹ: انڈیپنڈنٹ نیوز پاکستان-آئی این پی

مجھے زہر پینے دیا جائے'، شہری نے عدالت سے انوکھی درخواست کر دی۔ صوبائی دارالحکومت لاہور کے علاقے مزنگ کے شہری سرور تاج نے زہر پینے کیلئے عدالت سے رجوع کیا جس پر عدالت نے استفسار کیا کہ آپ زہر کیوں پینا چاہتے ہیں۔ درخواست گزار نے جواب دیا کہ میں قرآنی آیات پڑھ کہ زہر پیں گا مجھے کچھ نہیں ہوگا، میرے پاس علم ہے، ہائیکورٹ کے جسٹس راحیل کامران نے ریمارکس دیئے کہ عدالت کسی کو زہر پینے کی اجازت کیسے دے سکتی ہے، مجھے لگتا ہے آپ سستی شہرت کیلئے کوئی اسٹٹنٹ کھیل رہے ہیں۔ اس پر درخواست گزار کا کہنا تھا کہ مجھے کوئی شہرت نہیں چاہئے، میرا اللہ پر یقین ہے مجھے کچھ نہیں ہوگا۔ جس پر عدالت نے کہا کہ خودکشی اسلام میں حرام ہے آپ عدالت سے حرام کام کرنے کی اجازت مانگ رہے ہیں ، درخواست گزار نے جواب دیا کہ میں قرآن پاک کی طاقت دنیا کو دیکھانا چاہتا ہوں، لاہور کے موچی گیٹ پر سب کے سامنے یہ تجربہ کرنا چاہتا ہوں عدالت اجازت دے۔ عدالت عالیہ نے ریمارکس میں کہا کہ خود موت مانگنے والوں کے حوالے سے بھارتی سپریم کورٹ کے فیصلے موجود ہیں، بھارت میں کینسر کے مریضوں نے موت آسان کرنے کیلئے سپریم کورٹ سے رجوع کیا تھا۔ درخواست گزار نے جواب دیا کہ میں نہیں مروں گا میرا یقین کریں۔ جسٹس راحیل نے کہا کہ ہم کسی غیر قانونی کام کی اجازت نہیں دے سکتے، آپ کا اگر زیادہ دل ہے تو کریں پھر قانون کے مطابق آپ کے خلاف جو کارروائی ہوگی وہ ہوجائے گی۔ شہری نے مکالمہ کرتے ہوئے کہا کہ میں نے ہوم سیکرٹری کو بھی درخواست دی ہے کہ موچی گیٹ پر زہر پینے کا تجربہ کرنے کی اجازت دی جائے، عدالت نے ریمارکس دیئے کہ آپ عدالتی وقت ضائع کر رہے ہیں۔ بعدازاں عدالت عالیہ نے درخواست قابل سماعت ہونے سے متعلق فیصلہ محفوظ کر لیا۔

کریڈٹ: انڈیپنڈنٹ نیوز پاکستان-آئی این پی

زمین کے تنازع پر بھاری ہتھیاروں سے فائرنگ میں ایک شخص جاں بحق ہوگیا۔ ریگی کے علاقے میں قوم عیسی خیل اور سابق ڈپٹی اسپیکر محمود جان کے مابین زمین کے تنازع پر فائرنگ ہوئی۔ پولیس کے مطابق دونوں قوموں میں بھاری ہتھیاروں سے فائرنگ کا تبادلہ ہوا، جس میں دونوں جانب سے 3 افراد زخمی ہوئے۔ پولیس کے مطابق علاقے میں بھاری نفری طلب کرلی گئی ۔دوسری جانب اسپتال ذرائع کا کہنا ہے کہ اب تک ایل آر ایچ اسپتال میں ایک لاش لائی گئی ہے، جس کی شناخت وقار حسن کے نام سے ہوئی۔ مقتول کا تعلق عیسی خیل قوم سے ہے۔ جاں بحق ہونے والے کو شدید زخمی حالت میں اسپتال لایا گیا تھا، جہاں وہ جانبر نہ ہو سکا۔

کریڈٹ: انڈیپنڈنٹ نیوز پاکستان-آئی این پی

اینٹی نارکوٹکس فورس پاکستان نے 35کارروائیوں کے دوران 10.411 ملین ڈالر بین الاقوامی مالیت کی 428.943کلوگرام منشیات برآمد کر کے ایک خاتون سمیت 36ملزمان کو گرفتارکیا جبکہ منشیات کی اسمگلنگ میں استعمال ہونے والی 7 گاڑیاں بھی قبضے میں لے لیں۔برآمد شدہ منشیات میں 79کلو گرام افیون، 14.346 کلوگرام ہیروئن، 325.168کلوگرام چرس ،9.758کلو میتھ ایمفیٹامائن آئس ،660گرام ویڈ اور 18 عدد ایکسٹیسی گولیاں(11گرام وزنی ) شامل ہیں۔ پنجاب نے10کاروائیوںکے دوران 148.694کلومنشیات برآمدکرکے ایک خاتون سمیت 19ملزمان کو گرفتار کرکے2 گاڑیاں بھی قبضے میں لے لیں۔برآمدہ منشیات میں49.200 کلو گرام افیون، 12.750کلو گرام ہیروئن ، 77.600کلو گرام چرس اور 9.144کلو میتھ ایمفیٹامائن (آئس) شامل ہیں ۔ راولپنڈی نے9کاروائیوںکے دوران106.638کلومنشیات برآمدکرکے 12 ملزمان کو گرفتار کر کے 4گاڑیاں بھی قبضے میں لے لیں۔ برآمدہ منشیات میں14.800 کلو گرام افیون ، 1.116کلو ہیروئن ، 90.048کلو چرس ،614 گرام میتھ ایمفیٹا مائن (آئس) اور 60گرام ویڈ شامل ہیں ۔ خیبر پختونخوا نے11کاروائیوںکے دوران 79.011کلو منشیات برآمد کر کے 2 ملزمان کو گرفتار کر لیا ۔برآمدہ منشیات میں480گرام ہیروئن ،78.520کلوگرام چرس اور18عدد ایکسٹیسی گولیاں شا مل ہیں ۔ سندھ نے 2کاروائیوں میں30.600کلو منشیات برآمدکر کے 3ملزمان کو گرفتار کر کے ایک گاڑی بھی قبضے میں لے لی۔برآمدہ منشیات میں30کلو چرس اور 600گرام ویڈ شامل ہیں۔ بلوچستان نے3کاروائیوں میں64کلوگرام منشیات برآمدکی ۔ برآمدہ منشیات میں15کلو افیون اور 49 کلوچرس شامل ہیں ۔ تمام مقدمات انسداد ِ منشیات ایکٹ کے تحت متعلقہ تھانوں میں درج کرکے تفتیش کا آغاز کر دیا گیا ہے ۔

کریڈٹ: انڈیپنڈنٹ نیوز پاکستان-آئی این پی

پیپلز پارٹی کے چیئرمین اور سابق وزیر خارجہ بلاول بھٹو زرداری نے کہا ہے کہ افغانستان میں موجود امریکی اسلحہ سندھ کے کچے کے ڈاکوں کے پاس پہنچ چکا، اب اندازہ ہوتا ہے کہ عمران خان کی دہشت گردوں کو ملک میں بسانے کی پالیسی کتنی خطرناک تھی۔ سکھر میں شہید کیے گئے صحافی جان محمد مہر کے اہل خانہ سے ملاقات کے بعد میڈیا سے بات چیت کرتے ہوئے بلاول نے کہا کہ جان محمد مہر کے اہل خانہ سے تعزیت کے لیے آئے ہیں اس قتل کی جتنی مذمت کی جائے کم ہے جان محمد مہر کے خاندان کو انصاف دلائیں گے، شہید کے اہل خانہ اور پریس کلب کے مطالبے پر جان محمد مہر کے قتل کیس کی جے آئی ٹی بنائی گئی امید تھی کہ اس میں پیش رفت ہوگی مگر ایسا نہ ہوا۔ انہوں ںے کہا کہ کچے میں پولیس افسروں نے جان کے نذرانے پیش کیے، کچے کے ڈاکوں کے پاس جدید اسلحہ کہاں سے پہنچا، افغانستان میں امریکی اسلحہ دہشت گردوں کے پاس پہنچ چکا ہے، یہ امریکی اسلحہ صرف کے پی نہیں بلکہ ہمارے کچے کے علاقوں میں بھی پہنچ چکا کیوں کہ وہ ہتھیار جو امریکی فوج نے افغانستان میں استعمال کیے آج وہ کچے کے دہشت گردوں کے پاس موجود ہیں۔ انہوں ںے کہا کہ دہشت گرد تب سے سر اٹھارہے ہیں جب سے نیشنل ایکشن پلان پر عمل درآمد نہیں ہوا، اب کیا وجہ ہے کہ دہشت گرد پھر سے سر اٹھا رہے ہیں؟ اس کی وجہ یہ ہے کہ پیپلز پارٹی کی پالیسی پر عمل درآمد نہیں ہوا، تمام سیاستی جماعتیں کہتی تھیں کہ دہشت گردوں سے بات چیت کی جائے

لیکن ہمارا موقف تھا کہ ان سے بات چیت نہ کی جائے ایسا نہیں ہوسکتا کہ ایک طرف ان کی مدد کی جائے اور دوسری طرف بیان دیا جائے۔ چیئرمین پی پی پی نے کہا کہ محترمہ بے نظیر بھٹو بھی دہشت گردوں کی آنکھوں میں آنکھیں ڈال کر دہشت گردوں کو للکارتی تھیں اور سانحہ کارساز کے بعد بھی پیچھے نہیں ہٹیں، پیپلز پارٹی نے کے پی سے کراچی تک دہشت گردی کے خاتمے کے لیے ہر ممکن کوشش کی۔ بلاول بھٹو زرداری نے کہا کہ اندازہ ہوتا ہے کہ چیئرمین پی ٹی آئی کی پالیسی کتنی خطرناک تھی، عمران خان نے دہشت گردوں کے لیے سرحدیں کھولیں اور عمران خان نے دہشت گردوں میں ملک میں آباد کرنے کا پلان بنایا دہشت گردوں کو آباد کرنے والوں کو اندازہ نہیں کہ دہشت گردوں کو کراچی پہنچنے میں وقت نہیں لگیگا، پیپلز پارٹی نے دہشت گردوں کا مقابلہ کیا، پیپلز پارٹی نے تمام اسٹیک ہولڈرز کو ایک پلیٹ فارم پر جمع کیا۔ انہوں ںے کہا کہ پاکستان کو چلانے کا پرانا طریقہ ختم کیا جائے، افسوس ہے کہ پاکستانی سیاست دانوں کو شترمرغ کی سیاست کی عادت ہے، جو لوگ غلط فیصلوں میں ملوث ہیں ان کا احتساب ہونا چاہیے۔ بجلی چوری کے معاملے پر بلاول نے کہا کہ اٹھارہ اٹھارہ گھنٹے بجلی نہیں آتی اور بل ایسا آتا ہے جیسے 24 گھنٹے بجلی استعمال کی ہو مجھے لگتا ہے کہ چوری وہ کررہے ہیں جہاں سے بجلی بنتی ہے چاہے وہ بلوچستان ہو یا پختون خوا کے ہائیڈرل منصوبے ہوں۔

