جیوچھوان (شِنہوا) چین نے 3 خلابازوں کے ساتھ شین ژو -16 انسان بردار خلائی جہاز لانچ کردیا ہے جو 5 ماہ تک خلائی اسٹیشن پر قیام کر ے گا۔
چائنہ مینڈ اسپیس ایجنسی نے منگل کے روز بتایا کہ یہ خلائی جہاز لانگ مارچ ۔2 ایف راکٹ کے ذریعے خلا میں بھیجا گیا اور اس نے صبح 9 بج کر 31 منٹ (بیجنگ وقت) پر چین کے شمال مغربی جیو چھوان سیٹلائٹ لانچ مرکز سے اڑان بھری۔
چائنہ مینڈ اسپیس ایجنسی نے بتایا کہ لانچ کے تقریباً 10 منٹ بعد شین ژو-16 راکٹ سے الگ ہو کر مقرر کردہ مدار میں داخل ہوگیا۔ لانچ کامیاب رہی اور عملے کے ارا کین خیریت سے ہیں۔
مدار میں داخل ہونے کے بعد شین ژو -16 خلائی جہاز خلائی اسٹیشن کے امتزاج کے ساتھ تیز رفتار، خودکار طریقے سے لنگرانداز ہوگا اور شین ژو -16 کا عملہ شین ژو-15 کے عملے کے ساتھ مدار میں گردش کرے گا۔
شین ژو -16 کے خلاباز منصوبہ کے مطابق مختلف شعبوں میں بڑے پیمانے پر مدار میں تجربات کریں گے۔ توقع ہے کہ وہ نئے کوانٹم مظاہرے کے مطالعہ ، اعلیٰ سطح کی خلائی ٹائم فریکوئنسی نظام ، عمومی اضافیت کی تصدیق اور زندگی کی ابتدا بارے مطالعہ میں اعلیٰ سطح کی سائنسی کامیابیاں حاصل کریں گے۔
عملہ جنگ ہائی پھینگ ، ژو یانگ ژو اور گوئی ہائی چھاؤ پر مشتمل ہے جو شین ژو ۔17 اور تیان ژو۔ 5 مال بردار جہاز کے لنگرانداز ہونے کے علاوہ شین ژو۔ 15 اور تیان ژو۔ 5 کی روانگی کا مشاہدہ کرے گا۔
یہ چین کے خلائی اسٹیشن کے اطلاق اور ترقی کے مرحلے میں داخل ہونے کے بعد پہلا عملہ بردار مشن ہے جبکہ ملک کے انسان بردار خلائی پروگرام کی منظوری اور آغاز کے بعد سے 29 واں پرواز مشن ہے۔
یہ لانچ لانگ مارچ کیریئر راکٹ سیریز کا 475 واں پرواز مشن بھی ہے۔
خلائی اسٹیشن کا امتزاج اب ملاقات اور لنگرانداز ہونے کے لئے مدار میں موجود ہے۔ یہ درست حالت میں ہے اور یہ شین ژو -16 کے لنگرانداز ہونے اور عملے کے داخل ہونے کا منتظر ہے۔
