نٹ ویئر کی برآمدات میں جاری مالی سال کے پہلے 9 ماہ میں سالانہ بنیادوں پر9فیصد کی کمی ریکارڈ کی گئی ہے۔ پاکستان بیورو برائے شماریات کی طرف سے جاری کردہ اعدادوشمارکے مطابق مالی سال کے پہلے 9 ماہ میں نٹ ویئرکی برآمدات سے ملک کو3.39ارب ڈالر کا زرمبادلہ حاصل ہوا جو گزشتہ مالی سال کی اسی مدت کے مقابلے میں 9فیصد کم ہے۔گزشتہ مالی سال کی اسی مدت میں نٹ ویئر کی برآمدات سے 3.73ارب ڈالرکا زرمبادلہ حاصل ہوا۔مارچ میں نٹ ویئرکی برآمدات کا حجم 311ملین ڈالرریکارڈ کیا گیا جوگزشتہ سال مارچ کے مقابلے میں 27فیصد کم ہے۔ گزشتہ سال مارچ میں نٹ ویئرکی برآمدات کا حجم 425ملین ڈالر ریکارڈ کیا گیا تھا۔فروری کے مقابلے میں مارچ میں نٹ ویئر کی برآمدات میں ماہانہ بنیادوں پر12فیصد کی نمو ریکارڈ کی گئی۔ فروری میں نٹ ویئر کی برآمدات کا حجم 277ملین ڈالر ریکارڈ کیا گیا جو مارچ میں بڑھ کر311ملین ڈالر ہوگیا۔

کریڈٹ: انڈیپنڈنٹ نیوز پاکستان-آئی این پی

مینوفیکچرنگ گروپ کی برآمدات میں جاری مالی سال کے پہلے 9 ماہ میں سالانہ بنیادوں پر1.9فیصد کی کمی ریکارڈ کی گئی ہے۔پاکستان بیورو برائے شماریات کی جانب سے جاری کردہ اعدادوشمارکے مطابق جولائی سے مارچ تک کی مدت میں مینوفیکچرنگ گروپ کی برآمدات کا حجم 2.92ارب ڈالر ریکارڈ کیا گیا جو گزشتہ مالی سال کی اسی مدت میں 2.98ارب ڈالر تھا۔مارچ میں مینو فیکچرنگ گروپ کی برآمدات سے 327ملین ڈالرکا زرمبادلہ حاصل ہوا جوگزشتہ سال مارچ کے مقابلے میں 4.8فیصد کم ہے۔ گزشتہ سال مارچ میں مینوفیکچرنگ گروپ کی برآمدات سے ملک کو343ملین ڈالر کا زرمبادلہ حاصل ہوا تھا۔ فروری کے مقابلے میں مارچ میں مینوفیکچرنگ گروپ کی برآمدات میں ماہانہ بنیادوں پر16فیصد کی نمو ریکارڈ کی گئی ہے۔فروری میں مینو فیکچرنگ گروپ کی برآمدات کا حجم 282ملین ڈالر ریکارڈ کیا گیا جو مارچ میں بڑھ کر327 ملین ڈالر ہوگیا-

کریڈٹ: انڈیپنڈنٹ نیوز پاکستان-آئی این پی

ملک میں ایل پی جی کی درآمدات میں جاری مالی سال کے پہلے 9 ماہ میں سالانہ بنیادوں پر4فیصد کا اضافہ ریکارڈ کیا گیا ہے۔پاکستان بیورو برائے شماریات کی طرف سے جاری کردہ اعدادوشمارکے مطابق مالی سال کے پہلے 9 ماہ میں ایل پی جی کی درآمدات کا حجم 533 ملین ڈالر ریکارڈ کیا گیا جو گزشتہ مالی سال کی اسی مدت کے مقابلے میں 4فیصد زیادہ ہے۔گزشتہ مالی سال کی اسی مدت میں ایل پی جی کی درآمدات کا حجم 514ملین ڈالر ریکارڈ کیا گیا تھا۔مارچ میں ایل پی جی کی درآمدات کا حجم 44ملین ڈالر ریکارڈ کیا گیا جو گزشتہ سال مارچ کے مقابلے میں 29فیصد کم ہے۔ گزشتہ سال مارچ میں ایل پی جی کی درآمدات کاحجم 61ملین ڈالر ریکارڈ کیا گیا تھا۔ فروری کے مقابلے میں مارچ میں ایل پی جی کی درآمدات میں ماہانہ بنیادوں پر28فیصد کی کمی ریکارڈ کی گئی۔ فروری میں ایل پی جی کی درآمدات پر61ملین ڈالر کا زرمبادلہ صرف ہوا جو مارچ میں کم ہوکر44 ملین ڈالر ہوگیا۔

کریڈٹ: انڈیپنڈنٹ نیوز پاکستان-آئی این پی

کپڑے اور ملبوسات بنانے والی کمپنی ''انٹرلوپ'' کے بعد از ٹیکس منافع میں جاری مالی سال کے پہلے 9 ماہ میں سالانہ بنیادوں پر103فیصد کی نمو ریکارڈ کی گئی ہے۔کمپنی کی طرف سے جاری کردہ مالیاتی بیان کے مطابق مالی سال کے پہلے 9 ماہ میں انٹر لوپ کو14.16ارب روپے کا بعد از ٹیکس منافع حاصل ہوا جو گزشتہ مالی سال کی اسی مدت میں 6.99 ارب روپے تھا۔ مالی سال کی تیسری سہ ماہی میں کمپنی کو9.58ارب روپے کا بعد از ٹیکس منافع حاصل ہوا جو گزشتہ مالی سال کی تیسری سہ ماہی میں 2.27ارب روپے تھا۔ مالی سال کی پہلی سہ ماہی میں کمپنی کی فی حصص آمدنی 15.17 روپے ریکارڈ کی گئی جو گزشتہ سال کی اسی مدت میں 6.99 روپے تھی۔

کریڈٹ: انڈیپنڈنٹ نیوز پاکستان-آئی این پی

میزان بینک لمیٹڈ کے بعد از ٹیکس منافع میں کیلنڈر سال کی پہلی سہ ماہی میں سالانہ بنیادوں پر68فیصد کی نمو ریکارڈ کی گئی ہے۔ بینک کی طرف سے جاری کردہ مالیاتی بیان کے مطابق جنوری سے مارچ تک کی مدت میں میزان بینک کو15.44ارب روپے کا بعد از ٹیکس منافع حاصل ہوا جو گزشتہ سال کی اسی مدت کے مقابلے میں 68فیصد زیادہ ہے۔گزشتہ سال کی اسی مدت میں میزان بینک کو9.18ارب روپے کا بعد ازٹیکس منافع حاصل ہوا تھا۔ پہلی سہ ماہی میں بینک کی فی حصص آمدنی 8.63 روپے ریکارڈ کی گئی جو گزشتہ سال کی اسی مدت میں 5.13 روپے تھی۔سہ ماہی بنیادوں پربینک کے منافع میں گزشتہ سال کی چوتھی سہ ماہی کے مقابلے میں 5فیصد کی کمی ریکارڈ کی گئی ہے۔ گزشتہ سال کی آخری سہ ماہی میں میزان بینک کو16.31ارب روپے کا بعد از ٹیکس منافع حاصل ہواتھا۔