کریڈٹ: انڈیپنڈنٹ نیوز پاکستان-آئی این پی

کراچی گالف کلب میں 27ویں چیف آف دی نیول سٹاف اوپن گالف چیمپئن شپ کی افتتاحی تقریب کا انعقاد کیا گیا،کمانڈر کراچی ریئر ایڈمرل محمد سلیم اوپن گالف چیمپئن شپ کی افتتاحی تقریب کے مہمان خصوصی تھے، چیمپئن شپ کل 6کیٹیگریز میں کھیلی جائے گی جس میں ملک بھر سے 600سے زائد کھلاڑی شرکت کر رہے ہیں،ترجمان پاک بحریہ کے مطابق یہ ٹورنامنٹ 1995 سے قومی گالف سرکٹ کا ایک باقاعدہ اور بڑا ایونٹ بن چکا ہے، تقریب میں سول و ملٹری افسران اور کھلاڑیوں کی بڑی تعداد شریک ہے۔

کریڈٹ: انڈیپنڈنٹ نیوز پاکستان-آئی این پی

بھارت نے پاکستان کو شکست دیکر انٹرنیشنل ورچوئل اسکریبل چیمپئن شپ جیت لی،بھارت کے مادھو کامتھ نے شاندار کارکردگی کا مظاہرہ کرتے ہوئے انٹرنیشنل ورچوئل اسکریبل ٹورنامنٹ کے بیسٹ آف 5فائنل میں پاکستان کے علی سلمان کو شکست دے دی، سری لنکا کے ہیون دلمتھ تیسرے نمبر پر رہے،ٹورنامنٹ کا انعقاد پاکستان اسکریبل ایسوسی ایشن کی جانب سے ہیپی ہوم اسکول کراچی کی 75ویں سالگرہ کی تقریبات کے موقع پر کیا گیا،چیمپئن شپ میں8ممالک کے 40سے زائد کھلاڑیوں نے حصہ لیا،دو روزہ چیمپئن شپ کے پہلے روز ہفتے کو پہلے دن کے اختتام پر ٹاپ دو سلاٹس پر پاکستان کے عفان سلمان اور ان کے بھائی علی سلمان کا قبضہ تھا لیکن بھارت کے مادھو کامتھ نے دوسرے دن انہیں پیچھے چھوڑ کر ٹاپ پوزیشن حاصل کی اور فائنل کے لیے کوالیفائی کر لیا،علی سلمان نے اپنے چھوٹے بھائی عفان کو شکست دے کر فائنل میں کوالیفائی کیا جہاں وہ بیسٹ آف فائیو فائنل میں بھارت کے مادھو کامتھ سے شکست سے دوچار ہوئے،کوئٹہ گلیڈی ایٹرز کے مالک ندیم عمر ایونٹ کے مہمان خصوصی تھے،انہوں نے کھلاڑیوں میں انعامات تقسیم کیے، اس موقع پر غزالہ نظامی، طارق پرویز، ڈاکٹر ملیحہ اور دیگر موجود تھے۔

کریڈٹ: انڈیپنڈنٹ نیوز پاکستان-آئی این پی

ایشیاکپ میں بھارت کے خلاف سپر فور مرحلے کے میچ میں نسیم شاہ اور حارث رئوف کی انجریز نے پاکستان کرکٹ ٹیم کی پریشانیوں میں اضافہ کردیا،دونوں بالرز کی انجریز کا جائزہ لینے کے بعد ایشیاکپ میں شرکت کا فیصلہ ہوگا تاہم ذرائع نے دعوی کیا ہے کہ گرین شرٹس کے دونوں فاسٹ بولرز سری لنکا کے خلاف اہم میچ سے قبل باہر ہوسکتے ہیں،پاکستان نے نسیم شاہ اور حارث کے بیک اپ کے طور پر شاہنواز دھانی اور زمان خان کو طلب کرلیا ہے،دوسری جانب ٹیم انتظامیہ ایشین کرکٹ کونسل (اے سی سی)کی ٹیکنیکل کمیٹی سے صرف اس صورت میں متبادل کی درخواست کرے گی،اس بات کا قوی امکان ہے کہ حارث اور نسیم جمعرات کو سری لنکا کے خلاف پاکستان کے آخری سپر 4میچ میں حصہ نہیں لے سکیں گے ۔

کریڈٹ: انڈیپنڈنٹ نیوز پاکستان-آئی این پی

ایشیاکپ کے سپر فور مرحلے میں بھارت ہاتھوں تاریخی ہار پر قومی ٹیم کے کپتان شاہد آفریدی کا بیان بھی سامنے آگیا،سماجی رابطے کی سائٹ ٹوئٹر (ایکس)پر بھارت کے ہاتھوں تاریخی 228رنز کی شکست پر قومی ٹیم کے سابق کپتان شاہد آفریدی نے کہا کہ جیت اور ہار مقابلے کا حصہ ہے لیکن جیت کے حصول کیلئے نہ لڑنا افسوسناک ہے، بھارت نے پاکستان کیخلاف میچ میں ہر شعبہ میں بہترین کار کردگی دکھائی،سابق کپتان نے ٹوئٹ میں پاکستانی ٹیم کو حوصلہ دیتے ہوئے کہا کہ آپ اگلے میچ میں اچھی کاردکرگی دکھا سکتے ہیں، میچ میں شاندار کامیابی کا مظاہرہ کرنے پر شاہد آفریدی نے ویرات کوہلی اور کے ایل راہول کو سینچریاں چڑنے پر مبارکباد بھی پیش کی۔

کریڈٹ: انڈیپنڈنٹ نیوز پاکستان-آئی این پی

ہاکی میں لڑائی جھگڑے اور اختلافات کی وجہ سے پاکستان اولمپکس کوالیفائنگ رائونڈ کی میزبانی سے محروم ہو گیا،انٹرنیشنل ہاکی فیڈریشن(ایف آئی ایچ)نے پاکستان سے اولمپک کوالیفائر ایونٹ کی میزبانی واپس لے لی، ایف آئی ایچ نے پاکستان ہاکی فیڈریشن کو اپنے فیصلہ سے مطلع کردیا،انٹرنیشنل ہاکی فیڈریشن نے پاکستان سے اولمپک کوالیفائر ایونٹ کی میزبانی واپس لینے کی وجوہات میں حکومت پاکستان اور اسپورٹس بورڈ کی جانب سے عدم تعاون، ہاکی فیڈریشن کے معاملات میں مداخلت کو بنیادی وجہ قرار دیا ہے،پاکستان سے میزبانی واپس لینے کی وجوہات میں ایف آئی ایچ نے اس امر پر شدید تحفظات کا اظہار کیا ہے،ایف آئی ایچ کے مطابق انٹرنیشنل ایونٹ کے انعقاد کے لیے حکومت کے تعاون اور سپورٹ کی ضرورت ہوتی ہے جوکہ حکومت پاکستان ، وزارت بین الصوبائی رابطہ اور پاکستان اسپورٹس بورڈ فراہم نہیں کررہا، جبکہ اولمپک کوالیفائر جیسا بڑا ایونٹ حکومت پاکستان کے تعاون کے بغیر منعقد کرانا ممکن نہیں،اس لیے پاکستان سے اولمپک کوالیفائر ایونٹ کی میزبانی واپس لی جارہی ہے،واضح رہے کہ پاکستان کو پہلی بار اولمپکس کوالیفائنگ راونڈ کی میزبانی ملی تھی۔

کریڈٹ: انڈیپنڈنٹ نیوز پاکستان-آئی این پی

ایشیاکپ کے سپر فور مرحلے میں بھارت کے ہاتھوں 228رنز کے بڑے مارجن سے شکست نے قومی ٹیم کے ایونٹ کے فائنل کھیلنے کی راہ میں مشکلات کے نئے انبار لگا دیئے،بھارت کے خلاف شکست کے بعد قومی ٹیم ایشیاکپ میں پوائنٹس ٹیبل پر 2پوائنٹس کے باوجود تیسری پوزیشن پر آگئی ہے جبکہ اسکا نیٹ ریٹ بھی منفی 1.892ہوگیا ہے جبکہ بھارت ایک میچ میں 2پوائنٹس کے ساتھ 4.560نیٹ ریٹ کے ساتھ ٹاپ پر موجود ہے،اسی طرح میزبان سری لنکا دوسری پوزیش پر موجود ہے، آئی لینڈرز نے بنگال ٹائیگرز کو سپر فور مرحلے میں شکست دیکر ایونٹ سے باہر کیا اور انکا نیٹ ریٹ بھی پاکستان سے بہتر ہے، اگر سری لنکا اور پاکستان کا میچ بارش کی نذر ہوا تب بھی پاکستان ایونٹ کے فائنل سے محروم رہے گا، کیونکہ نیٹ ریٹ پر سری لنکا گرین شرٹس سے بہت آگے ہے۔

کریڈٹ: انڈیپنڈنٹ نیوز پاکستان-آئی این پی

متحدہ عرب امارات دنیا کے بہترین جج کے طور پر شہرت رکھنے والیامریکی جج فرینک کیپریوکی میزبانی کرنے کیلئے تیارہے،عرب میڈیاکے مطابق یوایمیں شارجہ گورنمنٹ میڈیا بیوروکے زیر اہتمام 13اور 14ستمبر کوانٹرنیشنل گورنمنٹ کمیونیکیشن فورم 2023کے 12ویں ایڈیشن کی دو روزہ تقریب کا اہتمام کیا جائے گا، جس میں مشہور سابق امریکامیں میونسپل کورٹ آف پروویڈنس کے سابق چیف جسٹس فرینک کیپریو کوبطور کلیدی مقررمدعو کیا گیا ہے،آج کے وسائل -کل کی دولت کے موضوع پر ہونے والی اس تقریب کے دوسرے اور اختتامی روزامریکی جج فرینک کیپریو کو شارجہ گورنمنٹ کمیونیکیشن ایوارڈ (SGCA)دیاجائے گا،خیال رہے کہ امریکا کے شہر پروویڈنس کے میونسپل چیف جج فرینک کیپریودنیا بھر میں اپنے منصفانہ فیصلوں، خوبصورت حس مزاح اور امن پسندی کے باعث جانے جاتے ہیں۔

کریڈٹ: انڈیپنڈنٹ نیوز پاکستان-آئی این پی

امریکی ریاست ہوائی میں واقع کیلااووا آتش فشاں 96روز بعدپھر سے ابل پڑا،امریکی مرکز برائے ارضیاتی تحقیق کے مطابق، ہوائی کے قومی پارک میں واقع کیلا اووا آتش فشاں میں مقامی وقت کے مطابق صبح سوا تین بجے دھماکہ ہوا ، ریسکیو حکام نے عوام کو دھویں اور راکھ کے بادل اٹھنے پر احتیاطی تدابیر اختیار کرنے اور آتس فشاں کے قریب نہ جانے کی ہدایات جاری کی گئی ہیں ۔

کریڈٹ: انڈیپنڈنٹ نیوز پاکستان-آئی این پی

عراق نے الفا کی بڑی جنوبی بندرگاہ کو سعودی عرب سے ملانے کے لئے ریلوے لائن بچھانے کا منصوبہ بنا لیا، یہ منصوبہ 17ارب ڈالر کے منصوبے کا حصہ ہو گا جسے "شاہراہ ترق" کا نام دیا گیا ہے،عراقی وزارت ٹرانسپورٹ کے میڈیا ڈائریکٹر میثم عبدالصافی کے مطابق "شاہراہ ترقی" میں 1,200کلومیٹر طویل ریلوے لائن اور بندرگاہ سے ترکیہ کے ساتھ شمالی سرحد تک ایک ہائی وے کی تعمیر شامل ہے۔

کریڈٹ: انڈیپنڈنٹ نیوز پاکستان-آئی این پی

لندن سے کویت آنے والی کویتی پرواز میں مسافروں کے درمیان لڑائی، چیخ پکار اور مارپیٹ کی ویڈیو سوشل میڈیا پروائرل ہو گئی، یہ واقعہ لندن سے کویت آنے والی کویتی پرواز میں پیش آیا،ویڈیو میں طیارے میں سوار نوجوانوں کے درمیان لڑائی دکھائی دے رہی ہے۔اس میں مسافروں کی چیخیں اور بچوں کے رونے کی آوازیں بھی سنی جا سکتی ہیں،مسافروں نے جھگڑنے والے افراد کو لڑائی سے روکنے کی کوشش کی مگر اس کا فائدی نہیں ہوا،ستیاب معلومات کے مطابق ایک طرف دو کویتی نوجوانوں اور ایک غیر ملکی کے درمیان کسی بات پرلڑائی ہوئی،مسافروں نے اس واقعے پر افسوس کا اظہار کیا۔ لڑائی کی وجہ سے جہاز کے اندر خوف و ہراس پھیل گیا۔

کریڈٹ: انڈیپنڈنٹ نیوز پاکستان-آئی این پی

امریکی سینٹرل کمانڈ کے سابق کمانڈر جنرل فرانک مکینزی نے کہاہے کہ طالبان کے القاعدہ کے ساتھ تعلقات امریکا سے زیادہ مضبوط ہیں،امریکی ٹی وی کو انٹرویو دیتے ہوئے امریکی سینٹرل کمانڈ کے سابق کمانڈر جنرل فرانک مکینزی نے کہا کہ صدر بائیڈن نے دعوی کیا تھا کہ القاعدہ کے خاتمے کیلئے طالبان امریکا کا ساتھ دیں گے،انہوں نے کہا کہ افغانستان سے انخلا کے وقت طالبان نے عارضی طور پر ایسا مانا ہو گا، طالبان پر بھروسہ نہیں کیا جا سکتا، طالبان کا القاعدہ کے ساتھ طویل مدتی خاندانی اور روایتی تعلق ہے، یہ رشتہ امریکا کے ساتھ کسی بھی ممکنہ تعلق سے کہیں زیادہ مضبوط ہے، جنرل فرانک مکینزی نے کہا کہ 25ہزار امریکی فوج کو افغانستان میں چھوڑنے کا مشورہ دیا تھا۔

کریڈٹ: انڈیپنڈنٹ نیوز پاکستان-آئی این پی

اقوام متحدہ جنرل اسمبلی کے 78ویں اجلاس میں آزاد جموں وکشمیر کا نمائندہ وفد بھی شرکت کریگا،ذرائع کا کہنا ہے کہ اسپیکر آزاد کشمیر اسمبلی کی قیادت میں 6اراکین اسمبلی اجلاس میں شرکت کرینگے،ذرائع کے مطابق آزاد کشمیر اسمبلی کا نمائندہ وفد او آئی سی رابطہ گروپ کی دعوت پر اجلاس میں شریک ہوگا، وفد اسلامی سربراہی تنظیم کے نمائندگان سے ملاقات کرے گا،اجلاس میں او آئی سی رابطہ گروپ جموں کشمیر کی مجموعی صورتحال پرتبادلہ خیال کریگا جب کہ مقبوضہ جموں کشمیر کی ابتر صورتحال کو اجاگر بھی کیا جائے گا،ذرائع کے مطابق عالمی برادری کے سامنے مقبوضہ کشمیر میں انسانی حقوق کی سنگین خلاف ورزیوں کا معاملہ اٹھایا جائے گا۔

کریڈٹ: انڈیپنڈنٹ نیوز پاکستان-آئی این پی

امریکا میں کورونا کے کیسز میں ایک بار پھر اضافہ ہونے لگا ہے،غیر ملکی میڈیا رپورٹ کے مطابق کورونا کیسز میں اضافے کی وجہ سے امریکی فوڈ اینڈ ڈرگ انتظامیہ نے نئے کووڈ بوسٹرز کی منظوری دے دی،رپورٹ میں بتایا گیا ہے کہ میڈیکل کمپنیوں کے نئے بوسٹرز کورونا کے ایکس بی بی ویئرینٹ کو ہدف بنا رہے ہیں،ایف ڈی اے کے ڈائریکٹر کا کہنا ہے کہ ویکسی نیشن عوامی صحت کے لیے اہم ہے، کووڈ کے خلاف مسلسل تحفظ کے لیے بوسٹر ضروری ہے،ان کا کہنا تھا کہ 5سال سے زیادہ عمر کے بچے بھی کووڈ ویکسین کی خوراک کے کم ازکم دو ماہ بعد بوسٹرکے اہل ہیں۔

کریڈٹ: انڈیپنڈنٹ نیوز پاکستان-آئی این پی

امریکی صدر جو بائیڈن نے کہا ہے نئی دہلی میں 2روزہ جی 20سربراہی اجلاس کے موقع پر بھارتی وزیراعظم نریندر مودی سے ہونے والی ملاقات میں انسانی حقوق اور آزادی صحافت کا مسئلہ اٹھایا،صدر بائیڈن نے ویتنام میں گفتگو کرتے ہوئے کہا کہ ہمیشہ کی طرح مودی سے انسانی حقوق کے احترام کی اہمیت پر بات کی،انہوں نے کہا کہ میں نے مضبوط و خوشحال ملک کی تعمیر میں سول سوسائٹی، آزاد صحافت کی اہمیت کو اجاگر کیا۔

کریڈٹ: انڈیپنڈنٹ نیوز پاکستان-آئی این پی

شمالی کوریائی رہنما امریکا کی جانب سے دی گئی دھمکیوں کو نظر انداز کرتے ہوئے ہتھیاروں کی متوقع ڈیل کے لیے روس پہنچ گئے جبکہ ترجمان امریکی محکمہ خارجہ نے کم جونگ ال کے دورہ روس پر کڑی تنقید کرتے ہوئے کہا ہے کہ امریکا روس کی یوکرین کے لیے فوجی مہم میں مدد کرنے والوں سے جواب طلب کرے گا،عالمی میڈیا رپورٹس کے مطابق شمالی کوریائی رہنما کم جونگ ان اپنے اہم دورے پر روس پہنچ گئے، جہاں ولادی ووسٹوک میں ان کی روسی صدر ولادیمیر پیوٹن سے ملاقات طے ہے،شمالی کوریا اور روس کے رہنمائوں کے درمیان اس اہم ملاقات میں ہتھیاروں کے معاہدے کی توقع ہے، واضح رہے کہ ایک روز قبل ہی امریکا کی جانب سے شمالی کوریا کو روس کو ہتھیار فروخت کرنے کے ممکنہ معاہدے کی صورت میں مزید پابندیاں عائد کرنے کی دھمکی دی گئی تھی،میڈیا ذرائع کے مطابق بائیڈن انتظامیہ کا کہنا ہے کہ یوکرین پر حملے میں ناکام روسی صدر ولادیمیر پیوٹن ، شمالی کوریائی رہنما کم جونگ ان سے ہتھیاروں کی بھیک مانگ رہے ہیں۔ ترجمان امریکی محکمہ خارجہ میتھیو ملر کے مطابق امریکا روس کی یوکرین کے لیے فوجی مہم میں مدد کرنے والوں سے جواب طلب کرے گا۔ انہوں نے کہا کہ روس کو شمالی کوریا کی جانب سے ہتھیاروں کی فراہمی اقوام متحدہ کی سلامتی کونسل کی قراردادوں کی کھلی خلاف ورزی ہوگی۔

کریڈٹ: انڈیپنڈنٹ نیوز پاکستان-آئی این پی

یورپی کمیشن نے روسی شہریوں پر روس کی رجسٹرڈ گاڑیوں اور ذاتی سامان جیسے اسمارٹ فونز، زیورات اور لیپ ٹاپ کے ساتھ یورپی ممالک میں داخلے پر پابندی عائد کردی ہے،عالمی میڈیا رپورٹس کے مطابق یورپی کمیشن نے روس کے خلاف پابندیوں کی قانون سازی کی توثیق کرتے ہوئے واضح کیا ہے کہ روسی رجسٹرڈ گاڑیوں کا استعمال کسٹم کوڈ کے تحت یورپی ممالک میں روسی ممنوعہ درآمدات کے زمرے میں آتا ہے چاہے گاڑی نجی یا تجارتی مقاصد کے لیے استعمال کی گئی ہو،مذکورہ بالا فیصلے نے قانونی ماہرین کیا ہے ، یورپی قوانین کے مطابق یورپی ممالک میں روسی سامان کی درآمد یا منتقلی پر پابندی ہے جو کہ روس کے لیے خاطر خواہ آمدنی پیدا کرنے کا باعث بنتی ہو۔