کریڈٹ: انڈیپنڈنٹ نیوز پاکستان-آئی این پی

بجلی کی پیداوار ی مشینری کی درآمدات میں جاری مالی سال کے پہلے 9 ماہ میں سالانہ بنیادوں پر68فیصد کی کمی ریکارڈ کی گئی ہے۔مالی سال کے پہلے 9 ماہ میں بجلی کی پیداواری مشینری کی درآمدات پر399ملین ڈالرکا زرمبادلہ صرف ہوا جو گزشتہ مالی سال کی اسی مدت کے مقابلے میں 68فیصد کم ہے۔گزشتہ مالی سال کی اسی مدت میں بجلی کی پیداواری مشینری کی درآمدات کا حجم 1.236ارب ڈالر ریکارڈ کیا گیا تھا۔مارچ میں بجلی کی پیداواری مشینری کی درآمدات پر23ملین ڈالر کا زرمبادلہ صرف ہوا جو گزشتہ سال مارچ میں 60 ملین ڈالر تھا۔فروری کے مقابلے میں مارچ میں بجلی کی پیداواری مشینری کی درآمدات پر ماہانہ بنیادوں پر40فیصد کی کمی ریکارڈ کی گئی ہے۔ فروری میں بجلی کی پیداواری مشینری کی درآمدات پر39 ملین ڈالر کا زرمبادلہ صرف ہوا جو مارچ میں کم ہوکر23 ملین ڈالر ہوگیا۔

کریڈٹ: انڈیپنڈنٹ نیوز پاکستان-آئی این پی

بھارتی گجرات کے فوجی اڈے میں پیرا ملٹری فورس سی آر پی ایف کے سب انسپکٹر نے سرکاری رائفل سے خود کو گولی مار کر اپنی زندگی کا خاتمہ کرلیا،کشمیر میڈیا سروس کے مطابق بھارتی ریاست گجرات کے ضلع گاندھی نگر کے فوجی اڈے میں گولی چلنے کی آواز سے فوجی افسران کی دوڑیں لگ گئیں،بھارتی فوج کے افسران اور اہلکار جائے وقوعہ پر پہنچے تو سب انسپکٹر کشن بھائی راٹھور کی خون میں لت پت لاش پڑی ہوئی تھی،سینٹرل ریزرو پولیس فورس کے سب انسپکٹر کو ملٹری اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے،59سالہ کشن بھائی راٹھور اگلے برس ریٹائرڈ ہونے والے تھے۔ تاحال خودکشی کی وجہ کا تعین نہیں ہوسکا۔ تحقیقات کے لیے انکوائری کمیٹی تشکیل دیدی گئی،واضح رہے کہ بھارتی فوج اور نیم فوجی دستوں کے افسران اور اہلکاروں میں پست ہمتی اور ذہنی دباو کے باعث خودکشی کرنے کے واقعات عام ہیں۔

کریڈٹ: انڈیپنڈنٹ نیوز پاکستان-آئی این پی

ناسا نے اس بات کی تردید کی ہے کہ اس کا خلائی سیٹلائٹ یوکرین میں گر کر تباہ ہوگیا ہے،یوکرین کی فضائیہ کا کہنا تھا کہ دارالحکومت کیف میں دیکھی گئی دہشت ناک اور پراسرار چمک سیٹلائٹ یا شہابیہ گرنے کے سبب ہوئی تھی،اس موقع پر سائرن بجائے گئے تھے جس سے لوگ خوف وہراس کا شکار ہوگئے تھے کہ 21برس بعد زمین پر گرنے والا ناسا کا سیٹلائٹ کیف کی جانب تو نہیں آگیا،ناسا نے وضاحت کی ہے کہ اس کا سیٹلائٹ ابھی فضا ہی میں ہے،یہ واضح نہیں کہ یوکرین پر دیکھی گئی پراسرار چمک کی وجہ کیا تھی۔

کریڈٹ: انڈیپنڈنٹ نیوز پاکستان-آئی این پی

عالمی ادارہ صحت نے سوڈان میں جاری جھڑپوں میں ہیلتھ سنٹرز کو نشانہ بنانے کی مذمت کی ہے،عالمی میڈیا کی رپورٹ کے مطابق عالمی ادارہ صحت کے ایک تحریری بیان میں کہا گیا ہے کہ سوڈان میں تنازعات نے شہریوں کو بری طرح متاثر کیا ہے، ملک میں ہیلتھ سنٹرز اور ہیلتھ ورکرز پر حملوں کی مذمت کرتے ہوئے بیان میں کہا گیا کہ کم از کم 3ہیلتھ ورکرز ہلاک اور 2زخمی ہوگئے ہیں،عالمی ادارہ صحت نے کہا کہ ہیلتھ سنٹرز اور ان کے ملازمین پر حملے اور ایمبولینس ہائی جیکنگ جیسے واقعات باعث صحت کے کام میں رکاوٹ پیدا ہو رہی ہے، جس کی وجہ سے اموات میں اضافہ ہوا ہے،عالمی ادارہ صحت کے مطابق سوڈان کے دارالحکومت خرطوم کے 9سمیت 16ہسپتال حملوں کی وجہ سے ناقابل استعمال ہیں،دوسری جانب اقوام متحدہ سمیت عالمی سطح پر سوڈان میں جاری کشیدگی کے دوران سفارت کاروں پر حملوں کی بھی شدید مذمت کی گئی ہے ،واضح رہے کہ گذشتہ ہفتے فوج کے ایک دھڑے نے فوجی آمر کے خلاف بغاوت کر دی تھی۔

کریڈٹ: انڈیپنڈنٹ نیوز پاکستان-آئی این پی

سورت کی سیشن کورٹ نے سزا پر حکم امتناع کی راہول گاندھی کی درخواست مسترد کردی،بھارتی میڈیا کے مطابق بھارتی اپوزیشن جماعت کانگریس کے رہنما راہول گاندھی نے ہتک عزت مقدمے کے فیصلے کے خلاف درخواست دائر کی تھی،واضح رہے کہ گزشتہ دنوں بھارتی عدالت نے راہول گاندھی کو ہتک عزت کیس میں مجرم قرار دیا تھا ، بھارتی پارلیمنٹ نے عدالتی فیصلے کے بعد اپوزیشن رہنما راہول گاندھی کو نااہل قرار دے دیا تھا۔

کریڈٹ: انڈیپنڈنٹ نیوز پاکستان-آئی این پی

یمن کے دارالحکومت صنعا میں چیریٹی فنڈ کی تقسیم کے دوران بھگدڑ مچنے سے90افراد کچل کر ہلاک ہوگئے،غیر ملکی میڈیا رپورٹس کے مطابق افسوس ناک واقعہ جمعرات کو اس وقت پیش آیا جب تاجروں کی جانب سے غریب لوگوں میں خیرات کی تقسیم جاری تھی ، تقسیم کے دوران شہریوں میں بھگدڑ مچ گئی جس کے نتیجے میں اب تک 90افراد ہلاک اور 300سے زائد زخمی ہوئے ہیں ،یمن کے وزارت داخلہ کے مطابق لاشوں اور زخمی افراد کو مقامی ہسپتال منتقل کردیا گیا ہے جبکہ فنڈ تقسیم کرنے والوں کو بھی حراست میں لے لیا گیا ہے،واقعے کی مزید تفتیش کی جارہی ہے جبکہ وزارت داخلہ نے ہلاکتوں کی حتمی تعداد کے حوالے سے تاحال کوئی بیان جاری نہیں کیا ۔

کریڈٹ: انڈیپنڈنٹ نیوز پاکستان-آئی این پی

بھارتی ریاست منی پور میں بھارت سے علیحدگی کا مطالبہ شدت اختیار کر گیا، وزیراعلی نونگتھم بم بیرن سنگھ نے بھارتی حکومت کی طرف سے الحاق کا معاہدہ جعلی قرار دے ڈالا،منی پور کی جلا وطن حکومت کے وزیر اعلی نونگتھم بم بیرن کی طرف سے جاری پریس ریلیز میں واضح کیا گیا ہے کہ آزادی ایکٹ 1947 کے تحت منی پور کی آزاد حیثیت کو تسلیم کیا گیا تھا، بھارت نے الحاق شدہ ریاستوں کو صوبوں میں بدل کر آزادی ایکٹ 1947 کی خلاف ورزی کی،خیال رہے کہ منی پور میں آزادی اور بھارت سے علیحدگی کا مطالبہ 1949 سے چل رہا ہے، 1980 سے منی پور میں علیحدگی کی جدوجہد جاری ہے جس میں ہزاروں بھارتی فوجی، پولیس اہلکار اور عام شہری اپنی جانیں گنوا چکے ہیں، 1972 میں منی پور کو ریاست کا درجہ دے دیا گیا تھا،بھارت میں اس وقت 15سے زائد ریاستوں میں آزادی اور علیحدگی کی تحریکیں چل رہی ہیں، آج کی یہ نفرت، تقسیم اور ہتک آمیز رویہ بھارتی نام نہاد جمہوریت کے منہ پر طمانچہ ہے۔