کریڈٹ: انڈیپنڈنٹ نیوز پاکستان-آئی این پی

عسکری بینک لمیٹڈ نے حال ہی میں 30 جون 2023 کو ختم ہونے والی تین ماہ کی مدت کے لیے اپنی کارکردگی کا اعلان کیاجس میں اہم مالیاتی اشاریوں میں ترقی کی صلاحیت کو اجاگر کیا گیا۔اس سہ ماہی کے دوران عسکری بینک کی قرضوں سے ہونے والی سود کی آمدنی نمایاں طور پر بڑھ کر 70.86 بلین روپے ہو گئی، جو کہ 103 فیصد کی سالانہ ترقی کی نمائندگی کرتی ہے۔ اس قابل ذکر پیش رفت کو بینک کی قرض دینے کی حکمت عملیوں اور مارکیٹ کے مواقع سے فائدہ اٹھانے میں اس کی مہارت سے منسوب کیا جا سکتا ہے۔اس سہ ماہی کے لیے خالص مارک اپ سود کی آمدنی 12.89 بلین روپے رہی، جو گزشتہ سال کی اسی مدت کے مقابلے میں 47 فیصد زیادہ ہے۔ یہ ترقی سود سے متعلق آمدنی اور اخراجات کے بینک کے موثر انتظام کی عکاسی کرتی ہے جو صحت مند مارجن میں حصہ ڈالتی ہے۔سہ ماہی کے لیے غیر مارک اپ سود کی آمدنی 3.62 بلین روپے تک پہنچ گئی جو سال بہ سال 19 فیصد اضافے کی نمائندگی کرتی ہے۔ یہ نمو بینک کے متنوع آمدنی کے ذرائع کو اس کی قرض دینے کی سرگرمیوں سے ہٹ کر ظاہر کرتی ہے، جس سے مجموعی طور پر آمدنی میں اضافہ ہوتا ہے۔عسکری بینک کی تین ماہ کی کل آمدنی 16.51 بلین روپے رہی جو پچھلے سال کی اسی مدت کے مقابلے میں 39 فیصد کی ٹھوس نمو کو ظاہر کرتی ہے۔ آمدنی کا یہ جامع اعداد و شمار بینک کی مختلف طبقات سے آمدنی پیدا کرنے کی صلاحیت کی نشاندہی کرتا ہے۔سہ ماہی کے لیے ٹیکس سے پہلے کا منافع 8.65 بلین روپے تک پہنچ گیا، جو کہ سال بہ سال 43 فیصد کی قابل ذکر نمو کو ظاہر کرتا ہے۔ سہ ماہی کے لیے بعد از ٹیکس منافع 4.13 بلین روپے تھاجو گزشتہ سال کی اسی مدت کے مقابلے میں 53 فیصد نمایاں اضافہ کو ظاہر کرتا ہے۔ منافع میں یہ اضافہ بینک کے موثر مالیاتی انتظام اور اس کے اسٹیک ہولڈرز کے لیے مثبت نتائج پیدا کرنے کی صلاحیت کو نمایاں کرتا ہے۔

سہ ماہی کے لیے فی حصص آمدنی 2.85 روپے رہی، جو پچھلے سال کی اسی مدت کے مقابلے میں 52فیصدکی نمایاں نمو کو ظاہر کرتی ہے۔ حصص یافتگان کے لیے دستیاب بینک کی آمدنی میں فی حصص کی بنیاد پر نمایاں اضافہ ہوا ہے۔30 جون 2023 کو ختم ہونے والے جاری کیلنڈر سال کی پہلی ششماہی میں، عسکری بینک نے ایک لچکدار اور ترقی پر مبنی ادارے کے طور پر اپنی پوزیشن کو مضبوط کرتے ہوئے مختلف کلیدی میٹرکس میں مضبوط مالی کارکردگی کا مظاہرہ کیا ہے۔چھ ماہ کے دوران بینک کا مارک اپ سود 128.01 بلین روپے تک پہنچ گیا، جو سال بہ سال 107 فیصد کی متاثر کن نمو کو ظاہر کرتا ہے۔ یہ نمو قرض دینے کے مواقع حاصل کرنے اور سود سے متعلق اپنی آمدنی کو بہتر بنانے میں بینک کی تاثیر کی نشاندہی کرتی ہے۔چھ ماہ کے لیے خالص مارک اپ سود کی آمدنی 24.82 بلین روپے رہی جو پچھلے سال کی اسی مدت کے مقابلے میں 44 فیصد زیادہ ہے۔ یہ نمو بینک کی اپنی سود کی آمدنی کو موثر طریقے سے منظم کرنے کی صلاحیت کو واضح کرتی ہے۔جاری کیلنڈر سال کی پہلی ششماہی میں عسکری بینک کی نان مارک اپ سود کی آمدنی 6.76 بلین روپے رہی جو کہ سال بہ سال 21 فیصد اضافے کی عکاسی کرتی ہے۔ یہ ترقی روایتی قرض دینے کی سرگرمیوں سے ہٹ کر بینک کے مختلف آمدنی کے سلسلے کو نمایاں کرتی ہے۔چھ ماہ کے لیے بینک کی کل آمدنی 31.58 بلین روپے تک پہنچ گئی، جو گزشتہ سال کی اسی مدت کے مقابلے میں 38 فیصد کی خاطر خواہ نمو کو ظاہر کرتی ہے۔چھ ماہ کے لیے ٹیکس سے پہلے کا منافع 17.01 بلین روپے تھا، جو گزشتہ سال کی اسی مدت کے مقابلے میں 40 فیصد نمایاں اضافہ ظاہر کرتا ہے۔ یہ ترقی بینک کے موثر مالیاتی انتظام اور مارکیٹ کے رجحانات سے فائدہ اٹھانے کی صلاحیت پر زور دیتی ہے۔چھ ماہ کے لیے بعد از ٹیکس منافع 8.84 بلین روپے تک پہنچ گیا، جو سال بہ سال 40 فیصد اضافے کی عکاسی کرتا ہے۔ یہ نمو اپنے اسٹیک ہولڈرز کو مثبت مالیاتی نتائج فراہم کرنے میں بینک کی مستقل مزاجی کو نمایاں کرتی ہے۔چھ ماہ کی فی حصص آمدنی 6.10 روپے رہی، جو گزشتہ سال کی اسی مدت کے مقابلے میں 40 فیصد کی قابل ستائش نمو کو ظاہر کرتی ہے۔

کریڈٹ: انڈیپنڈنٹ نیوز پاکستان-آئی این پی

الائیڈ بینک لمیٹڈنے 30 جون 2023 کو ختم ہونے والے جاری سال کی پہلی ششماہی کے لیے اپنی مالی کارکردگی میں متاثر کن نتائج دکھائے ہیں اور سرمایہ کاری کرنے کی اپنی صلاحیت کو اجاگر کیا ہے۔ چھ ماہ کی مدت کے دوران بینک کا مارک اپ 168 بلین روپے تک پہنچ گیاجو 93 فیصد کی سال بہ سال خاطر خواہ ترقی کو ظاہر کرتا ہے۔ سال کی پہلی ششماہی کے لیے خالص مارک اپ کی آمدنی 50.65 بلین روپے تھی، جو کہ سال کے لحاظ سے 84 فیصد نمایاں ہے۔یہ خاطر خواہ نمو بینک کی سود سے متعلقہ آمدنی کے سلسلے کو بہتر بنانے اور اپنے سود کے اخراجات کو مثر طریقے سے سنبھالنے میں کامیابی کی عکاسی کرتی ہے۔ الائیڈ بینک کی چھ ماہ کے لیے نان مارک اپ سود کی آمدنی 12.19 بلین روپے رہی جو کہ سال بہ سال 11 فیصد اضافے کی نشاندہی کرتی ہے۔ چھ ماہ کے لیے بینک کی کل آمدنی 62.83 بلین روپے تک پہنچ گئی جو گزشتہ سال کی اسی مدت کے مقابلے میں 63 فیصد کی نمایاں نمو کو ظاہر کرتی ہے۔ آمدنی کا یہ جامع اعداد و شمار الائیڈ بینک کی متعدد راستوں سے آمدنی پیدا کرنے کی صلاحیت کو ظاہر کرتا ہے۔ چھ ماہ کے لیے ٹیکس سے پہلے کا منافع 35.51 بلین روپے تھا، جو گزشتہ سال کی اسی مدت کے مقابلے میں 77 فیصد نمایاں اضافہ کو ظاہر کرتا ہے۔ منافع میں یہ اضافہ بینک کے رسک مینجمنٹ اور مارکیٹ کی کامیاب حکمت عملیوں کی نشاندہی کرتا ہے۔ چھ ماہ کے لیے منافع کے بعد ٹیکس کی رقم 17.64 بلین روپے تھی جو کہ 158 فیصد کی سال بہ سال غیر معمولی نمو کو ظاہر کرتی ہے۔ منافع میں یہ اضافہ اپنے مالیاتی انتظامات اور مارکیٹ کے مواقع سے فائدہ اٹھانے میں بینک کی مہارت کو نمایاں کرتا ہے۔

چھ ماہ کے لیے فی حصص آمدنی 15.40 روپے رہی، جو گزشتہ سال کی اسی مدت کے مقابلے میں 158فیصدکی شاندار نمو کو ظاہر کرتی ہے۔ حصص یافتگان کے لیے دستیاب بینک کی آمدنی فی حصص کی بنیاد پر نمایاں طور پر کئی گنا بڑھ گئی ہے۔ الائیڈ بینک لمیٹڈ کی 30 جون 2023 کو ختم ہونے والی تین ماہ کی مدت کے لیے مالیاتی کارکردگی مارکیٹ کے مواقع کو حاصل کرنے اور خاطر خواہ ترقی دینے میں بینک کی طاقت کی تصدیق کرتی ہے۔ اس سہ ماہی کے دوران، بینک کا مارک اپ سود 94.93 بلین روپے تک پہنچ گیا۔ یہ نمو بینک کی قرض دینے کی سرگرمیوں کے ذریعے آمدنی پیدا کرنے کی صلاحیت کی نشاندہی کرتی ہے۔ یہ نمو بینک کی سود سے متعلقہ آمدنی کے سلسلے کو بہتر بنانے میں مہارت کی نشاندہی کرتی ہے۔ الائیڈ بینک کی اس سہ ماہی کے لیے غیر مارک اپ سود کی آمدنی 4.97 بلین روپے رہی جو گزشتہ سال کی اسی مدت کے مقابلے میں 26 فیصد کی کمی کو ظاہر کرتی ہے۔ اس کمی کی وجہ مارکیٹ کے بدلتے ہوئے حالات اور حرکیات کی وجہ سے قرار دیا جا سکتا ہے۔ مجموعی طور پر، سہ ماہی کے لیے بینک کی کل آمدنی 35.18 بلین روپے تک پہنچ گئی، جو گزشتہ سال کی اسی مدت کے مقابلے میں 62 فیصد کی خاطر خواہ نمو کو ظاہر کرتی ہے۔ تین ماہ کے لیے ٹیکس سے پہلے کا منافع 21.94 بلین روپے تھا، جو سال بہ سال 82 فیصد کی متاثر کن نمو کو ظاہر کرتا ہے۔ یہ نمو بینک کے موثر مالیاتی انتظام اور مارکیٹ کے مواقع سے فائدہ اٹھانے کی صلاحیت کی نشاندہی کرتی ہے۔ یہ قابل ذکر نمو اپنے اسٹیک ہولڈرز کو خاطر خواہ منافع فراہم کرنے میں بینک کی کامیابی کا ثبوت ہے۔