کریڈٹ: انڈیپنڈنٹ نیوز پاکستان-آئی این پی

بھارت میں ڈسی جانے والی بیوی کے بجائے شوہر سانپ کو اسپتال لے گیا،بھارتی ریاست اترپردیش لے ضلع انا کے اسپتال میں ڈاکٹرز اور عملہ اس وقت حیران اور خوف زدہ ہوگیا جب ایک شخص تھیلے میں سانپ لے کر پہنچ گیا،رپورٹس کے مطابق نریندر نامی شخص کی بیوی کسم کو گھر کی صفائی کے دوران سانپ نے کاٹ لیا جس کے باعث وہ بیہوش ہوگئی،خاتون کو پڑوسیوں نے فوری طور پر اسپتال منتقل کیا۔ واقعہ کی اطلاع ملنے پر شوہر گھر آیا اور سانپ کو لے کر اسپتال پہنچ گیا جس پر ڈاکٹرز اور عملے میں خوف و ہراس پھیل گیا،حکام کے سوال کرنے پر کہ وہ سانپ کو لے کر اسپتال کیوں آیا ہے نریندر نے جواب دیا کہ وہ ڈاکٹرز کو اس لیے سانپ دکھانا چاہتا تھا کہ وہ زہر کا اندازہ کریں اور اس کے مطابق بیوی کا علاج کریں،سانپ کی ڈسی خاتون کی حالت تسلی بخش بتائی جاتی ہے جبکہ سانپ کو قریبی جنگل میں چھوڑ دیا گیا۔

کریڈٹ: انڈیپنڈنٹ نیوز پاکستان-آئی این پی

پاکستان سمیت دنیا بھر میں کتب کا عالمی دن 23اپریل کو منایا جائے گا اس دن کے منانے کا مقصد کتب بینی،اشاعت کتب اور اس کی حقوق اشاعت کے متعلق شعور اجاگر کرنا ہے۔اس دن کے حوالے سے سماجی اور ادبی تنظیموں کی جانب سے کتب کی نمائش سمیت دیگر تقریبات کا اہتمام کیاجائے گاجس سے خطاب کرتے ہوئے مقررین کتب بینی کی اہمیت کو اجاگر کرتے ہوئے کتب کے مصنفین کے حقوق اشاعت اور قوانین سے متعلق آگاہی فراہم کریں گے۔ماہرین کے مطابق عصر حاضر میں سوشل میڈیا کی یلغار کے باعث کتب بینی میں بے حد کمی واقع ہوئی ہے نوجوان نسل جو کہ موبائل کی رسیا نظر آتی ہے ان میں کتب اور مطالعہ کا شوق نہ ہونے کے برابر ہے،ماہرین نے کہا ہے کہ ضرورت اس امر کی ہے کہ کتب بینی کے فروغ کیلئے بچوں کو کتابوں کی جانب راغب کیا جائے۔

کریڈٹ: انڈیپنڈنٹ نیوز پاکستان-آئی این پی

پاکستان سمیت دنیا بھر میں زمین کے تحفظ کا عالمی دن ''ورلڈ ارتھ ڈے'' 22 اپریل کو منایا جائے گا اس دن کے منانے کا مقصد عوام کو زمین پر ماحولیاتی آلودگی اور دیگر مسائل بارے آگاہی دینا ہے۔ ورلڈ ارتھ ڈے کی مناسبت سے فیصل آباد سمیت ملک بھر میں سماجی تنظیموں کے زیر اہتمام سیمینارز اور واک کا اہتمام کیا جائے گا۔دنیا میں سب سے پہلے 1970ء کو اقوام متحدہ کے زیر انتظام امریکہ میں زمین کا عالمی دن منایا گیا تھا جس کا مقصد دنیا بھر کو ماحولیاتی آلودگی سے بچانے کیلئے زیادہ سے درخت لگانے کی جانب راغب کرنا ہے اور آج باون برس بعد دنیا بھر کے ممالک بڑھتی ہوئی ماحولیاتی آلودگی سے زمین کو بچانے کیلئے شجر کاری مہم چلا رہے ہیں اس روز دنیا بھرکی طرح پاکستان میں بھی سماجی تنظیموں،طلباء و طالبات مختلف پروگراموں میں زمین کے عالمی دن کی افادیت کو اجاگر کریں گے۔

کریڈٹ: انڈیپنڈنٹ نیوز پاکستان-آئی این پی

چیئرمین پاکستان الیکٹرانک میڈیا ریگولیٹری اتھارٹی (پیمرا) کی ہدایات پرپیمراریجنل دفاتر کراچی، حیدرآباد، سکھراور ملتان کے فیلڈ سٹاف نے غیر قانونی انڈین چینلز چلانے والے کیبل آپریٹرزکے خلاف کارروائی کرتے ہوئے غیرقانونی چینلز کی ترسیل میں استعمال ہونے والے آلات کو ضبط کر لیا ،سپریم کورٹ آف پاکستان کے احکامات اور پیمرا کے ماضی میں جاری کردہ نوٹسزکی روشنی میں کیبل آپریٹرز کے دفاترکی انسپیکشن کے دوران پیمرا ریجنل آفس کراچی نے میسرز ڈیلٹا ڈیجیٹل نیٹ ورک، میسرز ہوم میڈیا کمیونیکیشن (پرائیویٹ) لمیٹڈ اور میسرز سکائی کیبل ویژن ، پیمرا ریجنل آفس ملتان نے میسرز سٹی ڈیجیٹل کیبل نیٹ ورک، میسرز اسٹیٹ کیبل نیٹ ورک، میسرز نصیب اینڈ جمیل کیبل نیٹ ورک، میسرز ورلڈ برائٹ کیبل نیٹ ورک ، میسرز اسٹار انفارمیشن کمپنی اور میسرز گلوبل سگنلز کیبل نیٹ ورک اور پیمرا ریجنل آفس سکھر نے سکھر اور لاڑکانہ کے اضلاع میں کارروائی کرتے ہوئے میسرز میڈیا پلس نیٹ ورک لاڑکانہ اور میسرز یونیورسل کیبل ٹی وی نیٹ ورک لاڑکانہ کو پیمرا قوانین کی خلاف ورزی کا مرتکب پائے جانے والے کیبل آپریٹروں کے غیر قانونی چینلز کی ترسیل میں استعمال ہونے والے آلات کو ضبط کر لیا۔ مزید برآں قانون کی خلاف ورزی کرنے والے مذکورہ کیبل آپریٹرز کو اظہار وجوہ کے نوٹسزبھی جاری کیے گئے جن پر پیمرا قوانین کے تحت سزا کا تعین کیا جائے گا،مزید برآں ، پیمرا ریجنل آفس حیدرآباد نے سانگھڑ، ٹھٹھہ ، سجاول اور حیدرآباد کے اضلاع میں 23کیبل نیٹ ورکس کا دورہ کیا جس میں آٹھ کیبل نیٹ ورکس کو پیمرا قوانین کی خلاف ورزی کرنے پر ان کے 24سیٹلائٹ رسیورزاور ایک ٹرانسمیٹر ضبط کرتے ہوئے کیبل آپریٹرز کو اظہار وجوہ کے نوٹسزجاری کئے،یہاں یہ امر قابلِ ذکر ہے کہ پیمرا غیر قانونی /انڈین چینلز کی تقسیم کار، غیر مہذ ب مواد کی تقسیم کے حوالہ سے کوئی بھی رعایت نہیں برتے گی ۔تمام کیبل آپریٹرز کو ایک بار پھر متنبہ کیا جاتا ہے کہ و ہ غیر قانونی انڈین مواد اور انڈین چینلز کی نشریات بند کر دیں بصورت دیگر ان کے خلاف پیمرا قوانین کے تحت سخت تادیبی کارروائی کی جائے گی۔

کریڈٹ: انڈیپنڈنٹ نیوز پاکستان-آئی این پی

میانوالی روڑ اڈا واندھڑ کے قریب خوفناک ٹریفک حادثے میں ایک بچہ اور 2خواتین جاں بحق ہوگئے ،ریسکیو کے مطابق تیز رفتار مسافر بس کراچی سے میانوالی جا رہی تھی کہ چوک سرور شہید کے قریب بس نے رکشے کوٹکر ماردی جس کے نتیجے میں بچے سمیت دو خواتین جان کی بازی ہارگئیں ، حادثے میں 5افراد شدید زخمی ہوئے ہیں ،حادثے کی اطلاع ملتے ہی پولیس اور ریسکیو 1122موقع پر پہنچ گئیں ، ریسکیو کی جانب سے 2 زخمیوں کو نشترہسپتال ملتان جبکہ 3کو تحصیل ہیڈکوارٹر ہسپتال سرور شہید منتقل کر دیا گیا،ریسکیو حکام کے مطابق حادثے کے شکار رکشہ میں ایک ہی خاندان کے تمام افراد سوار تھے۔

کریڈٹ: انڈیپنڈنٹ نیوز پاکستان-آئی این پی

وزیراعظم شہباز شریف نے کہا ہے کہ آئین نے پارلیمان کی کوکھ سے جنم لیا،عدلیہ آئین کی تشریح کرسکتی ہے لیکن ری رائٹ نہیں کر سکتی، آئین میں ترمیم کا اختیار صرف پارلیمان کو ہے،ایسا بالکل نہیں ہوسکتا کہ پارلیمان کوئی قانون بنائے جس کا نفاذ بھی نہ ہوا ہو اس پر عدالت حکم امتناع جاری کردے،ماضی میںعدالت کی طرف سے حکم امتناع کی ایسی کوئی مثال نہیں ملتی،ماضی میں سیاستدانوں سے بے شمار غلطیاں ہوئیں، بڑے لوگ وہی ہوتے ہیں جو غلطیوں سے سبق سیکھ کر آگے چلتے ہیں،خوشی ہے کہ آئین پاکستان کو ڈیجیٹل ٹیکنالوجی میں تبدیل کر دیا گیا،موبائل ایپ کے ذریعے تمام پاکستانی آئین سے استفادہ حاصل کرسکیں گے،آئین و قانون کی بالادستی کیلئے ہم سب کو اکٹھا ہونا ہوگا۔جمعرات کے روز وزیراعظم شہباز شریف نے پاکستان ٹیلی وژن سینٹر کا دورہ کیا،پاکستان ٹیلی وژن پہنچنے پر وزیراطلاعات مریم اورنگزیب ، ایم ڈی پی ٹی وی اور دیگر اعلیٰ حکام نے وزیراعظم کا استقبال کیا،وزیراعظم نے آئین پاکستان 1973ء کی موبائل ایپ کے اجراء کی تقریب میں بطور مہمان خصوصی شرکت کی،کانسٹیٹیوشن موبائل ایپ پاکستان کے آئین کی گولڈن جوبلی کے نتاظر میں جاری کی جارہی ہے،کانسٹیٹیوشن موبائل ایپ وزیراطلاعات مریم اورنگزیب کی قیادت میں وزارت اطلاعات ونشریات نے تیار کی،کانسٹیٹیوشن موبائل ایپ کی تیاری میں نادرا نے بھی تعاون کیا،ایپ کا مقصد عوام بالخصوص نوجوانوں کو آئین سے متعلق شعور اور رسائی دینا ہے،ایپ وزیراعظم کے وژن کے تحت آئین پاکستان سے روشناس کروانے اور اسے سمجھنے میں ہر شہری کی مددکرے گی

۔تقریب سے خطاب کرتے ہوئے وزیراطلاعات مریم اورنگزیب نے کہا کہ پاکستان ٹیلی وژن سینٹر آمد پر وزیراعظم کی مشکور ہوں،وزیراعظم شہباز شریف نے مصروفیات کے باوجود اپنا قیمتی وقت نکالا،آئین پاکستان تمام شہریوں کے حقوق کی ضمانت ہے،ایپ کا مقصد نوجوانوں کو آئین کی اہمیت کے بارے میں اجاگر کرناہے،اس ایپ میں آئین کے بارے میں تمام معلومات موجود ہیں،کانسٹیٹیوشن ایپ پلے سٹور اور ایپل سٹور پر دستیاب ہے،ایپ اردو اور انگلش دونوں زبانوں میں ہے،آئین پاکستان ایپ سرچ ایبل ہے۔تقریب میں وزیراعظم شہباز شریف نے کانسٹیٹیوشن موبائل ایپ کا اجراء کر دیا۔ اس موقع پر تقریب سے خطاب کرتے ہوئے وزیراعظم شہباز شریف نے کہا کہ خوشی ہے کہ آئین پاکستان کو ڈیجیٹل ٹیکنالوجی میں تبدیل کر دیا گیا،موبائل ایپ کے ذریعے تمام پاکستانی آئین سے استفادہ حاصل کرسکیں گے،سرکاری ٹی وی کی عمارت میں 12اکتوبر1999ء کو آیاتھا جب غیرآئینی اقدام اٹھایا گیا تھا،ذوالفقار علی بھٹوشہید، مفتی محمود، شاہ نورانی ، عبدالولی خان اور دیگر نے آئین تخلیق کیا۔انہوں نے کہا کہ آئین نے پارلیمان کی کوکھ سے جنم لیا،عدلیہ آئین کی تشریح کرسکتی ہے

لیکن ری رائٹ نہیں، آئین میں ترمیم کا اختیار صرف پارلیمان کو ہے،آج پاکستان دوراہے پر کھڑا ہے،مجھ سمیت دیگر سیاستدانوں سے بے شمار غلطیاں ہوئیں،بڑے لوگ وہی ہوتے ہیں جو غلطیوں سے سبق سیکھ کر آگے چلتے ہیں،یقیناً سبق سیکھا ہے اور ملکر پاکستان کو مشکل ترین حالات سے نکالیں گے۔ وزیراعظم نے کہا کہ ہمیں مشکل ترین حالات میں یہ اقتدار ملا،ہم یکسو ہیں ، سیاسی اثاثہ ریاست کیلئے قربان کرنے سے نہیں ہچکچائیں گے،ایسا بالکل نہیں ہوسکتا کہ پارلیمان کوئی قانون بنائے جس کا نفاذ بھی نہ ہوا ہو اس پر عدالت حکم امتناع جاری کردے،ماضی میںعدالت کی طرف سے حکم امتناع کی ایسی کوئی مثال نہیں ملتی۔وزیراعظم شہبازشریف نے کہا کہ یہ بہترین فیصلہ ہے کہ تعلیمی اداروں میں آئین نصاب کے حصہ بن جائے،اس کے ذریعے ملک میں آئین و قانون کی حکمرانی بہت بڑاستون بن جائے گا،آئین و قانون کی بالادستی کیلئے ہم سب کو اکٹھا ہونا ہوگا،اللہ تعالی پاکستان کو ہمیشہ قائم و دائم کھے گا۔