کریڈٹ: انڈیپنڈنٹ نیوز پاکستان-آئی این پی

پاکستان صنعت کاری کو تیز کرنے کے لیے خصوصی اقتصادی زونز کی ترقی کو تیز کرنے میں چینی تجربے سے سیکھ سکتا ہے۔ اسلام آباد اسٹریٹجک اسٹڈی انسٹی ٹیوٹ میں چائنا پاکستان اسٹڈی سینٹر کے ڈائریکٹر ڈاکٹر طلعت شبیر نے ویلتھ پاک سے گفتگو میں کہاکہ پاکستان چائنا پاکستان اکنامک کوریڈور کے دوسرے مرحلے میں داخل ہو گیا ہے جس میں کاروبار سے کاروبار پر توجہ مرکوز کی گئی ہے۔ خصوصی اقتصادی زونز سرمایہ کاری کو راغب کرنے، صنعت کاری کو فروغ دینے، مارکیٹ تک رسائی اور علاقائی رابطوں میں اضافہ کرنے میں اہم کردار ادا کرتے ہیں۔انہوں نے کہا کہ خصوصی اقتصادی زونز کی کامیابی کا انحصار واضح مقاصد پر ہے جن میں ان کی خصوصیات، تقابلی فائدہ اور مقام شامل ہیں۔انہوں نے کہا کہ چینی خصوصی اقتصادی زونز جن کا شمار دنیا کے بہترین اداروں میں ہوتا ہے، نے واضح طور پر ان مقاصد کی وضاحت کی ہے۔انہوں نے مزید کہاکہ اگر کسی خصوصی اقتصادی زونز کا بنیادی مقصد ملازمتیں پیدا کرنا ہے، تو پھر پالیسیوں کو محنت پر مبنی صنعتوں کے قیام کے لیے تیار کیا جانا چاہیے۔ انہوں نے کہا اگر مقصد برآمدات میں اضافہ کرنا یا ٹیکنالوجی کی منتقلی ہے، تو ایک پالیسی فریم ورک ان مقاصد کی عکاسی کرے۔ اسی طرح خصوصی اقتصادی زونز زیادہ کامیاب ہوں گے اگر وہ قومی صنعتی پالیسی کے مطابق تیار کیے جائیں۔ طلعت شبیر نے کہا کہ پاکستان کئی طریقوں سے چین سے نمایاں طور پر مختلف ہے۔

بہتر انفراسٹرکچر اور تجارتی سہولت کے ذریعے تعاون کیا جا سکتا ہے تاکہ غیر ملکی اور ملکی فرموں سے سرمایہ کاری کو راغب کیا جا سکے۔ انہوں نے زور دیا کہ پاکستان کو جلد از جلد سیاسی ہلچل پر قابو پانا چاہیے۔ یہ بھی ضروری ہے کہ حکومت ترقی کے لیے ایک طویل المدتی حکمت عملی کے لیے خود کو پابند کرے۔انہوں نے کہا کہ خصوصی اقتصادی زونز کو قومی قانونی فریم ورک کے اندر الگ الگ قوانین اور ادارہ جاتی ڈھانچے کے تحت چلنا چاہیے۔ انہوں نے مزید کہا کہ ورنہ، بہت کم ایف ڈی آئی چین اور دیگر معیشتوں سے آئے گی جو پاکستان کو اس کی برآمدی صلاحیت اور ترقیاتی مقاصد کا ادراک نہیں کرنے دے گی۔طلعت شبیر نے کہا کہ یہ ضروری ہے کہ جس صوبے میں ایک خصوصی اقتصادی زونز واقع ہے اس کی ترجیحات اور افرادی قوت کی صلاحیت کو مدنظر رکھتے ہوئے اس اقدام سے زیادہ سے زیادہ فائدہ اٹھانے کے لیے پالیسی وضع کی جائے گی۔سی پیک یقینا پاکستان کے لیے گیم چینجر ہے لیکن یہ ہماری صلاحیت کا امتحان بھی ہے۔ یہ سب ہماری صلاحیت پر منحصر ہے کہ وہ غیر ملکی سرمایہ کاری کے حوالے سے جو فوائد فراہم کرتا ہے اسے کس طرح زیادہ سے زیادہ حاصل کرنا ہے۔پاکستان کو وسیع تحقیق اور ترقی پر توجہ دے کر اپنی صلاحیتوں اور مسابقت کو بڑھانا چاہیے اور عالمی مارکیٹ کے رجحانات اور طلب کے نمونوں کا مطالعہ کرنا چاہیے وہ شعبے جو بین الاقوامی منڈیوں میں ترقی کی صلاحیت رکھتے ہیں۔

کریڈٹ: انڈیپنڈنٹ نیوز پاکستان-آئی این پی

پاکستان کو مارکیٹ میں موجودگی بڑھانے اور گوشت کی عالمی منڈی میں اپنا حصہ بڑھانے کے لیے حفاظتی معیارات کو بڑھانے اور مسابقتی رکاوٹوں کو دور کرنے کی ضرورت ہے۔سابق ڈائریکٹر جنرل لائیو سٹاک اینڈ ڈیری ڈویلپمنٹ ڈیپارٹمنٹ پنجاب ڈاکٹر منصور احمد نے ویلتھ پاک کو بتایا کہ پاکستان دنیا میں مویشیوں کی سب سے بڑی آبادی سے مالا مال ہے جس میں گوشت کی مصنوعات کی برآمدات کی بے پناہ صلاحیت ہے لیکن اسے حاصل کرنا ابھی باقی ہے۔ اس زبردست صلاحیت کو غیر مقفل کرنے اور زیادہ سے زیادہ مصنوعات اور مارکیٹ کے تنوع کے ذریعے عالمی ویلیو چین کو آگے بڑھانے کے لیے اس شعبے کو فارم کی سطح سے شروع ہونے والی ویلیو چین کے تمام مراحل پر ضروری ساختی بہتری کے حصول کے لیے اجتماعی طور پر کام کرنے کی ضرورت ہوگی۔ ہماری صنعت کو جانوروں کی سورسنگ، کم پیداوار، اور پاوں اور منہ کی بیماری کے پھیلا وسے متعلق چیلنجوں کا سامنا ہے جو برآمدات کو چند جغرافیائی مقامات تک محدود کرتے ہیں۔ مصنوعات اور منڈیوں کے لحاظ سے پاکستان کی برآمدی ٹوکری کا یہ زیادہ ارتکاز صنعت کو نقصان سے دوچار کرتا ہے۔ڈاکٹر منصور نے کہا کہ ہمیں مسابقتی رکاوٹوں کو دور کرنے پر توجہ مرکوز کرنے کی ضرورت ہے جیسے کہ پاوں اور منہ کی بیماری کا خاتمہ، جانوروں کو سورس کرنے کے زیادہ اخراجات اور کم پیداوار جو دوسری صورت میں برآمدات میں رکاوٹ بنتی ہیں۔

ڈاکٹر منصور نے کہاکہ دیگر خدشات جیسے کہ مویشیوں کا سراغ نہ لگنا اور متعدد میٹ پروسیسرز کی کوالٹی اور فوڈ سیفٹی کی ضروریات کو پورا کرنے میں ناکامی، جس کے نتیجے میں سب سے زیادہ درآمد کرنے والے ممالک میں پاکستانی گوشت تک رسائی محدود ہوتی ہے، کو بڑے پیمانے پر نمٹنا ہوگا۔انہوں نے کہاکہ ہمیں ماحولیاتی ذمہ داری، جانوروں کی دیکھ بھال، پیداواری ٹیکنالوجی، اپنے لوگوں کی پرورش اور دنیا بھر میں مارکیٹ شیئر کے لیے ہماری جاری جنگ کے عالمی چیلنجوں سے آگے رہنا چاہیے۔ اس سلسلے میں محکمہ لائیو سٹاک اینڈ ڈیری ڈویلپمنٹ پنجاب نے گوشت کی برآمد کو بڑھانے کا منصوبہ پیش کیا ہے۔ گوشت کی برآمدات کی کارکردگی کو بہتر بنانے کی کوشش میںلائیو سٹاک کے وزیر ابراہیم مراد نے اپنے وژن کا خاکہ پیش کیا ہے اور گوشت کی صنعت کو ایک اہم برآمدی شعبے کے طور پر بحال کرنے کے لیے اپنی توانائیاں وقف کر دی ہیں۔ اس کا مقصد گوشت کو ایک اہم برآمدی اجناس کے طور پر بلند کرنے کے لیے ہدف شدہ حکمت عملیوں کو نافذ کرنا ہے جس سے عالمی سطح پر اس کی مسابقت کو تقویت ملے گی۔وزیر نے کہاکہ ہم پاکستان کی مارکیٹ میں موجودگی کو بڑھانے اور مارکیٹ شیئر کو بڑھا کر عالمی گوشت کی صنعت میں اس کا مقام بلند کرنے کے لیے پرعزم ہیں۔ ہم اس بات پر پختہ یقین رکھتے ہیں کہ اسٹریٹجک اقدامات کو نافذ کرکے اور اہم اسٹیک ہولڈرز کے ساتھ تعاون کرکے ہم اس مقصد کو حاصل کرسکتے ہیں اور ملکی معیشت کی ترقی اور ترقی میں اپنا حصہ ڈال سکتے ہیں۔