کریڈٹ: انڈیپنڈنٹ نیوز پاکستان-آئی این پی

سالگرہ منا کر واپس گھر جانے والے دوستوں کی گاڑی بیل ریڑھے سے ٹکرانے سے 4افراد جاں بحق جب کہ 2شدید زخمی ہو گئے،نجی ٹی وی کے مطابق وہاڑی میں لڈن روڈ پر سالگرہ منا کر واپس گھر جانے والے دوستوں کی گاڑی بیل ریڑھے سے ٹکرا کر دیوار سے جا ٹکرائی جس کے نتیجے میں 4 افراد جاں بحق جب کہ 2شدید زخمی ہو گئے،ریسکیو ذرائع کا کہنا تھا کہ دونوں زخمیوں کو تشویشناک حالت میں نشتر اسپتال ملتان ریفر کر دیا گیا ہے، افسوسناک حادثہ لڈن روڈ پر کھادر نہر کے پل کے قریب پیش آیا جہاں بیل ریڑھے پر لکڑ لوڈ تھی، کار سوار وہاڑی سے اپنے دوست احمد لکھویرا کی سالگرہ منا کر لڈن جا رہے تھے، حادثہ میں احمد لکھویرا نامی نوجوان بھی جاں بحق ہو گیا، ریسکیو ٹیم نے کار کی باڈی کاٹ کر نعشوں اور زخمیوں کو نکالا۔

کریڈٹ: انڈیپنڈنٹ نیوز پاکستان-آئی این پی

آزاد کشمیر میں حکومت کے لیے تحریک انصاف آزاد کشمیر فارورڈ بلاک، پیپلزپارٹی اور مسلم لیگ ن کے درمیان پاور شیئرنگ فارمولہ طے پاگیا ہے،تحریک انصاف آزادکشمیر فارورڈ بلاک کے چوہدری انوار الحق آزاد کشمیر کے 15ویں وزیر اعظم منتخب ہوگئے ہیں ،سیکرٹری اسمبلی کے مطابق نو منتخب وزیر اعظم آزاد کشمیر کے مقابلے میں کسی بھی امیدوار نے کاغذات جمع نہیں کروائے جب کہ اسپیکرپیپلزپارٹی اور سینئر وزیرمسلم لیگ ن سے ہوگا،ذرائع کے مطابق 16رکنی کابینہ میں فارورڈ بلاک کے6، پیپلزپارٹی کے 6اور مسلم لیگ ن کے4وزرا ہوں گے۔یاد رہے کہ گزشتہ دنوں آزادکشمیر ہائیکورٹ نے سابق وزیر اعظم آزادکشمیر سردار تنویر الیاس کو توہین عدالت میں سزا سنائی تھی۔

کریڈٹ: انڈیپنڈنٹ نیوز پاکستان-آئی این پی

امیر جماعت اسلامی سراج الحق نے کہا ہے کہ ملک میں ایک ہی دن الیکشن ہونے چائیں ،الگ الگ انتخابات کا نتیجہ قوم کے لیے مشکلات کا سبب بنے گا، الیکشن میں حصہ لینا چاہتے ہیں جس میں دھاندلی نہ ہو، آئین اتنا کمزور نہیں کہ الیکشن پر اختلاف کی وجہ سے ختم ہو جائے،اس وقت اہم مسئلہ الیکشن کا ہے کہ کب ہوں،سپریم کورٹ کے باہر میڈیا سے گفتگو کرتے ہوئے سراج الحق نے کہا یے کہ ہم ایسے الیکشن میں حصہ لینا چاہتے ہیں جس میں دھاندلی نہ ہو، ملک میں الگ الگ انتخابات نہیں ہونے چاہئیں، ایک ساتھ بہتر ہے،انہوں نے کہا کہ آئین اتنا کمزور نہیں کہ الیکشن پر اختلاف کی وجہ سے ختم ہو جائے، الگ الگ انتخابات کا نتیجہ قوم کے لیے مشکلات کا سبب بنے گا، سیاسی افراتفری اور آئینی بحران کی وجہ سے ہماری معیشت خراب ہو رہی ہے،سراج الحق کا کہنا تھا کہ سیاسی عدم استحکام کی وجہ سے اداروں سمیت غریب آدمی پر بہت برا اثر پڑ رہا ہے، لوگوں کے پاس کھانے کے ذرائع ختم ہو گئے ہیں،امیر جماعت اسلامی نے کہا کہ سیاست دانوں کی آپس کی لڑائی سے عوام متاثر ہو رہے ہیں، الیکشن کسی ایک سیاسی جماعت کا مسئلہ نہیں ہے، ہم ایک ایسی تاریخ چاہتے ہیں جو سب کے لیے قابل قبول ہو،ان کا کہنا ہے کہ مخلصانہ تجویز دیتے ہیں کہ مرکز اور صوبوں میں نگراں حکومتیں قائم ہوں، سیاسی جماعتیں مل کر الیکشن کی تاریخ طے کریں۔

کریڈٹ: انڈیپنڈنٹ نیوز پاکستان-آئی این پی

سربراہ عوامی مسلم لیگ اور سابق وزیر داخلہ شیخ رشید نے کہا ہے کہ عید کے بعد الیکشن ہوں گے یا حکومت نااہل ہوگی، ٹوئٹر پر اپنے پیغام میں سابق وزیر داخلہ شیخ رشید نے کہا کہ نواز شریف لندن جائیں گے، پاکستان اپنی شرائط کے الیکشن تک نہیں آئیں گے، نگران حکومتیں آئینی طور پر ختم ہوچکی ہیں، ان کی ترقیاں، تنزلیاں، گاڑیاں دفتر سب واپس ہونے چاہئیں،انہوں نے کہا کہ آصف زرداری ڈبل گیم کھیل رہے ہیں، 27اپریل تک 21 ارب روپے جاری کرنے ہوں گے ورنہ سنگین نتائج بھگتنے کیلئے تیار رہنا ہوگا، سازش کے تحت فضل الرحمان کو مذاکرات سے نواز شریف کے اشارے پر باہر رکھا جا رہا ہے،شیخ رشید نے کہا کہ سپریم کورٹ نے آئین اور قانون کا جھنڈا بلند رکھا اور سیاسی جماعتوں کو گنجائش بھی دی لیکن جو جماعتیں عوام میں جانے کے قابل نہیں وہی الیکشن میں رکاوٹ بن رہی ہیں، حکومت اپنے جال میں خود پھنس گئی، انہیں حالات کی سنگینی کا اندازہ ہے،سابق وزیر داخلہ کاکہنا تھا کہ شہباز شریف، وزیر داخلہ اور وزیرقانون توہین عدالت کے ریڈار میں ہوں گے، سپریم کورٹ کا حکم 14مئی کو الیکشن کروانا فائنل ہے جس میں تبدیلی کی گنجائش نہیں، مذاکرات کے نام پر وقت ضائع کرنے کی سازش ہو رہی ہے۔

کریڈٹ: انڈیپنڈنٹ نیوز پاکستان-آئی این پی

مسلم لیگ ن کے رہنما طلال چوہدری نے کہا ہے کہ عمران خان لیڈر نہیں بلکہ اچھے سیلزمین ہیں،پی ٹی آئی کی پنجاب میں ٹکٹوں کی تقسیم کے حوالے سے فواد چوہدری کے بیان پر ردعمل میں طلال چوہدری نے کہا کہ فوادصاحب! کتنا مال اکٹھا کیا وہ بھی بتا دیں؟انہوں نے سوال کیا کہ ملاقات کا کروڑ روپیہ اور ٹکٹ کتنے میں بیچا؟ جن کو ٹکٹ نہیں دیا ان بیچاروں کے پیسے واپس کر دیں،طلال چوہدری کا کہنا تھا کہ خان صاحب لیڈر نہیں بلکہ اچھے سیلزمین ہیں،گھڑی بیچنی ہو، سینیٹ کی سیٹ بیچنی ہو، پارٹی کاعہدہ بیچناہویاالیکشن کی ٹکٹ بیچنی ہو۔

کریڈٹ: انڈیپنڈنٹ نیوز پاکستان-آئی این پی

کراچی کی ملیرکورٹ نے فراڈ اور دھمکانے کے مقدمے میں پاکستان تحریک انصاف (پی ٹی آئی)سندھ کے صدر علی زیدی کی ضمانت منظور کر لی،عدالت نے علی زیدی کو 10ہزار روپے کے مچلکے جمع کروانے کا حکم بھی دیا جبکہ مدعی مقدمہ کے وکیل کامران بلوچ نے درخواست ضمانت پر اعتراض نہیں کیا،اس موقع پر مدعی مقدمہ کے وکیل کامران بلوچ نے کہا کہ میرے موکل نے کہا ہے کہ ہم آئوٹ آف کورٹ سیٹلمنٹ کریں گے جس پر علی زیدی کے وکیل خالد محمود نے جواب دیا کہ ہم کوئی آٹ آف کورٹ سیٹلمنٹ نہیں کر رہے،بعدازاں کراچی کی ملیرکورٹ نے فراڈ اور دھمکانے کے مقدمے میں پاکستان تحریک انصاف سندھ کے صدر علی زیدی کی ضمانت منظور کر لی،قبل ازیں ملیرکورٹ کراچی میں پی ٹی آئی رہنما علی زیدی کے خلاف فراڈ اور دھمکانے کے کیس کی سماعت ہوئی، گرفتار پی ٹی آئی رہنما علی زیدی کو انتہائی سخت سکیورٹی میں سٹیل ٹاون تھانے سے ملیر کورٹ میں پیش کیا گیا،پولیس کی جانب سے پی ٹی آئی رہنما علی زیدی کو 3دن کا جسمانی ریمانڈ مکمل ہونے پر عدالت لایا گیا، علی زیدی کی پیشی کے موقع پر ملیر کورٹ اور اطراف میں سکیورٹی کے سخت انتظامات کیے گئے۔

کریڈٹ: انڈیپنڈنٹ نیوز پاکستان-آئی این پی

وزیر خارجہ بلاول بھٹو زرداری نے کہا ہے عید الفطر کے بعد ملک میں ایک ہی وقت الیکشن اور اپوزیشن کے ساتھ مذاکرات کے معاملے پر مثبت پیشرفت ہوگی،جے یو آئی کے سربراہ مولانا فضل الرحمان سے ملاقات کے بعد ٹوئٹر پر اپنے پیغام میں چیئرمین پیپلز پارٹی بلاول بھٹو نے کہا کہ الحمدللہ آج مولانا فضل الرحمان سے تفصیلی گفتگو ہوئی، میں پر امید ہوں کہ عید کے بعد پارٹی سربراہان کے اجلاس میں مثبت پیشرفت ہو گی،بلاول بھٹو نے کہا کہ ملک میں ایک ہی وقت انتخابات کرانے کے معاملات اور اپوزیشن کے ساتھ مذکرات کے طریقہ کار کو اس وقت تک حتمی شکل دی جائے گی۔

کریڈٹ: انڈیپنڈنٹ نیوز پاکستان-آئی این پی

پاکستان مسلم لیگ(ن)کی قیادت نے پنجاب میں صوبائی اسمبلی کے انتخابات کا بائیکاٹ کر دیا،ذرائع کے مطابق مسلم لیگ (ن)نے پنجاب میں کسی بھی امیدوار کو ٹکٹ جاری نہ کرنے کا فیصلہ کیا ہے،اس حوالے سے لیگی قیادت کا کہنا ہے کہ 14 مئی کو الیکشن کے حوالے سے (ن)لیگ کا موقف واضح ہے، شیڈول کے مطابق امیدوار ٹکٹ جمع کروا سکتے ہیں۔

کریڈٹ: انڈیپنڈنٹ نیوز پاکستان-آئی این پی

پاکستان میں آمدنی اور روزگار کے مواقع کی نئی راہیں کھولنے کے لیے ماہی گیری کا ریگولیٹری میکانزم اور رجسٹریشن اہم ہے،زرمبادلہ حاصل کرنے کے لیے پراسیسڈ اور غیر پروسیسڈ فشریز کی معیاری مصنوعات کی برآمد ضروری ہے،حکومتی سطح پر اس صنعت کو فروغ دینے کے لیے مکمل ڈیٹا کی دستیابی ناگزیرہے،ڈی ایف پی لیبز کو بین الاقوامی معیارات کے مطابق اپ گریڈ کیا جائیگا۔ ویلتھ پاک کی رپورٹ کے مطابق پاکستان میں آمدنی اور روزگار کے مواقع کی نئی راہیں کھولنے کے لیے ماہی گیری سے متعلقہ تمام کاروباروں کی مناسب طریقے سے وضاحت شدہ ریگولیٹری میکانزم اور رجسٹریشن اہم ہے۔ ملک میں شاندار زرمبادلہ حاصل کرنے کے لیے پراسیسڈ اور غیر پروسیسڈ فشریز کی معیاری مصنوعات کی برآمد ضروری ہے۔ اس ساری فصل کو کاٹنے کے لیے ایک اچھی طرح سے تیار کردہ آپریشنل ایجنڈے پر عمل کرنا ضروری ہے۔

ویلتھ پاک کے ساتھ ماہی گیری کے کاروبار کی تمام اقسام کی رجسٹریشن کی اہمیت پر بات کرتے ہوئے محکمہ ماہی پروری پنجاب کے ڈائریکٹر جنرل ڈاکٹر سکندر حیات نے کہا کہ یکوا کلچر کے نظام کو مناسب بنانے کا پہلا اور سب سے اہم کام ریگولیٹری میکانزم اور تمام متعلقہ ماہی گیری کے کاروبار کی قومی سطح پر رجسٹریشن ہے۔ حکومتی سطح پر اس صنعت کو فروغ دینے کے لیے ان سے متعلق مکمل ڈیٹا کی دستیابی بہت ضروری ہے۔ اس سے سرمایہ کاروں، ماہرین اور تاجروں کی دلچسپی جاننے میں مدد ملے گی کہ وہ اس کاروبار کے کس شعبے میں دلچسپی رکھتے ہیں۔ اس طرح حکومت کے لیے مقامی اور بین الاقوامی سپلائرز، پروسیسرز اور بیچنے والوں کے لیے مناسب روڈ میپ کی منصوبہ بندی کرنا آسان ہو جائے گا ۔ یہ اسٹریٹجک فریم ورک اور ریگولیٹری میکانزم اس صنعت کی ترقی کی طرف پہلا اور سب سے اہم قدم ہے۔انہوں نے کہا کہ ماہی گیری سے متعلق تمام چھوٹے اور بڑے پیمانے پر یا انفرادی طور پر ہینڈل کیے جانے والے کاروبار کے لیے رجسٹریشن کو لازمی بنایا جائے۔ ہمارے محکمے نے اس تناظر میں بنیادی تبدیلیاں لانے کا آغاز کیا ہے تاکہ موجودہ اور نئے سیٹ اپ کے لیے رجسٹریشن لازمی ہونا چاہیے۔

رجسٹریشن سے کثیر الجہتی ڈیٹا تیار کرنے میں مدد ملے گی جس میں تمام موجودہ اور نئے قائم ہونے والے بڑے اور چھوٹے آبی کاروباروں، پروڈیوسرز، ہیچری مینیجرز، پروسیسرز کی صحیح تعداد، افرادی قوت کی صحیح تعداد، نئی ملازمت کے مواقع، ہنر مندغیر ہنر مند، براہ راست اور بالواسطہ افرادی قوت اور اس سے متعلقہ صنعتوں کی تعداد، ہیچریوں کی تعداد، پیداواری کھیتوںتالابوںقدرتی مقامات، ذخیرہ کرنے کی جگہیں ، پروسیسنگ یونٹس، ہر قسم کی پیداوار کی مقدار شامل ہو گی۔ یہ تمام معلومات معیار کو بہتر بنانے، استعداد کار بڑھانے اور آگاہی مہم کے ذریعے زیادہ سے زیادہ لوگوں کو اس منافع بخش صنعت کی طرف لانے کے لیے بھی اہم ہیں۔ ڈی ایف پی نے اپنی لیبز کو بین الاقوامی معیارات کے مطابق اپ گریڈ کیا ہے۔ ان لیبز کو نہ صرف اپ گریڈ رکھا جائے گا بلکہ نئی لیبز کا قیام اور نجی سرمایہ کاروں کو راغب کرنا بھی اس منصوبے کا حصہ ہے۔ عالمی مچھلی اور سمندری غذا کی مارکیٹ میں 2022 میں 171,864 ملین ڈالرتھی۔ پاکستان کے لیے ضروری ہے کہ وہ اپنی مچھلی اور سمندری غذا کی مارکیٹ کو جدید رجحانات کے مطابق بہتر کرے۔ اس صنعت کو فروغ دینا ناگزیر ہے جس سے اس کاروبار سے وابستہ لاکھوں افراد ایک پائیدار روزی کمائیں گے۔