کریڈٹ: انڈیپنڈنٹ نیوز پاکستان-آئی این پی

خیبر پختونخوا میں ڈینگی کے کیسز میں تیزی کے ساتھ اضافہ ہونے لگا ہے، جس کے بعد حکام نے 5 اضلاع کو ہائی رِسک قرار دیا ہے۔ حکام کے مطابق صوبے کے 5 اضلاع پشاور، مردان، صوابی، چارسدہ اور بٹگرام میں ڈینگی کیسز میں اضافہ دیکھنے میں آ رہا ہے، جس کے بعد انہیں ہائی رسک قرار دیا گیا ہے۔ صوبے میں ڈینگی کے متاثرہ کیسز کی تعداد بڑھ کر 165 ہو چکی ہے۔ صوبائی محکمہ صحت کے مطابق پشاور میں 38،مردان 32،صوابی 19،چارسدہ 14 اور بٹگرام میں 12 ڈینگی کے کیسز رپورٹ ہوئے ہیں۔ صوبے میں اب تک 20 اضلاع سے ڈینگی کے کیسز رپورٹ کیے جا چکے ہیں۔بعض اضلاع بنوں، ہنگو، تورغر، لکی مروت،خیبر اور ہری پور سے چند ہی کیسز کا اندراج ہوا ہے۔ نگران مشیر صحت نے ہائی رِسک اضلاع میں ڈینگی کی روک تھام کے لیے اقدامات سخت کرنے کی ہدایت کی ہے۔

کریڈٹ: انڈیپنڈنٹ نیوز پاکستان-آئی این پی

پاکستانی دستکاری نے 23 ویں چائنا انٹرنیشنل فیئر فار انویسٹمنٹ اینڈ ٹریڈ (سی آئی ایف آئی ٹی) میں دھوم مچا دی ، پاکستانی کڑھائی کی مصنوعات سیاحوں کی توجہ کا مرکز رہیں ، یہ پاکستانی کاریگروں کی غیر معمولی مہارت کا منہ بولتا ثبوت ہے۔ گوادر پرو کے مطابق 23 ویں چائنا انٹرنیشنل فیئر فار انویسٹمنٹ اینڈ ٹریڈ (سی آئی ایف آئی ٹی)چین کی وزارت تجارت کے زیر اہتمام 8 ستمبر سے 11 ستمبر تک شیامن انٹرنیشنل کنونشن اینڈ ایگزیبیشن سینٹر میں منعقد ہونے والی اہم ترین تقریبات میں سے ایک تھی ۔ گوادر پرو کے مطابق ثقافتی تبادلے اور اقتصادی تعاون کی غرض سے پاکستانی دستکاری کمپنی میگا انٹرنیشنل نے بین الاقوامی تعاون سے وابستہ نمائش ی علاقے میں روایتی دستکاری اور دستکاری مصنوعات کی شاندار نمائش کی جس نے سیاحوں اور سرمایہ کاروں کو یکساں طور پر محظوظ کیا۔ انہوں نے شاندار تراشے ہوئے اونیکس کے کام سے لے کر عمدہ کڑھائی والے ٹیکسٹائل تک پاکستان کے شاندار ثقافتی ورثے اور فنکارانہ صلاحیتوں کا مظاہرہ کیا۔ 23 ویں چائنا انٹرنیشنل فیئر فار انوسٹمنٹ اینڈ ٹریڈ (سی آئی ایف آئی ٹی) میں پاکستانی کڑھائی کی مصنوعات بڑی تعداد میں سیاحوں کو اپنی طرف متوجہ کرتی ہیں۔ گوادر پرو کے مطابق پاکستانی پویلین میں سب سے اہم کشش مسحور کن کڑھائی ہے جو پاکستانی کاریگروں کی غیر معمولی مہارت کا منہ بولتا ثبوت ہے۔ پیچیدہ دھاگے کا کام مختلف ٹیکسٹائل کی زینت بنتا ہے ، جس میں شال ، ملبوسات اور گھریلو سجاوٹ کی اشیا شامل ہیں۔ محنت سے کڑھائی کی گئی یہ شکلیں روایت، تاریخ اور ثقافتی تنوع کی کہانیاں بیان کرتی ہیں۔ زائرین محتاط دستکاری اور رنگوں کے ہم آہنگ امتزاج پر حیرت زدہ ہیں جو ہر ٹکڑے کو آرٹ کا کام بناتے ہیں۔ گوادر پرو کے مطابق نمائش کنندہ فیصل رشید نے 23 ویں چین انٹرنیشنل فیئر فار انویسٹمنٹ اینڈ ٹریڈ )سی آئی ایف آئی ٹی( میں چینی زائرین کو پاکستانی دستکاریوں کا تعارف کرایا۔

کمپنی کے مالک فیصل رشید سی آئی ایف آئی ٹی میں اپنے تجربے سے کافی مطمئن تھے، جہاں متعدد مہمانوں نے نمائش میں ان کی دستکاریوں میں دلچسپی کا اظہار کیا۔ بہت سے شرکا نے انہیں بتایا کہ وہ پاکستانی مصنوعات کے معیار، دستکاری اور انفرادیت سے متاثر ہیں۔ گوادر پرو کے مطابق فیصل نے میلے کے بارے میں اپنے جوش و خروش کا اظہار کرتے ہوئے کہا کہ "سی آئی ایف آئی ٹی ہمارے لئے اپنے کاریگروں کی منفرد دستکاری اور صلاحیتوں کو پیش کرنے اور دنیا بھر کے ممکنہ خریداروں اور سرمایہ کاروں کے ساتھ روابط قائم کرنے کے لئے ایک مثالی پلیٹ فارم فراہم کرتا ہے، انہوں نے میلے کے بارے میں اپنے جوش و خروش کا اظہار کرتے ہوئے کہا کہ "یہ ایونٹ نہ صرف ہمیں اپنی مصنوعات کو فروغ دینے کی اجازت دیتا ہے بلکہ پاکستان کے ثقافتی ورثے کی گہری تفہیم اور تعریف کو بھی فروغ دیتا ہے۔ دونوں ممالک کے درمیان ثقافتی تبادلے اور افہام و تفہیم کو مزید آسان بنانا۔یہ چھٹی بار ہے جب فیصل نے سی آئی ایف آئی ٹی میں حصہ لیا ہے اور اس سال ان کی توقعات اور بھی زیادہ ہیں۔ "ہم نے پچھلے سال یہاں کچھ بڑے گاہکوں سے ملاقات کی اور پرانے دوستوں سے ملنے کے لئے اس موقع کا فائدہ اٹھانا اچھا ہے. پاکستانی دستکاریوں کو ان کے عمدہ ڈیزائن اور اعلی معیار کی وجہ سے زائرین کی طرف سے بڑے پیمانے پر خوش آمدید کہا جاتا ہے۔ چینی دوستوں کا پاکستانی آئرن برادران کی تیار کردہ مصنوعات پر اعتماد بھی ایک اہم عنصر ہے۔ انہوں نے کہا کہ سی آئی ایف آئی ٹی ایک محرک کے طور پر کام کر رہا ہے اور عالمی مارکیٹ میں اپنی موجودگی بڑھانے کی خواہش مند پاکستانی کمپنیوں کے لیے مستقبل امید افزا نظر آتا ہے۔ مجھے امید ہے کہ سی آئی ایف آئی ٹی میں ہماری شرکت سے نئی مارکیٹوں اور تعاون کے دروازے کھلیں گے اور پاکستان کی امیر فنکارانہ صلاحیتوں کے تحفظ اور فروغ کو یقینی بنایا جائے گا۔"اوپن اینڈ انٹیگریٹڈ: اعلی معیار کی ترقی کی کلید" کے عنوان سے منعقد ہونے والے 23 ویں سی آئی ایف آئی ٹی نے 102 ممالک اور خطوں کے ساتھ ساتھ 14 بین الاقوامی تنظیموں کی شرکت کو راغب کیا ہے۔

کریڈٹ: انڈیپنڈنٹ نیوز پاکستان-آئی این پی

اسلام آباد کی احتساب عدالت نے بشری بی بی کی 190 ملین پانڈ کیس میں ضمانت منظور جبکہ توشہ خانہ کیس میں عبوری ضمانت میں توسیع کر دی۔ احتساب عدالت اسلام آباد کے جج محمد بشیرنے بشری بی بی کی توشہ خانہ اور 190 ملین پاونڈزکیس میں ضمانت کی درخواست پر سماعت کی، بشری بی بی اپنے وکیل کے ہمراہ پیش ہوئیں۔ وکیل بشری بی بی نے موقف اپنایا کہ بشری بی بی کی دو بجے چیئرمین پی ٹی آئی سے اٹک جیل میں ملاقات ہے، نیب نے بھی دو بجے کیلئے طلبی کے نوٹسز بھیج دیئے، گرفتاری مطلوب ہے تو پہلے آگاہ کیا جائے۔ نیب پراسیکیوٹر نے موقف اپنایا کہ نیب طلبی کا معاملہ عدالت کا نہیں، توشہ خانہ کیس میں فی الحال بشری بی بی کی گرفتاری درکار نہیں۔ عدالت نے بشری بی بی کی ایک لاکھ روپے کے مچلکوں کے عوض 26 ستمبر تک عبوری ضمانت منظور کر لی، جبکہ توشہ خانہ کیس میں عبوری ضمانت میں بھی 26 ستمبر تک توسیع کر دی گئی۔

کریڈٹ: انڈیپنڈنٹ نیوز پاکستان-آئی این پی

پشاور میں چوری کے پیسوں میں حصہ نہ دینے پر دوستوں کے ہاتھوں دوست کے قتل کا ڈراپ سین ہوگیا۔ پولیس کے مطابق پشاور کے علاقہ داودزئی میں 2 نوجوانوں کے قتل کیس کا ڈراپ سین ہوگیا، مقتولین کے قاتل قریبی دوست نکلے جس کے بعد واردات میں ملوث دونوں ملزمان کو گرفتار کرلیا گیا ہے۔ پولیس کا بتانا ہے کہ مقتول داد نے اپنے دوست سجاد کے ہمراہ سسرالیوں کے گھر سے پیسے چوری کیے تھے، چوری کے پیسوں میں حصہ نہ دینے پر دیگر 2 دوستوں نے داد اور سجاد کا قتل کیا۔ پولیس نے بتایا کہ 2 نوجوانوں کے قتل کا ڈرامہ یکم ستمبر کو ہوا تھا۔