کریڈٹ: انڈیپنڈنٹ نیوز پاکستان-آئی این پی

یوسف ویونگ ملز لمیٹڈ کی آمدنی میں 75 فیصدکا نمایاں اضافہ ہوا ہے،کمپنی نے 626 ملین روپے کی آمدنی حاصل کی جو گزشتہ سال 358 ملین روپے تھی۔ویلتھ پاک کی رپورٹ کے مطابق یوسف ویونگ ملز لمیٹڈ ٹیکسٹائل کمپنی کی 31 دسمبر 2022 کو ختم ہونے والے اپنے چھ ماہ کے مالیاتی نتائج کے تحت سال بہ سال آمدنی میں 75 فیصد نمایاں اضافہ ہوا ہے۔ کمپنی نے 626 ملین روپے کی آمدنی حاصل کی جو گزشتہ سال 358 ملین روپے تھی۔ کمپنی نے 37.5 ملین سے مجموعی منافع میں 19 فیصد اضافہ بھی ریکارڈ کیا جو کہ 44.6 ملین تک پہنچ گیا۔ تاہم کمپنی کے منافع کے مارجن کو نقصان پہنچا کیونکہ اس نے خالص منافع کے مقابلے میں 2.88 ملین روپے کا خالص منافع رپورٹ کیا۔ قبل از ٹیکس منافع بھی گزشتہ سال کے 14.6 ملین روپے سے 27 فیصد کم ہو کر 10.7 ملین روپے رہ گیا۔ کاروباری ماحول میں چیلنجوں کے باوجودیوسف ویونگ ملز لمیٹڈ کو یقین ہے کہ وہ مستقبل میں مضبوط ترقی حاصل کرتی رہے گی

کیونکہ یہ ٹیکسٹائل کی صنعت میں معیار اور جدت کے لیے پرعزم ہے۔ 2021-22 میں کمپنی نے تمام اہم مالیاتی اشاریوں میں متاثر کن ترقی کا مظاہرہ کیا ہے اور مارکیٹ میں ایک اہم کھلاڑی کے طور پر اپنی پوزیشن کو برقرار رکھا ہے۔ 30 جون 2022 کو ختم ہونے والے سال کے لیے کل آمدنی 1.24 بلین روپے رہی۔ پچھلے سال کی 723 ملین روپے کی آمدنی کے مقابلے میں 72 فیصد اضافہ ہوا۔ سال کا مجموعی منافع 97.6 ملین روپے رہا جو پچھلے سال کے 84 ملین روپے کے مقابلے میں 16 فیصد زیادہ ہے۔ کمپنی نے ٹیکس سے پہلے 37.97 ملین روپے منافع کمایا جو پچھلے سال کے 28.1 ملین روپے کے مقابلے میں 35 فیصد سالانہ اضافہ کو ظاہر کرتا ہے۔ 30 جون 2022 کو ختم ہونے والے سال کے لیے خالص منافع 22.4 ملین روپے تھاجو پچھلے سال کے 17.2 ملین روپے کے مقابلے میں 30 فیصد اضافے کو ظاہر کرتا ہے۔ 30 جون 2022 کو ختم ہونے والے سال کے لیے فی شیئر آمدنی پچھلے سال کے 0.19 روپے کے مقابلے میں 0.25 روپے رہی جس میں 32 فیصد اضافہ ہوا۔یوسف ویونگ ملز کو 17 جنوری 1988 کو پاکستان میں ایک پبلک لمیٹڈ کمپنی کے طور پر شامل کیا گیا تھا۔ کمپنی ٹیکسٹائل کی بنائی، اسپننگ اور پروسیسڈ فیبرک کی فروخت کے کاروبار میں مصروف ہے۔

کریڈٹ: انڈیپنڈنٹ نیوز پاکستان-آئی این پی

پاکستان کی گھریلو بچتیں جی ڈی پی کے تناسب سے2020 میں 6.9 فیصد سے کم ہو کر 2021 میں 4.5 فیصد رہ گئیں،پاکستان خطے اور دنیا میں سب سے کم سرمایہ کاری اور بچت کی شرحوں والے ممالک میں سے ایک ہے،بیرونی انحصار کو کم کرنے کے لیے پاکستان کو اپنی گھریلو بچت کی شرح کو بہتر کرنا ہوگا،ملک کا متوسط طبقہ بے روزگاری اور مہنگائی کی وجہ سے شدید متاثر ہے ۔ویلتھ پاک کی رپورٹ کے مطابق پاکستان کے معاشی حالات غیر ملکی ذرائع اور قرضوں پر انحصار کرنے کی بجائے ملکی بچت کے کلچر کو فروغ دینے کے لیے کثیر الجہتی حکمت عملی کا تقاضاکرتے ہیں۔قائداعظم یونیورسٹی کے سکول آف اکنامکس کے ایسوسی ایٹ پروفیسر ڈاکٹر جاوید اقبال نے ویلتھ پاک سے گفتگو میںکہا کہ پاکستان کی معیشت کو متاثر کرنے والے مسائل کی بنیادی وجوہات میں سے ایک کھپت سے چلنے والی معیشت کے طور پر اس کی نوعیت ہے۔ اگرچہ کھپت ایک ایسا عنصر ہے جو معیشت میں مجموعی طلب کو بڑھانے پر توجہ مرکوز کرتا ہے جس کے نتیجے میںپیداوار میں اضافہ ہوتا ہے لیکن بنیادی مسئلہ اس وقت پیدا ہوتا ہے جب کوئی معیشت بچت کی ذیلی سطح کے ساتھ کھپت کی انتہائی بلند شرح پر منحصر ہو جاتی ہے۔پاکستان میں گھریلو آمدنی کا 75 فیصد نجی استعمال کے لیے استعمال کیا جاتا ہے۔ زیادہ کھپت کے نتیجے میںسرمایہ کاری کی قربانی دی جا رہی ہے جس سے ملک کی ترقی متاثر ہو رہی ہے۔ گھریلو بچتوں نے سرمائے کو جمع کرنے اور بلند شرح نمو حاصل کرنے میں اہم کردار ادا کیا ہے۔

جوں جوں گھریلو بچت کم ہوتی ہے سرمائے کے جمع ہونے میں بھی کمی آتی ہے اور اسی وجہ سے پاکستان کی شرح نمو کم ہوتی ہے۔اس وقت پاکستان کا متوسط طبقہ بے روزگاری اور مہنگائی کی وجہ سے شدید متاثر ہے۔ زیادہ مہنگائی قوت خرید کو ختم کر دیتی ہے۔ نتیجے کے طور پرلوگوں کی حقیقی آمدنی جو ان کی افراط زر کے لیے ایڈجسٹ کردہ آمدنی ہے میں بھی کمی آتی ہے۔ افراد کو پیسہ بچانا مشکل ہوتا ہے کیونکہ ان کے پاس اپنے بنیادی اخراجات کو پورا کرنے کے بعد بچت کے لیے کم ڈسپوزایبل آمدنی دستیاب ہوتی ہے۔حکومت کو چاہیے کہ وہ تمام نجی بچت کرنے والوں کو چوری، مہنگائی کے خوف اور مالیاتی نظام کے گرنے سے تحفظ فراہم کرے اور بچت کرنے والوں کو انعام دے۔ یہ مقامی مالیاتی اداروں کو مضبوط بنانے، افراط زر کی شرح کو کنٹرول کرنے ،بچتوں اور سرمایہ کاری کی تقسیم کا فیصلہ کرنے میں مارکیٹ سگنلز کے کردار کو بڑھا کر کیا جا سکتا ہے۔پاکستان انسٹی ٹیوٹ آف ڈویلپمنٹ اکنامک کے ریسرچ اکانومسٹ محمود خالد نے کہاکہ پاکستان کم بچت اور کم سرمایہ کاری کی صورت حال میں پھنسا ہوا ہے جس کی وجہ سے اس کی معاشی صلاحیت محدود ہے۔

گھریلو بچت عالمی معیشت میں غیر یقینی صورتحال کے خلاف ایک بفر کے طور پر کام کر سکتی ہے۔ معاشی بحران کے وقت ملکی بچت کی اعلی سطح والے ممالک ایسے اثرات کو سنبھالنے اور کم کرنے کے لیے بہتر طریقے سے لیس ہوتے ہیں۔پاکستان خطے اور دنیا میں سب سے کم سرمایہ کاری اور بچت کی شرحوں میں سے ایک ہے جو ایک پائیدار اور جامع اقتصادی ترقی کی جانب پیش رفت میں رکاوٹ ہے۔بیرونی انحصار کو کم کرنے کے لیے پاکستان کو اپنی گھریلو بچت کی شرح کو بہتر کرنا ہوگا۔ وہ پالیسیاں جو مالی شمولیت کو فروغ دیتی ہیں جن میں رسمی مالیاتی اداروں کی رسائی کو بڑھانا، بینکنگ کے عمل کو آسان بنانا، اور مالی خواندگی کو فروغ دینا گھرانوں کو اپنی آمدنی بچانے اور سرمایہ کاری کرنے کی ترغیب دے سکتی ہے۔موجودہ حکومت کو ان مسائل کو حل کرنے اور ایسی ٹھوس کوششیں کرنے کی ضرورت ہے جو ملک کو کم بچتوں اور سرمایہ کاری کے جال سے آزاد کر کے اسے معاشی ترقی اور خوشحالی کی راہ پر گامزن کریں۔ورلڈ بینک سے دستیاب اعداد و شمار کے مطابق پاکستان کی گھریلو بچتیں جی ڈی پی کے فیصد کے طور پر 2020 میں 6.9 فیصد سے کم ہو کر 2021 میں 4.5 فیصد رہ گئی ہیں۔ ملک کی بچت کی شرح کا موازنہ مشرقی ایشیائی ممالک اور اس کے جنوبی ایشیائی ہم عصروں کے ساتھ ناگوار ہے۔ بنگلہ دیش اور ہندوستان نے اسی مدت کے دوران اپنی بچت کی شرح میں اضافہ دیکھا ہے۔

کریڈٹ: انڈیپنڈنٹ نیوز پاکستان-آئی این پی

سیالکوٹ چیمبر آف کامرس اینڈ انڈسٹری نے حکومت سے مطالبہ کیا ہے کہ وہ تاجروں کی سہولت کے لیے اشیا اور مشینری کی دوبارہ برآمد اور درآمد سے متعلق قوانین پر نظرثانی اور ترمیم کرے، ایکسپورٹ پروسیسنگ زونز پالیسی کے تحت مشینری یا پروسیسنگ پلانٹس کی درآمد پر کوئی ٹیکس یا کسٹم ڈیوٹی نہیں ہے،پاکستان کے ریونیو جنریشن اور زرمبادلہ کو بڑھانے کے لیے پالیسی ایڈجسٹمنٹ کی ضرورت ہے۔ایس سی سی آئی کے پبلک ریلیشنز آفیسر تجم الحسین سچل نے ویلتھ پاک کو بتایا کہ کاروبار کرنے میں آسانی کو یقینی بنانے کے لیے پوری دنیا میں ایکسپورٹ پروسیسنگ زونز قائم کیے گئے ہیںلیکن بدقسمتی سے پاکستان میں صورتحال بالکل مختلف ہے۔ حکومت کی طرف سے لاگو شرائط صورتحال کو مزید خراب کرتی ہیں اور ایکسپورٹ پروسیسنگ زونزعملی طور پر اس مقصد کو پورا نہیں کر رہے ہیں جس کے لیے وہ قائم کیے گئے تھے۔انہوں نے وضاحت کی کہ موجودہ قوانین کے تحت دوبارہ برآمد کے لیے درآمد کی جانے والی مشینری، مصنوعات یا خام مال دو سال کی مدت کے لیے ٹیکس رعایت کے اہل ہیں۔دو سال کی مقررہ حد سے تجاوز کرنے کی صورت میںتمام ڈیوٹیز اور ٹیکس مکمل طور پربشمول متعدد قسم کے اضافی سرچارجز ادا کرنا ہوں گے۔ اس قسم کا قانون دنیا میں کہیں بھی موجود نہیں ہے۔انہوںنے کہا کہ برآمدی یونٹس بنیادی طور پر برآمدات بڑھانے، جدید ترین ٹیکنالوجیز کی منتقلی غیر ملکی براہ راست سرمایہ کاری ، زرمبادلہ کمانے اور روزگار کے مزید مواقع پیدا کرنے کے لیے قائم کیے گئے ہیںجن کی وضاحت غیر ملکی تجارتی پالیسی کے تحت ایسی اکائیوں کے طور پر کی گئی ہے جو سامان، خدمات اور دیگر امداد سمیت اپنی پوری پیداوار برآمد کرتے ہیں۔

ڈومیسٹک ٹیرف ایریا کی صورت میںجائز فروخت میں اچھی مینوفیکچرنگ، ریپیئرنگ، ری انجینئرنگ، رینڈرنگ اور ری کنڈیشننگ جیسی سرگرمیاں شامل نہیں ہیں۔ایس سی سی آئی کے ترجمان نے بتایا کہ ایکسپورٹ پروسیسنگ زونز پالیسی کے تحت مشینری یا پروسیسنگ پلانٹس کی درآمد پر کوئی ٹیکس یا کسٹم ڈیوٹی نہیں ہے۔ گو کہ حکومت پاکستان کی جانب سے یہ ایک اچھا اقدام ہے لیکن جب وہی مشینری ایکسپائر یا اپ گریڈیشن کی صورت میں دوبارہ درآمد کی جاتی ہے تو پاکستان کسٹمز کی جانب سے پوری ڈیوٹی کا مطالبہ کیا جاتا ہے۔ انہوں نے کہا کہ اس مسئلے پر پالیسی سازوں کی فوری توجہ کی ضرورت ہے۔تجمل نے کہا کہ تاجروں کو باقاعدگی سے درپیش مشکلات سے بچنے کے لیے فوری توجہ کی ضرورت ہے۔ انہوں نے کہا کہ حکومت کو ملک میں تیزی سے صنعتی ترقی کو یقینی بنانے کے لیے تاجروں کو سہولت فراہم کرنی چاہیے۔صنعت معیشت کو مضبوط بنیادوں پر رکھنے کا ایک مضبوط طریقہ کار ہے۔ برآمدات میں اضافہ صنعتی شعبے کو پھلتا پھولتا رہتا ہے۔ انہوں نے مزید کہا کہ پاکستان کے ریونیو جنریشن اور زرمبادلہ کمانے کے بہا وکو بڑھانے کے لیے پالیسی ایڈجسٹمنٹ کی ضرورت ہے۔سیالکوٹ چیمبر آف کامرس اینڈ انڈسٹری نے پالیسی سازوں کی توجہ درآمد کنندگان اور برآمد کنندگان کو درپیش دو اہم مسائل کی طرف دلانے کی کوشش کی اور دوبارہ برآمد کی حد اور برآمد پر مبنی یونٹ کی پالیسیوں میں تبدیلی کا مطالبہ کیا۔

کریڈٹ: انڈیپنڈنٹ نیوز پاکستان-آئی این پی