کریڈٹ: انڈیپنڈنٹ نیوز پاکستان-آئی این پی

پاکستان سمیت دنیا بھر میں عالمی یوم جمہوریت15ستمبر کومنایا جائے گااس دن کے منانے کا مقصد غیر جمہوری طاقتوں کا راستہ روکنے اور جمہوریت کیلئے ہر قسم کی قربانی دینے کیلئے عوامی شعور اجاگر کرنا ہے اس سلسلے میں ملک بھر میں سیاسی و سماجی جماعتوں اور تنظیموں کے زیر اہتمام مذاکرے،سیمینارز اور دیگر تقریبات کا اہتمام کیا جائے گا جس سے خطاب کرتے ہوئے مقررین ملکی ترقی میں جمہوریت کے کردار اور اہمیت پر تفصیل سے روشنی ڈالیں گے۔اقوام متحد ہ کی جنرل اسمبلی نے 2007ء میں جمہوریت کے عالمی دن کے منانے کا اعلان کیا 15ستمبر 2008ء کو دنیا بھر میں پہلی مرتبہ جمہوریت کا عالمی دن منایا گیا تھا۔

کریڈٹ: انڈیپنڈنٹ نیوز پاکستان-آئی این پی

پاکستان مسلم لیگ(ن)کے سینئر رہنما اور سینیٹر رانا مقبول احمد انتقال کرگئے، رانا مقبول احمد کچھ عرصے سے علیل تھے۔ چیئرمین سینیٹ صادق سنجرانی نے سینیٹر رانا مقبول کے بیٹے سے ٹیلیفونک رابطہ کیا، انہوں نے رانا مقبول کے بیٹے رانا طلال سے والد کے انتقال پر تعزیت کی۔ صادق سنجرانی کا کہنا تھا کہ سینیٹر رانا مقبول ایک بہترین سیاسی ورکر اور پارلیمنٹرین تھے، سینیٹر رانا مقبول نے پولیس سروس کی وجہ سے فوجداری قوانین سے متعلق بہترین قانون سازی بھی کی۔

کریڈٹ: انڈیپنڈنٹ نیوز پاکستان-آئی این پی

انسداد دہشتگردی عدالت نے جناح ہاوس پر حملے کے کیس میں سابق گورنر پنجاب عمر سرفراز چیمہ کی درخواست ضمانت خارج کر دی۔ لاہور کی انسداد دہشتگردی عدالت میں رہنما تحریک انصاف عمر سرفراز چیمہ کی دو مقدمات میں درخواست ضمانت پر سماعت ہوئی، اے ٹی سی کی ایڈمن جج عبہر گل خان نے عمر سرفراز چیمہ کی درخواست پر سماعت کی۔ عدالت نے جناح ہاوس حملے کے مقدمہ میں ملزم کے دوبارہ جسمانی ریمانڈ ہونے کے باعث درخواست خارج کر دی، عدالت نے درخواست ضمانت کو غیر موثر قرار دیتے ہوئے ریمارکس میں کہا کہ مقدمہ میں بغاوت سمیت دیگر نئی دفعات شامل ہونے پر ملزم کا دوبارہ جسمانی ریمانڈ منظور ہوا۔ سابق گورنر پنجاب عمر سرفراز چیمہ نے عسکری ٹاور حملہ کیس میں بھی درخواست ضمانت دائر کر رکھی ہے، اے ٹی سی نے عسکری ٹاور حملہ کیس میں درخواست ضمانت پر سماعت ملتوی کر دی۔ خیال رہے کی عمر سرفراز چیمہ پر عسکری ٹاور اور جناح ہاوس پر حملے کا الزام ہے، عسکری ٹاور حملے کا مقدمہ تھانہ گلبرگ جبکہ جناح ہاوس حملے کا مقدمہ تھانہ سرور روڈ میں درج ہے۔

کریڈٹ: انڈیپنڈنٹ نیوز پاکستان-آئی این پی

190 ملین پانڈز سکینڈل میں سابق وفاقی وزیر داخلہ شیخ رشید نے نیب تحقیقاتی ٹیم کے سامنے پیش ہونے سے انکار کر دیا۔ شیخ رشید نے نیب تحقیقاتی ٹیم کو طلبی کے نوٹس پر جوابی خط ارسال کر دیا۔ سابق وفاقی وزیر کی جانب سے جوابی خط میں کہا گیا ہے کہ القادر ٹرسٹ اور 190 ملین پانڈز کیس کا کچھ علم ہے نہ ہی کوئی معلومات، القادر ٹرسٹ کیس میں گواہ بھی نہیں ہوں، طلبی کا نیب نوٹس غیر قانونی ہے واپس لیا جائے۔ واضح رہے کہ نیب راولپنڈی نے سابق وزیر داخلہ شیخ رشید احمد کو آج پیش ہونے کی ہدایت کی تھی، قومی احتساب بیورو نے شیخ رشید احمد کو کیس سے متعلقہ دستاویزات بھی ہمراہ لانے کا حکم دیا تھا۔

کریڈٹ: انڈیپنڈنٹ نیوز پاکستان-آئی این پی

نگران وزیراعظم انوارالحق کاکڑ کودوروزہ دورہ پر گلگت میں گارڈ آف آنر پیش کیا گیا، نگران وزیراعظم نے گلگت میں یادگارشہداء حاضری دی ،پھول چڑھائے اور فاتحہ خوانی کی۔منگل کے روزنگران وزیراعظم انوارالحق کاکڑ دوروزہ دورہ پر گلگت پہنچ گئے،نگران وزیراعظم نے بطور مہمان خصوصی یادگارشہدا پر گارڈ آف آنر کی تقریب میں شرکت کی،تقریب کا آغاز قومی ترانے سے کیا گیا،نگران وزیراعظم کو وزیراعلیٰ سیکرٹریٹ میں گارڈ آف آنرپیش کیا گیا،نگران وزیراعظم نے یادگارشہدا پر حاضری دی،نگران وزیراعظم انوارالحق کاکڑ نے یادگارشہداء پر پھول چڑھائے اور فاتحہ خوانی کی،چیف سیکرٹری نگران وزیراعظم کے ہمراہ رہے،چیف سیکرٹری نے نگران وزیراعظم کو مختلف امور پر بریفینگ دی، نگران وزیراعظم نے سکول کی بچوں سے ملاقات کی،ملاقات کے دوران نگران وزیراعظم کو بچوں کی جانب سے تعلیمی ماڈلز کا معائنہ بھی کیا،نگران وزیراعظم انوارالحق کاکڑ نے بچوں کی تعلیمی ماڈلز کو بھرپور طریقے سے سراہا۔

کریڈٹ: انڈیپنڈنٹ نیوز پاکستان-آئی این پی

لیسکو ریجن میں بجلی چوروں کے خلاف آپریشن چھ روز سے جاری ہے، اس دوران 100 سے زائد مقدمات درج کرلیے گئے ہیں۔ ترجمان لاہور الیکٹرک سپلائی کمپنی کے مطابق لیسکو ریجن میں بجلی چوروں کے خلاف آپریشن چھٹے روز بھی بھرپور طریقے سے جاری ہے۔ چیف ایگزیکٹو انجینیر شاہد حیدر نے کہا ہے کہ بجلی چوروں کو کیفر کردار تک پہنچائیں گے۔ وزیراعظم، اور وزارت توانائی کی ہدایات پر لیسکو ریجن میں بجلی چوروں کے خلاف آپریشن کے چھٹے دن تمام سرکلز میں 205 کنکشنز بجلی چوری میں ملوث پائے گئے۔ تمام بجلی چوروں کے خلاف ایف آئی آرز کی درخواستیں متعلقہ تھانوں میں دائر کر دی گئی ہیں جن میں سے105ایف آئی آرز رجسٹرڈ ہو چکی ہیں جب کہ ایک ملزم کو گرفتار بھی کیا گیاہے۔پکڑے جانے والے کنکشنز میں ایک زرعی،6کمرشل اور198ڈومیسٹک تھے۔ تمام کنکشنز منقطع کر کے ان کو443,875 یونٹس ڈٹیکشن بل کی مد میں چارج کیے گئے ہیں جن کی رقم 18,522,713 (ایک کروڑ 85 لاکھ 22 ہزار 713)روپے ہے۔ بجلی چوروں کے خلاف کیے جانے والے آپریشن میں بڑے زرعی اور کمرشل صارفین بھی بجلی چوری میں ملوث پائے گئے۔ ترجمان کے مطابق 1497کنکشنز کے خلاف ایف آئی آر کی درخواستیں جمع کروائی گئیں جن میں سے 947درخواستیں رجسٹرڈ ہو چکی ہیں اورکل 86ملزمان کو گرفتار کیا گیا ہے۔ بجلی چوروں کو اب تک4,775,973یونٹس چارج کیے گئے ہیں جن کی رقم (201,751,130) 20 کڑور 17 لاکھ 51 ہزار 130 روپے ہے۔

کریڈٹ: انڈیپنڈنٹ نیوز پاکستان-آئی این پی

لاہور ہائیکورٹ نے عدالت عالیہ کے 11 ججز کو 36 کروڑ روپے کے بلاسود قرض کی حکومتی منظوری کے خلاف درخواست کیساتھ مصدقہ دستاویزات لف کرنے کی ہدایت کر دی۔ لاہور ہائیکورٹ میں عدالت عالیہ کے 11 ججز کو بلا سود قرضوں کی منظوری کے خلاف درخواست پر سماعت ہوئی، جسٹس شمس محمود مرزا نے شہری مشکور حسین کی درخواست پر سماعت کی، عدالت عالیہ نے درخواست پر رجسٹرار آفس کے اعتراضات کو ختم کر کے دوبارہ درخواست دائر کرنے کی ہدایت کر دی۔ عدالت عالیہ نے درخواست گزار پر متاثرہ فریق نہ ہونے کا اعتراض ختم کر دیا، ہائیکورٹ نے درخواست گزار کو ججز کو قرض دینے سے متعلق مصدقہ دستاویزات بھی درخواست کیساتھ لگانے کی ہدایت کی ہے۔ درخواست گزار کی جانب سے مقف اختیار کیا گیا تھا کہ ججز کو بلاسود قرضہ فراہم کرنا غیر قانونی اقدام ہے، ججز پہلے ہی بے شمار مراعات حاصل کر رہے ہیں، عوام کے ٹیکس کے پیسے کا نگران حکومت بے دریغ استعمال نہیں کر سکتی، درخواست میں چیف سیکرٹری ،سیکرٹری فنانس سمیت دیگر کو فریق بنایا گیا تھا۔ لاہور ہائیکورٹ سے درخواست میں استدعا کی گئی کہ عدالت نگران حکومت کی جانب سے ججز کو قرضے دینے کی منظوری کالعدم قرار دے، عدالت ججز کو قرضے دینے کے اقدام کو غیر قانونی قرار دے، پٹیشن کے حتمی فیصلہ تک ججز کو قرضہ دینے کا اقدام معطل کیا جائے۔

کریڈٹ: انڈیپنڈنٹ نیوز پاکستان-آئی این پی

صدرمملکت نے فواد حسن فواد کو نگران وفاقی وزیر مقررکردیا۔منگل کے روز صدرمملکت ڈاکٹرعارف علوی نے فواد حسن فواد کونگران وفاقی کابینہ میں وفاقی وزیرمقررکردیا،صدرمملکت نے نگران وفاقی وزیر کی تقرری نگران وزیراعظم کی ایڈوائس پر جاری کردی۔

کریڈٹ: انڈیپنڈنٹ نیوز پاکستان-آئی این پی

کرنسی اور تیل کے بعد اب چینی،کھاد اورگندم اسمگلنگ کی رپورٹ بھی وزیراعظم سیکرٹریٹ میں جمع کرادی گئی۔ چینی،کھاد اورگندم کی پاکستان سے اسمگلنگ کے بارے میں تفصیلات رپورٹ کا حصہ ہیں جب کہ گندم،کھاد،چینی کے اسمگلرز اور سرکاری اہلکاروں کی تفصیلات بھی رپورٹ میں شامل کی گئی ہیں۔ نجی ٹی وی کے مطابق رپورٹ میں گندم کی اسمگلنگ میں ملوث 592 ذخیرہ اندوزں کی نشاندہی کی گئی ہے جب کہ گندم کی اسمگلنگ میں 26 اسمگلرز شامل ہیں۔ رپورٹ میں مزید بتایا گیا کہ گزشتہ سال آئی بی نے 417 رپورٹس متعلقہ محکموں کو بجھوائی، حساس ادارے کی نشاندہی پر90147 میٹرک ٹن ذخیرہ شدہ اور اسمگل ہونے والی گندم قبضے میں لی گئی۔ رپورٹ میں اسمگلرزکی مدد کرنے والے 259 اہلکاروں کی نشاندہی کی گئی ہے، صوبائی حکومتوں میں تعینات اہلکار اسمگلرز، ذخیرہ اندوزں کی مدد فراہم کرتے ہیں۔ رپورٹ کے مطابق پنجاب میں272، سندھ میں244 اورکے پی میں56 سرکاری اہلکار اسمگلرز کے مددگار ہیں جب کہ بلوچستان میں 15 اور اسلام آباد میں 5 اہلکار اسمگلرزکیساتھی ہیں۔ واضح رہے کہ اس سے قبل حساس ادارے کی رپورٹ میں انکشاف کیا گیا تھا کہ ایرانی تیل کے کاروبار میں 29 سیاستدان بھی ملوث ہیں۔

کریڈٹ: انڈیپنڈنٹ نیوز پاکستان-آئی این پی

اسلام آباد ہائیکورٹ نے سائفر کیس کی سماعت اٹک جیل میں کرنے کے خلاف چیئرمین پی ٹی آئی کی درخواست پر فیصلہ محفوظ کر لیا۔چیف جسٹس عامر فاروق نے کیس کی سماعت اور چیئرمین پی ٹی آئی کے وکیل شیر افضل مروت عدالت کے سامنے پیش ہوئے، وکیل نے وزارت قانون کے نوٹیفکیشن کو عدالت کے سامنے پڑھا۔ وکیل شیر افضل مروت نے دلائل میں کہا کہ وزارت قانون نے کس قانون اور کس اختیار کے تحت عدالت اٹک جیل منتقل کی، اسلام آباد سے ٹرائل کیسے پنجاب میں منتقل ہو سکتا ہے؟ ٹرائل کی دوسرے صوبے منتقلی قانونی طور صرف سپریم کورٹ کر سکتی ہے، چیف کمشنر یا سیکرٹری داخلہ کا اختیار نہیں کہ وہ ٹرائل دوسرے صوبے منتقل کریں۔ وکیل نے دلائل میں کہا کہ اگر ٹرائل تبدیلی کرنی تھی تو ان کو ٹرائل جج سے پوچھنا تھا لیکن نہیں پوچھا گیا، چیئرمین پی ٹی آئی کو اٹک جیل میں رکھنے کی کوئی وجہ نہیں جبکہ انکی توشہ خانہ کیس میں ضمانت ہو چکی ہے لیکن سابق وزیراعظم اس وقت جوڈیشل حراست میں ہیں۔ شیر افضل مروت نے دلائل جاری رکھتے ہوئے کہا کہ سماعت کا مقام تبدیل کرنے کے پیچھے بدنیتی ہے کیونکہ سماعت کا مقام تبدیل کرنے کے نوٹیفکیشن کا مقصد چیئرمین پی ٹی آئی کو اٹک جیل میں رکھنا تھا اور ابھی تک یہ نہیں بتایا گیا کہ یہ نوٹیفکیشن کس قانون کے تحت جاری کیا گیا، آفیشل سیکرٹ کے تحت سویلین کا ٹرائل سپیشل کورٹ میں ہوتا ہے۔ اس کے ساتھ جیل ٹرائل اور جج تعیناتی کے خلاف درخواست پر چیئرمین پی ٹی آئی کے وکیل کے دلائل مکمل ہو گئے۔ ایڈیشنل اٹارنی جنرل منور اقبال دوگل نے اپنے دلائل میں کہا کہ جیل ٹرائل سے متعلق نوٹیفکیشن ایک دفعہ کے لیے تھا اور نوٹیفکیشن جب ایک دفعہ کے لیے تھا تو ان کی پٹیشن غیر موثر ہو چکی ہے، رولز آف بزنس میں وزارت قانون کے پاس نوٹیفکیشن جاری کرنے کا اختیار ہے اور وزارت قانون نے صرف این او سی جاری کیا تھا، سائفر کیس میں عدالت کی مقام تبدیلی صرف ایک بار کے لیے تھی۔

عدالت نے وزارت قانون کے نوٹیفکیشن کی وضاحت طلب کر رکھی تھی جس پر ایڈیشنل اٹارنی جنرل نے معلومات لے کر عدالت کو آگاہ کیا۔ ایڈیشنل اٹارنی جنرل نے عدالت کو بتایا کہ 30 اگست کو سائفر کیس کی سماعت کے لیے عدالت اٹک جیل منتقل کی گئی تھی، یہ نوٹیفکیشن وزارت قانون نے کیا اور اسی کا ہی اختیار تھا، وزارت قانون نے این او سی جاری کیا کہ وینیو تبدیلی پر کوئی اعتراض نہیں۔ منور اقبال دوگل نے کہا کہ اس سے پہلے دو ججز اسی بنیاد پر تعینات ہوتے رہے ہیں، ایڈیشنل سیشن جج فیضان حیدر گیلانی بھی اسی طرح تعینات ہوتے رہے اور جج راجہ جواد عباس کی تعیناتی بھی اسی طرح ہی ہوئی ہے۔ چیئرمین پی ٹی آئی کے وکیل شیر افضل مروت نے کہا کہ یہ کہا گیا کہ میرا نوٹیفکیشن غیر موثر ہوگیا یہ نہیں کہہ سکتے۔ عدالت نے استفسار کیا کہ غیر موثر کی حد تک یہ ہے کہ اگر کل دوبارہ آپ کر دیں پھر کیا ہوگا؟ یہ طے تو ہونا ہے کہ نوٹیفکیشن کس اختیار کے تحت کر سکتے ہیں؟ ایڈیشنل اٹارنی جنرل نے بتایا کہ انسداد دہشت گردی عدالت کے جج کو سائفر عدالت کا اختیار دینا قانون کے مطابق ہے، فرسٹ کلاس مجسٹریٹ یا اس سے اوپر کے کسی بھی جج کو اختیار دیا جا سکتا ہے۔ پراسیکیوٹر ذوالفقار نقوی نے کہا کہ عدالت کا مقام تبدیل کرنے کی درخواست غیرموثر ہو چکی ہے۔ چیف جسٹس عامر فاروق نے ریمارکس دئیے کہ اگر کل دوبارہ وہی نوٹیفکیشن کر دیا جائے تو یہی سوال متعلقہ ہو جاتا ہے، یہ طے ہونا چاہیے کہ عدالت کا مقام تبدیل کرنے کا اختیار کس کا ہے، درخواست غیرموثر ہونے والی بات سے میں اتفاق نہیں کرتا۔

پراسیکیوٹر ذوالفقار عباس نقوی نے کہا کہ جوڈیشل ریمانڈ کے لیے ملزم کو عدالت کے سامنے پیش کرنا ضروری نہیں البتہ جب جسمانی ریمانڈ ہو تو ملزم کو پیش کیا جانا لازم ہے۔ چیئرمین پی ٹی آئی کے وکیل شیر افضل مروت نے دلائل میں کہا کہ جوڈیشل ریمانڈ میں بھی ملزم کو پیش کرنے سے کوئی استثنی نہیں ہے، اگر پہلا آرڈر بلاجواز اور غیر قانونی تھا تو اس کے نتائج تو ہونگے، ہماری درخواست کے جواب میں یہ کہہ دینا کہ نوٹیفکیشن غیر موثر ہوگیا ہے یہ کافی نہیں، عدالت کے سامنے سوال یہ ہے کہ چیئرمین پی ٹی آئی کس قانون کے تحت اٹک جیل میں ہیں؟ اس پر آنکھیں تو بند نہیں کی جا سکتیں۔ شیر افضل مروت نے کہا کہ کسی کے پاس کوئی قانونی جواب ہے؟ کیوں چیئرمین پی ٹی آئی اٹک جیل میں ہیں؟ ایک بار اٹک جیل کا نوٹیفکیشن ہوگیا کل کو لانڈھی جیل کا ہوجائے تو کیا ہم وہاں جائیں گے؟ ہماری ایک اور درخواست پر فیصلہ محفوظ ہے لہذا ہماری استدعا ہے کہ محفوظ فیصلہ سنایا جائے، فیصلوں میں تاخیر کی وجہ سے ہم مشکلات کا شکار ہو رہے ہیں۔ بعدازاں چیف جسٹس اسلام آباد ہائیکورٹ جسٹس عامر فاروق نے ریمارکس دئیے کہ میں اس پر بھی آرڈر پاس کروں گا اور ساتھ ہی عدالت نے دلائل کے بعد فیصلہ محفوظ کر لیا۔

کریڈٹ: انڈیپنڈنٹ نیوز پاکستان-آئی این پی